Во Александри́и еги́петстей, бысть не́кто презви́тер вели́кия це́ркве, и́менем А́рий, хитр сый кни́гам и имея́ глубину́ слове́с, вни́хже и глубину́ обре́т и во глубину́ злых впаде́ся, ему́же повеле́ Петр свяще́нноепи́скоп учи́ти лю́ди в це́ркви. Не по мно́зе же нача́ зло́е се́мя се́яти, глаго́ля вся тварь Сын Бо́жий есть, Христа́ же глаго́лаше не Единосу́щна Бо́гу, ни ра́вна Свято́му Ду́ху. Се уве́дав епи́скоп Петр, изгна́ его́ из це́ркве. А́рий же нача́ собо́рища сотворя́ти и учи́ти свое́й е́реси мно́ги.

Уве́дав же царь Константи́н, Це́рковь Бо́жию А́рием возмуще́ну, от всея́ вселе́нныя повеле́ собра́ти епи́скопы и в Нике́ю ско́ро приити́. Иде́же А́рий со единомы́сленики свои́ми приведе́н бысть, соше́дшимжеся отвсю́ду епи́скопом, число́м три́ста и осмьна́десять. И се́дшим с царе́м на престо́лех, и призва́ша А́рия со единомы́сленики свои́ми на собо́р, и повеле́ша ему́ глаго́лати своя́ уче́ния, и́миже льстя́ше мир. И той рече́ не искони́ бысть сло́во Бо́жие Сын, ни тем ви́димая сотвори́, но от небытия́ бысть, ни подо́бен есть Сын Отцу́, ни и́стинен естество́м, но созда́ние и тварь Сын Бо́гу рече́тся и неви́димь есть Оте́ц Сы́нови.

Бя́ху же и филосо́фи, и ри́тори мно́зи, зело́ гора́здии, в ни́хже бе Фео́дор филосо́ф. И той хи́тро разреша́ше А́рием глаго́лемая и на епи́скопы по А́рии кре́пко противля́шеся: бе бо и язы́ком речи́ст. Но да пока́жет Бог, я́ко не сло́вом бысть Ца́рство небе́сное, но си́лою, сотвори́бося тогда́ на собо́ре чу́до. Епи́скоп Ки́прский, и́менем Спиридо́н, прост сый и некни́жен сло́вом, хотя́ше пре́тися с фиософо́м. Епи́скопиже ве́дуще его́ некни́жна, браня́ху ему́, да не гре́шники пору́ган бу́дет. Он же не послу́шав их, но присту́пль к филосо́фу рече́: «Во и́мя Иису́са Христа́ послу́шай, ария́не. Бог еди́н есть, И́же не́бо и зе́млю сотвори́ и челове́ка созда́, и всю тварь сло́вом и ду́хом соста́ви. Сего́ у́бо и мы Сло́во, Сы́на Бо́жия ве́дуще, на́шего ра́ди спасе́ния напосле́док от Де́вы роди́ся, и распя́тием, и сме́ртию, и воскресе́нием свободи́вша род челове́чь, Его́же ча́ем хотя́ща приити́ суди́ти живы́м и ме́ртвым. Ве́руешили сим, о́ филосо́фе?». И вси и́же со А́рием ужа́сшеся умолко́ша. Се еди́но извеща́ филосо́ф: «Аз ве́рую ти, я́ко та́ко есть». Отвеща́ святы́й: «Воста́в после́дуй ми к це́ркви, и прии́меши зна́мение ве́ры Христо́вы». Филосо́ф же обрати́вся глаго́ла ко ученико́м свои́м: «Послу́шайте, о́ му́жи, досе́ле со тща́нием по А́рии пре́хся, сло́во к сло́ву прилага́я и тщи́ми словесы́ премага́х. Егда́ же сей ста́рец нача́т ми глаго́лати, си́ла вели́ка изоу́ст его́ исхожда́ше: не мого́ша словеса́ моя́ проти́витися си́ле Бо́жии. Кото́рый бо челове́к проти́витися мо́жет Бо́гу?». Вси бо ви́деша огнь изоу́ст Спиридо́ню исходя́щь, егда́ глаго́лаше Фео́дору: и та́ко бы́ша вси христия́не, и́же с Фео́дором филосо́фи и ри́тори, ра́зве А́рия духобо́рца, его́же препре́ша святи́и отцы́ отверго́ша и утверди́вше Христо́ву ве́ру, прокля́ша А́рия и его́ е́ресь.

Бя́хуже старе́йшины святы́м отце́м в собо́ре, Селиве́стр па́па ри́мский, Вит, и Вике́нтий, Митрофа́н от Византи́я, Алекса́ндр от Александри́и, Еуста́фий от Антиохи́и, Мака́рий от Иеросали́ма, и Нико́ла от Лики́и, Пафну́тий от Еги́пта. Се же бысть пе́рвый собо́р в Нике́и, святы́х оте́ц, три́ста и осмьна́десять, в двадеся́тное ле́то Константи́на царя́: и той заточи́ А́рия, и просла́виша Христа́ единосу́щна Отцу́ Бо́жия Сло́ва, пре́жде век рожде́на по глаго́лющему проро́ку: «Из чре́ва пре́же денни́цы роди́х тя, и в после́дняя от Де́вы, на́шего ра́ди спасе́ния вочелове́чшася». И та́ко ве́рующе, покланя́емся свято́му Его́ о́бразу, сла́вим в Тро́ице еди́ного Бо́га, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.