Це́рковь у́бо небе́снаго жили́ща ме́сто есть, уче́нием и моли́твою. Ны́не же це́рковь, ничи́м же у́ньши то́ргу, и хра́ма цатои́мец. Жены́ бо сбира́ются в це́ркви крася́щеся, да прельстя́т безу́мныя. А́ще кто хо́щет по́вести глаго́лати, и мню ино́го ме́ста не и́мут обрести́ повесте́м, ра́зве це́ркви. А́ще же кто хо́щет ку́плю твори́ти, в це́ркви же твори́т. А́ще ли кто свари́тися хо́щет, или́ строе́ния домо́вная глаго́лати, или́ во́иньския чи́ны слы́шати, или́ суд, или́ каки́я врачьбы́, то вся си в це́ркви соверша́ют. Те́мже по вся дни ту́жим о сем, и печа́луем, да бы есмы́ блага́я обрели́ в це́ркви. Но си́це обрето́х вы, на па́кость и на грех сходя́щася, и глаго́люща в це́ркви, о гресе́х же не печа́лующася, но и кро́тким па́коствующа глаго́лании свои́ми. Но глаго́леши не разуме́ю, что глаго́лют словеса́, или́ о чем чтут. Повеству́еши бо в це́ркви, а не стои́ши со стра́хом, и того́ ра́ди не разуме́еши. Виждь ка́ко он скопе́ц, на пути́ сый кни́ги чтя́ше. А ты посреде́ учи́тель стоя́, вину́ твори́ши глаго́ля, не ве́де, ни разуме́ю. Тем моли́ся Го́сподеви, да разуме́еши я́. Подоба́ет же ти молча́ти в це́ркви, да Бог прии́м твое́м молча́ние, и ти́хость ра́зума сотвори́т. Не мо́жеши ли молча́ти, то изы́ди из це́ркве, да не ине́м бу́деши на па́кость. Еди́ному бо подоба́ет гла́су бы́ти в це́ркви то́кмо, е́же пе́нию и моли́тве во вре́мя церко́внаго собра́ния, а не плищева́нию, е́же друг с дру́гом бесе́довати и не внима́ти чте́нию. И сам бо епи́скоп молчи́т, а певцы́ единогла́сно пою́т. Почто́ у́бо и́стину оста́вльше, и стень и со́ния го́ните. Тем молю́ вы свободи́теся от вра́жия де́тели. И от злоб ва́шых изба́витеся. И за мздоима́ние, ми́лостыню возлюби́те. За не́нависть же, братолю́бие. И та́ко творя́ще, и ны́нешних благ и бу́дущих насладите́ся, о Христе́ Иису́се Го́споде на́шем. Ему́же сла́ва и держа́ва, со Отце́м и со Святы́м Ду́хом ны́не и при́сно и во ве́ки веко́в.