Блаже́н у́бо челове́к бра́тие и́же и́мать страх Бо́жий в себе́. Сицевы́й у́бо я́ве Святы́м Ду́хом блажи́мь есть. Блаже́н мужь боя́йся Го́спода, таковы́й бо кроме́ есть сете́й вра́жиих, и вся́кого неприя́зньства сове́та и ла́яния. И́бо име́яй страх Бо́жий в души́, удо́бь отганя́ет от себе́ дия́вола злохи́трца. И ничи́мже его́ плени́т, зане́ бои́тся Го́спода, и по́хоти плотьски́я не прие́млет, ни глуми́тся пусто́шным зде. Ожида́ет бо своего́ Влады́ки, егда́ внеза́пу прии́дет и обре́т не пригото́вившыяся, и разлучи́т без вре́мене от жития́. Име́яй страх Бо́жий в себе́, всегда́ трезви́тся, и сну ле́ностну не вдаст себе́, бдит бо и ожида́ет Го́спода своего́ прише́ствия. Ни обьяда́етжеся, да не прогне́вает своего́ Влады́ки. Но испытова́ет всегда́ себе́, ка́ко уго́дная Бо́гови всегда́ твори́ти, да прише́д Господи́н его́ возвесели́тся о нем и похва́лит его́. Вся́кому бо стяжа́вшему страх Бо́жий, удо́бь бла́га вина́ спасе́ная ве́чней жи́зни быва́ет. Не име́яй же стра́ха Божия в себе́, пови́нен есть таковы́й дия́волим начина́нием, и глуми́тся с похотми́ сумня́ся. Спит без числа́ от уны́ния, и о гресе́х свои́х не ради́т, вмести́лище быва́ет похоте́м, зане́ все не подо́бно сло́во и жите́йское виде́ние в нем есть, и не бои́тся прише́ствия Влады́чня, ни помышля́ет о сме́рти свое́й. Сицевы́й кра́сит страсть, поко́ю ра́дуется, озлобле́ния бе́гает. Смире́ние же ме́рзит ему́, горды́ню лю́бит. Про́чее же внеза́пу прии́дет Господи́н его́, и обря́щет его́ во всех не гото́ва я́же уго́дна ему́ суть, и разлучи́т и́ неми́лостивно, и по́слет и во тму кроме́шнюю. И кто у́бо не опла́чет такова́го. Поне́же у́бо безконе́чным му́кам пре́дан бысть, иде́же несть избавля́ющаго, ни поми́лующаго. Сего́же у́бо бра́тие вси потщи́мся убежа́ти зла, творя́ще во́лю Бо́жию во стра́се, да сподо́бимся и мы вни́ти в ра́дость Го́спода своего́, ю́же обеща́ творя́щым во́лю Его́.