Пове́даше Ула́с, в Диоспо́ле гра́де сотво́ршееся чу́до. Прии́де бра́та ча́до срацы́нскаго царя́ Нунерми́я, не́ким ору́дием. И ви́дев це́рковь свята́го Гео́ргия, обита́ в ней, и вельблу́ды в це́рковь пусти́, не послу́ша возбраня́ющаго ему́ иер́ея христиа́нскаго, вельблуды же вси изомро́ша. Наче́ншу же иере́ю святу́ю Литу́ргию служи́ти, ви́де арави́т, я́ко поп закла́ Де́тище, и источи́ кровь Его́ в поти́р, а те́ло на блю́де раздроби́. И п сконча́нии вси лю́дие пи́ша кровь, а мя́со ядо́ша. Срацы́нин же я́рости и гне́ва испо́лнися. По сконча́нии же Литурги́и, принесе́ ему́ просфору́, и рече́: Приими́ господи́не, сим бо служи́хом Го́сподеви Бо́гу на́шему. Отвеща́в же срацы́нин, и рече́: Си́ми ли окая́нне служи́ши, де́тище закла́л еси́, а те́ло его́ на блю́де раздроби́л еси́, и того́ снел еси́? Презв́итер же поклони́ся, нача́т ему́ глаго́лати: Вели́к еси́ муж ты го́споди мой, я́ко Бог откры тебе́ та́йну, ю́же аз не ви́дех: то́кмо вели́цыи святи́и ви́деша, Васи́лия, Григо́рий, и Иоа́нн Златоу́стый. Вопроси́ же его́ о всем срацы́нин е́же ви́де. И уве́дев от попа́, прии́де в страх Бо́жий, и отве́ржеся срацы́нския ве́ры: и и́де во Иерусали́м, и крести́ся от патриа́рха. И по́слан бысть в Сина́йскую го́ру, и бысть мона́х: жела́ше же му́читися по Христе́. По трех же ле́тех па́ки в Диоспо́ль прии́де. И прише́д в це́рковь свята́го Гео́ргия, пове́дася пре́жнему иере́ю, хотя́ му́читися за Христа́. Он же посла́ и́ в Си́рию, к стры́еви его́, срацы́нскому царю́, рек: пред ним испове́ждь Иисуса Христа́ Сы́на Бо́жия су́ща. Прише́д же во град в не́мже бе стрый его́ ца́рствуяй, и вшед на столп, нача́ зва́ти срацы́ны. О́нем же сше́дшымся рече́ им: Что ми хо́щете да́ти, да пове́м вам, где есть брата́н царе́в. Они́ же пои́мше ведо́ша и́ к царю́. И рече́ царь: А́ще вои́стинну испове́даеши, много зла́та и сребра́ дам ти. Черне́ц же рече́: Аз есмь, но креще́н бых, и ве́рую во Отца́, и Сы́на, и Свята́го Ду́ха: а срацы́нскую ве́ру проклина́ю, и лжи́ваго проро́ка Магме́та. Царь же рече́: Что ти бысть окая́нне, я́ко оста́вил еси́ свое́ бога́тство и до́брую ве́ру срацы́нскую, и скве́рную власяни́цу возде́в на ся прохо́диши? Черне́ц же рече́: Сию́ власяни́цу па́че бога́тства люблю́, а Магме́та проклина́ю. Царь же повеле́ его́ изгна́ти вон. Реко́ша же кня́зи: Не мо́жем сего́ жи́ва ви́дети, прокле́ншаго ве́ру на́шу, и Магме́та поху́ливша. И изве́дше его́ из гра́да, поби́ша его́ ка́мением. И та́ко предаде́ в ру́це Бо́жии дух свой.