Ве́чер

На Го́споди, воззва́х: стихи́ры, глас 8: Подо́бен: Что вы нарече́м;

Что тя, о́тче Космо́, возымену́ем; ꙳ ревни́теля ве́ры, Це́ркви побо́рника, ꙳ еретика́ обличи́теля, ꙳ я́ко да́же по сме́рти Правосла́вия еси́ храни́тель ꙳ и сла́вы Бо́жией яви́тель. ꙳ Тем у́бо мо́лим тя, ꙳ преподо́бне о́тче Космо́, ꙳ пода́ждь нам ве́ру тве́рду во е́же спасти́ся нам.

Что тя нарече́м, богомудре Космо́; ꙳ стро́гий по́стник, я́ко ду́хом обузда́л еси́ стра́сти, ꙳ ка́мень ве́ры, я́ко диа́вольския ко́зни небре́гше, ꙳ воору́жься моли́твою, я́ко щито́м, ꙳ подви́жник усе́рднейший, ꙳ мона́шествующих о́браз и а́нгелом равноче́стен. ꙳ Преподо́бне о́тче, ꙳ огради́ нас искуше́ний лука́ваго, ꙳ пода́ждь нам сквозе́ я неколеби́мо в ве́ре проити́ ꙳ во е́же спасти́ся нам.

Что тя провеща́ем, о́тче Космо́; ꙳ исцеле́ний пода́теля и Христо́ва уго́дника, ꙳ я́ко по моли́твам твои́м ꙳ разсла́бленному подае́тся хожде́ние, ꙳ скорбя́щему утеше́ние, ꙳ и́щущему разуме́ние. ꙳ Ны́не, а́нгельски пожи́вше, ꙳ в раи́ со а́нгелы обита́яй, ꙳ моли́ Го́спода за ны во е́же спасти́ся нам.

И́ны стихи́ры Пресвяты́я Богоро́дицы, глас и подо́бен то́йже. А́ще аллилу́ия, пою́тся си́и стихи́ры пре́жде:

Стра́нно та́инство, Чи́стая, ꙳ безсе́меннаго Твоего́ рождества́, Де́во, и ужа́сно, ꙳ превосходя́ вели́чеством вся́ку мы́сль челове́чу: ꙳ Его́же бо не терпя́т зре́ти многоочи́тии ꙳ и чи́ни вси святы́х А́нгел трепе́щут, ꙳ нам пло́тию родила́ еси́, ꙳ не отсту́пльша же О́тча Существа́. ꙳ Сла́вим ро́ждшую Тя, Богоневе́сто.

Кому́ уподо́билася еси́, окая́нная, ꙳ к покая́нию ника́коже возни́чущи, душе́, ꙳ и огня́ не ужаса́ешися, злых жду́щаго? ꙳ Воста́ни, и еди́ну к заступле́нию ско́рую призови́, и возопи́й: ꙳ Де́во Ма́ти, моли́ Твоего́ Сы́на и Бо́га на́шего ꙳ изба́вити мя сете́й льсти́ваго.

О́гнь ро́ждши нестерпи́мый, ꙳ попаля́ющь грехи́и ороша́ющь ве́рныя, ꙳ ве́щная безме́рных мои́х, Пренепоро́чная Чи́стая, согреше́ний ꙳ попали́ моли́твами Твои́ми ꙳ и росо́ю иста́явшую страстьми́ ду́шу мою́ прохлади́, ꙳ я́ко да Твою́ велегла́сно ми́лость и си́лу велича́ю, раб Твой.

Сла́ва, и ны́не, Богоро́дичен, глас и подо́бен то́йже:

Всех заступле́ние, Влады́чице, ꙳ пучи́ною обурева́емому мне тьмы́ ꙳ и лю́тых жития́ треволне́ньми погружа́ему ми при́сно ꙳ ка́плю ми́лости Твоея́ низпосли́, ꙳ и ру́ку по́мощи Твоея́ пода́ждь ми, ꙳ и ча́сти сподо́би мя избра́нных и пра́ведных, ꙳ я́ко бе́здну ро́ждшая, Человеколю́бца.

А́ще ли среда́ или́ пято́к: Слава и ны́не, Крестобогоро́дичен, глас и подо́бен то́йже:

А́гница А́гнца я́ко ви́де, на дре́ве ꙳ просте́рта во́лею Кре́стнем, ꙳ вопия́ше ма́терски, боле́знующи с пла́чем: ꙳ Сы́не Мой, что стра́нное сие́виде́ние? ꙳ Всем живо́т дая́й я́ко Госпо́дь, ꙳ ка́ко умерщвля́ешися, Долготерпели́ве, ꙳ земны́м пода́й воскресе́ние? ꙳ Сла́влю Твое́мно́гое, Бо́же Мой, снизхожде́ние.

На стихо́вне Окто́иха Глас 2, подо́бен: Егда́ от дре́ва; Стих: Честна́ пред Го́сподем ꙳ смерть преподо́бных Его́.

Сло́вом боже́ственным пита́емь ꙳ возрасти́л еси́ дух сво́й в ве́ре, ꙳ нощь жите́йскую без поро́ка преше́л еси́ ꙳ ко дво́ру Бо́га Вы́шняго. ꙳ Та́мо всели́лся еси́, ꙳ собесе́дуя свети́лам Це́ркви, ꙳ тем и нас све́ту Сло́ва научи́ ꙳ да им ны́не укрепля́еми ꙳ исто́чнику Того́ прича́стницы сподо́бимся.

Сла́ва, глас 8:

Антио́хия днесь с патриа́рхом Григо́рием весели́тся, ꙳ зря́щи в себе́ ста́до мона́хов, ꙳ обстоя́щих честны́й гроб пречу́днаго ста́рца сего́, ꙳ от земли́ Палести́нстей прише́дшаго ꙳ и по днех зде во гра́де преста́вльшагося, ꙳ духо́вно веселя́щихся и пра́здственно торжеству́ющих, глаго́лющих: ꙳ ра́дуйся, о́тче всеблаги́й, ꙳ посто́м и моли́твою просия́вый ла́вру Фара́нскую, ꙳ ра́дуйся, свети́льниче светлый, ꙳ и́же просвеща́еши ве́рных, ꙳ ра́дуйся, о́тче Космо́, ꙳ днесь преста́вился еси́ко Го́споду, ꙳ Ему́же моли́ся о нас, ꙳ благоче́стно па́мять твою́ пра́зднующих, ꙳ во еже укрепи́ти ны в ве́ре Правосла́вней, ꙳ я́ко да, до́бре сконча́вше жизнь свою́, ꙳ дерзнове́ние полу́чим в день Стра́шнаго Испыта́ния.

И ны́не, Богоро́дичен или́ Крестобогоро́дичен:

Тя ви́дящи пригвожда́ема на Кресте́ Иису́се, ꙳ и стра́сти прие́млюща во́лею, ꙳ Дева и Мати Твоя, Влады́ко, ꙳ увы́ Мне, вопия́ше, Ча́до сла́дкое, ꙳ ра́ны непра́ведно ка́ко терпи́ши, ꙳ Врачу́, исцели́вый челове́ческое неможе́ние, ꙳ и от тли всех изба́вивый милосе́рдием Твои́м.

А́ще пое́м Бог Госпо́дь, тропа́рь: глас 1:

Пусты́нный жи́тель , и в телеси́ а́нгел, ꙳ и чудотво́рец яви́лся еси́, богоно́се о́тче наш Космо́: ꙳ посто́м, бде́нием, моли́твою небе́сная дарова́ния прии́м, ꙳ исцеля́еши неду́жныя, и ду́шы ве́рою притека́ющих ти, ꙳ сла́ва Да́вшему ти кре́пость, ꙳ сла́ва Венча́вшему тя, ꙳ сла́ва Де́йствующему тобо́ю всем исцеле́ния.

У́тро

Кано́на Окто́иха два, пе́рвый на 6 со ирмосо́м, вторы́й на 4 и свято́му еди́н на 4

Кано́н свято́му, глас 2, его́же краегране́сие: Восхвалю́ богому́драго Косму́ отше́льника.

Песнь 1 Ирмо́c: Гряди́те, лю́дие, ꙳ пои́м песнь Христу́ Бо́гу, ꙳ разде́льшему мо́ре, и наста́вльшему лю́ди, ꙳ я́же изведе́ из рабо́ты Еги́петския, ꙳ я́ко просла́вися.

Влады́ко Го́споди, недосто́йнеи устне́ мои́ отве́рзи и о́блак неве́дения моего́ отгони́, просвети́ луче́м светозаре́ния во е́же воспе́ти досточе́стно па́мять уго́дника Твоего́ Космы́ отше́льника, в ла́вре Фара́нстей подвиза́вшагося, ра́достию вопию́щаго: Го́сподеви пое́м, сла́вно бо просла́вися.

Очеса́ моя́ возведя́ к тебе́, ны́не песнь приношу́ ти смире́нно, о́тче Космо́, в Палести́нстей земле́ просия́вшему; ты бо плотско́е нача́ло боже́ственному премени́л еси́, сла́вяй Христа́ и взыва́яй: Помо́щник и Покрови́тель бысть мне во спасе́ние.

Све́тлость ве́ры, стро́гий по́стниче и све́дче Сло́ва боже́cтвеннаго яви́лся еси́, о́тче Космо́; те́мже мы, с весе́лием пра́зднующе па́мять того́, мо́лимтися Го́споди Бо́же Наш, просла́влен бо во святы́х еси́, Ди́вен, сла́вно творя́й чудеса́.

Богоро́дичен:

Хвалу́ Тебе́ воспое́м, Богоро́дице, Со́лнце бо спасе́ния и Свет нетле́ния преесте́ственно родила́ еси́, зако́нов кроме́ есте́ственных; Того́, я́ко Ми́лостива, моли́, Пренепоро́чная, презрети на́ша согреше́ния и спасти́ нас, вопию́щих Ему́: пои́м Го́сподеви, сла́вно бо просла́вися.

Песнь 3 Ирмо́с: На ка́мени мя ве́ры утверди́в, ꙳ разшири́л еси́ уста́ моя́ на враги́ моя́, ꙳ возвесели́бося дух мой, внегда́ пе́ти: ꙳ несть свят, я́коже Бог Наш, ꙳ и несть пра́веден, па́че Тебе, Го́споди.

В ла́вру Пи́рги восше́д проси́ти отве́тствия а́ввы Фео́фила, егда́ измышля́ше о словесе́ Господне́м, диа́вол же прети́ пути его́; ему́ идя́щу, наведе́ зми́я, пресека́ющаго путь его́; той же безбоя́зненно продолжа́ше путь, храни́мый си́лою Бо́жиею, я́ко есть пи́сано: Госпо́дь не́мощна сотвори́ супоста́та его́, Госпо́дь Свят.

А́ки врата́ сквозе́ зми́я проиды́й, вре́да вся́каго изба́вися, а́ввы Фео́фила дости́же и отве́т улучи́; я́ко два меча́ суть два труда́ богоуго́дная – труд жите́йский и труд моли́твенный. Господь же Наш, Ты еси́, Дая́й моли́тву моля́щемуся, и Благословля́яй ле́та пра́веднаго.

Лу́ком поста́ неуста́йнаго и стре́лами непреста́нней моли́твы изгна́ от себе́ род лука́вый, потщи́лся еси́ соблюсти́ сло́во и зако́н Христо́в; разшири́л еси́ в себе́ уста́ на врази́ твоя́, внегда́ пе́ти: несть свят, я́ко Госпо́дь, и несть пра́веден, я́ко Бог наш.

Богоро́дичен:

Ю́зам вражиим прети́ши окова́ти нас, ши́рше ви́димаго земна́го бытия́ простира́я покро́в Свой, Влады́чице, челове́ческаго ро́да Храни́тельнице, благослове́н еси́ Сын твой, Его́же моли́ о проще́нии на́шем, да вмени́т нам моле́ние сие́ со тща́нием на́шым и покая́нием и да не осудит нас судо́м пра́ведным, но да поми́лует по вели́цей Свое́й ми́лости.

Седа́лен, глас 4:

Све́тлостию ве́ры и де́тельным све́том ꙳ яви́лся еси́ равноа́нгелен на земли́ вои́стинну, ꙳ Космо́ преподо́бне, ꙳ му́жески кре́пкое ума́ твоего́ показа́л еси́, ꙳ посто́м ополче́ния стра́стная победи́в. ꙳ Те́мже по успе́нии твое́м, мо́лим тя, ꙳ я́ко жив сый, моли́ спасти́ся нам.

Сла́ва и ны́не, Богоро́дичен:

Де́во Всенепоро́чная, ꙳ Я́же Пресу́щнаго Бо́га рождшая, ꙳ со безпло́тными Того́ непреста́нно моли́, ꙳ оставле́ние прегреше́ний и исправле́ние жития́ ꙳ да́ти нам пре́жде конца́, ꙳ ве́рою и любо́вию пою́щым Тя по до́лгу, ꙳ Еди́на Всепе́тая.

Крестобогоро́дичен:

Де́во Всенепоро́чная, ꙳ Ма́ти Христа́ Бо́га, ꙳ ору́жие про́йде Твою́ пресвяту́ю ду́шу, ꙳ егда́ распина́ема ви́дела еси́ во́лею, ꙳ Сы́на и Бо́га Твоего́: ꙳ Его́же Благослове́нная моля́щи не преста́й, ꙳ проще́ние прегреше́ний нам дарова́ти.

Песнь 4 Ирмо́с: Услы́шах, Го́споди, сла́вное Твое́смотре́ние, ꙳ и просла́вих, Человеколю́бче, ꙳ непостижи́мую си́лу Твою́.

Боговдохнове́нными бесе́дами а́вву Васи́лия наставля́ше, де́сять лет во оби́тели Фара́нстей и́ночествующаго и па́мять о тебе́ сохра́ньшаго, проводнико́м боже́ственнаго Сло́ва яви́лся еси́, о́тче Космо́, со тре́петом собе́седнику взыва́ющу: Го́споди, услы́шах слух Твой и убоя́хся, сла́ва си́ле Твое́й, Го́споди.

О спасе́нии души́ творя́й бесе́ду, сло́во Афана́сия Вели́каго в той тебе́ изглаго́лющу, рече́: свята́го Афана́сия изрица́ние внегда́ услы́шати или́ наити́ тебе́ в кни́зе не́кой, а́щели не и́маши ха́ртии, запиши́ то на ри́зе свое́й; та́ко, тре́петность а́ввы ко сло́ву спасе́ния памяту́я и о спасе́нии души́ свое́й помышля́я, ко Го́споду вопию́, и убоя́ся се́рдце мое́ от гла́са моли́твы усте́н мои́х.

Голе́мо естьчисло́ святы́хТвои́х, Щедрода́тельный Бо́же, в ко́е совше́л есть и преподо́бный Косма́, ны́не собесе́дуяй вели́ким отца́м и учи́телям Це́ркви; те́мже днесь аз о Го́споде возра́дуюся, возвеселю́ся о Бо́зе, Спа́се мое́м.

Богоро́дичен:

Оборо́нь напа́стей бесо́вских яви́лася еси́ нам, Богоро́дице Де́во, я́ко по рождестве́ Сы́на Твоего́ спасе́ние и наде́жду на живо́т ве́чный обрето́хом, и ны́не огражда́емся ко́зней лука́ваго Твое́ю по́мощию и засту́пничеством, те́мже прославля́ем Тя и Сы́на Твоего́, пою́ще: сла́ва си́ле Твое́й, Го́споди.

Песнь 5 Ирмо́с: Све́та Пода́телю и веко́в Тво́рче, Го́споди, ꙳ во све́те Твои́х повеле́ний наста́ви нас: ꙳ ра́зве бо Тебе́, ина́го бо́га не ве́мы.

Ма́ло вре́мене на земли́ иму́щь, еди́нощи пре́йде от Иерусали́ма в Антио́хию к патриа́рху Григо́рию, а́вве Васи́лию о́нде бы́вшу, и по не́колико днех Го́споду преста́вися та́мо; све́тло успе́ние твое́ бе, я́ко че́стно уже́ на земли́ пожи́л бы́ше, испо́лнил еси́, ко е́же проро́к Иса́ия взыва́ше: пра́вде научи́теся, живу́щии на земли́.

Успе́нию твоему́ два ме́сяцы мину́вшу, па́ки яви́ся ревни́телем ве́ры и храни́телем догма́тов церко́вных, возста́вшым от одра́ разсла́бленным уличи́ нече́стие епи́скопа, по́дле себе́ лежа́щаго, вопия́й: не прибли́жися и не прикосни́ся мне, ерети́че; поели́ку бо чу́дно ра́дуемся и восклица́ем: Го́споди, ра́зве Тебе́, ина́го не ве́мы.

Двана́десять лет лежа́щаго разсла́бленнаго, от одра́ возста́вшаго по моли́твам твои́м, уте́шил еси́, не еди́нощи ему́ в ско́рби приходи́вый и утеша́вый; те́мже во дни ско́рби на́шя, прииди́, собесе́дуй и уте́ши, преподо́бне о́тче Космо́, мы бо моли́твы твоя́ призыва́ем и и́мя Госпо́дне имену́ем.

Богоро́дичен:

Раболе́пие греху́, окая́нство и непотре́бство, я́же на вся́кий час явля́ем и тому́ иногда́да́же не стыди́мся, на́ше пре́зри, Пречи́стая Богоро́дице, и вонми́ моле́нию на́шему, ра́зве бо Тебе́ ины́я по́мощи не обрета́ем, и утеше́ния ина́го ра́зве Тебе́ не ве́мы.

Песнь 6

Ирмо́с: Глас глаго́л моле́бных от боле́зненныя, Влады́ко, ꙳ души́ услы́шав, от лю́тых мя изба́ви: ꙳ Еди́н бо еси́ на́шего спасе́ния Вино́вен.

А́вва Васи́лий, свято́му ста́рцу поклони́тися прише́дшу, узре́ ни́щаго у врат церко́вных, его́же возста́ви Госпо́дь от одра́ разсла́бленнаго по моли́твам преподо́бнаго; то́йже, трикра́ты гро́бу поклони́выйся, возвести́вся, е́же сотвори́ему́ Госпо́дь по моли́твам пресла́внаго Космы́, та́ко е́же есть пи́сано: возопи́х в ско́рби мое́й ко Го́споду Бо́гу моему́, и услы́ша мя.

Гро́бное ме́сто упокое́ния премени́ти жела́юще, а́вва Васи́лий возвести́вся, е́же ни́щий глаго́лати, патриа́рху Григо́рию; то́йже о свя́тости Космы́ разуме́вый, а́вве отвеща́: ни, поне́же не мо́жет ерети́к отщети́ти свято́му. О́нако, ны́не, сла́ву Го́споду воздаю́ще, глаго́лем: да прии́дет к Тебе́ моли́тва моя́ ко хра́му свято́му Твоему́.

Оста́вивый мирска́я, уясни́в ду́шу чи́стостию ве́ры, собесе́дник духо́вный и уте́шитель душ яви́лся еси́ да́же и по сме́рти, те́мже притека́ем тебе́ за утеше́нием и пи́щей духо́вней, Бо́га сла́вяще и восклица́юще: ели́ка обеща́х, возда́м Тебе́ во спасе́ние мое́, Го́сподеви.

Богоро́дичен:

Краеуго́льный Ка́мень отсече́ся от несеко́мыя горы́ Тебе́, Чи́стая, Сын Твой, бы́ти ве́рным основа́ние и неве́рным претыка́ние, помози́ ми да сози́жду на сем Ка́мени хра́мину ве́ры своея́ неруши́му и непреме́нну, да не паду́ся пред возве́янием ве́тра лука́вых помышле́ний и возлия́нием рек ко́зней диа́вольских, да неколеби́м ста́ну пред Го́сподем мои́м, внегда́ прии́де час успе́ния моего́.

Конда́к, глас 2

Чистото́ю душе́вною боже́ственно вооружи́вся ꙳ и непреста́нную моли́тву, яко копие́, вручи́в кре́пко, ꙳ ссекл еси́ де́монская ополче́ния, ꙳ Космо́ богому́дре, о́тче наш, ꙳ моли́ся непреста́нно о всех нас.

И́кос:

Пустынножи́тельствовав в оби́тели Фара́нстей, ꙳ высоты́ благоче́стия дости́гл еси́, ꙳ смире́нно пожи́вше и по успе́нии твое́м прославле́ние обрето́ше, ꙳ я́ко по моли́твам твои́м ꙳ дарова́ Госпо́дь исцеле́ние разсла́бленному ꙳ и Це́ркве Правосла́вней обличе́ние епи́скопа еретика́. ꙳ Сло́вом богоразу́мия всегда́ гото́вый притекти́ ꙳ и уте́шити прося́щих у тебе́, ꙳ ты бу́ди кре́пкий засту́пник пред Го́сподем за ны, ꙳ Космо́ богому́дре, ꙳ моли́ся непреста́нно о всех нас.

Песнь 7 Ирмо́с: Вети́и яви́шася о́троцы любому́дрейшии дре́вле: ꙳ от богоприя́тныя бо души́, богосло́вяще устна́ми поя́ху: ꙳ Пребоже́ственный отце́в и наш Бо́же, благослове́н еси́.

О о́тче Космо́, ты сном пра́ведным усну́л еси́, те́мже ны́не неусы́пным предста́телем соде́лался еси́, ко Го́споду моли́твами твои́ми, умири́ стра́сти на́шя и треволне́ния, тем и нас возводя́й к Бо́гу, вопию́щих: благослове́н еси́, Го́споди Бо́же оте́ц на́ших, препе́тый и превозноси́мый во ве́ки.

Страсте́й изба́вился еси́ тмы, скопце́м су́щи, не соде́лал в руку́ беззако́ния, ниже́ помы́сли на Го́спода лука́вая, поели́ку, е́же есть пи́сано, улучи́л еси́ ве́ры благода́ть избра́нну и предста́л еси́ пред Бо́гом ско́рый поспе́шник и засту́пник, воспева́яй: благослове́но И́мя сла́вы Твоея́ свято́е, препе́тое и превозноси́мое во ве́ки.

Моли́твенный свети́льник и ка́мень ве́ры яви́лся еси́, о́тче Космо́, льще́ния диа́вольскаго неприя́в, того́ прославля́юще в пе́нии духо́внем, Бо́гу возопии́м: благослове́н еси на тве́рди Небе́сней, препе́тый и превозноси́мый во ве́ки.

Богоро́дичен:

У́жас обуя́ет мя, внегда́ помышля́ю о преще́нии свое́м пути́ Бо́жию ходи́ти окая́нный, Ты же, возвы́сившая па́дшее естество́ челове́ческое, ны́не напра́ви мя на путь и́стинный да отлучу́ся аз ча́сти шу́ия на Суди́щи Стра́шнем, родила́ бо еси́ Вино́вника спасе́ния на́шего, Его́же нам пе́ти и превозноси́ти во вся ве́ки.

Песнь 8 Ирмо́с: О подо́бии зла́те небре́гше треблаже́ннии ю́ноши, ꙳ неизме́нный и живы́й Бо́жий о́браз ви́девше, среди́ огня́ воспева́ху: ꙳ осуществова́нная да пое́т Го́спода вся тварь, ꙳ и превозно́сит во вся ве́ки.

Откры́ очеса́ духо́вныя, у́ды теле́сныя умертви́, крест на ра́мена взят раче́нием жи́зни, шепта́ния диа́вольскаго небреже́, тем и ны́не к нестаре́ющейся сла́дости нетле́нней преста́вился еси, мы же благо́дарне воззове́м: благослови́те, вся дела́Госпо́дня, Го́спода, по́йте и превозноси́те Его́во ве́ки.

Ши́рым се́рдцем , еди́но со усты́ восхва́лим ангелоподо́бное житие́ твое́, за е́же обре́л еси́ благода́ть исцеле́ний по успе́нии твое́м, о́тче Космо́, сопричты́йся ли́ку небе́сных сил, засту́пник еси́ и моли́твенник зе́льный пред Го́сподем, тем у́бо воспое́м: благослови́те, вся дела́ Госпо́дня, Го́спода, по́йте и превозноси́те Его́во ве́ки.

Тро́ичен:

Еди́ницу Тро́ическую Неслива́емую и Неразде́льную Тро́ицу Сопресто́льную, я́ко в трие́х со́лнцах еди́ну зарю́же и све́тлость, просия́вшую нам преподо́бнаго Косму́чудотво́рца, воспое́м ны́не, глаго́люще: благослови́м Отца́, и Сы́на, и Свята́го Ду́ха Го́спода, по́йте и превозноси́те Его́ во ве́ки.

Богоро́дичен:

Льще́ния бесо́вскаго, небогоуго́дных дел и мы́слей отврати́мя, Богороди́тельнице, возведи́ ум мой к зре́нию за́поведей Сы́на Твоего́и Бо́га моего́, да до́брыми де́лы освящу́ся и в покая́ние со слеза́ми обращу́ся, воспева́я и превознося́ Творца́ моего́ и Созда́теля.

Песнь 9 Ирмо́с: От земноро́дных кто слы́ша таково́е; ꙳ или́ кто ви́де когда́, я́ко де́ва обре́теся во чре́ве иму́щая, ꙳ и безболе́зненно младе́нца ро́ждшая; таково́е Твое́чу́до, ꙳ и Тя, Чи́стая Богоро́дице, велича́ем.

Не успе́вше ка́пли сле́зныя проли́ти, уте́шителя и собесе́дника духо́внаго тя обрета́ем, о́тче Космо́, укрепи́в ве́ре на́шей, пода́й сил на пост и моли́тву, сопоспеши́ на́шему духо́вному укрепле́нию, во е́же сла́вити Го́спода, нам восклица́ющим: благослове́н Госпо́дь, Бог Изра́илев.

Истинноимени́тый сто́лпе показа́лся еси́, во оби́тели Фара́нстей ангелоподо́бному житию́ поревнова́л еси́, тем ны́не притека́ющим к тебе́с моли́твою и любо́вию да́руеши утеше́ние ума́ и умире́ние серде́чное, тебе́ же воспева́юще, благодари́м Го́спода и глаго́лем: Госпо́дь, Бог Изра́илев.

Ко́тва ве́ры бу́ди нам, о́тче Космо́, предстоя́й в вы́шних Христу́, укрепи́ свои́ми моли́твами нас, ны́не благоче́стно пра́зднующих па́мять твою́, бу́ди нам засту́пник, неотсту́пный наста́вник, оте́ческий води́тель и корми́ло на пути́ спасе́ния, я́ко да воспое́м неумо́лчно Христа́ Бо́га на́шего, взыва́юще: благослове́н Госпо́дь, Бог Изра́илев.

Богоро́дичен:

Ангелоимени́та еси́, бо вы́щши херуви́м и серафи́м яви́ся, Пресвята́я Де́во, прия́вши Еди́на Невмести́маго Бо́га, Нескве́рная, и ны́не еси́ скоре́йшая Предста́тельнице и Засту́пнице пред Бо́гом за род челове́ческий, те́мже Тя, Пречи́стая, пе́сньми ублажа́ем.

Свети́лен Окто́иха. Сла́ва, свети́лен свято́му:

Посто́м и моли́твою возде́лал еси́ ду́шу свою́, за зе́льный труд улучи́лся еси́ бы́ти зерца́ло боже́ственнаго осия́ния, подая́ цельбы́ и утеша́я в ско́рби, свети́льниче мона́хов, Космо́ богому́дре.

И ны́не, Богоро́дичен:

И́стинно Богоро́дицу Тя испове́дуем, Влады́чице, Тобо́ю спа́сшиися, и́бо Бо́га неизрече́нно родила́ еси́, Кресто́м разруши́вшаго смерть, к Себе́ же привле́кша преподо́бных собо́ри, с ни́миже Тя, Де́во, восхваля́ем.

Крестобогоро́дичен:

На Кресте́ ви́дящи ви́сима Тя, Христе́, вопия́ше Чи́стая: ка́ко страсть прие́млеши Ты, стра́сти и неду́ги исцели́вый и ме́ртвых воскреси́вый; ка́ко по естеству́ Бог Сый смире́нно непрети́ши страда́нию; но Того́ страстьми́ от страсте́й нас изба́вити, моли́ся да улучу́ся и аз спасе́ния да при́сно восхваля́ю, я́коже и преподо́бных собо́ри Спаси́теля моего́.

На стихо́вне Окто́иха. Глас 2, подо́бен: Егда́ от дре́ва; Стих: Блаже́н муж, боя́йся Го́спода, ꙳ в за́поведех Его́ восхо́щет зело́.

А́нгельски житие́ пожи́в, ꙳ земна́я вся́ оста́вив, богому́дрия дости́гл еси́, ꙳ сло́вом Пра́вды науча́емь. ꙳ Не преста́й моля́ся о и́хже к Бо́гу приведы́й, ꙳ богоуго́дным житие́м просвети́вый, ꙳ святу́ю па́мять твою́ почитаю́щих.

Сла́ва, глас 6:

Ны́не возра́дуйся, ꙳ пусты́не Фара́нская свя́тая и боголюбе́зная, ꙳ я́ко израсти́вшая досточу́днаго уго́дника Христо́ва сего́, ꙳ его́же житие́м вку́пе со ины́ми освяти́лася еси́: ꙳ той бо просла́ви Бо́га свои́м доброде́тельным житие́м, ꙳ в животе́ ве́рно послужи́в Ему. ꙳ Сего́ ра́ди по преставле́нии и Бог просла́ви того́ ꙳ чудесы́ свои́ми богодарова́нными, ꙳ исцеле́ние и утеше́ние подава́яй чту́щим святу́ю па́мять его́. ꙳ Те́мже мы, уми́льно кла́няющеся и вопие́м ему́: ꙳ О, всеблаже́нне о́тче Космо́, ꙳ неотсту́пно моли́ся Христу́Бо́гу на́шему ꙳ испроси́ти нам ве́ру кре́пку ꙳ и душа́м на́шым мир и ве́лию ми́лость.

И ны́не, Богоро́дичен или Крестобогоро́дичен:

Всечи́стая я́ко ви́де Тя на кресте́ ви́сима, вопия́ше: ꙳ что стра́нное е́же ви́жду та́инство, Сы́не мой; ꙳ ка́ко на дре́ве умира́еши, ꙳ пло́тию пове́шеный, ꙳ живота́ Пода́телю.