Бога́т бе не́кто в стране́ не́коей, и купи́ себе́ село́, об он пол реки́, и призва́ рабы́ своя, и отпусти́ их а́бие: раздели́в им село́, пода́в кому́ждо, я́коже восхоте́. И рече́ им: Да и́дет ко́ждо вас в свою часть, и да де́лает в ней, до́ндеже прише́д ви́жу ва́ше де́ло. Не́цыи же обрето́шася от них благово́льнии и владыколю́бцы, и не преслу́шаша за́поведи влады́ки своего́, но а́бие преше́дше реку́, де́лаху на селе́ господи́на своего́. Друзи́и же от них непослушли́ви суще и жестосе́рди, сопроти́в реко́ша господи́ну своему́, глаго́люще: Мы гла́са твоего́ не послу́шаем, и реки́ не пре́йдем, и на селе́ твоем не де́лаем. О всех же сих не прогне́вася господи́н их, но угото́ва пи́во рабо́м свои́м и упои́в непослушли́выя рабы́, и повеле́в други́м рабо́м превести́ их реку́. И превезо́ша их реку́, и положи́ша их коего́ждо на ча́сти свое́й, ю́же бе дал им господи́н их. И воспряну́в еди́н от них, обре́теся об он пол реки́, лежа на ча́сти свое́й, ю́же бе дал ему́ господи́н его́, и диви́ся о сем. И рече́ в себе́: А́ще та́ко возлюби́л мя есть господи́н мой, отмета́вшуся мне, и не прогне́вася на мя: но преве́зл мя есть долготерпе́нием вели́кую реку́ сию́, и ну́жную, я́ко во сне, и на ча́сти мое́й положи́л мя есть, те́мже у́бо и аз потружда́юся до́бре на селе́ его́, не забыва́я благи́х его́ дея́ний. И нача́т де́лати приле́жно, я́коже пости́гнути ему́ и пре́дния. Посе́м же воспряну́в и други́й раб, обре́теся и той об он пол реки́, на селе́ господи́на своего́: лука́в же сый и лени́в, рече́ в себе́: се реку́ сию́ вели́кую и ну́жную, я́ко во сне преве́зл мя есть, аз же пуст есмь оста́вил виногра́д его́, и узрю́ что хо́щет ми сотвори́ти. И па́ки возле́г у́спе. Спя́щу же ему́ взы́де те́рние, и ди́вия ляди́на покры́ его́. Не по мно́зе же вре́мени прии́де господи́н раб тех, ви́дети коего́ждо де́ло: и ви́дев де́ло пре́жде наче́нших, благослови́ их. И па́ки по том прии́де к рабу́ тому́, его́же бе сам во сне преве́зл, и ви́дев де́ло его́ возвесели́ся о нем и благослови́ его́. Посе́м же прии́де ви́дети лени́ваго раба́ и де́ло его́: и прише́д обре́те его́ спя́ща, те́рнием же и ляди́ною покрове́на. И призва́в его́ с преще́нием рече́: Ра́бе лука́вый, почто пуст еси́ оста́вил виногра́д мой, или́ не ве́си ка́ко тя превезох реку́ во сне, и на твое́й ча́сти положи́х тя, и не помяну́х злобы твоея́, о пе́рвем ти непоко́рстве? Не бе ли тебе́ подоба́ло уподо́битися клевре́том твоим́, имже о́бразом и тех превезо́х реку́? То не те́мже ли тя уподо́бих? Тогда́ ни еди́наго отве́та обря́щет раб он в день стра́шный. Тогда́ господи́н их, сотвори́т кому́ждо по дело́м их.

Толкова́ние: Глаго́лют у́бо бога́таго: Влады́ку, Христа́. Село́ же: ве́ру. Пия́нство же: молву́. Ну́жную же реку́: пре́лесть и бога́тство ве́ка сего. Приле́жныя же рабы́: пра́ведники. А от пия́нства воспряну́вшаго и де́лавша: му́жа гре́шна, и ну́ждею, и иску́сом воспряну́вша, и прите́кша к Бо́гу, и сотво́рша во́лю Госпо́дню. Лени́вый же раб: челове́к отве́ргий благода́ть Госпо́дню, и неради́вый о спасе́нии свое́м. О всех же сих воспомяни Са́вла, ка́ко взем еписто́лию от архиере́й, идя́ше в Дама́ск гони́ти ве́ровавших во Христа́, и искази́ти ве́ру, и обре́теся пропове́дник ве́ре: Мно́ги бо щедро́ты Госпо́дни на всех призыва́ющих Его́ вои́стинну. Тому́ сла́ва во ве́ки. Ами́нь.