Молю́ у́бо вы ча́да, Го́спода ра́ди смире́ние люби́те, зане́же и сам смири́ся Госпо́дь нас ра́ди до сме́рти и распя́тия. Те́мже и вы у́бо бу́дите подо́бни Ему́. И та́ко победи́м го́рдость дия́волю свои́м смире́нием. И́бо Госпо́дь смире́ния де́ля рече́, и́же хо́щет вя́щший бы́ти в вас, то бу́ди всех мний, и всем слуга́, и всем раб. И́же бо а́ще вознесе́тся, то той пони́зится, а смиря́яй себе́, вознесе́тся, и вся хотя́щая ему́ да сокруша́тся зла́я. Вы́сяй бо ся и́дет в пре́дняя а́ду в бе́здну о́гненую. Молю́ же вы у́бо ча́да послуша́ние стяжи́те без прекосло́вия. Послуша́ние бо жи́зни ве́чней ма́ти есть, преслуша́ние же ма́ти поги́бели. Зане́же послуша́нием и смире́нием вни́дем в Ца́рство небе́сное, и жизнь ве́чную насле́дуем.