Нищелю́бие и страннолю́бие, две ве́тве есте́ ма́сти ма́сличныя, е́юже плод умаща́ет вся. От нею́же помазу́ет Си Госпо́дь гла́ву и но́зе, и возда́ст помазу́ющему Царство небе́сное. И́стый бо нищелю́бец, слу́шает глаго́лющаго: Ми́лостыня и ве́ра не оставля́ет тебе́, Привяжи́ же я́ свое́й вы́и, и обря́щеши благода́ть, и промышля́й до́брая пред Го́сподем и челове́ки. И путие́ пра́ведных то́чно све́ту сия́ют, предъи́дут и просвеща́ют, до́ндеже испра́вит день. Запове́дает же и зако́н глаго́ля: Отверза́я отве́рзи ру́це твои́ убогому, да не возопие́т на тя к Богу. При́точник же: Живота́ ни́щаго не лиши́, и души́ а́лчны не оскорби́, и не ми́мо иди́ дая́ния тре́бующаго. Бра́та скорбя́ща не отре́й, ни отвраща́й лица́ твоего́ от ни́щаго. И па́ки: Души́ свое́й бла́го твори́т муж ми́лостивый, гу́бит же свое́ те́ло неми́лостивый. И проро́к Иоси́я: Се́йте, глаго́ля, в пра́вду, и ми́лость и суд храни́те: и приближа́йтеся к Бо́гу своему́ при́сно. Дании́л Навуходоно́сору рече́: Сове́т мой да бу́дет ти го́де царю́, грехи́ твоя́ ми́лостынями очи́сти, и непра́вды твоя́ ще́дротами ни́щих. Дави́д же: Расточи́, даде́ убо́гим, пра́вда его́ пребыва́ет в век ве́ка. Лю́бит ми́лостыню и суд Госпо́дь. Блаже́н разумева́яй на ни́ща и убо́га, я́ко в день лют изба́вит его́ Госпо́дь. И́ов же рече́: Еда́ оста́вих кого́ из две́рий мои́х изы́ти не́дром тщимь? И ин: Приклони́ у́хо твое́ к ни́щему: и́же бо дает ни́щему, не оскуде́ет. И па́ки: Ели́ко и́мать рука́ твоя́ твори́ти, и ели́ко же си́ла ти есть, твори́. Души́ бо свое́й бла́го твори́т муж ми́лостив, и благослове́ние Госпо́дне на главе́ даю́щих. Избавле́ние души́ му́жу, свое́ его́ бога́тство. Ми́лостынями и ве́рою очища́ются греси́. И ми́луяй ни́ща, взаи́м дае́т Бо́гу, подая́нию же его́ возда́стся ему́. Добро́ у́бо есть от своего́ труда́ я́же Госпо́дь подае́т, всем лиша́емым подая́ти простра́нно: ничто́же сумня́ся, кому́ дам, кому́ ли не дам. Всем бо Бог дая́ти вели́т от свои́х трудо́в, а не разсмотря́ти, кому́ даст, кому́ ли не даст. Слу́жба бо сия́ препро́ста сверши́тся, сла́вна бо есть от Бо́га, но тако про́сто служи́ти Бо́гу, и жив бу́дет. Велий бо челове́к, и драг муж ми́лостив. Апо́стол же: Се́яй щадя́, щадя́ и пожне́т. И се́яй о благослове́нии, о благослове́нии и пожне́т. И наво́дит: Македо́ния бо и Аха́ия благоволи́ша обще́ние не́кое к ни́щым сотвори́ти святы́м, и́же во Иерусали́ме. Госпо́дь же: Продади́те име́ния ва́ша, и дади́те ми́лостыню, и сотвори́те себе́ влага́лища неветша́юща, и сокро́вища неоскуде́ема на небесе́х. Иде́же бо сокро́вища ва́ша, та́мо бу́дут и сердца́ ва́ша.