Рече́ а́вва Иса́ия: бога́тый до́бре смы́сля кры́ет внутрь хра́ма сокро́вища своя́. Сокро́вище явля́емо оскудева́ет, и от князь наве́туется. Си́це и мних смиреному́др и доброде́телен, таи́т своя́ доброде́тели, я́коже он своя́ сокро́вища. И не твори́т своя́ хоте́ния, но на всяк час себе́ укоря́ет и себе́ та́йному поуча́ет поуче́нию по пи́санному: «Согре́яся се́рдце мое́ во мне, и в поуче́нии мое́м разгори́тся огнь». Кото́рый огнь? Слы́шите писа́ние глаго́лющее: «И́бо Бог наш Огнь пояда́яй есть». Я́коже бо огнь та́ит воск, и искуша́ет ти́ну скве́рных нечистот: си́це и сокрове́нное поуче́ние искуша́ет скве́рныя помыслы, и увяда́ет душе́вныя стра́сти, и просвеща́ет ум, и я́сну твори́т мысль, и ра́достно твори́т се́рдце. Та́йное поуче́ние уязвля́ет бе́сы, и отгоня́ет злы́я по́мыслы. И́бо вну́тренняго челове́ка просвеща́ет, и укрепля́емь есть от а́нгел, и сла́вимь есть от челове́к. Та́йное поуче́ние и чте́ние, дом есть души́ непрохо́ден, и столп неподви́жимь, и приста́нище ти́хо, и немяте́жно, и недви́жимо ду́шу спаса́ет. Мно́го смуща́ются и мо́лвят бесове, егда́ и́нок вооружа́ет себе́ та́йным поуче́нием, е́же есть сице: «Го́споди Иису́се Христе́ Сы́не Бо́жий, поми́луй мя», и прочита́нием и́же наеди́не. Сокрове́ное поуче́ние, зерца́ло есть уму, и свети́льник со́вести. Сокрове́ное поуче́ние изсуша́ет блуд, украща́ет я́рость, отгоня́ет гнев, отъе́млет го́ресть, отрева́ет напра́снство, та́ит уны́ние. Сокров́еное поуче́ние просвеща́ет влады́чное ума́, отго́нит ле́ность. Сокрове́ное поуче́ние ражда́ет умиле́ние, и вселя́ет в тя страх Бо́жий, и прино́сит сле́зы. Сокрове́ное поуче́ние, хода́тай быва́ет мни́ху, смиреному́дрию неле́стному, и бде́нию благоумиле́ну, и моли́тве несму́тне. Сокро́вище моли́твеное отгоня́ет скве́рныя по́мыслы, и ра́нит бе́сы, и очища́ет те́ло. Сокрове́ное поуче́ние, долготерпе́нию учи́т, воздержа́нию прича́стник, гее́нну возвеща́ет. Сокрове́ное поуче́ние, ума́ неглу́мна соблюда́ет, сме́рти помышля́ти устроя́ет. Сокрове́ное поуче́ние вся́кого бла́га де́ла испо́лнено есть, и вся́кою доброде́телию укра́шено есть, и вся́каго скве́рнаго де́ла удале́но есть, и не́где дале́че отстои́т.