Сей нача́ток ме́сяцем, и богоуго́дником Моисе́ом пе́рвый нари́чется. От сего́ бо учи́ми быва́ем вся́кими богосоде́лованными. От небытия́ в бытие́ и я́ве е́же от земли́ возраща́емая былия, тогда́ се́емое по повеле́нию Бо́жию. И новокорени́тися по ти́хости, мо́рю же и не́бу ясне́йшим быва́ти. Е́же от зи́мняго пооблаче́ния и мглы преме́ньшимся. О сем в двадеся́тый и пе́рвый челове́к созда́н бысть руко́ю Бо́жиею. В сем Изра́ильтестии лю́дие, фараони́тския руки́ отпуще́ни бы́ша, и Чермно́е мо́ре проидо́ша, и па́сху соверши́ша. В сем в зе́млю внидо́ша обетова́нную. В сем Сын Бо́жий сни́де на́шего ра́ди спасе́ния, и всели́ся в блаже́нное чре́во при́сно Де́выя Мари́и Пречи́стыя Богоро́дицы, плоть от Нея́ восприе́м. По сем и креста́ ра́ди смерть восприя́т, и воскресе́ние нам боголе́пно обнови́. И о сем ве́руем и о́бщее воскресе́ние, и всеми́рный Суд, и всеконе́чному и неотреши́мому уставле́нию бы́тися. Е́же и рещи́ не́коему ме́сяца про́летна, по и́стинне и́мать рещи́, я́ко в том обрета́ются вся про́летная быва́ти, бу́дущая же и сбыва́емая. Се же есть по евре́ох Ниса́н нари́чется, е́же от ита́лиих пе́рвие При́мос, пото́м же Ро́мом и́же Рим созда́вшему, за его́же и соимени́тие град имя́ше, Март нарекова́ся, вины́ ра́ди таковы́я. Той Ром рече́: Зи́жду же́ртвище му́жеское, в ме́сяц при́мов. И того́ соверши́в и обновле́ния сотво́рь, нарекова́ того́ ме́сяц март, и́же есть е́ллински А́реос, чтый поне́ о сем бо́га своего́. И да непристу́пнейше сло́во притяжу́, сей нарече́н бысть март е́же есть ме́сяц про́летный, си́речь, соверше́н. Я́ко пе́рвие того́ я́ве февралю́ недоста́влену су́щу, о и́мже непщу́ю и Го́споду при́точно во Ева́нгелии ре́кшу: Я́ко а́ще не прекрати́лися бы́ша дни́е они́, не бы спасла́ся вся́ка плоть: проле́тие в ме́сяц март установи́ся си́це.