Не осужда́йте рече́, да не осужде́ни бу́дете. Се́ бо мно́ги слы́шах глаго́лющя, го́ре мне́, ка́ко могу́ спасти́ся, пости́тися не могу́, и е́же не спа́ти бы, не бо́др е́смь. Де́вствовати не могу́, ми́ра отлучи́тися не терплю́, ми́лостыни не и́мам, не ве́м ка́ко спасу́ся. А́з ти́ глаго́лю, оста́ви, и оста́вит ти ся. Прости́, и проще́н бу́деши. Не осужда́й, да не осужде́н бу́деши. Си́ми мо́жеши спасти́ся. А́ще име́ния не и́маши зде́, ни телесе́ мо́жеши труди́ти, не осуди́ у́бо, а́ще и свои́ма очи́ма ви́диши согре́шьша кого́. Еди́н Судия́ е́сть Бо́г, и́же возда́ст кому́ждо по де́лом. Судя́й бо чюжы́я грехи́, Христу́ проти́вник е́сть, и анти́христ нарече́тся, я́ко су́д Христо́в восхища́ет. Не су́дим бра́тие вся́кому согре́шьшему, да просты́ню от Бо́га прии́мем на́шым согреше́нием. А́ще еси́ ви́дел кого́ согреши́вша, но не ве́си ка́ко житие́ пре́йдет. Разбо́йник у́бо о́н со Иису́сом распя́тый человекуби́йца бе́, а Ию́да апо́стол бе́ Иису́сов. Разбо́йник же вни́де в Ца́рство, а учени́к в па́губу. А́ще и ви́диши кого́ согре́шьша, но не ве́си его́ добродея́нии. Мно́зи бо согреши́ша я́ве, о́тай же пока́яшася. И мы́ грехи́ и́х ви́дим, а покая́ния не ве́мы. Те́м же бра́тие не осужда́ем никого́же, да не осужде́ни бу́дем. Па́че же иере́я да не осужда́ем, а́ще и ви́дим и́ что́ сотво́рша. И не рци́ я́ко гре́шен е́сть, и не досто́йне слу́жит. Но приступи́ с чи́стою со́вестию, и причасти́ся Боже́ственных Та́ин, да Святы́ню получи́ши. А́ще бо и а́нгел е́сть принося́ Безкро́вную Же́ртву, а ты́ не досто́йне прихо́диши. То́ ника́коже тебе́ и а́нгел от гре́х очи́стит. И́стинною у́бо о Ию́де послушеству́ет, я́ко от Пречи́стою Ру́ку Влады́ки Христа́, Пресвяты́й Хле́б прия́т, и а́бие вни́де во́нь сатана́ за недосто́иньство его́. Се́ ва́м изве́стно да е́сть, я́ко а́ще неосужда́ет кто́, не осужде́н бу́дет. И о се́м мно́зи послушеству́ют. Му́ж не́кто чернори́зец в ле́ности житие́ пре́йде, разболе́ же ся к сме́рти. И прише́дшу ему́ к после́днему издыха́нию, ника́коже не стужи́ си́, но благодаря́ше. Еди́н же от седя́щих у него́ вели́ких оте́ц рече́ ему́ глаго́ля, бра́те ими́ ми ве́ру, я́ко отне́ле же еси́ мни́хом, вси́ ви́дехом тя́, я́ко в ле́ности еси́ и в небреже́нии житие́ свое́ сконча́л. Отку́ду таково́ беспеча́льство в стра́шный ча́с и́маши. К си́м бра́т отвеща́, вои́стину честни́и отцы́ в ле́ности е́смь житие́ свое́ сконча́л. Но отне́ле же ми́ра отверго́хся, и бы́х мни́х, не осуди́х никого́же от челове́к, и никому́ зла́ сотвори́х. И ны́не принесо́ша а́нгелии Бо́жии рукописа́ние мои́х гре́х. И соверши́лося на мне́ Госпо́дне сло́во е́же рече́, не осужда́йте и не осужде́ни бу́дете, оста́вите и оста́влю ва́м, и расте́рзано бы́сть рукописа́ние мои́х гре́х. Да се́ с ра́достию иду́ и с беспеча́лием к Го́сподеви моему́. Я́ко се́ бра́т отце́м изрече́, и в то́м часе́ предаде́ ду́х, мно́гу по́льзу все́м сотвори́в. Се́ же слы́шаще бра́тие, потщи́мся не осужда́ти, ни по́мнити зла́, да Госпо́дь Бо́г не осу́дит ны́, и не воспомяне́т прегреше́ний на́шых.