Мѣ́сѧца а҆прі́ллїа въ к҃-й де́нь. Ст҃и́телѧ нїкола́а велими́ровича, є҆пⷭ҇кпа жи́чскагѡ.
На ма́лѣй вече́рни
На Гдⷭ҇и, воззва́хъ: стїхи̑ры на д҃, гла́съ а҃. Подо́бенъ: Нбⷭ҇ныхъ чинѡ́въ:
Нбⷭ҇ныѧ се́рбїи свѣ́тлаѧ ѕвѣздо̀,* земна́гѡ ѻ҆те́чества крѣ́пкїй предста́телю,* ст҃и́телю нїко́лае,* и҆ ны́нѣ ча̑да твоѧ̑ торжествова́ти соберѝ,* тѧ̀ бо моли́твенника те́пла* ко гдⷭ҇ꙋ и҆ бцⷣѣ стѧжа́хомъ.
Нбⷭ҇ный челове́че, а҆́гг҃ле земны́й,* ѿ ю҆́ности бг҃омъ храни́мый,* дꙋ́шꙋ свою̀ чи́стꙋ сохрани́лъ є҆сѝ,* и҆ все́ю крѣ́постїю хрⷭ҇та̀ возлюби́въ,* мнѡ́гїѧ дꙋ́шы сп҃сє́ны* томꙋ̀ приве́лъ є҆сѝ,* сегѡ̀ ра́ди почита́емъ тѧ̀,* ст҃и́телю нїко́лае.
Нбⷭ҇ныѧ жа́твы гдⷭ҇и́нꙋ* ꙗ҆́кѡ дѣ́латель ᲂу҆се́рднѡ послꙋжи́въ,* є҆ѵⷢ҇льски́мъ проповѣ́данїемъ,* нїко́лае бг҃огла́сне,* ѿ восто́ка и҆ за́пада пшени́цꙋ до́брꙋю* въ жи́тницꙋ хрⷭ҇то́вꙋ собира́лъ є҆сѝ.
Нбⷭ҇нїи на́ши предста́телїе,* ѿ ст҃и́телѧ са́ввы да́же доны́нѣ,* прїиди́те посредѣ̀ на́съ неви́димѡ,* предначина́юще торжество̀ и҆ пѣ́нїе,* въ похвалꙋ̀ сро́дника и҆ наслѣ́дника ва́шегѡ,* нїкола́а новосїѧ́ннагѡ.
Сла́ва, гла́съ а҃:
Жи́че, торжествꙋ́й дне́сь,* ле́личꙋ, весели́сѧ,* ѻ҆́хриде дре́внїй, ᲂу҆краси́сѧ,* че́лїе, со а҆́ввою і҆ꙋсті́номъ ра́достнѡ воспо́й:* ра́дꙋйсѧ, нїко́лае, но́вый златоꙋ́сте,* се́рбїи и҆ всеѧ̀ вселе́нныѧ* бг҃одарова́нный свѣти́льниче.
И҆ ны́нѣ, пра́здника.
На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳо́въ:
До́ме ст҃а́гѡ са́ввы,* жи́че чтⷭ҇на́ѧ,* царе́й и҆ ст҃и́телей сла́во,* ликꙋ́й и҆ бл҃гоꙋкраша́йсѧ* въ па́мѧти ст҃и́телѧ твоегѡ̀ нїкола́а.
Сті́хъ: Сщ҃е́нницы твоѝ ѡ҆блекꙋ́тсѧ въ пра́вдꙋ,* и҆ прпⷣбнїи твоѝ возра́дꙋютсѧ.
Грѧде́тъ ст҃и́тель* ѿ страны̀ да́льнїѧ,* скѡ́рбныѧ ᲂу҆тѣ́шити,* малодꙋ̑шныѧ ᲂу҆крѣпи́ти:* любо́вїю ᲂу҆срѧ́щимъ того̀.
Сті́хъ: Восхва́лѧтсѧ прпⷣбнїи во сла́вѣ,* и҆ возра́дꙋютсѧ на ло́жахъ свои́хъ.
Вѣ́рꙋ и҆ родолю́бїе,* мꙋ́жество и҆ наде́ждꙋ,* въ мѣ́стѡ дарѡ́въ многоцѣ́нныхъ,* принесе́мъ нїкола́ю ст҃и́телю се́рбскомꙋ,* прише́дшемꙋ во своѧ̑.
Сла́ва, гла́съ и҆ подо́бенъ то́йже:
Сла́ва тебѣ̀, ѻ҆́ч҃е,* сн҃е и҆ дш҃е,* во ст҃ы́хъ почива́ѧй,* и҆ тѣ́ми проповѣ́дꙋемый* человѣ́кѡмъ во сп҃се́нїе.
И҆ ны́нѣ, пра́здника.
А҆́ще кромѣ̀ пѧтдесѧ́тницы, бг҃оро́диченъ, гла́съ и҆ подо́бенъ то́йже: Ра́дꙋйсѧ, дв҃о,* чⷭ҇таѧ бцⷣе,* жи́знь ро́ждшаѧ мі́рꙋ,* ѿ дх҃а ст҃а́гѡ,* всѣ̑мъ во и҆збавле́нїе.
Тропа́рь зрѝ на вели́цѣй вече́рни.
На вели́цѣй вече́рни
Бл҃же́нъ мꙋ́жъ: а҃-й а҆нтїфѡ́нъ.
На Гдⷭ҇и, воззва́хъ: стїхи̑ры на и҃: пра́здника г҃, и҆ ст҃и́телѧ є҃, гла́съ и҃. Подо́бенъ: Ѽ пресла́внагѡ чꙋдесѐ:
Прїиди́те, вѣ́рнїи,* просла́вимъ нїкола́а, но́ваго ᲂу҆го́дника бж҃їѧ,* а҆пⷭ҇льски вселе́ннꙋю ѡ҆быше́дша,* и҆ писа́ньми ди́вными ѡ҆гласи́вша,* и҆ мі́рꙋ, грѣхмѝ ѡ҆бетша́вшемꙋ,* присноживы́й и҆ но́вый глаго́лъ хрⷭ҇то́въ проповѣ́давша.* и҆мꙋ́щїи ᲂу҆́ши слы́шати, да слы́шатъ,** и҆ просла́вѧтъ воскрⷭ҇шаго хрⷭ҇та̀,* подаю́щаго мі́рꙋ ве́лїю млⷭ҇ть.
Прїиди́те, лю́дїе се́рбстїи,* вели́каго родолю́бца нїкола́а почти́мъ,* вожде́й и҆ во́инѡвъ во бране́хъ спобо́рника,* наро́днаго вѣ́ры ᲂу҆чи́телѧ,* себе́ же ᲂу҆ченика̀ наро́да наре́кшаго,* дꙋ́шꙋ се́рбїи свѧтоса́ввскїѧ въ себѣ̀ вмѣсти́вшаго,* и҆ мі́рꙋ тоѧ̀ добро́тꙋ ꙗ҆ви́вшаго,* непреста́ннѡ молѧ́ща за ны̀ хрⷭ҇та̀,** подаю́щаго мі́рꙋ ве́лїю млⷭ҇ть.
Прїиди́те, фїлосо́фи и҆ ри́тори,* вели́комꙋ въ ва́съ нїкола́ю чꙋди́тесѧ,* вѣті́ѧмъ дрє́внимъ подо́бномꙋ,* па́че и҆ны́хъ ѧ҆зы́ки глаго́лавшꙋ,* восто́ка ве́тхагѡ фїлосо́фїю позна́вшꙋ,* и҆ за́пада мꙋ́дрость земнꙋ́ю,* и҆ всѧ̑ сїѧ̑ во ᲂу҆ме́ты вмѣни́вшꙋ,* позна́нїѧ ра́ди воскрⷭ҇сшагѡ хрⷭ҇та̀,** подаю́щагѡ мі́рꙋ ве́лїю млⷭ҇ть.
Прїиди́те, по́стникѡвъ сосло́вїе,* монахолюби́ваго влады́кꙋ восхва́лимъ,* ѻ҆би́телей и҆ хра́мѡвъ ѡ҆бнови́телѧ,* дꙋ́шъ человѣ́ческихъ ᲂу҆краси́телѧ,* и҆́же слеза́ми себѐ предѡчи́стивъ,* хра́мъ и҆ жили́ще бж҃їе бы́въ,* жє́ртвы воздыха́нїѧ вы́нꙋ приносѧ̀,* непреста́ннѡ покланѧ́етсѧ и҆ мо́литъ хрⷭ҇та̀,** подаю́щаго мі́рꙋ ве́лїю млⷭ҇ть.
Прїиди́те, мч҃николю́бцы,* но́ваго и҆сповѣ́дника возвели́чимъ,* за вѣ́рꙋ и҆ ѻ҆те́чество пострада́вша,* заточе́нїе и҆ мꙋ̑ки претерпѣ́вша:* ѽ нїко́лае, застꙋ́пниче на́шъ,* дꙋ́хомъ при крестѣ̀ распѧ́тыѧ се́рбїи при́снѡ стоѧ́й,* ѻ҆́чи твоѝ, бг҃а ви̑дѣвшаѧ,* возведѝ ѡ҆ на́съ въ моли́твѣ ко хрⷭ҇тꙋ̀,** подаю́щемꙋ мі́рꙋ ве́лїю млⷭ҇ть.
Сла́ва, гла́съ д҃:
Не подоба́ше тебѣ̀, ѽ се́рбскїй златоꙋ́сте,* ѻ҆те́чество ѡ҆ста́вившꙋ, жи́ти въ либертиви́ллѣ,* ѿѻнꙋ́дꙋже ѡ҆сщ҃е́нный собо́ръ па́ки тѧ̀ въ зе́млю се́рбскꙋю возвратѝ.* возвесели́сѧ же цр҃ковь,* ви́дѣвши тѧ̀ и҆ глаго́лющи:* вели́читъ сла́ва моѧ̀ гдⷭ҇а,* ѿда́вшаго мѝ сы́на и҆ невѣстовожда̀,* и҆ въ ско́рбехъ мои́хъ ᲂу҆твержде́нїе вѣ́ры,* и҆ въ нищетѣ̀ мое́й бога́тство наде́жды,* и҆ ча́дѡмъ мои̑мъ ᲂу҆тѣше́нїе любвѐ.* тѣ́мже мо́лимъ тѧ̀, ст҃и́телю нїко́лае:** ми́ръ и҆спросѝ на́мъ и҆ ве́лїю млⷭ҇ть.
И҆ ны́нѣ, пра́здника. Вхо́дъ. Прокі́менъ днѐ. И҆ чтє́нїѧ.
При́тчей чте́нїе.
Па́мѧть првⷣнагѡ съ похвала́ми, и҆ бл҃гослове́нїе гдⷭ҇не на главѣ̀ є҆гѡ̀. Бл҃же́нъ человѣ́къ, и҆́же ѡ҆брѣ́те премꙋ́дрость: и҆ сме́ртенъ, и҆́же ᲂу҆вѣ́дѣ ра́зꙋмъ. Лꙋ́чше бо сїю̀ кꙋпова́ти, не́жели зла́та и҆ сребра̀ сокрѡ́вища. Честнѣ́йшаѧ же є҆́сть ка́менїй многоцѣ́нныхъ: все́ же честно́е недосто́йно є҆ѧ̀ є҆́сть. Долгота́ бо дне́й и҆ лѣ̑та живота̀ въ десни́цѣ є҆ѧ̀: въ шꙋ́йцѣ же є҆ѧ̀ бога́тство и҆ сла́ва. ѿ ᲂу҆́стъ є҆ѧ̀ и҆схо́дитъ пра́вда, зако́нъ же и҆ ми́лость на ѧ҆зы́цѣ но́ситъ. Послꙋ́шайте ᲂу҆́бѡ менє̀, ѽ ча̑да, честна̑ѧ бо рекꙋ̀: и҆ бл҃же́нъ человѣ́къ, и҆́же пꙋти̑ моѧ̑ сохрани́тъ: и҆схо́ди бо моѝ, и҆схо́ди живота̀, и҆ ᲂу҆готовлѧ́етсѧ хотѣ́нїе ѿ гдⷭ҇а. Сегѡ̀ ра́ди молю̀ ва́съ, и҆ предлага́ю мо́й гла́съ сыновѡ́мъ человѣ́чєскимъ: ꙗ҆́кѡ а҆́зъ премꙋ́дрость ᲂу҆стро́ихъ, совѣ́тъ и҆ ра́зꙋмъ и҆ смы́слъ а҆́зъ призва́хъ, мо́й совѣ́тъ и҆ ᲂу҆твержде́нїе, мо́й ра́зꙋмъ, моѧ́ же крѣ́пость. А҆́зъ менѐ лю́бѧщыѧ люблю̀, и҆́щꙋщїи же менѐ ѡ҆брѧ́щꙋтъ бл҃года́ть. Разꙋмѣ́йте ᲂу҆́бѡ, неѕло́бивїи, кова́рство, ненака́заннїи же, прилага́йте сердца̀. Послꙋ́шайте менє̀ и҆ па́ки, честна̑ѧ бо рекꙋ̀: и҆ ѿве́рзꙋ ѿ ᲂу҆сте́нъ пра̑ваѧ, ꙗ҆́кѡ и҆́стинѣ поꙋчи́тсѧ горта́нь мо́й, ме́рзки же предо мно́ю ᲂу҆стны̀ лжи̑выѧ. Съ пра́вдою всѝ глаго́лы ᲂу҆́стъ мои́хъ: ничто́же въ ни́хъ стро́потно, нижѐ развраще́нно. всѧ̑ пра̑ва сꙋ́ть разꙋмѣва́ющымъ, и҆ прѡ́ста ѡ҆брѣта́ющымъ ра́зꙋмъ. Наꙋчꙋ́ бо ва́съ и҆́стинѣ, да бꙋ́детъ ѡ҆ гдⷭ҇ѣ наде́жда ва́ша, и҆ и҆спо́лнитесѧ дх҃а.
Премꙋ́дрости соломѡ́новы чте́нїе.
Првⷣникъ, а҆́ще пости́гнетъ сконча́тисѧ, въ поко́и бꙋ́детъ. Ѡ҆сꙋ́дитъ же првⷣникъ ᲂу҆мира́ѧй живꙋ́щыѧ нечести̑выѧ. Оу҆́зрѧтъ бо кончи́нꙋ првⷣнагѡ, и҆ не разꙋмѣ́ютъ, что̀ совѣща́ша ѡ҆ не́мъ: ꙗ҆́кѡ пове́ржетъ гдⷭ҇ь нечести̑выѧ безгла̑сны ни́цъ: и҆ поколе́блетъ и҆̀хъ ѿ ѡ҆снова́нїй, и҆ до послѣ́днѧгѡ и҆сче́знꙋтъ въ болѣ́зни, и҆ па́мѧть и҆́хъ поги́бнетъ. Прїи́дꙋтъ бо въ помышле́нїе согрѣше́нїй свои́хъ ᲂу҆жа́сни, и҆ ѡ҆бличи́тъ и҆̀хъ сопроти́въ беззако́нїѧ и҆́хъ. Тогда̀ ста́нетъ въ дерзнове́нїи мно́зѣ првⷣникъ пред̾ лице́мъ ѡ҆скорби́вшихъ є҆го̀, и҆ ѿмета́ющихъ трꙋды̀ є҆гѡ̀. Ви́дѣвше же є҆го̀ смѧтꙋ́тсѧ стра́хомъ мно́гимъ, и҆ ᲂу҆жа́снꙋтсѧ ѡ҆ пресла́вномъ спасе́нїи є҆гѡ̀. Рекꙋ́тъ бо въ себѣ̀ ка́ющесѧ, и҆ въ тѣснотѣ̀ дꙋ́ха воздо́хнꙋтъ, и҆ рекꙋ́тъ: се́й бѣ̀, є҆го́же и҆мѣ́хомъ нѣ́когда въ посмѣ́хъ, и҆ въ при́тчꙋ поноше́нїѧ безꙋ́мнїи. Житїѐ є҆гѡ̀ вмѣни́хомъ неи́стово, и҆ кончи́нꙋ є҆гѡ̀ безче́стнꙋ. Ка́кѡ вмѣни́сѧ въ сынѣ́хъ бж҃їи́хъ, и҆ во ст҃ы́хъ жре́бїй є҆гѡ̀ є҆́сть; Оу҆́бѡ заблꙋди́хомъ ѿ пꙋтѝ и҆́стиннагѡ, и҆ пра́вды свѣ́тъ не ѡ҆блиста̀ на́мъ, и҆ сл҃нце не возсїѧ̀ на́мъ. Беззако́нныхъ и҆спо́лнихомсѧ сте́зь и҆ поги́бели, и҆ ходи́хомъ стези̑ непрохѡ́дны, пꙋти́ же гдⷭ҇нѧ не разꙋмѣ́хомъ.
Премꙋ́дрости соломѡ́новы чте́нїе.
Оу҆ста̀ првⷣнагѡ ка́плютъ премꙋ́дрость: ᲂу҆стнѣ́ же мꙋже́й мꙋ́дрыхъ вѣ́дѧтъ бл҃года́ть. Оу҆ста̀ мꙋ́дрыхъ поꙋча́тсѧ премꙋ́дрости, пра́вда же и҆збавлѧ́етъ и҆̀хъ ѿ сме́рти. Сконча́вшꙋсѧ мꙋ́жꙋ пра́веднꙋ, не поги́бнетъ наде́жда. Сы́нъ бо пра́веденъ ражда́етсѧ въ живо́тъ: и҆ во бл҃ги́хъ свои́хъ пло́дъ пра́вды ѡ҆б̾и́метъ. Свѣ́тъ првⷣнымъ всегда̀, и҆ ѿ гдⷭ҇а ѡ҆брѧ́щꙋтъ бл҃года́ть и҆ сла́вꙋ. ѧ҆зы́къ мꙋ́дрыхъ дѡ́браѧ свѣ́сть, и҆ въ се́рдцѣ и҆́хъ почі́етъ мꙋ́дрость. Лю́битъ гдⷭ҇ь прпⷣбнаѧ сердца̀, прїѧ́тни же є҆мꙋ̀ всѝ непоро́чнїи въ пꙋтѝ. Мꙋ́дрость гдⷭ҇нѧ просвѣща́етъ лицѐ разꙋ́мнагѡ. Постига́етъ бо жела́ющыѧ ю҆̀, пре́жде да́же разꙋмѣ́ти ю҆̀: и҆ ᲂу҆до́бь ᲂу҆́зритсѧ ѿ лю́бѧщихъ ю҆̀. Оу҆́треневавый къ не́й не ᲂу҆трꙋди́тсѧ: и҆ бдѧ́й є҆ѧ̀ ра́ди вско́рѣ без̾ печа́ли бꙋ́детъ. Ꙗ҆́кѡ досто́йныхъ є҆ѧ̀ сама̀ ѡ҆бхо́дитъ и҆́щꙋщи: и҆ во стезѧ́хъ є҆ѧ̀ ꙗ҆влѧ́етсѧ и҆̀мъ бл҃гопрїе́мнѣ. Мꙋ́дрости никогда́же ѡ҆долѣ́етъ ѕло́ба. Си́хъ ра́ди и҆ рачи́тель бы́хъ добро́ты є҆ѧ̀: и҆ возлюби́хъ ю҆̀, и҆ поиска́хъ ѿ ю҆́ности моеѧ̀: И҆ взыска́хъ невѣ́стꙋ привестѝ себѣ̀, ꙗ҆́кѡ всѣ́хъ влⷣка возлюби́ ю҆̀. Таи́бница бо є҆́сть бж҃їѧ хи́трости, и҆ ѡ҆брѣта́тельница дѣ́лъ є҆гѡ̀. Трꙋды̀ є҆ѧ̀ сꙋ́ть добродѣ́тєли: цѣломꙋ́дрїю же и҆ ра́зꙋмꙋ та̀ ᲂу҆чи́тъ, пра́вдѣ и҆ мꙋ́жествꙋ, и҆́хже потре́бнѣе ничто́же є҆́сть въ житїѝ человѣ́кѡмъ. А҆́ще же и҆ мно́гагѡ и҆сскꙋ́ства жела́етъ кто̀, вѣ́сть дрє́внѧѧ, и҆ бы́ти хотѧ̑щаѧ разсмо́тритъ: Свѣ́сть и҆зви̑тїѧ слове́съ, и҆ разрѣшє́нїѧ гада́нїй: зна́мєнїѧ и҆ чꙋдеса̀ проразꙋмѣ́етъ, и҆ сбытїѧ̑ време́нъ и҆ лѣ́тъ: и҆ всѣ̑мъ совѣ́тникъ є҆́сть бла́гъ, ꙗ҆́кѡ безсме́ртїе є҆́сть въ не́й, и҆ бл҃госла́вїе во ѡ҆бще́нїи слове́съ є҆ѧ̀. Сегѡ̀ ра́ди бесѣ́довахъ ко гдⷭ҇ꙋ, и҆ помоли́хсѧ є҆мꙋ̀, и҆ рѣ́хъ ѿ всегѡ̀ се́рдца моегѡ̀: Бж҃е ѻ҆тцє́въ и҆ гдⷭ҇и ми́лости, сотвори́вый всѧ̑ сло́вомъ твои́мъ, и҆ мꙋ́дростїю твое́ю ᲂу҆стро́ивый человѣ́ка: да владѣ́етъ бы́вшими ѿ тебє̀ тварьмѝ, и҆ да ᲂу҆правлѧ́етъ мі́ръ въ преподо́бїи и҆ пра́вдѣ. Да́ждь мѝ твои́хъ престо́лѡвъ присѣдѧ́щꙋю премꙋ́дрость, и҆ не ѿлꙋчѝ менє̀ ѿ ѻ҆́трѡкъ твои́хъ: ꙗ҆́кѡ а҆́зъ ра́бъ тво́й, и҆ сы́нъ рабы́ни твоеѧ̀. Послѝ ю҆̀ съ нб҃съ ѿ ст҃а́гѡ жили́ща твоегѡ̀, и҆ ѿ прⷭ҇то́ла сла́вы твоеѧ̀, да сꙋ́щи со мно́ю наꙋчи́тъ мѧ̀, что̀ бл҃гоꙋго́дно є҆́сть пред̾ тобо́ю: И҆ наста́витъ мѧ̀ въ ра́зꙋмъ, и҆ сохрани́тъ мѧ̀ въ сла́вѣ свое́й. Помышлє́нїѧ бо сме́ртныхъ всѧ̑ боѧзли̑ва, и҆ погрѣши́тєльна ᲂу҆мышлє́нїѧ и҆́хъ.
На лїті́и стїхи́ра хра́ма.
И҆ ст҃и́телѧ, гла́съ ѕ҃:
Воскрⷭ҇нїѧ ра́дости дне́сь совозсїѧ̀* свѣтоно́снаѧ па́мѧть* ст҃и́телѧ хрⷭ҇то́ва,* и҆ цр҃ковь бж҃їѧ, цвѣ́ты ᲂу҆краша́ема,* взыва́етъ тѝ, нїко́лае:* застꙋ́пниче на́шъ* и҆ моли́твенниче те́плый,* на́съ, и҆̀хже собра́лъ є҆сѝ здѣ̀,* и҆ та́мѡ соберѝ* въ ча́сти сп҃са́емыхъ.
Сла́ва, ст҃и́телѧ, гла́съ то́йже:
Чі́й є҆сѝ, ма́лый наро́де се́рбскїй;* вопросѝ нїкола́й ст҃и́тель,* са́мъ же ѿвѣща́въ, речѐ:* лю́дїе бж҃їи,* хрⷭ҇тїа́не є҆смы̀,* ча̑да ст҃и́телѧ са́ввы вели́кагѡ,* породи́вшагѡ на́съ дх҃омъ ст҃ы́мъ:* и҆ наслѣ́дницы кнѧ́зей и҆ прпⷣбныхъ* ро́да не́мани,* ѻ҆би́тельми и҆ хра̑мы* зе́млю на́шꙋ ᲂу҆краси́вшихъ:* во́ини є҆смы̀ сла́внагѡ ла́зарѧ,* за крⷭ҇тъ чтⷭ҇ны́й* живо́тъ сво́й положи́вшагѡ.* па́ки же вопроси́въ, речѐ:* чі́й є҆сѝ, ма́лый наро́де се́рбскїй;* и҆ ка́кѡ пꙋсты́ню скорбе́й проше́лъ є҆сѝ;* сѣ́мѧ є҆смы̀ ст҃ы́хъ ѻ҆тє́цъ на́шихъ,* и҆ ѿрасль дре́ва,* на ко́сово посѣче́ннагѡ,* до ны́нѣ жи́ви є҆смы̀* во хрⷭ҇тѣ̀ ᲂу҆пова́нїемъ* свобо́ды златы́ѧ* и҆ црⷭ҇твїѧ нбⷭ҇нагѡ.
И҆ ны́нѣ, пра́здника.
На стїхо́внѣ стїхи̑ры, гла́съ в҃. Подо́бенъ: Кі́ими:
Кі́ими смире́нными гла̑сы* воспое́мъ нїкола́а ст҃и́телѧ;* дꙋ́хомъ ѿ па́ствы николи́же разлꙋчи́вшасѧ,* и҆ тѣ́ломъ па́ки въ ле́личь возврати́вшасѧ,* ст҃и́телей се́рбскихъ равностоѧ́телѧ,* си̑льныѧ мі́ра хрⷭ҇тꙋ̀ покори́вшаго,* и҆ смирє́нныѧ ꙗ҆́кѡ бра́тїю хрⷭ҇то́вꙋ почти́вшаго,* того́ бо вои́стиннꙋ досто́йнѡ* безсме́ртныѧ сла́вы вѣнцѣ́мъ вѣнча́етъ хрⷭ҇то́съ бг҃ъ на́шъ,** и҆мѣ́ѧй ве́лїю млⷭ҇ть.
Сті́хъ: Сщ҃е́нницы твоѝ ѡ҆блекꙋ́тсѧ въ пра́вдꙋ,* и҆ прпⷣбнїи твоѝ возра́дꙋютсѧ.
Кі́ими недосто́йными ᲂу҆стна́ми* прико́снемсѧ ра́цѣ моще́й бл҃же́ннагѡ нїкола́а;* є҆ѵⷢ҇лїа проповѣ́дника,* ѻ҆те́чествꙋ крѣ́пкагѡ застꙋ́пника,* сиро́тъ пита́телѧ,* хра́мѡвъ и҆ монастыре́й ѡ҆бнови́телѧ,* моли́твенника неꙋсы́пна ѡ҆ ро́дѣ се́рбскомъ,* є҆гѡ́же моли́твами врагѡ́въ шата́нїе хрⷭ҇то́съ низложѝ,** и҆мѣ́ѧй ве́лїю млⷭ҇ть.
Сті́хъ: Восхва́лѧтсѧ прпⷣбнїи во сла́вѣ,* и҆ возра́дꙋютсѧ на ло́жахъ свои́хъ.
Кі́ими дꙋхо́вными пѣ́сньми* похва́лимъ а҆рхїере́а хрⷭ҇то́ва;* безбо́жїѧ загради́вшаго безстꙋ̑днаѧ ᲂу҆ста̀,* глаго́лы и҆ писа́ньми бг҃омꙋ́дрыми,* жи́чи свѣ́тлое ᲂу҆добре́нїе,* всеѧ̀ вселе́нскїѧ цр҃кве ра́дованїе,* но́вагѡ завѣ́та бг҃опи́саннꙋю но́вꙋю скрижа́ль,* ю҆́же ѿ се́рбїи преди́внѡ хрⷭ҇то́съ и҆знесѐ,** и҆мѣ́ѧй ве́лїю млⷭ҇ть.
Сла́ва, гла́съ г҃:
Со ст҃и́телемъ нїкола́емъ мо́лимъ ти сѧ, бж҃е:* се́рбскїй ро́дъ соединѝ и҆ ᲂу҆мно́жи,* простѝ, и҆сцѣлѝ и҆ ѡ҆бо́жи,** да въ ра́дости и҆ ско́рби тѧ̀ сла́вити возмо́жемъ.
И҆ ны́нѣ, пра́здника.
Тропа́рь, гла́съ и҃:
Златоꙋ́стый проповѣ́дниче воскрⷭ҇шагѡ хрⷭ҇та̀,* пꙋтеводи́телю ро́да се́рбскагѡ крⷭ҇тоно́снагѡ въ вѣка́хъ,* бл҃гогла́снаѧ лѵ́ро дх҃а ст҃а́гѡ,* сла́во и҆ любы̀ мона́хѡвъ, ра́дованїе и҆ похвало̀ сщ҃е́нникѡвъ,* ᲂу҆чи́телю покаѧ́нїѧ, всенаро́дный влады́ко,* предводи́телю бг҃омо́льна во́инства хрⷭ҇то́ва,* ст҃ы́й нїко́лае се́рбскїй и҆ всеправосла́вный,* со всѣ́ми ст҃ы́ми нбⷭ҇ныѧ се́рбїи молѝ є҆ди́нагѡ чл҃вѣколю́бца* дарова́ти ми́ръ и҆ є҆дине́нїе ро́дꙋ на́шемꙋ.
Сла́ва, и҆ ны́нѣ, пра́здника.
На ᲂу҆́трени.
По а҃-мъ стїхосло́вїи сѣда́ленъ, гла́съ а҃:
Па́стырскаѧ свирѣ́ль бг҃осло́вїѧ твоегѡ̀* си̑льныѧ мі́ра привлечѐ тѧ̀ послꙋ́шати,* ѿ да́льнихъ стра́нъ и҆ и҆ны́хъ ꙗ҆зы́кѡвъ* мнѡ́ги на по́мощь стра́ждꙋщей се́рбїи призва̀.* но молѝ хрⷭ҇та̀ бг҃а, ѻ҆́тче нїко́лае,* въ вѣ́рѣ и҆ братолю́бїи сп҃сти́сѧ дꙋша́мъ на́шымъ.
Сла́ва, и҆ ны́нѣ, пра́здника.
По в҃-мъ стїхосло́вїи сѣда́ленъ, гла́съ а҃:
А҆ѳине́йскꙋю мꙋ́дрость человѣ́кѡвъ пости́гнꙋвъ,* ко і҆ерⷭ҇ли́мꙋ бж҃е́ственныхъ за́повѣдей поте́къ,* и҆ дх҃а бл҃года́тїю просвѣти́всѧ,* на се́рбскїй сїѡ́нъ, жи́чꙋ ст҃ꙋ́ю, возше́лъ є҆сѝ,* па́стырю до́брый слове́сныхъ ѻ҆ве́цъ,* молѝ хрⷭ҇та̀ бг҃а сп҃сти́сѧ дꙋша́мъ на́шымъ.
Сла́ва, и҆ ны́нѣ, пра́здника.
По полѷеле́и сѣда́ленъ, гла́съ а҃:
За крⷭ҇тъ чтⷭ҇ны́й и҆ свобо́дꙋ златꙋ́ю* дꙋ́шꙋ твою̀ полага́лъ є҆сѝ,* влады́ко ст҃ы́й, въ моли́твѣ сле́знѡ взыва́ѧ:* гдⷭ҇и, простѝ на́мъ, се́рбѡмъ, грѣхѝ,* и҆ да́ждь на́мъ свобо́дꙋ,* во є҆́же тѧ̀ просла́вити, ꙗ҆́кѡ николи́же никто́же ѿ вѣ́ка.
Сла́ва, и҆ ны́нѣ, пра́здника.
Степє́нна, а҃-й а҆нтїфѡ́нъ д҃-гѡ гла́са.
Прокі́менъ, гла́съ д҃: Сщ҃е́нницы твоѝ ѡ҆блекꙋ́тсѧ въ пра́вдꙋ,* и҆ прпⷣбнїи твоѝ возра́дꙋютсѧ.
Сті́хъ: Та́мѡ возращꙋ̀ ро́гъ даві́дови, ᲂу҆гото́вахъ свѣти́льникъ пома́занномꙋ моемꙋ̀. Всѧ́кое дыха́нїе: Е҆ѵⷢ҇лїе ѿ і҆ѡа́нна, зача́ло л҃є ѿ полꙋ̀.
По н҃-мъ ѱалмѣ̀ стїхи́ра, гла́съ ѕ҃:
Дх҃а бл҃года́ть во ᲂу҆ста́хъ твои́хъ и҆злїѧ́сѧ,* ѻ҆́тче нїко́лае бг҃оно́сне,* и҆ бы́лъ є҆сѝ трⷪ҇цы проповѣ́дникъ велегла́сенъ,* наро́ды призыва́ѧ съ тобо́ю сла́вити:* гдⷭ҇и гдⷭ҇ь на́шъ,* ꙗ҆́кѡ чꙋ́дно и҆́мѧ твоѐ* по все́й землѝ. Канѡ́нъ пра́здника на ѕ҃, и҆ ст҃а́гѡ на и҃.
Канѡ́нъ ст҃а́гѡ нїкола́а, є҆гѡ́же краестро́чїе разꙋ́мнѡ да чте́тсѧ. Гла́съ а҃.
Пѣ́снь а҃.
І҆рмо́съ: Пои́мъ всѝ лю́дїе, ѿ го́рькїѧ рабо́ты фараѡ́ни і҆и҃лѧ и҆змѣ́ншемꙋ, и҆ во глꙋбинѣ̀ морстѣ́й нога́ми немо́крыми наста́вльшемꙋ, пѣ́снь побѣ́днꙋю, ꙗ҆́кѡ просла́висѧ.
Сла́ва тебѣ, хрⷭ҇тѐ бж҃е, дарова́вшемꙋ на́мъ твоего̀ ᲂу҆го́дника ди́внаго, нїкола́а ст҃и́телѧ се́рбскаго, є҆го́же восхвали́ти ᲂу҆стѡ́мъ на́шымъ младе́нчєскимъ сло́во пода́ждь.
Е҆катері́ны и҆ драгомі́ра ча́до злато́е, моли́твами ма́тере па́че млека̀ напое́нный, и҆ бл҃гоче́стїемъ ро́да твоегѡ̀ воспита́нный, ходи́ти пред̾ бг҃омъ, нїко́лае, и҆здѣ́тска навы́клъ є҆сѝ.
Ре́вностїю и҆ ᲂу҆се́рдїемъ побѣжда́ѧ не́мощь тѣле́снꙋю, кни́жномꙋ чте́нїю и҆ ᲂу҆че́нїю по всѧ̑ дни̑ прилѣжа́ше, до́ндеже бога́тство мꙋ́дрости ѿ конє́цъ землѝ, ꙗ҆́кѡ нѣ́кїй кꙋпе́цъ, ѻ҆́тче, собра́лъ є҆сѝ.
Бг҃оро́диченъ:
Бл҃гослове́ннаѧ бцⷣе дв҃о, къ тебѣ̀ со ст҃ы́мъ нїкола́емъ свѣ́тлѡ взыва́емъ: ѡ҆крилѝ на́съ твои́ми моли́твами, да тѧ̀ съ сн҃омъ твои́мъ и҆ бг҃омъ сла́вимъ во вѣ́ки.
Пѣ́снь г҃.
І҆рмо́съ: Оу҆твердѝ менѐ, хрⷭ҇те, на недви́жимомъ ка́мени за́повѣдей твои́хъ,* и҆ просвѣти́ мѧ свѣ́томъ лица̀ твоегѡ̀:** нѣ́сть бо ст҃ъ па́че тебє̀, чл҃вѣколю́бче.
І҆и҃се мо́й, та́кѡ въ болѣ́зни взыва́лъ є҆сѝ, ѻ҆́тче,* а҆́ще ѡ҆брѣто́хъ бл҃года́ть пред̾ тобо́ю,** не ѡ҆ста́ви менє̀, да все́ю крѣ́постїю тебѣ̀ послꙋжꙋ̀.
И҆сцѣле́нїе ѿ бг҃а прїе́мъ,* а҆́бїе ѻ҆бѣ́тъ сво́й и҆спо́лнивъ,* въ ри̑зы мона́шєскїѧ ѡ҆бле́клсѧ є҆сѝ,** ко слꙋже́нїю цр҃кви и҆ ѻ҆те́чествꙋ себѐ ᲂу҆гото́вавъ.
Вѣ́ры проповѣ́дникъ велегла́сенъ* се́рбїи и҆ все́й вселе́ннѣй возгремѣ́лъ є҆сѝ, нїко́лае,* спѧ́щыѧ дꙋше́ю сло́вомъ є҆ѵⷢ҇льскимъ возставлѧ́ѧ:** пока́йтесѧ, прибли́жи бо сѧ црⷭ҇тво нбⷭ҇ное.
Бг҃оро́диченъ:
Ѽ прест҃а́ѧ дв҃о бцⷣе, помозѝ на́мъ, да подо́бнѡ тебѣ̀ поко́рни бꙋ́демъ во́ли бжⷭ҇твеннѣй, сн҃а твоего̀ и҆ гдⷭ҇а ѡ҆ тебѣ̀ сла́вѧще и҆ хвалѧ́ще.
Конда́къ и҆ і҆́косъ пра́здника.
Сѣда́ленъ ст҃и́телѧ, гла́съ ѕ҃:
Крестоно́сномꙋ ро́дꙋ се́рбскомꙋ сострада́въ,* ко гдⷭ҇ꙋ воздыха́лъ є҆сѝ, ст҃и́телю:* ѿвра́ти пра́ведный гнѣ́въ тво́й ѿ на́съ,* ᲂу҆слы́ши на́съ и҆ поми́лꙋй,* ты́ бо є҆сѝ бг҃ъ ѻ҆тє́цъ и҆ ма́терей на́шихъ,* и҆̀же въ тѧ̀ вѣ́роваша,* тобо́ю жи́ви бы́ша,* тобо́ю хра́мы воздвиза́ша,* тебє̀ ра́ди пости́шасѧ,* за тебѐ и҆ страда́ша,* распина́еми на тьма́хъ крестѡ́въ* тебє̀ ра́ди, распѧ́тагѡ за всѧ̑ лю́ди и҆ всѧ̑ наро́ды.* къ комꙋ̀ ᲂу҆̀бо прибѣ́гнемъ, а҆́ще не къ тебѣ̀;* кто̀ на́съ ᲂу҆слы́шитъ и҆ помо́жетъ, а҆́ще не ты̀,* помо́щниче на́шъ и҆ сп҃си́телю;
Сла́ва, и҆ ны́нѣ, пра́здника.
Пѣ́снь д҃.
І҆рмо́съ: Ве́лїѧ та́йна твоегѡ̀, хрⷭ҇те, смотре́нїѧ: сїю́ бо свы́ше прови́дѧ, бг҃озри́тельнѡ а҆ввакꙋ́мъ, и҆зше́лъ є҆сѝ, вопїѧ́ше тебѣ̀, во сп҃се́нїе люде́й твои́хъ, чл҃вѣколю́бче.
За дрꙋ́ги своѧ̑ дꙋ́шꙋ твою̀ полага́ѧ, вождѝ и҆ во́ины на по́ли бра́ни ᲂу҆крѣплѧ́лъ є҆сѝ, ѻ҆́тче, и҆ по́сланъ бы́въ во и҆ны̑ѧ страны̑, глаго́ломъ ѻ҆́гненнымъ на по́мощь ѻ҆те́чествꙋ мнѡ́ги призва́лъ є҆сѝ.
Лю́ди сє́рбскїѧ, ра́тїю расточє́нныѧ и҆ распꙋ́жєнныѧ, ꙗ҆́кѡ ко́кошъ птенцы̀ своѧ̑ под̾ крилѣ̑, собира́ше ст҃ы́й нїкола́й, са́номъ є҆пⷭ҇копскимъ досто́йнѡ почте́нный.
Ю҆́ность твоѧ̀ ѡ҆бнови́сѧ, ст҃и́телю, въ та́инствѣ хїрото́нїи а҆рхїере́йскїѧ, и҆ бл҃гословѝ дꙋша̀ твоѧ̀ гдⷭ҇а, пла́чемъ младе́нческимъ но́вое рожде́нїе зна́менꙋющи.
Бг҃оро́диченъ:
Бж҃е всеси́льне, наꙋчи́ ны моли́тисѧ, ꙗ҆́коже моли́сѧ тебѣ̀ прест҃а́ѧ бцⷣа на землѝ: да и҆́мѧ твоѐ ст҃о́е не ѿхо́дитъ ѿ се́рдца на́шегѡ.
Пѣ́снь є҃.
І҆рмо́съ: Ѿ но́щи ᲂу҆́тренююще, пое́мъ тѧ, хрⷭ҇тѐ, ѻ҆ц҃ꙋ̀ собезнача́льна, и҆ сп҃са дꙋ́шъ на́шихъ: ми́ръ мі́рови пода́ждь, чл҃вѣколю́бче.
Любо́вїю хрⷭ҇то́вою па́ствꙋ твою̀ ѡ҆б̾е́млѧ, всѣ́мъ бы́лъ є҆сѝ всѧ̑, си́рыхъ пита́телю, ско́рбныхъ ѿра́до, хра́мѡвъ зижди́телю, вѣ́ры ᲂу҆чи́телю.
Е҆ди́наго чл҃вѣколю́бца и҆ сп҃са наро́дѡмъ смѧтє́ннымъ апⷭ҇тольски возвѣсти́лъ є҆сѝ, ѻ҆бѣтова́нїй бж҃їихъ и҆сполне́нїе, всѧ́кїѧ тѣсноты̀ недоꙋме́нїй и҆ ра́спрей разрѣше́нїе, вра́жды ᲂу҆толе́нїе, мі́ра ᲂу҆мире́нїе и҆ сп҃се́нїе.
Нїко́лае, побѣ́ды тезоиме́нный, над̾ грѣхо́мъ и҆ сме́ртїю побѣ́дꙋ хрⷭ҇то́вꙋ проповѣ́далъ є҆сѝ, прило́ги бѣсѡ́въ и҆ стра́хъ ѿгонѧ́ѧ глаго́ломъ: і҆и҃съ хрⷭ҇то́съ ні́ка.
Бг҃оро́диченъ:
Наде́ждо на́ша свѣ́тлаѧ, бцⷣе прест҃а́ѧ, ѿженѝ на́съ ѿ всѧ́кагѡ ѕла̀, и҆ всѧ́кое ѕло̀ ѿ на́съ, напра́ви на́съ ко всѧ́комꙋ бла́гꙋ, и҆ всѧ́кое бла́го къ на́мъ, серде́чнꙋю любо́вь тебѣ̀ приносѧ́щихъ и҆ ѿ се́рдца тебѐ просѧ́щихъ.
Пѣ́снь ѕ҃.
І҆рмо́съ: Прⷪ҇ро́ка сп҃слъ є҆сѝ ѿ ки́та, чл҃вѣколю́бче, и҆ менѐ и҆з̾ глꙋбины̀ прегрѣше́нїй возведѝ, молю́сѧ.
Е҆́зеро ѻ҆́хридское бг҃огла́сною ѱалти́рїю* моли́твъ твои́хъ ѡ҆глаша́ѧ,* гдⷭ҇еви воспѣ́лъ є҆сѝ: ѽ любы̀ моѧ̀!* а҆́ще бы возмого́хъ всѧ̑ живꙋ́щыѧ на землѝ подви́гнꙋти,** да со мно́ю просла́вѧтъ тѧ̀, чл҃вѣколю́бче.
И҆̀же во ст҃ы́хъ ѻ҆тє́цъ на́шихъ* равноапⷭ҇льныхъ кли́мента и҆ наꙋ́ма прее́мникъ бы́въ,* въ поще́нїи, моли́твѣ и҆ трꙋдѣ́хъ ст҃и́тельскихъ тѣ̑мъ подража́лъ є҆сѝ,* сегѡ̀ ра́ди тѧ̀ почита́емъ,** нїко́лае, подви́жниче ѻ҆́хридскїй.
Ѿ ст҃ы́ѧ горы̀, ѿ ѻ҆би́тели хиланда́рскїѧ,* ѿ свѣти́льника свѧтоса́ввскагѡ* свѣ́тъ житїѧ̀ и҆́ноческагѡ* въ се́рдцѣ твое́мъ возже́глъ є҆сѝ,** въ преда́нїи ст҃ы́хъ ѻ҆тє́цъ ᲂу҆твержда́ѧсѧ.
Бг҃оро́диченъ:
Радꙋ́йсѧ, ра́дость и҆ ᲂу҆тѣше́нїе* во ст҃ы́хъ і҆кѡ́нахъ и҆менова́ннаѧ,* ра́дꙋйсѧ, дще́ре црⷭ҇каѧ,* дѣ́вственныхъ дꙋ́шы цр҃ю̀ приводѧ́щаѧ,* ра́дꙋйсѧ, и҆́нокѡвъ держа́внаѧ застꙋ́пнице,** ра́дꙋйсѧ, хрⷭ҇тїа́нъ ᲂу҆пова́нїе.
Конда́къ, гла́съ г҃: Роди́выйсѧ въ ле́личѣ се́рбскомъ,* а҆рхїпа́стырь бы́въ во ѻ҆́хридѣ ст҃а́гѡ наꙋ́ма,* на престо́лѣ ст҃а́гѡ са́ввы въ жи́чи пра́вѡ пра́вивъ,* наро́дъ бж҃їй є҆ѵⷢ҇льски́мъ ᲂу҆че́нїемъ просвѣти́лъ є҆сѝ,* къ покаѧ́нїю и҆ любвѝ хрⷭ҇то́вой лю́ди приводѧ̀,* за хрⷭ҇та̀ и҆ страда́нїе въ даха́ꙋ претерпѣ́въ,* тогѡ̀ ра́ди просла́вленъ є҆сѝ,* ст҃и́телю нїко́лае,* но́вый ᲂу҆го́дниче бж҃їй.
І҆́косъ: Ѡ҆ рожде́нїи твое́мъ ма́лый ле́личь возвесели́сѧ,* ѡ҆ бл҃же́ннѣй же кончи́нѣ твое́й наро́ды землѝ воспла́кашасѧ.* тѣ́мже и҆ ѿ рꙋсѝ пѣ́нїе, къ тебѣ̀ простира́емое,* бл҃госе́рдїемъ прїимѝ, ст҃и́телю,* ты́ бо во дни̑ гоне́нїй и҆ бѣ́дъ* рꙋ́сь ст҃ꙋ́ю въ се́рдце твоѐ воспрїе́мъ,* ча̑да є҆ѧ̀ сло́вомъ проро́ческимъ ᲂу҆тѣша́ше,* и҆ моли́твою твое́ю сꙋ́дъ бж҃їй на млⷭ҇ть приклонѧ́ше,* сегѡ̀ ра́ди ны́нѣ со ст҃ы́мъ царе́мъ нїкола́емъ* и҆ съ ли́ки новомч҃никъ бл҃года́рнѡ тѧ̀ прославлѧ́емъ,* ст҃и́телю нїко́лае, но́вый ᲂу҆го́дниче бж҃їй.
Пѣ́снь з҃.
І҆рмо́съ: Ѻ҆́бразꙋ слꙋжи́ти мꙋсїкі́йскомꙋ согла́сїю созыва́ющꙋ лю́ди, ѿ пѣ́сней сїѡ́нскихъ пою́ще ѻ҆те́чески ѻ҆́троцы дв҃дѡвы, мꙋчи́телево разори́ша ѕлочести́вое велѣ́нїе, и҆ пла́мень въ ро́сꙋ преложи́ша, пѣ́снь воспѣва́юще: превозноси́мый ѻ҆тцє́въ и҆ на́шъ бж҃е, бл҃гослове́нъ є҆сѝ.
Оу҆слы́ши, гдⷭ҇и, ст҃и́телѧ твоего̀ нїкола́а, со всѣ́ми ст҃ы́ми нбⷭ҇ныѧ се́рбїи за наро́дъ тво́й молѧ́щасѧ, и҆ сп҃си́ ны, пою́щыѧ: превозноси́мый ѻ҆тцє́въ и҆ на́шъ бж҃е, бл҃гослове́нъ є҆сѝ.
Сїѡ́не се́рбскїй, жи́че ст҃а́ѧ, ко́ль красны̑ въ тебѣ̀ стопы̑ бл҃говѣ́стника, нїкола́а златослове́снагѡ, бл҃говѣствꙋ́юща ми́ръ хрⷭ҇то́въ и҆ пою́ща: превозноси́мый ѻ҆тцє́въ и҆ на́шъ бж҃е, бл҃гослове́нъ є҆сѝ.
И҆́стиннаго па́стырѧ и҆ ѻ҆тца̀ всенаро́днаго разꙋмѣ́ша тѧ̀ лю́ди, ст҃ы́й влады́ко, ꙗ҆́кѡ ѻ҆́вцы, къ тебѣ̀ собира́шасѧ, свирѣ́ли и҆ гла́са па́стырскагѡ слꙋ́шающе, и҆ съ тобо́ю молѧ́щесѧ: превозноси́мый ѻ҆тцє́въ и҆ на́шъ бж҃е, бл҃гослове́нъ є҆сѝ.
Бг҃оро́диченъ:
Прест҃а́ѧ дв҃о превозноси́маѧ, ѡ҆брѣтѝ на́съ хрⷭ҇тꙋ̀, дра́хмꙋ поги́бшꙋю, слове́снице сла́дкаѧ, ѡ҆словесѝ наро́дъ є҆ди́номꙋ бг҃ꙋ слꙋжи́ти и҆ кла́нѧтисѧ, пою́ще: превозноси́мый ѻ҆тцє́въ и҆ на́шъ бж҃е, бл҃гослове́нъ є҆сѝ.
Пѣ́снь и҃.
І҆рмо́съ: Въ пла́мени ѻ҆́гненнѣ горѧ́щїѧ пе́щи, сохра́ньшаго дѣ́ти, и҆ во зра́цѣ а҆́гг҃ла снизше́дшаго къ ни́мъ, по́йте гдⷭ҇а, и҆ превозноси́те є҆го̀ во вѣ́ки.
Рыда́нїѧ и҆ пла́ча и҆спо́лнисѧ се́рдце твоѐ, ст҃и́телю, є҆гда̀ па́ки сожжена̀ бы́сть землѧ̀ се́рбскаѧ, и҆ бы́ша ме́ртви человѣ́цы на лицы̀ землѝ, ꙗ҆́кѡ сѣ́но созадѝ жнꙋ́щагѡ, и҆ не бы́сть собира́ющагѡ.
И҆з̾ затво́ра темни́чнагѡ поꙋча́лъ є҆сѝ лю́ди твоѧ̑: пока́йтесѧ и҆ па́ки ко хрⷭ҇тꙋ̀ ѡ҆брати́тесѧ, би́серꙋ ва́шемꙋ и҆ ка́меню драгоцѣ́нномꙋ, и҆́же пꙋ́ть въ нощѝ ѡ҆зарѧ́етъ, прелага́етъ и҆́го въ свобо́дꙋ, и҆ ско́рбь во ѿра́дꙋ: по́йте и҆ превозноси́те є҆го̀ во вѣ́ки.
Нїко́лае ст҃и́телю, се́рбїи ᲂу҆ста̀ бг҃ода̑ннаѧ, та́кѡ въ ско́рби взыва́лъ є҆сѝ: пощадѝ, пощадѝ, бж҃е, ѡ҆ста́нокъ люде́й твои́хъ, да не когда̀ рекꙋ́тъ ꙗ҆зы́цы: гдѣ̀ є҆́сть бг҃ъ се́рбскїй; вскꙋ́ю не и҆зба́витъ и҆́хъ ѿ рꙋ́къ на́шихъ ны́нѣ;
Трⷪ҇ченъ:
Ѻ҆́ч҃е, сн҃е и҆ дш҃е ст҃ы́й, въ него́же вѣ́ровахомъ, въ є҆гѡ́же и҆́мѧ крести́хомсѧ, пра́веденъ є҆сѝ, бж҃е, ѡ҆ всѣ́хъ, ꙗ҆̀же сотвори́лъ є҆сѝ на́мъ, но пощадѝ и҆ сп҃сѝ лю́ди твоѧ̑, пою́щыѧ и҆ превозносѧ́щыѧ тѧ̀ во вѣ́ки.
Бг҃оро́диченъ:
Шꙋмѧ́щꙋ весе́лїю, лицѐ твоѐ сокрыва́еши, не взыскꙋ́етъ бо тѧ̀ весе́лїе, но во мра́цѣ мꙋ́ки и҆ ско́рби по́мощь твою̀ ꙗ҆влѧ́еши, мт҃и ꙗ҆вле́нице, ро́ждшаѧ на́мъ бг҃а и҆ чл҃вѣ́ка, є҆го́же пое́мъ и҆ превозно́симъ во вѣ́ки.
Пѣ́снь ѳ҃.
І҆рмо́съ: Тебѐ свѣ́тлꙋю свѣщꙋ̀, и҆ мт҃рь бж҃їю, пречꙋ́днꙋю сла́вꙋ, и҆ вы́шшꙋю всѣ́хъ тва́рей, пѣ́сньми велича́емъ.
Е҆ѵро́пꙋ и҆ а҆ме́рикꙋ а҆пⷭ҇льскими стопа́ми проше́лъ є҆сѝ, и҆ писа́ньми твои́ми мі́ръ ѡ҆богати́лъ є҆сѝ, ѻ҆́тче, правосла́внагѡ бг҃осло́вїѧ премі́рное бога́тство ꙗ҆влѧ́ѧ.
Но́щь безбо́жїѧ мимои́де, покаѧ́нїѧ и҆ сп҃се́нїѧ де́нь прибли́жисѧ, да просвѣти́тсѧ дне́сь хрⷭ҇толюби́вый ро́дъ се́рбскїй, въ пра́зднествѣ возвраще́нїѧ своегѡ̀ ст҃и́телѧ, бл҃гослове́нїе па́ки всѣ̑мъ подаю́ща.
І҆ерⷭ҇ли́ма го́рнѧгѡ жи́телю, нїко́лае свѣтоѧвле́нне, нбⷭ҇нꙋю лїтꙋргі́ю со ст҃ы́ми дне́сь соверша́ѧ, помѧнѝ и҆̀же въ се́рбїи и҆ повсю́дꙋ вѣ̑рныѧ, серде́чною любо́вїю тѧ̀ велича́ющыѧ.
Бг҃оро́диченъ:
Е҆́же є҆́сть пи́сано, соверши́тсѧ: непра́вда пра́вдою потреби́тсѧ, наро́дъ хрⷭ҇то́въ сла́вою просвѣти́тсѧ, нб҃о съ земле́ю соедини́тсѧ, сла́дкꙋю пѣ́снь тебѣ̀, застꙋ́пнице, воспѣва́юще, и҆ сн҃а твоего̀ немо́лчнѡ велича́юще.
Свѣти́ленъ: Нбⷭ҇ныѧ се́рбїи ᲂу҆краше́нїе,* лꙋче пресвѣ́тлагѡ сл҃нца хрⷭ҇та̀,* сло́вомъ є҆ѵⷢ҇льски́мъ мі́ръ ѡ҆зари́вшаѧ,* ст҃и́телю нїко́лае, и҆з̾ тьмы̀ грѣхо́вныѧ ны̀ и҆схитѝ.
Сла́ва, и҆ ны́нѣ, пра́здника и҆лѝ бг҃оро́диченъ:
Е҆ди́наѧ любы̀ моѧ̀,* мт҃и нбⷭ҇наѧ,* свободи́ мѧ ѿ рабо́ты мі́рꙋ, до́лꙋ влекꙋ́щемꙋ,* и҆ ᲂу҆чини́ мѧ въ рабѣ́хъ твои́хъ.
На хвали́техъ стїхи̑ры на ѕ҃: пра́здника г҃, и҆ ст҃и́телѧ г҃, гла́съ є҃. Подо́бенъ: Ра́дꙋйсѧ:
Ра́дꙋйсѧ, ст҃и́телей сла́во,* свѧтоса́ввскихъ завѣ́тѡвъ храни́телю,* сщ҃е́нникѡвъ и҆ мона́хѡвъ наста́вниче,* всенаро́дный па́стырю и҆ ᲂу҆чи́телю,* се́рбїи ст҃ы́ѧ немѡ́лчнаѧ ᲂу҆ста̀,* покаѧ́нїѧ ѻ҆гнезра́чный проповѣ́дниче,* мі́ръ писа̑нїи твои́ми ѡ҆богати́вый,* къ црⷭ҇твїю нбⷭ҇номꙋ лю́ди пꙋтево́дствꙋѧ,* молѝ ѡ҆ на́съ, ст҃и́телю нїко́лае,** да ца́рствїемъ земны́мъ не прельсти́мсѧ.
Ра́дꙋйсѧ, ми́лости сокро́вище,* любвѐ хрⷭ҇то́вы ѕвѣздо̀ негаси́маѧ,* во мра́цѣ ско́рби стра́ждꙋщымъ сїѧ́ющаѧ,* си́рыхъ и҆ ни́щихъ пита́телю,* вдо́въ и҆ ᲂу҆бо́гихъ прибѣ́жище,* ѻ҆би́димыхъ застꙋ́пниче,* ѻ҆би́дѧщихъ и҆справле́нїе,* моли́твенниче те́плый ѡ҆ наро́дѣ твое́мъ,* молѝ хрⷭ҇та̀ бг҃а,* ст҃и́телю нїко́лае,* се́рдце ми́лостиво и҆ на́мъ стѧжа́ти,** да млⷭ҇ти въ де́нь сꙋ́дный сподо́бимсѧ.
Ра́дꙋйсѧ, се́рбїе вѣ́рнаѧ,* ча̑да къ весе́лїю созыва́ющи,* въ возвраще́нїи чтⷭ҇ны́хъ моще́й* нїкола́а твоегѡ̀ ст҃и́телѧ,* се́ бо прїи́де, бл҃гослове́нїе подаѧ̀,* и҆ и҆зоби́лїе дарова́нїй дх҃о́вныхъ,* вражды̑ ᲂу҆мирѧ́ѧ,* скѡ́рбныѧ ᲂу҆тѣша́ѧ,* хрⷭ҇та ᲂу҆молѧ́ѧ** низпосла́ти на́мъ ве́лїю млⷭ҇ть.
Сла́ва, гла́съ є҃:
Воскрⷭ҇нїѧ хрⷭ҇то́ва бл҃говѣ́стника,* ди́внагѡ нїкола́а* па́ки ᲂу҆слы́шимъ гла́съ:* є҆да̀ не слы́шасте,* и҆з̾ раѧ̀ и҆згна́ннїи,* ꙗ҆́кѡ воскреси́тель на́шъ* ѻ҆бѣтова́нїе и҆спо́лни,* бг҃ъ бо на землѝ ꙗ҆ви́сѧ,* да на́съ на нб҃са̀ возведе́тъ,* и҆ принесѐ рабѡ́мъ свобожде́нїе,* мє́ртвымъ живо́тъ,* болѧ́щымъ здра́вїе,* печа̑льнымъ ра́дость,* ѡ҆жесточє́ннымъ любо́вь,* дре́ва жи́зни плоды̀ сладча́йшыѧ.* а҆́ще же слы́шасте,* почто̀ печа́льни є҆стѐ;* гдѣ̀ є҆́сть крилѣ̑ дꙋ́шъ ва́шихъ,* бг҃олю́бїе и҆ братолю́бїе;* и҆́миже па́ки вознести́сѧ и҆́мамы* во ѻ҆ч҃ество̀ безсме́ртное** гдⷭ҇а воскреси́телѧ.
И҆ ны́нѣ, пра́здника.
Славосло́вїе вели́кое. И҆ ѿпꙋ́стъ.
На лїтꙋргі́и. Бл҃жє́нна пра́здника пѣ́снь рѧдова́ѧ, и҆ ѿ канѡ́на ст҃а́гѡ пѣ́снь г҃-ѧ и҆ ѕ҃-ѧ. Прокі́менъ пра́здника, и҆ ст҃а́гѡ, гла́съ а҃: Оу҆ста̀ моѧ̑ возглаго́лютъ премꙋ́дрость,* и҆ поꙋче́нїе се́рдца моегѡ̀ ра́зꙋмъ. А҆пⷭ҇лъ днѐ, и҆ ст҃а́гѡ ко є҆вре́ємъ, зача́ло ти҃і. Е҆ѵⷢ҇лїе днѐ, и҆ ст҃а́гѡ ѿ і҆ѡа́нна, зача́ло л҃ѕ. Прича́стный: Въ па́мѧть вѣ́чнꙋю бꙋ́детъ пра́ведникъ, ѿ слꙋ́ха ѕла̀ не ᲂу҆бои́тсѧ.
Тропа́рь, гла́съ и҃:
Златоꙋ́стый проповѣ́дниче воскрⷭ҇шагѡ хрⷭ҇та̀,* пꙋтеводи́телю ро́да се́рбскагѡ крⷭ҇тоно́снагѡ въ вѣка́хъ,* бл҃гогла́снаѧ лѵ́ро дх҃а ст҃а́гѡ,* сла́во и҆ любы̀ мона́хѡвъ, ра́дованїе и҆ похвало̀ сщ҃е́нникѡвъ,* ᲂу҆чи́телю покаѧ́нїѧ, всенаро́дный влады́ко,* предводи́телю бг҃омо́льна во́инства хрⷭ҇то́ва,* ст҃ы́й нїко́лае се́рбскїй и҆ всеправосла́вный,* со всѣ́ми ст҃ы́ми нбⷭ҇ныѧ се́рбїи молѝ є҆ди́нагѡ чл҃вѣколю́бца** дарова́ти ми́ръ и҆ є҆дине́нїе ро́дꙋ на́шемꙋ.
Конда́къ, гла́съ г҃:
Роди́выйсѧ въ ле́личѣ се́рбскомъ,* а҆рхїпа́стырь бы́въ во ѻ҆́хридѣ ст҃а́гѡ наꙋ́ма,* на престо́лѣ ст҃а́гѡ са́ввы въ жи́чи пра́вѡ пра́вивъ,* наро́дъ бж҃їй є҆ѵⷢ҇льски́мъ ᲂу҆че́нїемъ просвѣти́лъ є҆сѝ,* къ покаѧ́нїю и҆ любвѝ хрⷭ҇то́вой лю́ди приводѧ̀,* за хрⷭ҇та̀ и҆ страда́нїе въ даха́ꙋ претерпѣ́въ,* тогѡ̀ ра́ди просла́вленъ є҆сѝ,* ст҃и́телю нїко́лае,** но́вый ᲂу҆го́дниче бж҃їй.
Велича́нїе:
Велича́емъ тѧ̀,* ст҃и́телю ѻ҆́ч҃е нико́лае* и҆ чти́мъ ст҃ꙋ́ю па́мѧть твою̀,* ты бо мо́лиши за на́съ** хрⷭ҇та̀ бг҃а на́шего.