Стихи́:

Толи́ко огне́м попале́но бысть мно́жество му́ченик,

Ели́ко до дне́шняго дне ме́сяц дний и́мать.

Сия́ бе́ста при Уиггури́фе царе́ го́тфстем, и Иулиа́не, и Гратиа́не, и Уалентиа́не же ри́мских царе́х. Пою́щым у́бо сим в це́ркви христиа́нстей, и Бо́га сла́вящым, посла́в Уиггури́ф, пожже́ це́ркви, и вся су́щыя в них сожже́, три́сте и осмь. А́ще принося́ше просфо́ру христиани́н, и́мше вопроша́ху его́: и а́ще Христа́ испове́дает, во огнь вмета́ху его́, в приноше́ния ме́сто Христо́ви тех бя́ху телеса́. И собира́ше тех мо́щи другаѓо кня́зя жена́, язы́ка го́тфскаго, христиа́на су́щи и правове́рна: Сия́ оста́вльши власть сы́ну своему́, е́мши же попы́, и от ме́ста до ме́ста преходя́щи, прии́де до земли́ Си́рския, и дщи ея́ с не́ю. Посе́м возвести́ сы́нови своему́, прише́дшу ему́, и и́де с ним, оста́вльши мо́щи святы́х у дще́ри. Дщи же прише́дши в Кизи́к, в ца́рство Уалентиа́на и Феодо́сия, и даде́ часть от мощей во гра́де на освяще́ние. А́лла же ше́дши па́ки в го́тфы со Агафо́ном, и ту ка́мением побие́на бы́ста и сконча́стася. Сама́ же последи́ Дукли́да с ми́ром у́спе.