Конда́къ по́лный въ недѣ́лю Ва́їй, гла́съ 6
Творецъ: Романъ Сладкопѣвецъ Церковнославянскій текстъ: Тріоди (два проімія и 1-й икосъ) и П. Мѵроносицкаго въ редакціи р. Б. Георгія
Прои́мий пе́рвый: На престо́ле на Небеси́, / на жребя́ти на земли́ носи́мый, Христе́ Бо́же, / А́нгелов хвале́ние и дете́й воспева́ние / прия́л еси́, зову́щих Ти: // благослове́н еси́, Гряды́й Ада́ма воззва́ти.
Прои́мий вторы́й: С ве́твьми воспе́вше пре́жде, / с древесы́ последи́ я́ша Христа́ Бо́га, неблагода́рнии иуде́е. / Мы же ве́рою непрело́жною при́сно почита́юще, / я́ко благоде́теля, вы́ну вопие́м Ему́: // благослове́н еси́, Гряды́й Ада́ма воззва́ти.
И́кос 1: Поне́же а́да связа́л еси́ Безсме́ртне, / и смерть умертви́л еси́, / и мир воскреси́л еси́, / с ва́иами младе́нцы восхваля́ху Тя, Христе́, я́ко победи́теля, / зову́ще Ти днесь: оса́нна Сы́ну Дави́дову. / Не ктому́ бо, рече́, закла́ни бу́дут младе́нцы, за Младе́нца Мари́ина, / но за вся младе́нцы и ста́рцы, Еди́н распина́ешися. / Не ктому́ на нас вмести́тся меч: / Твоя́ бо ре́бра прободу́тся копие́м. / Те́мже ра́дующеся глаго́лем: // благослове́н [еси́] гряды́й Ада́ма воззва́ти.
И́кос 2: Се Царь наш, / кро́ток и тих, на жребя́ти седя́й, / ско́ро прихо́дит пострада́ти и стра́сти умертви́ти. / Сло́во Сый – на безслове́снем, / слове́сныя хотя́ изба́вити. / И зде виде́ние бысть: / на седа́лищи жребя́те, И́же седя́й на Херуви́мех, / И́же вознесы́й иногда́ Илию́ на колесни́це о́гненней, / И́же обнищава́яй во́лею, естество́м бога́т Сый, / И́же немощству́яй хоте́нием, всех укрепля́я, зову́щих к Нему́: // благослове́н еси́, Гряды́й Ада́ма воззва́ти.
И́кос 3: Сио́н весь потрясе́ся, / я́коже Еги́пет пре́жде: / та́мо у́бо безду́шная, / зде же одушевле́нная, ходя́щу Ти Спа́се: / не я́коже Стра́шну Ти бы́ти, / Насади́тель ми́ра бо еси́, / но я́ко врага́ все прельще́ние разруша́яй, Творе́ц Сый всех, / изгоня́я того́ отвсю́ду, я́ко ца́рствуяй на вся́цем ме́сте. / И́доли язы́к падо́ша тогда́, / ны́не же их держа́щиися ниспроверга́ются, / слы́шаще младе́нец глас: // благослове́н еси́ гряды́й Ада́ма воззва́ти.
И́кос 4: Кто Сей есть? / Глаго́лаху неве́девшии во́лею, / Кто есть Сын Дави́дов, свободи́вый я́ от тли. / Еще́ ны́не разреша́ют Ла́заря, / не ве́дяще, Кто возста́ви того́. / Еще́ ны́не стра́ждут ра́мены носи́вшии его́, / и уже́ не ве́дят, Кто есть исхи́тивый того́ от сме́рти. / Еще́ не изы́де двора́ Иаи́рова воскреси́вый дщерь его́, / и ти́и име́ются отрече́ни. / Ве́дят же, не хотя́ще рещи́: // благослове́н еси́, Гряды́й Ада́ма воззва́ти.
И́кос 5: Неблагода́рнии беззако́нницы / измышля́ху неве́дение, / и́стинно не ве́дя Его́же хотя́ху уби́ти. / Не разумева́ху же сы́нове лжи, / я́ко не но́вая глаго́лют, но пре́жде бы́вшая обновля́ют. / И́же Моисе́я, и́хже изве́дшаго от Еги́пта, / а́бие отверго́шася, / и́хже Спа́сшаго от сме́рти, ны́не не позна́ша. / Не позна́ша Моисе́я зна́вшия тельца́: / отверго́шася Сего́ дру́зи Велиа́ра. / Тогда́: Что есть сие́? / Ны́не же реко́ша: // Кто Сей есть, Гряды́й Ада́ма воззва́ти?
И́кос 6: С ва́иями де́ти / воспева́ху Тя, Сы́на Дави́дова, зову́ще Ти: / Оса́нна, Го́споди: / умертви́л бо еси́ поноси́теля, / Голиа́фа мы́сленнаго. / Воспева́ху же того́ одоле́ния: / «Победи́ Сау́л со ты́сящами, Дави́д же со тьма́ми». / Се бысть вре́мя зако́на, по́слежде благода́ть Твоя́, Иису́се мой. / Зако́н бо я́ко Сау́л зави́дяй и гоня́й, / Дави́д же гони́мь, прие́млет благода́ть, / его́же Сын еси́ и Госпо́дь, // благослове́н Гряды́й Ада́ма воззва́ти.
И́кос 7: Со́лнце, све́та колесни́ца, / е́же рабо́тно Ти есть, / сия́ возни́ца блиста́юща / повину́ется Ти, я́ко Созда́телю и Бо́гу. / А́ще уго́дно бы́сть Ти осля́, / поклоня́юся благоутро́бию Твоему́: / мене́ бо ра́ди возле́гл еси́ Спа́се иногда́ во я́слех безслове́сных, / ны́не же возше́л еси́ на жребя́, име́яй не́бо престо́л Свой. / Та́мо а́нгели обстоя́ху я́сли, / зде же ученицы́ осля́ ведя́ху. / Тогда́ сла́ву, ны́не же слы́шал еси́: // благослове́н еси́, Гряды́й Ада́ма воззва́ти.
И́кос 8: Кре́пость Свою́ явля́еши, подъе́мля ску́дость, / нищеты́ бо о́браз есть возсе́сти на жребя́: / но я́ко Пресла́вен потря́сл еси́ Сио́н. / И ри́зы учени́к явля́ху простоту́, / но хва́льно бысть Ти дете́й пе́ние / и наро́д стече́ние, вопию́щих: «Оса́нна!», / е́же есть: И́же в вы́шних Сый, / спаси́, Всевы́шний, поми́луй нас уничиже́нных. / И́же прие́мый ва́ия, воззри́ на ны, Тебе́ зову́щия: // благослове́н еси́, Гряды́й Ада́ма воззва́ти.
И́кос 9: Ада́м, в снедь прие́м, / е́же не до́лжен бе, / долг сотвори́ нам, и́же и нам тяготи́т, / и да́же додне́сь истязу́еми есмы́, от него́ су́ще. / Не довле́ет Заимода́вец истяза́ти до́лжное, / но и ча́дом предстои́т, о́тчаго до́лга тре́буя, / и должника́ дом расхища́ет, до́ндеже прии́мет все. / Те́мже я́ко мо́щно есть, возглаго́лем вси: / И́же ве́дый я́ко обнища́хом зело́, / Сам Спа́се возда́ждь, // я́ко благослове́н еси́, Гряды́й Ада́ма воззва́ти. И́кос 10: Спасти́ всех прише́л еси́, / и свиде́тель есть проро́к Твой Заха́рия, / пропове́да бо Тя су́ща кро́тка, пра́ведна, спаса́я. / Изнемого́хом, победи́хомся, / отвсю́ду изгна́ни бы́хом. / Мне́хом Зако́н име́ти изба́вителя, / и той порабо́ти нас. / Проро́ки па́ки, / и ти́и оста́виша ны, оба́че с упова́нием. / Те́мже со детьми́ преклоня́ем Ти коле́на: поми́луй ны. / Ми́лостивне прие́мля ва́ия, / благоволи́ распя́тися, / раздери́ рукописа́ние: // благослове́н еси́, Гряды́й Ада́ма воззва́ти.
И́кос 11: О́ творе́ние руку́ Мое́ю, / отвеща́ Созда́тель вопию́щым, / ви́дя не́мощна Зако́на спасти́ тя, Аз приидо́х. / Не в Зако́не написа́ся [спасе́ние], / поне́же не возмо́же: / ниже́ во проро́цех, / суть бо созда́ние Мое́, я́коже еси́. / Мое́ бо есть е́же разреши́ти тя до́лга тяжча́йша. / Продае́мь есмь тебе́ ра́ди, и свобожда́ю тя. / Распина́емь есмь в тебе́ ме́сто, и ты не у́мреши. / Умира́ю, и тя учу́ вопи́ти: // благослове́н еси́, Гряды́й Ада́ма воззва́ти.
И́кос 12: Не [си́це] а́нгелы, / я́коже тебе́ ни́ща возлюби́х. / Сокры́х сла́ву, / и Сый бога́т, нищь яви́хся во́лею. / Мно́го тя возлюби́в, алка́х, жада́х, тебе́ ра́ди стражда́х. / Го́ры, стремни́ны, юдо́ли дубра́внии проидо́х, / взыску́я тя, заблу́дшаго овча́. / Бых Па́стырь, / да привлеку́ тя, гла́сом Мои́м взыва́я, / и последи́ возвращу́. / Тебе́ ра́ди хощу́ положи́ти ду́шу Свою́ / во е́же исхи́тити тя из руки́ во́лчия. / Вся терплю́, хотя́ тя бы́ти вопию́ща: // благослове́н еси́, Гряды́й Ада́ма воззва́ти. И́кос 13: По словесе́х же сих, / а́бие дела́ явля́ются. / Я́коже бо дости́гнув гра́да, / младе́нец пе́ние распали́ враго́в Его́. / Той же, возве́д о́чи Своя́, воззре́ у́бо к Сио́ну, / и плачь о нем составля́я, возопи́: / Возстени́, Иерусали́ме, / я́ко де́ти своя́ обре́л еси́ учи́тели отце́м, / я́ко ча́да своя́ на зло и лука́вство обраща́еши, / на бла́го же ниже́ ста́рцы своя́ подвиза́еши. / У́не тебе́ суть вопию́щии: // благослове́н еси́, Гряды́й Ада́ма воззва́ти.
И́кос 14: Ны́не бо взы́ду [к тебе́], и отри́ну тя, / не бо возненави́дев тя, / но я́коже обрето́х тя ненави́дя Мя и Моя́. / Вску́ю запреща́ют Ми кресто́м ча́да твоя́, / и́хже ра́ди я́коже хито́н мо́ре жезло́м раздра́х? / За сие́ ли гроб Ми стружа́т, / я́ко о́блак пода́х им осене́ние? / Ра́дуюся же, я́ко сих ра́ди приидо́х / и страда́ти хощу́, возлюби́в па́дшаго, / да и́же лю́бят Мя реку́т и возопию́т: // благослове́н еси́, Гряды́й Ада́ма воззва́ти.
И́кос 15: Сим о́бразом, / ви́дя жестосе́рдаго, И́же испыту́яй серде́чная, / ку́пно со детьми́ в храм вхо́дит, я́ко Сый Архиере́й. / Сын прихо́дит в дом Отца́ Своего́, / и изгоня́ет вон продаю́щия, ку́пно и купу́ющия, глаго́ля: / Ничто́ же зде да пребыва́ет, / прехо́дим бо отсю́ду / Аз и Оте́ц, [ку́пно и Дух], / и ме́ста и се́ни предугото́ваем, / и́мже благоче́стною любо́вию и тве́рдою ве́рою взыва́ющим: // благослове́н еси́, Гряды́й Ада́ма воззва́ти.
И́кос 16: Сы́не Бо́жий, Всесвяты́й, / воспева́ющим Тя и нас сопричти́, / и приими́ моле́ние раб Твои́х / я́коже иногда́ дете́й. / Поми́луй и́хже сотвори́л еси́, / и́хже и любя́й соше́л еси́. / Мир да́руй це́рквам Твои́м, обурева́емым от враг. / Низпосли́ же ми, Спа́се, отпуще́ние грех мои́х. / Пода́ждь ми е́же глаго́лати я́же Ти благоуго́дно, Бо́же мой, / да не в ле́ность ум мой претвори́т печа́ль. / Покажи́ мя добропло́дна, // я́ко благослове́н еси́, Гряды́й Ада́ма воззва́ти.