Мѣ́сѧца того́же во в҃‐й де́нь. па́мѧть свѧта́гѡ мꙋ́ченика ма́манта

Стїхѝ:

Безмо́лствꙋеши в̾ рождествѣ́ си, мꙋ́чениче, тлѣ̑ннаѧ зрѧ̀:

Нетлѣ̑ннаѧ же ᲂу҆вѣ́девъ, проти́вꙋ мꙋчи́телю велегла́снѡ вѣща́еши:

Во вторы́й ма́мантꙋ копїѐ ꙗ҆́тра извлечѐ.

При а҆врилїа́нѣ царѣ̀ нꙋ́дими бѧ́ху христїа́не жрѣ́ти и҆́долѡмъ. Бѧ́ше же во гра́дѣ гарго́нѣ мꙋ́жь и҆́менемъ ѳеодо́тъ, и҆ подрꙋ́жїе и҆мѣ́ѧ рꙋѳи́ну. Занѣ̀ не пожро́ста кꙋми́рѡмъ, по́слана бы́ста в̾ кеса́рїю к̾ фа́ѵстꙋ кнѧ́зю, и тѣ́мъ в̾ темни́цꙋ вве́ржена бы́ста; и҆ помоли́шасѧ Бо́гꙋ пре́жде мꙋ́ки ᲂу҆мрѣ́ти, и҆ тꙋ̀ приѧ́тъ смерть ѳеодо́тъ. Рꙋѳи́нѣ же сꙋ́щи непра́зднѣ, ро́ждьши младе́нца, посѣ́мъ ᲂу҆́мре. И҆ се ᲂу҆вѣ́девши сигклитикі́и, ше́дши в̾ темни́цꙋ, тѣлеса̀ свѧты́хъ погребѐ. Младе́нца же приѧ́тъ в̾ сы́на мѣ́сто, и҆́же люби́мь бѧ́ше є҆́ю. Но и҆ не глаго́лаше пѧ́ть лѣ́тъ, и҆ пото́мъ ма́ма ре́къ ри́мскимъ и҆́менемъ, и҆ та́кѡ прозово́мь ма́мантъ бы́сть. В̾ во́зрастъ же прише́дъ, по ᲂу҆ме́ртвїи матро́ны, понꙋ́жденъ бы́сть пожрѣ́ти и҆́долѡмъ, и҆ не покори́вжесѧ, мꙋ́ченъ бы́сть тогѡ̀ ра́ди. И а҆́нгеломъ веде́нъ бы́сть на го́рꙋ, на не́йже повеле́нїемъ бж҃їимъ ди̑вїѧ ѕвѣ́ри доѧ́ше и҆ творѧ́ше сыры̀, и҆ даѧ́ше ни́щымъ. Посѣ́мъ ꙗ҆́тъ бы́сть и҆ мꙋ́ченъ, и҆ к̾ ѕвѣрє́мъ вве́рженъ, и҆ неврежде́нъ. Наконе́цъ копїе́мъ ᲂу҆ѧ́звенъ бы́сть. Носѧ̀ же внꙋ̑тренѧѧ своѧ̑ свои́ма рꙋка́ма, и҆зы́де из̾ гра́да, и҆ та́кѡ да́въ дꙋ́хъ в̾ рꙋ́цѣ бг҃ови, и҆ погребе́нъ бы́сть.

В̾ то́йже де́нь и҆́же во свѧты́хъ ѻ҆тца̀ на́шегѡ і҆ѡа́нна, а҆рхїєпи́скопа константи́нѧ гра́да по́стника

Стїхѝ:

Не текꙋ́щими пита́ешисѧ ны́нѣ ве́щьми,

По́стниче тлѣ́нныхъ сласте́й, і҆ѡа́нне.

И҆́же во свѧты́хъ ѻ҆те́цъ на́шь і҆ѡа́ннъ, бѧ́ше при і҆ꙋсти́нѣ, и҆ тиѵе́рїи, и҆ маѵрикі́и царѣ́хъ, в̾ константи́ни град́ѣ рожде́нъ. Пе́рвѣе и҆зваѧ́тель златни́цамъ бы́въ, мꙋ́жь бл҃гочести́въ, нищелюби́въ, и҆ страннолюби́въ, и҆ боѧ́сѧ бг҃а. То́й є҆все́вїѧ и҆́менемъ мни́ха, ѿ палести́ны бы́вшагѡ воспрїи́мъ: и҆́же с̾ ни́мъ и҆ по пꙋтѝ и҆ды́й, ѻ҆деснꙋ́ю преподо́бнагѡ, слы́шаше нѣ́коего бесѣ́дꙋюща є҆мꙋ̀: не подоба́етъ ти а҆́вво ѻ҆деснꙋ́ю вели́кагѡ ше́ствовати, ᲂу҆жѐ бг҃ꙋ произвѣща́ющꙋ, бꙋ́дꙋщагѡ врꙋчи́тисѧ є҆мꙋ̀ вели́кагѡ а҆рхїєре́йства. Посѣ́мъ ѡ҆повѣ́данъ бы́сть и҆́же во свѧты́хъ є҆ѵти́хїю ѿ схола̑стикъ, и҆ боже́ственомꙋ а҆рхїере́ю, и҆́же и҆ пострищѝ того̀ совѣща̀, ꙗ҆́кѡ досто́йна сꙋ́ща вмѣни́ти в̾ при́четъ. И҆ є҆щѐ сꙋ́щꙋ є҆мꙋ̀ в̾ дїа́конствѣ, прїи́де в̾ це́рковь свѧта́гѡ лаѵре́нтїѧ, полꙋ́дни сꙋ́щꙋ, и҆ та́мѡ ѡ҆брѣ́те нѣ́коего пꙋсты́нника, є҆го́же никто́же зна́ѧше ѿкꙋ́дꙋ прїи́де. И҆ пока́зоваше преподо́бномꙋ степє́ни ѻ҆лта̑рныѧ, и҆ с̾ ты́сѧщами свѧты́хъ, и҆ гла́сомъ смѣше́нїѧ, ꙗ҆́кѡже и҆ стра́шнѡ слы́шати бѣ́ѧше. И҆ вси бѣ́лыми ѡ҆дѣ́ждами и҆ блиста́ющимисѧ ѡ҆дѣва́хꙋ себѐ. Се́й же слꙋга̀ сы́й, и҆ раздаѧ́тель церко́внагѡ и҆мѣ́нїѧ, возвраща́ѧсѧ из̾ внѣ́шнѧгѡ и҆ по́льскагѡ мѣ́ста. И҆ єди́нъ то́чїю пла́тѧнъ сосꙋ́дъ носѧ̀, и҆ неѡскꙋ́днѡ подава́ѧ, ꙗ҆́кѡ да и҆ не и҆спражнѧ́шесѧ, ни́щымъ мно́жествꙋ сте́кшымсѧ. Е҆ди́номꙋ же ѿ ни́щыхъ ѿ согнете́нїѧ возопи́вшꙋ: гдⷭ҇и поми́лꙋй, доко́лѣ не мо́жетъ и҆спраздни́тисѧ сїѐ влага́лище?. И҆ а҆́бїе пра́здно бы́сть. Се́й же ѕвѣрови́днѡ на о́ного возрѣ́въ речѐ: бг҃ъ да прости́тъ тѧ брате, занѣ́же на мно́зѣ хотѧ́ше дово́льствовати. По ᲂу҆спе́нїи же є҆вти́хїѧ патрїа́рха, ᲂу҆держа́нъ бы́сть на хиротониса́нїе, и҆ не повинꙋ́сѧ, донѣ́леже ви́де ᲂу҆́жасъ стра́шенъ. Бѧ́ше же виде́нїе: мо́ре до небесѐ дви́жꙋщеесѧ, и҆ пѣ́щь ѻ҆́гненна стра́шна, и а҆́г҃гельское множество вѣща́юще к̾ немꙋ̀ си́цѣ: не прїе́млеши ли, и҆́нъ бꙋ́детъ, ты̀ же молчѝ, и҆ ꙗ҆́кѡ ѿ всѣ́хъ на́съ бꙋ́деши мꙋ́ченъ. Сицѣва̑ѧ с̾ преще́нїемъ рѣ́кшымъ, тогда̀ и҆ не хотѧ̀ приста̀. И҆ поста́вленъ бы́сть патрїа́рхъ константи́нѧ гра́да. Поще́нїе соверше́нно, и҆ житїѐ чи́сто, со всѧ́кою добродѣ́телїю, да́же и҆ до конца̀ проходѧ̀. Томꙋ́ же ходѧ́щꙋ нѣ́когда в̾ домꙋ̀, и҆ бꙋ́ри ве́лїи бы́вши, мл҃и́твою и҆ зна́менїем кр́естнымъ, мо́ре в̾ тишинꙋ̀ преложѝ. И҆ заитѝ [є҆́же] ѻ҆чесє́мъ и҆мѣ́ѧ га́зскїй і҆ѡа́ннъ схола́стикъ, и҆́же доше́дъ к̾ свѧто́мꙋ патрїа́рхꙋ, и҆ того̀ прїе́мъ патрїа́рхъ, и҆ ѿ тѣ́ла хр҃сто́ва часть взе́мъ, положѝ є҆мꙋ̀ на ѻ҆́чи, ре́къ: ѿ рожде́нїѧ слѣпа́го и҆сцѣли́вый, да и҆сцѣли́тъ тѧ. И҆ цѣлова́въ свѧта́го патрїа́рха, цѣльбꙋ̀ полꙋчѝ. И҆ нѣ́когда ᲂу҆́бо мо́рꙋ вели́кꙋ бы́вшꙋ, дадѐ нѣ́коемꙋ вѣ́рнꙋ ѿ слꙋ́гъ свои́хъ, два сосꙋ́да, є҆ди́нъ пра́зденъ, а҆ дрꙋгі́й по́лнъ ка́менїѧ дро́бнагѡ. И҆ речѐ є҆мꙋ̀: и҆дѝ ста́ни ᲂу҆ волꙋ́ѧгѡ мѣ́ста, и҆ ми́мѡ носи̑мыѧ мертвецы̀ и҆зчита́ѧ, по числꙋ̀ взима́ѧ ка́менїемъ, ѿ по́лнагѡ сосꙋ́да, прелага́й в̾ пра́здный. И҆ сїѐ сотвори́въ є҆ди́ною и҆ два́жды: и҆ позна̀ ꙗ҆́кѡ и҆знесе́на бы́шѧ тѣлеса̀ ме́ртвыхъ. И҆ в̾ пе́рвый ᲂу҆́бо де́нь три́ста и҆ дв́адесѧть и҆ трѝ, и҆ та́кѡ па́ки втори́цею сотвори́въ: преста̀ ма́лѡ. И҆ во все́й недѣ́ли та́кѡ творѧ̀. И҆ ѡ҆брѣ́те ꙗ҆́кѡ всеконе́чнѣ преста̀ сѣ́чь, по ᲂу҆чине́нїю свѧта́гѡ и҆ прорече́нїю. И҆ мл҃и́твою и҆ воздержа́нїем̀ та́кѡ бѧ́ше прилежа̀, ꙗ҆́кѡ за ше́сть дні́й, ни воды̀ вкꙋша́ѧ: то́чїю є҆ди́ны бредо́квы, сре́днѧѧ и҆́зрасль быва́ше є҆мꙋ̀ пи́ща и питїѐ. И҆ ма́лѡ ѿ ды́ни, и҆лѝ нѣ́гдѣ гро́здъ, и҆лѝ смо́квамъ премѣ́нꙋ. Сицѣва̑ѧ томꙋ̀ бѣ́ѧше пи́ща, до трїе́хъ на́десѧтихъ лѣ́тъ свѧти́тельствъ є҆гѡ̀. Спа́нїе же є҆мꙋ̀ бѧ́ше, є҆́же сѣ́сти, и҆ коле́на и҆ пе́рси смѣси́ти. Ве́рвь ма́лꙋ к̾ свѣщѝ прилѣпи́вѣ: да внѣгдаъ пригорѣ́ти свѣщѝ, па́даше ве́рвь в̾ лаха́ню, и҆ творѧ́ше кло́котъ, и҆ та́кѡ воста́ѧше. А҆́ще ли же прилꙋча́шесѧ є҆́же не ѡ҆щꙋти́ти є҆мꙋ̀ ве́рвнагѡ звꙋ́кꙋ, всю̀ ѻ҆́нꙋ но́щь без̾ сна̀ пребыва́ше. И҆ та́кѡ в̾ мл҃и́твахъ пребыва́ѧ, со страстьмѝ борѧ́сѧ. Ва̑рварскїѧ воспѧща́ше нахо́ды посто́мъ: па́гꙋбꙋ рѣша́ше гра́дꙋ: и҆ бдѣ́нїемъ па́ствꙋ соблюда́ше, ѿ ви́димыхъ и҆ неви́димыхъ вра̑гъ. Нѣ́когда же пѧткꙋ̀ сꙋ́щꙋ, наꙋ́трїе нѣ́цыи ре́кше свѧто́мꙋ: заꙋ́тра влады́ко бꙋ́детъ ко́нское риста́нїе, бѣ́ѧше ᲂу҆́бо сꙋббо́та пентико́стнаѧ. И҆ ѿвѣща́въ свѧты́й речѐ: ко́нское риста́нїе во свѧтꙋ́ю пѧтидесѧ́тницꙋ да не бꙋ́детъ. И҆ па́дъ на коле́нꙋ помоли́сѧ бг҃ꙋ, є҆́же нѣ́которомꙋ зна́менїю бы́ти стра́ха ра́ди, и҆ разрꙋше́нїѧ ра́ди таково́мꙋ дѣ́лꙋ. И҆ что сегѡ̀ страшнѣ́йше; Бы́вшꙋ ᲂу҆́бо собра́нїю на мѣ́стѣ, и҆дѣ́же ѻ҆бы́чай бѧ́ше: и҆ а҆́бїе бы́сть бꙋ́рѧ, и҆ мно́зи вѣ́три, и҆ исхождє́нїѧ дожде́мъ, ꙗ҆́кѡ скончава́тисѧ всѣ́мъ си́мъ. И҆ нача́шѧ человѣ́цы бѣжа́ти ѿ стра́ха: кромѣ̀ бо тогѡ̀ стра́ха, дрꙋгі́й никогда́ же бы́сть. Но и҆ жена̀ нѣ́кая и҆мꙋ́щи мꙋ́жа бѣснꙋ́ющасѧ, и҆ к̾ мꙋ́жꙋ нѣ́коемꙋ прите́кши, в̾ пꙋсты́ни живꙋ́щꙋ. И҆ ѻ҆́нъ к̾ не́й речѐ: и҆дѝ ко всесвѧто́мꙋ і҆ѡа́ннꙋ патрїа́рхꙋ константи́нѧ гра́да, и҆ ѻ҆́нъ и҆́мать того̀ и҆сцѣли́ти. И҆ сїѐ сотворѝ, и҆ не погрѣшѝ и҆ско́магѡ: прїи́мши бо мꙋ́жню цѣльбꙋ̀ мл҃и́твами преподо́бнагѡ, поидо́ста ѻ҆́ба во своѧ̑ ра́дꙋющесѧ. Е҆го́же мл҃и́твами, непло̑дныѧ жены̑ ча̑да ражда́хꙋ, и҆ мно́зи болѧ̑щїи, цѣльбы̑ полꙋча́хꙋ. Ѹ҆снꙋ́вшꙋ же томꙋ̀ с̾ ми́ромъ, и҆ предложе́нꙋ. И҆ прише́дъ к̾ немꙋ̀ на цѣлова́нїе ни́лъ сла́вный є҆па́рхъ, и҆ цѣлова́въ є҆го̀. Свѧты́й же, всѣ́мъ зрѧ́щымъ и҆ дивѧ́щымсѧ, речѐ к̾ немꙋ̀ нѣ̑кїѧ глаго́лы во ᲂу҆́хо, и҆́хже никомꙋ́же и҆зречѐ. Погребѐ же є҆го̀ внꙋ́трь ѻ҆лтарѧ̀ свѧты́хъ а҆пѡ́столъ ꙗ҆́кѡ досто́йна, сла́вѧ и҆ бл҃гословѧ̀ оц҃а̀, и҆ сн҃а, и҆ ст҃а́го дх҃а.

В̾ то́йже де́нь сло́во ѡ҆ ю҆́ноши совлачи́вшемъ мертвеца̀, и҆ па́ки пока́ѧвшемсѧ

Свѧты́й ѻ҆те́цъ на́шь і҆ѡа́ннъ и҆́же в̾ виѳаи́дѣ мни́хъ повѣ́даше глаго́лѧ си́цѣ. Бѧ́ше нѣ́кїй ю҆́ноша в̾ гра́дѣ ѕѣлѡ̀ мно́гѡ сотво́рь ѕла̀ и҆ лю́тѣ согрѣша́ѧ и҆ гро̑бища кра́дый. И҆ бж҃їй сꙋ́дъ помѧнꙋ́въ, и҆ стра́хъ в̾ се́рдцы си прїи́мъ. Смирѝ себѐ вельмѝ, и҆ пока́ѧвсѧ ѿ мно́гихъ свои́хъ грѣ̑хъ. И҆ ко гро́бищемъ прише́дъ, пе́рвагѡ ра́ди своегѡ̀ житїѧ̀, ни́цъ па́дъ пла́кашесѧ, не смѣ́ѧ гла́са и҆спꙋсти́ти, ни бг҃а нарица́ти, недосто́инъ сѧ творя̀ житїѧ̀ пе́рвагѡ, и҆ прѣ́жде сме́рти во гро́бищихъ сѧ затворѝ, ѿча́ѧвсѧ живота̀ своегѡ̀. Недѣ́ли же минꙋ́вши ѡ҆ не́мъ, та́кѡ бѣ́си придо́шѧ на́нь, кли́чꙋще и҆ глаго́люще си́цѣ: гдѣ̀ є҆́сть скверна́вый ѻ҆́нъ нечи́стый, и҆́же блꙋжде́нїѧ насы́тивсѧ; Ны́нѣ без̾ ᲂу҆ма̀ цѣломꙋ́дръ сѧ твори́тъ и҆ бг҃опрїѧ́тенъ сѧ ꙗ҆влѧ́етъ и҆ бг҃очести́въ, а҆ ᲂу҆жѐ ни христїа́нъ сѧ мо́га бы́ти, да что добра̀ надѣ́ешисѧ набра́всѧ на́шихъ ѕо́лъ; Не воста́неши ско́рѡ ѿсю́дꙋ, и҆ на ѻ҆бы̑чныѧ с̾ на́ми по́йдеши; Се ожида́ют тебе́ блудни́цы и҆ прикꙋ́пи, что не по́йдеши; ско́рѡ напита́ешисѧ по́хоти тоѧ̀. А҆́ще ли то, прїи́детъ на тѧ̀ сꙋ́дъ вско́рѣ, что сѧ са́м ᲂу҆́марѧ́еши; и҆ что са́мъ сѧ тщи́ши на мꙋ́кꙋ ѡ҆каѧ́нне; не на́шь ли є҆сѝ; На́мъ сѧ є҆сѝ ѡ҆бѣща́лъ, без̾зако́нїе всѐ сотвори́лъ є҆сѝ, и҆ всѣ́мъ на́мъ пови́ненъ є҆сѝ. смѣ́еши ли ѿвѣща́ти на́мъ; И҆ сїю̀ творѧ́ще ѕло́бꙋ, и҆ па̑кости пребыва́хꙋ ᲂу҆ негѡ̀. Ю̀҆ноша же крѣплѧ́шесѧ бж҃їею по́мощїю и҆ си́лою, и҆ преодолѣва́ше нѣ́мощнꙋю и҆́хъ си́лꙋ, ни ѿвѣщава́ѧ и҆́мъ. И҆ на до́лзѣ же не ѡ҆ста́нꙋчемсѧ є҆гѡ̀ бѣсѡ́мъ, и҆ ꙗ҆́кѡ не ᲂу҆спѣ́шѧ ничто́же, мно́гажды ѕло́е глаго́люще є҆мꙋ̀. Нꙋ́дьма ᲂу҆́бо є҆́мше є҆гѡ̀, вельмѝ бїѧ́хꙋ є҆го̀ лю́тѣ, и҆ є҆́лѣ жи́ва ѡ҆ста́вльше є҆го̀ ѿхожда́хꙋ ѿ негѡ̀. Се́й же ни ма́ла дви́гнꙋтисѧ можа́ше, и҆ па́ки стенѧ̀ а҆́ки нѣ́гдѣ дꙋ́шꙋ взима́ше в̾ себѣ̀. Свои́ же бли́жнїи взыска́вше є҆го̀, и҆ ѡ҆брѣ́тше и҆ вопраша́хꙋ є҆го̀, ко́еѧ ра́ди вины̀ прїи́де на мѣ́сто сїѐ; Не вѣ́дꙋще серде́чныхъ є҆гѡ̀, нꙋжда́хꙋ и҆́ вестѝ домо́вь. И҆ ѕѣлѡ̀ бѣдѧ́ще є҆го̀ и҆ти́ с̾ ни́ми, ѻ҆нъ же не послꙋ́шаше и҆́хъ. И҆ па́ки є҆мꙋ̀ в̾ дрꙋгꙋ́ю но́щь, горѣ́е пе́рвагѡ сотвори́ша. И҆ па́ки своѝ є҆мꙋ̀ прише́дше, велѧ́хꙋ ѿъитѝ ѿ мѣ́ста тогѡ̀. Се́й же та́кѡ глаго́лаше: ᲂу҆́нѣ ми є҆́сть ᲂу҆́мрѣ́ти в̾ гро́бищѣхъ си́хъ, нѣ́же в̾ тацѣ́хъ грѣсѣ́хъ жи́ти в̾ мі́рѣ. И҆ ѿъидо́шѧ ѿ негѡ̀ своѝ не ᲂу҆вѣща́вше є҆го̀. В̾ тре́тїю же но́щь ма́лымъ є҆го̀ бѣ́си не ᲂу҆би́шѧ, без̾ ми́лости мꙋ́чивше є҆го̀ и҆ до послѣ́днѧгѡ издыха́нїѧ догна́вше. И҆ ѿъидо́шѧ ѿ негѡ̀ є҆́лѣ жи́ва ѡ҆ста́вльше и҆́, кли́чꙋще и҆ глаго́люще си́цѣ: ѡ҆долены̀ бл҃года́тїю бж҃їею, и҆ твои́мъ терпе́нїемъ, И҆ ктомꙋ̀ не ви́де ѕла̀ ѿ бѣсѡ́въ, без̾ бѣды̀ пожи́въ во гробѣ́хъ, до живота̀ своегѡ̀. Бг҃ꙋ на́шемꙋ сла́ва, и҆ ны́нѣ и҆ при́снѡ и҆ во вѣ́ки вѣкѡ́въ. А҆ми́нь.

В̾ то́йже де́нь стра́сть свѧты́хъ мꙋ̑ченикъ тре́хъ ты́сѧщь, и҆ шестисо́тъ, и҆ ѻ҆смина́десѧть и҆́же в̾ никомиді́и

Сі́и бѣ́шѧ при дїоклитїа́нѣ царѣ̀, и҆ маѯимїа́нѣ. И҆ царе́ма повеле́вшема ᲂу҆сѣ́кнꙋти свѧта́го петра̀ а҆рхїепи́скопа алеѯа́ндрьскагѡ. И҆ по ᲂу҆сѣче́нїи є҆гѡ̀ са́ми ᲂу҆бі́йцы ті́и вѣ́ровашѧ хр҃сто́ви, и҆ со всѣ́ми свои́ми, и҆ со и҆нѣ́ми мно́зѣми собра́вшесѧ, и҆ тща́хꙋсѧ ᲂу҆мрѣ́ти за хр҃ста̀ И҆ поѧ́шѧ жены̑ своя̑ и҆ дѣ́ти, и҆ всѧ̑ бли́жницы своѧ̑, внидо́шѧ в̾ никомиді́ю пред̾ царѧ̀, зовꙋ́ще, и҆ глаго́люще: ꙗ҆́кѡ христїа́не є҆смы̀. И҆ сїѐ слы́шавъ дїоклитїа́нъ, смѧте́сѧ. Пе́рвїе же ласка́нїемъ ᲂу҆вѣщава́ше и҆́х ѿврещи́сѧ хр҃ста̀. И҆ ꙗ҆́кѡ не послꙋ́шашѧ, повелѐ вѡ́емъ и҆зсѣщѝ и҆́хъ мечѝ пред̾ собо́ю. По ᲂу҆бїе́нїи же и҆́хъ повелѐ маѯимїа́нъ вмета́ти и҆́хъ в̾ разсѣ̑ѧнны го̑рскїѧ. И҆ по мно́зѣхъ лѣ́тѣхъ, ѡ҆брѣ́тены бы́шѧ мо́щи и҆́хъ, чꙋде́съ ра́ди быва́емыхъ свѧты́ми мꙋ́ченики.