Мѣ́сѧца септе́мврїѧ в̾ пе́рвый де́нь. начѧ́токъ і҆нди́ктꙋ, ре́кше но́вомꙋ лѣ́тꙋ
Стїхѝ:
Хр҃тофо́ръ а҆нѳїпа́та і҆нди́ктомъ бл҃гословлѧ́й но́вомꙋ лѣ́тꙋ,
Ѽле вѣ́тхїй, человѣ́къ ра́ди но́вый:
Вѣ́дѣти є҆́сть, ꙗ҆́кѡ і҆нди́кта пра́зднꙋетъ бж҃їѧ цр҃кви, ѿ дре́внихъ прїи́мши: занѣ̀ мнѣ́ти ѿ ри́млѧнъ начѧ́ткꙋ бы́ти лѣ́тꙋ, и҆ ѿ тогѡ̀ і҆нди́кта, и҆ то ѿ ри́млѧнъ повеле́нїе: Занѣ̀ в̾ таковы́й де́нь вни́ти гдⷭ҇ꙋ на́шемꙋ і҆и҃сꙋ х҃ꙋ̀ в̾ собо́ръ жидо́вскїй, и҆ да́шѧ ємꙋ̀ кни́гꙋ и҆са́їи проро́ка: И҆ раз̾гнꙋ́въ, ѡ҆брѣ́те мѣ́сто, и҆дѣ́же бѣ̀ напи́сано: дх҃ъ гдⷭ҇ень на мнѣ̀, єго́же ра́ди пома́за мѧ̀, бл҃говѣсти́ти ни́щымъ посла́ мѧ̀, и҆ цѣли́ти сокрꙋше́нныѧ се́рдцемъ, проповѣ́дати плѣ́нникѡмъ ѿпꙋще́нїе, слѣпы́мъ прозре́нїе, посла́ти сокрꙋше̑нныѧ во ѡ҆сла́бꙋ, проповѣ́дати лѣ́то гдⷭ҇не прїѧ́тнѡ. И҆ согнꙋ́въ кни́гꙋ, ѿда́сть слꙋѕѣ̀, сѣ́де и҆ ᲂу҆ча́ше ѧ҆̀, глаго́лѧ: ꙗ҆́кѡ дне́сь сбы́стьсѧ писа́нїе сїе́ во ᲂу҆́шїю ва́шею. И҆ дивлѧ́хꙋсѧ наро́ди ѡ҆ словесѝ бл҃года́ти, и҆сходѧ́щыхъ и҆зоꙋ́стъ є҆гѡ̀.
В̾ то́йже де́нь па́мѧть преподо́бнагѡ ѻ҆тца̀ на́шегѡ сѷмеѡ́на сто́лпника
Стїхѝ:
Ѡ҆ста́вль сѷмеѡ́нъ сто́лпное взы́тїе,
Бли́жнее ѡ҆брѣ́те бж҃їѧ сло́ва стоѧ́лище:
Вышехо́децъ сѷмеѡ́нъ, септе́мврїѧ ᲂу҆́мре в̾ пе́рвый.
Сла́вный сѷмеѡ́нъ бѣ̀ ѿ а҆нтїохі́и сѵ́рскїѧ, пасѧ́ше ѻ҆́вцы роди́телю свое́ю. Ѹ҆́праздни́вжесѧ в̾ го́дъ зимы̀, вни́де в̾ цр҃ковь, и҆ свѧта́гѡ є҆ѵа́нгелїѧ послꙋ́шавъ, бл҃жа́ща и҆ хва́лѧща ненави́дѧщыхъ мі́ра, и҆ бг҃а лю́бѧщыхъ: ѡ҆ста́вивъ роди́телѧ и҆ всѐ и҆мѣ́нїе, послѣ́дова хрⷭ҇то́ви: и҆ вше́дъ в̾ ла́ѵрꙋ, глаго́лемꙋю ѡ҆гра́дꙋ, и҆ бы́сть мни́хъ, в̾ ца́рство льва̀ вели́кагѡ. И҆ пребы́сть нѣ́колико лѣ́тъ в̾ то́й ла́ѵрѣ, и҆ всѣ́хъ мни́ховъ до́брыми дѣ́лы преѡдоле́въ. И҆ своѐ тѣ́ло а҆лка́нїемъ и҆ жѧ́ждею и҆ ѡ҆ѕлобле́нїемъ ᲂу҆дрꙋчи́въ: и҆́бо постѧ́сѧ четы́редесѧть дні́й, и҆́хже ᲂу҆́бо два́десѧть стоѧ́ше не сѣда́ѧ, два́десѧть же сѣдѧ́ше ѿ трꙋда̀. Послѣдѝ же взы́де на сто́лпъ высо́къ, на не́мже мно́га чюдеса̀ сотворѝ и҆ вельмѝ ди́венъ бы́сть всѣ́мъ человѣ́кѡмъ. И҆ мно́ги ѿ пога́ныхъ ко гдⷭ҇ꙋ ѡ҆братѝ, четы́редесѧть и҆ се́дмь лѣ́тъ рабо́тавъ є҆мꙋ̀, преста́висѧ, в̾ рꙋ́цѣ є҆гѡ̀ преда́въ дꙋ́шꙋ свою̀, и҆ погребе́нъ бы́сть сла́внѡ.
В̾ то́йже де́нь свѧта́ѧ пꙋльхе́рїѧ цари́ца ми́ромъ сконча́сѧ
Стїхѝ:
Вои́стинꙋ предста̀ ѱало́мски пꙋльхе́рїѧ
Ѡ҆деснꙋ́ю тебѐ цари́ца, хрⷭ҇тѐ мо́й.
Та бѣ́ѧше сестра̀ ѳеодо́сїѧ ма́лагѡ, жена̀ же наречена̀ бы́вши маркїа́на бл҃гочести́вагѡ царѧ̀, ꙗ҆́же и до ста́рости дѣ́вство сохра́ньши. И҆ мно́гаѧ и҆справле́нїѧ ѡ҆ цр҃квахъ и҆ ѡ҆ градѣ́хъ сотворѝ: и҆ є҆́же в̾ халкїдо́нѣ свѧта́гѡ собо́ра бы́ти ᲂу҆гото́вльши, с̾ ми́ромъ почѝ ѡ гдⷭ҇ѣ.
В̾ то́йже де́нь ᲂу҆спе́нїе і҆исꙋ́са наѵи́на
Стїхѝ:
Тече́нїе ᲂу҆ста́вльшемꙋ со́лнечное дре́влѣ,
Про́чее і҆исꙋ́съ со́лнце сла́вное ви́дитъ.
Се́й і҆исꙋ́съ бѧ́ше, сы́н҆ наѵи́н҆, снасто́льникъ мѡѷсе́ѧ законополо́жника є҆ѵре́йскагѡ, и҆́же їерихо́нъ гра́дъ приѧ́тъ, держа́щь и҆ноплеме́нницы. Та́мѡ же и҆ архїстрати́га михаи́ла ви́девъ, держа́ща мечь. И҆ ᲂу҆вѣ́де ꙗ҆́кѡ архїстрати́гъ є҆́сть си́лы гдⷭ҇ни, пове́ргъ ѻ҆рꙋ́жїе, и҆ падѐ предъ нога́ма є҆гѡ̀. Ра́тꙋѧ же и́ноплеме́нницы, и҆ ᲂу҆жѐ со́лнцꙋ хотѧ́щꙋ заитѝ, и҆мѣ́ѧ хра́брство к̾ ра́ти, и҆ помоли́сѧ б҃гꙋ, и҆ речѐ: ꙗ҆́кѡ да ста́нетъ со́лнце ѿ тече́нїѧ своегѡ̀. И҆ ста̀ со́лнце ѿ своегѡ̀ ше́ствїѧ, до́ндеже крѣ́пкѡ побѣди́тъ и҆ноплеме́нницы. Воево́дствова же в̾ лю́дѣхъ, и҆ проведѐ и҆́хъ сквозѣ̀ пꙋсты́ню, и҆ раз̾дѣлѝ и҆́мъ зе́млю ѡ҆бѣтова́ннꙋю, и́же є҆́сть їеросали́мъ. И҆ сꙋди́въ лю́демъ і҆и҃левымъ, два́десѧть и҆ о҆́смь лѣ́тъ. И҆ стра́шенъ в̾ ра́тѣхъ бы́въ. И҆ на мно́гихъ ра́тѣхъ мꙋ́жество своѐ и҆ добродѣ́тель показа̀, и҆ ᲂу҆́мре. И҆ погребе́нъ бы́сть че́стнѡ свои́ми людьмѝ.
И҆́же во ст҃ы́хъ ѻ҆тца́ на́шегѡ і҆ѡа́нна, а҆рхїепи́скопа константи́нѧ гра́да, златоꙋ́стагѡ, сло́во в̾ начѧ́лѣ і҆нди́ктꙋ:
Чю̑дна правосла́вныхъ торжества̑, свѣ̑тлы мꙋ̑ченическїѧ па̑мѧти, непосты̑дна бл҃гочести́выхъ весє́лїѧ, всѧ́кагѡ ѡ҆чища́ютъ досажде́нїѧ на́шегѡ. Не пра́зднꙋемъ лѣ́тꙋ, несоста́внѡ дви́жимꙋ, не почита́емъ годи́нꙋ, человѣ́ческїѧ жи́зни и҆стощи́тельницꙋ, не покланѧ́емсѧ вѣ́кꙋ, в̾ тлю̀ на́съ влекꙋ́щемꙋ, не слꙋ́жимъ тва́ри, сорабо́тна бо бы́вшимъ, не слꙋ́жимъ ти́нѣ, ѿ не сꙋ́щихъ бо предста̀, ꙗ҆́коже бо бытїѐ и҆́мꙋтъ сїѧ̀, си́цѣ и тле́нїе подлежи́тъ кончи́нѣ, не чте́мъ не́бо, ꙗ҆́кѡ ды́мъ бо ᲂу҆тверди́сѧ, не чте́мъ тве́рдь, ѿ не сꙋ́щыхъ бо ледови́днѡ сотвори́сѧ, не почита́емъ свѣ́та, сло́вомъ бо содѣ́тельствовасѧ, не чте́мъ со́лнце, ѿ свѣ́та бо и҆скова́сѧ, не чте́мъ лꙋнꙋ̀, воѡбраже́нїемъ бо ᲂу҆краси́сѧ, не чте́мъ ѕвѣ́зды, потре́бы бо ра́ди созда́шасѧ, не чте́мъ зе́млю, ѿ воды̀ бо призвана̀ бы́сть, не слꙋ́жимъ ѻ҆гню̀, веще́ственъ бо соста́въ, не чте́мъ во́дꙋ, текꙋ́щаго бо є҆стества́, не слꙋ́жимъ годи́нѣ, не стои́тъ бо, не чте́мъ де́нь, повеле́нїемъ бо рабо́таетъ по всѧ̑ лѣ̑та: состарева́етъ бо сѧ лѣ́то, со всѣ́ми состаре́етсѧ. Бг҃ъ же є҆ди́нъ вѣ́тхости вы́шьши и ꙗ҆ви́тъ коне́чный де́нь.
Е҆́ллини ᲂу҆́бо и҆ і҆ꙋде́и, бра́тїѧ без̾зако́нна, дїа́волѧ коры́сти, грехо́внїи внꙋ́цы, пре́лести пи́ща, нече́стїѧ тма̀, геє́нны наслѣ́дницы, гребцы̀ нече́стїѧ, сы́нове клѧ́твы. Сі́и бо да пра́зднꙋютъ нечести́вѣ, понѣ́же мꙋ́дрствꙋютъ непреподо́бнѣ: ѻ҆нѝ ᲂу́бо пре́лесть да почита́ютъ, ѻ҆́вы же зако́нъ да попира́ютъ, и҆ дрꙋ́гъ дрꙋ́гꙋ лꙋка́вствꙋ да поꙋча́ютъ, согласи́шѧ бо сѧ: і҆ꙋде́и ѿ є҆ллинъ навыко́шѧ и҆долослꙋже́нїе, и҆ є҆́ллины ѿ і҆ꙋде́й наꙋчи́шѧсѧ прорѡ́ки побива́ти, і҆ꙋде́и бо в̾ зако́нѣ всю̀ є҆́ллинскꙋю и҆з̾ꙗви́шѧ пре́лесть. Но илѝ негодꙋ́еши, ѽ і҆ꙋде́ю, сїа̀ слы́шавъ; Воспомѧнѝ содѣ́ѧннаѧ, и҆ не смꙋща́йсѧ ѡ҆ ᲂу҆кори́знѣ. Гдѣ̀ бо и҆́долѡмъ не послꙋжи́лъ є҆сѝ, рцы ми; В̾ пꙋсты́ни тельца̀ излиѧ́лъ є҆сѝ, побѣди́въ, веєльфего́рꙋ послꙋжи́лъ є҆сѝ, в̾ моави́тѣхъ хамо́сꙋ поклони́лсѧ є҆сѝ, в̾ палести́нѣ даго́нꙋ поже́рлъ є҆сѝ, в̾ вавѷло́нꙋ ви́лꙋ же́ртвꙋ прине́слъ есѝ, в̾ финикі́и а҆ста́рти послꙋжи́въ, в̾ плене́нїи ѡ҆ хамо́сѣ пла́калъ є҆сѝ. Ѡ҆скꙋдѐ мѣ́сто, не ѡ҆скꙋдѐ же ме́рзость. Сего̀ ра́ди и҆ пра́здницы ва́шѧ ненави́дитъ влⷣка: всѧ́къ бо тво́й пра́здникъ, ѽ і҆ꙋде́ю, ᲂу҆бі́йство принесѐ. Постѧ́сѧ, наꙋфе́ѧ поби́лъ є҆сѝ какка́менїемъ: пра́зднꙋѧ, и҆са́їю прете́рлъ є҆сѝ: торжествꙋ́ѧ, їеремі́ю в̾ ровъ ка́ленъ в̾ве́рже: в̾ сꙋды̀ и҆ сва̑ры непреподо́бнѣ пости́лсѧ є҆сѝ, ѡ҆б̾ѣда́ѧсѧ: при и҆лїѝ кїво́тъ пре́далъ є҆сѝ: і҆ѡа́ннꙋ главꙋ̀ ѿ̾ѧ́тъ. А҆́ще си́цѣ пра́зднꙋеши, пла́кати тебѣ̀ лꙋ́чши є҆́сть.
Мы же дне́сь пра́зднꙋемъ бж҃е̑ственаѧ и҆ пресла̑внаѧ чюдеса̀, мꙋ̑ченикъ страда̑нїѧ, погребе́нныхъ ра̑ки, неви́димыхъ мре́жѧ, разрѣше́нныхъ врачева̑нїѧ, стефа́новъ каменноплете́ный вѣне́цъ, пресла́внагѡ лаѵре́нтїѧ ꙗ҆́же сме́ртїю побѣ́ды, а҆га́ино неѡбꙋрева́нно дѣ́вство. ѽ трⷪ҇це, трⷪ҇ческаѧ про́повѣди: ѽ мо́щи свѧты́хъ, больны́хъ лѣчьбы̀: ѽ пра́ше, и҆сто́чниче чюде́съ: ѽ мо́ре, небе́сныѧ добро́ты подо́бїе: Ѡ҆бличи́въ срабны́ѧ, проповѣ́мъ и҆ а҆́зъ влⷣкꙋ: не ѿѧготѣва́етъ мѧ̀ стопа̀ созда́вшагѡ мѧ̀: ѡ҆свѧща́ютъ мѧ̀ но̑ѕѣ созда́телевѣ: Мѡѷсе́й раздѣлѝ, но се́й ѡ҆свѧтѝ: І҆ѡ́нꙋ поглоти́хъ, сегѡ̀ же трепе́щꙋ: Нѡ́ѧ ѡ҆бꙋрева́хъ, но не дерза́ю возрѣ́ти на сего́, и҆́же человѣ́цы созда́вшагѡ: нога́ма менѐ ше́ствовавъ ѡ҆свѧтѝ: не́бо престо́ломъ просла́ви: зе́млю ꙗ҆́сльми просвѣтлѝ: а҆́да гро́бомъ ᲂу҆ѧснѝ: и҆ менѐ ᲂу҆́бо да освѧти́тъ стопа́ми: не́смь бо безꙋ́менъ илѝ бездꙋ́шенъ: познава́ю, ꙗ҆́кѡ созда́нїе созда́вшагѡ: не глаго́лю со і҆ꙋде́и: се́й человѣ́къ не́сть ѿ бг҃а. Се́й – бг҃ъ мо́й, и҆ просла́влю и҆́. Покажꙋ̀ ꙗ҆́же моегѡ̀ є҆стества̀, ѡ҆бличи́въ ᲂу҆би́йцъ нра́вы, проповѣ́мъ и҆ по мнѣ̀ ходи́вшагѡ держа́вꙋ: сі́и клевре́ти, ѻ҆́нъ влⷣка: не ѿ стра́ха си́хъ смꙋща́юсѧ: влⷣка ᲂу҆́бо в̾ мо́ри немо́кренѡ ше́ствова: ѻ҆́ви же, пла́вающе в̾ мо́ри, молвꙋ̀ дѣ́ѧху, стра́хъ же бѣ́дствꙋющыхъ зва́ти творѧ́ше: человѣколюби́вый же па́стырь є҆́же дерза́ти повелева́ше, глаго́лѧ: Дерза́йте, вѣ́ры и҆́мате держа́вꙋ, и҆долослꙋже́нїѧ молва̀ не потопи́тъ ва́съ. Дерза́йте, і҆ꙋде́йскаѧ неи́стовства не погрꙋзѧ́тъ ва́съ. Дерза́йте, є҆рети́ческїѧ бꙋ́ри не ѡбꙋрева́ютъ ва́съ, Аз є҆́смь собезнача́льное сло́во ѻ҆ц҃ꙋ̀, несозда́ннагѡ начѧ́ла ветвь, мїрска́гѡ грѣха̀ а҆́гнецъ, гра́дскихъ ѡбꙋрева́нїй ко́рмчїй, правосла́вныхъ вѣ́ры сокро́вище, мꙋ́ченическихъ по́двигъ мздода́тель. Аз є҆́смь, не бо́йтесѧ: и҆дѣ́же бо свѣ́тъ прихо́дитъ, ѿбѣга́етъ тма̀, бл҃года́тїю и человѣколю́бїемъ гдⷭ҇а на́шегѡ і҆и҃сꙋ́съ хр҃та̀, є҆мꙋ́же сла́ва и҆ держа́ва со безнача́льнымъ ѻ҆ц҃е́мъ и҆ прест҃ы́мъ и҆ животворѧ́щымъ дх҃омъ, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.