Бра́та два́, во вре́мя гоне́ния, я́та бы́ста прия́ти му́ку, име́яста же вражду́ между́ собо́ю. И затвори́ша я́ в темни́це, и му́чиша ею́. Пока́яв же ся еди́н ею́, глаго́ля дру́гу своему́, смири́мася, еда́ у́тре у́мрема, и оти́дема к Бо́гу. О́н же не хотя́ше сего́. Во у́трий же де́нь изведо́ша я́ усе́кнути. Да и́же с бра́том не смири́ся и греха́ не отда́, отве́ржеся Христа́. А друга́го усе́кнуша во и́мя Христо́во ве́рующа. Глаго́ла же мучи́тель отве́ргшемуся Христа́, почто́ вчера́ не отве́ржеся, да бы́ ра́н не прия́л. О́н же отвеща́ ему́, егда́ оста́вих Бо́га моего́, и не смири́хся с бра́том мои́м, тогда́ оста́ви мя́ Си́ла Бо́жия и по́мощь, и на́г бы́х от Нея́. И сего́ ра́ди отверго́хся Его́. Да се́ ве́дуще бра́тие смиря́йтеся и в любви́ пребыва́йте, да зде благоуго́дно пожи́вше, ве́чных бла́г прича́стницы бу́дем. Бо́гу На́шему сла́ва, ны́не и при́сно и во ве́ки веко́в.