Сей бя́ше от Филаде́льфии Арави́тския, иде́же дре́вле нарица́шеся Ема́н. Зи́на же бя́ше слуга́ жела́я же Христа́ ра́ди быва́емаго муче́ния получи́ти. Святы́й же Зино́н разда́в все име́ние свое́ ни́щым, и рабы́ свобо́дою поче́т при иге́моне Максимиа́не, и́же бя́ше при Максимиа́не царе́. Слы́шав же я́ко мно́гу честь и́долом твори́т, прии́де к нему́ со слуго́ю Зи́ном, и́бо Зи́на та́ко изво́ли, не восхоте́ оста́ти господи́на своего́, но и́де с ним. И я́влься иге́мону святы́й Зино́н, и я́ко того́ к су́етным бого́м тща́щася ви́де, и о слу́жбе и́дольстей прилежа́ща, обличи́в его́. Он же а́бие волу́ями жи́лами би́ти повеле́. Бие́мь же святы́й просте́рши ру́ку, и лакты́ удари в сте́ну ка́пища, и разори́в его́ и низложи́. Того́ ради повешен, и стро́ган неми́лостивно, и о́цтом и со́лию по ра́нах тромь, в кла́де но́зе заби́вши четы́рьми кли́ны, иде́же и слузе́ его́ Зи́не вше́дшу и моля́щуся не отрази́ти ни оста́вити его́. Иге́мон же о сем уве́дав, повеле́ и того́ затвори́ти. Внегда́ же на вопроше́ние о́ба приведе́на бы́вша, и Христа́ отврещи́ся не восхоте́вша, бие́ни бы́ша вельми́, и рожны́ желе́зными разжже́ными поджго́ша свято́му Зинону пе́рси и се́рдце. Та́же пове́шен на дре́ве, и огне́м мы́шцы их сожго́ша. И ка́мением по ногу́ отягче́ни, и по сих в ров о́гненный вве́ржени, пла́мени ма́слом покропле́ну, и зане́же пресла́вно невреди́ми бы́ша и сохране́ни, мече́м главы́ ею́ отсеко́ша. Соверша́ется же собо́р ею́ в муче́нии свята́го Гео́ргия, и́же в Липарисси́и.