Во дни у́бо Неро́на царя́ Ри́мскаго, гоне́ние ве́лие подви́жеся на христиа́ны. По муче́нии же у́бо святы́х и верхо́вных апо́столов Петра́ и Па́вла, приле́жно иска́ху сих учени́к. Тогда у́бо свята́я Фоти́ния со Иоси́ем сы́ном свои́м, в Карфаге́не Африки́йстем су́щи, пропове́дающи Ева́нгелие Христо́во со дерзнове́нием. Ви́ктор же сын ея́ старе́йший, вельми́ му́жествова в бра́ни, тогда́ у́бо ва́рваром на ри́мляны воева́вшым. Посе́м во Иттали́ю воево́дою по́слан быв царе́м, вся та́мо су́щыя христиа́ны м́учити. Севастиа́н же дукс слы́шав сия́ рече́: Вем аз изве́стно о́ воево́до христиани́на тебе́ бы́ти, и твою́ ма́терь, со Иоси́ем бра́том твои́м, Петру́ после́дствующих. Повеле́нное же у́бо тебе от царя́ не сотвори́, да не душе́вно поги́бнеши. И рече́ Ви́ктор: Аз небе́снаго Царя́ и безсме́ртнаго Христа́ Бо́га на́шего во́лю твори́ти хощу́. Неро́на же царя́ повеле́ние е́же о сем, небрегу́, е́же христиа́ны му́чити. Дукс же отвеща́, я́ко и́скреннему дру́гу своему́ сове́тую ти: А́ще бо приступи́ти на́чнеши приседе́ти, и по нахожда́емы христиа́ны опыту́еши и му́чиши, то царю́ угоди́ти и́маши, и христиа́нская име́ния притя́жеши себе́. Но и ма́тери и бра́ту твоему́ объяви твои́м писа́нием, да не дерзнове́нно уча́т е́ллины, оте́ческих отмета́тися служе́ний, но о́тай име́йте, я́же в Христа́ ва́шего ве́ру, я́коже хо́щете, да и ты тех ра́ди не постра́ждеши с ни́ми ра́вно. Ви́ктор же рече́: Не бу́ди мне сего́ сотвори́ти, и не то́чию же се, но ни помы́слити сего́ хощу́, да аз му́чу христиа́ны, или́ возму́ что от них: или́ сове́товати ма́тери, или́ бра́ту моему́, е́же не пропове́дати, я́ко Христо́с Бог есть. Но и аз у́бо па́че пропове́дник Христо́в, и есмь и бу́ду, я́коже и они́. Севастиа́н же к нему́ глаго́ла: О́ Ви́кторе, вси познава́ем о зле, е́же и́мать бы́ти вам. И се рек разже́гся лице́м, и паде́ на зе́млю, от зе́льныя и вели́кия и лю́тыя боле́зни о́чию свое́ю, и безгла́сен пребы́сть. Похвати́вше же его́ предстоя́щий наро́д, и положи́ша на одре́, и пребы́сть три дни, весма́ не проглаго́лав. По тре́тием же дни возопи́ гла́сом велиим глаго́ля: Еди́н Бог христиа́нский, и еди́на ве́ра и́стинная христиа́нская, и еди́но креще́ние, во и́мя Отца́ и Сы́на и Свята́го Ду́ха. И несть ины́я ве́ры, ра́зве тоя́. Вшед же к нему́ Ви́ктор, и рече́: Что та́ко напра́сно преложи́лся еси́? Он же рече́: Призыва́ет мя Христо́с твой, о́ сладча́йший Ви́кторе. И а́бие поуче́н бы Ви́ктором и крести́ся. И взы́де от воды́, и внеза́пу прозре́, и просла́ви Бо́га. Ви́девше же наро́ди пресла́вное сие чу́до, убоя́шася, еда́ ка́ко и ти́и та́ковая же постра́ждут не ве́рующе, и прише́дше крести́шася. По сих же до́йде в слух се Неро́ну, я́ко Ви́ктор воево́да Иттали́йский, и Севастиа́н того́же гра́да дукс, пропове́дают пропове́дание Петра́ и Па́вла и всех к себе́ приво́дят после́дствовати к пропове́данию их. Но и стратила́това ма́ти Фоти́ния, со Иосием сы́ном свои́м, и́же в Карфаге́н по́сланыя, такова́я же творя́т. Сия слы́шав царь, и я́ростию разже́гся, посла́в и́ны во́ины во Иттали́ю, во еже привести́ та́мо су́щыя христиа́ны, му́жы и жены́. Яви́ся же Христо́с всем глаго́ля: Прииди́те ко Мне вси тружда́ющиися и обремене́нии, и Аз поко́ю вы, я́ко Аз с ва́ми есмь. и побежде́н бу́дет Неро́н, и и́же с ним. И Ви́ктору рече́: Отсе́ле у́бо Фоти́н бу́дет и́мя твое́. Мно́зи бо тобо́ю просвети́вшеся прии́дут ко Мне. Севастиа́на же ели́ко укрепи́ слов́ом на муче́ние, рек: Блаже́н он а́ще до конца́ подви́гнется. Сия́ ре́кшу Го́споду, взы́де на небеса́. Объяви́ же и святе́й Фоти́нии, о хотя́щих ей сбы́тися. И воздви́гшися же от Карфаге́на со мно́гими христиа́ны, до́йде в Вели́кий Рим, и потрясе́ся весь град, глаго́люще: Кто есть сия́? Она́ же со дерзнове́нием пропове́да Ева́нгелие Христо́во. Приведе́н же бысть и Фоти́н сын ея́, и́же бя́ше пре́жде Ви́ктор, с Севастиа́ном, и во́ины. Свята́я же Фоти́ния предвари́вши, предста́ Неро́ну, со Иоси́ем, и и́же с су́щыми с не́ю. Рече́ же Неро́н к ней: Что придо́сте к нам? Свята́я же рече́: За е́же научи́ти тебе́ Христа́ чести́. Предстоя́щии же реко́ша к царю́: Севастиа́н дукс, и Ви́ктор воево́да, и́же бого́м не ве́руют, приидо́ша от Иттали́и. И рече́ царь: Да приведе́ни бу́дут ко мне. Приведе́ным же им, рече́ к ним царь: Что е́же о вас слы́шах? Святи́и же реко́ша: Ели́ка о нас слышал еси́ о́ царю́, и́стинна суть. И воззре́в на святы́я жены́ Неро́н, рече́ к ним: Отрече́теся ли и вы Христа́ своего́, или́ глаго́лете зле что умре́ти Зань? И па́ки рече́ к ним: Что ли, и ка́ко ли нари́четеся? Свята́я же отвеща́вши рече́: Аз убо от Христа́ Бо́га моего́, Фоти́ния наречена́ бых: сестры́ же моя́, и́же со мно́ю. Пе́рвая нари́чется Анафло́рия: втора́я Фо́та: тре́тия Афоти́да: четве́ртая Парасќева: пя́тая Кириаки́я. Сы́нове же мои́: пе́рвый Ви́ктор, и́же Го́сподем Фоти́н нарече́н бысть: вторый же Иоси́я. И рече́ к ней Неро́н: Вси у́бо вы совеща́стеся му́чени бы́ти, и о Назаре́и Христе́ умре́ти. Свята́я же рече́: Того́ у́бо ра́ди умре́ти вси мы ра́дующеся и веселя́щеся убедихомся и жела́ем. Тогда́ повеле́ царь млаты́ желе́зными сокруши́ти соста́вы персто́м их. Принесе́не же бы́вши накова́льне, и положи́ша святы́х нечести́вии мучи́тели ру́це на накова́льну, и нача́ша би́ти, от тре́тияго у́бо часа́, да́же и до девя́таго, три́жды измени́шася бию́щии их. Святии же весма не вменя́ху му́ки. И слы́шав царь Неро́н смяте́ся, и повеле́ ру́це и́ма отсещи́. И а́бие мучи́тели и́мше же́стоко святы́я, и ру́це им связа́вше, и на накова́льну возло́жше: и се́чива подъи́мше, и на ру́це святе́й Фоти́нии седмери́цею трие́ слуги́ изменя́ющеся ударя́ху секу́ще, и не успе́ша ничто́же: но изнемо́гше падо́ша я́ко ме́ртвы. Свята́я же невреди́ма бы́вши Христо́вою благода́тию. И моля́шеся глаго́лющи: Госпо́дь мне Помо́щник, и не убою́ся что сотвори́т мне челове́к. Нача́т же царь от недоуме́ния тужи́ти, я́ко да бы ко́зньми не́которыми святы́я му́чити, и сих в глубо́кую темни́цу отвести́ повеле́. Святу́ю же Фоти́нию с пятию́ сестра́ми ея́ отвести́ в златоку́клия своя́. И повеле́ дще́ри свое́й Домни́не пребыва́ти с ними. Свята́я же научи́ ве́ре Христо́ве дщерь царе́ву со стом рабы́нями ея́, и крести́шася. И волхва́ не́коего да́вшаго им бы́лие смертоно́сное пи́ти, в ве́ру приве́дше. Посем же мно́ги му́ки претерпе́. По трех же ле́тех, раба́ име́я царь от своея су́ща пола́ты в темни́це затворе́на, повеле́ того́ ипусти́ти. Да яко ви́деша по́слании от царя́ святы́я здра́вы, пове́даша ему́: я́ко ослепле́нии галиле́яне, ви́дят царю́, и здра́вы у́бо суть. Но и темни́ца просвети́вшися, и благоуха́ния премно́га испуща́ют, яќо преложи́вшуся во сла́ву Бо́жию, и в дом святы́й. И бога́тство у́бо посреде́ темни́цы кипя́щися, иде́же сти́чутся лю́дие к ним, и креща́ются от них ве́рующии в Бо́га их. Сия у́бо слы́шав царь, ужасе́ся. И посла́в приведе́ их пред себе́, и рече́: Не запове́дах ли вам ца́рским повеле́нием не проповедати Христа во гра́де Ри́мстем, ка́ко у́бо в темни́це су́ще таково́е творите́? Сего́ ра́ди мно́ги и велики наложу́ на вы му́ки. Святы́я же реко́ша: Е́же у́бо хо́щеши твори́ти, твори́. Мы Христа́ И́стиннаго су́ща Бо́га и Творца́ у́бо вся́ческим, пропове́дати не преста́нем. И о сем я́ростию разгоре́вся царь, повеле́ распя́ти их стремгла́в и по три дни би́ти по телесе́м их жи́лами, до́ндеже рече́, отделя́тся соста́вы их. Тому́ же у́бо бы́вшу. Посе́м и стра́жи поста́ви, повеле́ их блюсти́ за четы́ре дни вис́ящих. В четве́ртый же день прише́дше слуги́, ви́дети их а́ще жи́ви суть. Да я́ко у́бо ви́деша их ви́сящих, сами а́бие ослепо́ша. А́нгел же Бо́жий сни́де с небесе́, и отрещи́ святы́я, и целова́в я́, и здра́вы их сотвори́. Тогда́ свята́я о ослепле́ных слуга́х умилосе́рдившися, помоли́ся, и а́бие прозре́ша. И ве́ровавше, крести́шася во имя Христа Бо́га на́шего, и после́доваша святы́м. Слы́шав же сия скве́рный Неро́н, и разгне́вася окая́нный зе́льным разжже́нием: повеле́ со святы́я Фоти́нии ко́жу одра́ти. И тому́ бы́вшу, поя́ше свята́я: Го́споди, искуси́л мя еси́ и позна́л мя еси́, Ты позна́л еси́ седа́ние мое́, и воста́ние мое́. Ты разуме́л еси́ помышле́ние мое́ издале́че. Отдра́вше же ей ко́жу, и вверго́ша ю́ в реку́. Севастиа́на же и Фоти́на и Иоси́ю и́мше, и подколе́нныя их жи́лы отре́заша с лы́сты, псом поврего́ша. И отдра́ша ко́жие глав их. И по одра́нии повеле́ царь вве́ргнути в ве́тхую баню. Пять же сестр святы́я Фоти́нии предста́вльше, отре́заша сосцы́ им. Пото́м и тем содра́ша ко́жие. Доше́дшым же им на святу́ю Фоти́нию, и не восхоте́ она́ ники́м я́та бы́ти я́коже про́чия: но сама́ ста́вши, и до́блествено отдра́ сама́ свою́ ко́жу, и ве́рже на лице́ Неро́ново: я́ко у́бо и царю́ уди́вльшуся му́жеству ея́ и терпе́нию. И па́ки другу́ю му́ку помы́сли навести́ на ню вселю́ту и па́губну. Внутрь своего́ садо́вия, два дре́ва ну́ждею склони́ти, и к те́ма повеле́ за но́зе святу́ю привяза́ти. И пусти́вше та́я, расторго́ста святу́ю. И та́ко Бо́гу предаде́ святую свою́ и блаже́нную ду́шу. Тогда́ злостра́стный Неро́н, повеле́ мече́м всех сконча́ти. Блаже́нную же Фоти́нию от студенца́ извле́к, в темни́цу всади́, и пребы́сть два́десять дний. Пото́м предста́вль вопроси́ ю́, еда́ раска́явшися покори́тся, е́же пожре́ти бого́м? Свята́я же плю́нув на лице́ ему, и посмея́вся бу́ести его́, и безу́мному ра́зуму глаго́лющи: Всескверна́вый сле́пче, толи́ко ли мя неразу́мичну твори́ши, ле́стьче и безу́мне, е́же отврещи́ся ми своего́ Влады́ки Христа́, и пожре́ти подо́бным тебе́ слепы́м бого́м. Сия́ же слы́шав царь, повеле́ воврещи́ ю́ в студене́ц. И сему́ бы́вшу, свята́я оста́ви ду́шу Бо́гу. Вене́ц нося́щи, и ве́чно лику́ющи со все́ми страда́вшыми с не́ю в небе́сном Ца́рствии.