Егда́ душа́ объя́та бу́дет мно́гими грехо́вными страстьми́, и во глубины́ злых прии́дет, преоби́дит про́чее и мертве́ет на блага́я дела́, и та́ко в после́днее отчая́ние прии́дет. Да а́ще и что лю́бо тогда́ извеща́еши от свята́го Писа́ния на исправле́ние, не прие́млет уве́дению де́ла, но лю́бо му́ки, лю́бо чим запреща́еши боле́ти, пребыва́ет необрати́мо. Госпо́дь Бог наш, не егда́ хо́щем [мы], но егда́ [Он] хо́щет, помага́ет: в я́зях и в беда́х страсте́й избавля́ет, и Свои́ми времены́ я́ко Благ и Человеколюби́вый Врачь коего́ждо подвиза́ющихся исцеля́ет. О́ го́ре привлача́ющих[ся] грехи́ а́ки уже́м, е́же есть прилага́ти к пе́рвому согреше́нию, вторы́я и тре́тия, и я́же пото́м нечи́стая блуже́ния и непра́вды! Подоба́ше бо увя́зшим во гресе́х в собира́ния ме́сто и прилага́ния к злым соплете́нием, разсы́повати грехи́ и истребля́ти. Не согреши́ти бо челове́честей ве́щи не мо́щно. Я́коже несть безпра́ведна на земли́, т́ако и безгре́шна. [Я́коже несть пра́ведна на земли́ и́же сотвори́т бла́го и не согреши́т ]. Мо́щно у́бо от согреше́ний а́бие пременя́ющымся пока́ятися и не собира́ти зла ко злым. Но то у́бо свое́ю воле́ю грехи́ ко грехо́м я́ко у́же плету́ще, и сконча́тися уже́ хотя́щу соплета́ему [у́жищу], па́ки друго́е прилага́ют продолжа́юще и свива́юще. Та́ко у́бо обы́кли [суть] во злых пребыва́ющии. От сего́ же да изба́вит нас Госпо́дь Свое́ю благодатию, Ему́же сла́ва, ны́не и при́сно, и во ве́ки веко́в. Ами́нь.