Во дни о́ны, Фили́пп сшед во град самари́йский, пропове́даше им Христа́. Внима́хуже наро́ди глаго́лемым от Фили́ппа единоду́шно, слы́шаще и ви́дяще зна́мения я́же творя́ше. Мно́зи же иму́ще ду́хи нечи́сты вопию́ще гла́сом ве́лием исхожда́ху. Мно́зи же разсла́блении и хроми́и исцели́шася. И бысть ра́дость ве́лия во гра́де том.
Толкова́ние Иси́дорово: Не апо́стол Фили́п и́же в двана́десяти счета́н, но еди́н от седмы́х и́же с до́блиим му́чеником нача́льника Стефа́ном счета́н быв на устрое́ние вдови́ц. Сей бо есть, и́же евну́ха крести́вый, и Си́мона на ве́ру наста́вив. «Вси бо разсе́яни бы́вше рече́ по страна́х иуде́йских и самари́йских, кроме́ апо́стол». Я́ко я́ве есть, я́ко апо́стол Фили́пп с про́чими апо́столы во Иеросали́ме бе. Фили́пп же крести́ у́бо и́же в Самари́и ве́ровавших. Петр же Иоа́нн су́щии апо́столы соше́дше от Иеросали́ма к ним, Ду́ха Свята́го благода́ть пода́ша. А́ще крести́л бы еди́н апо́стол, име́л бы и власть Ду́ха Свята́го подая́ния. Крести́т же то́чию я́коже учени́к, соверша́ют же благода́ть апо́столы, и́мже такова́го подая́ния власть дана́ бысть.
Су́щее: Муж же не́кий и́менем Си́мон, пре́жде бе во гра́де волхву́я, и удивля́я язы́к самари́йский, глаго́ля не́коего бы́ти себе́ вели́ка. Ему́же внима́ху от ма́ла да́же и до вели́ка, глаго́люще: «Се есть си́ла Бо́жия вели́кая». Внима́ху же ему́, за е́же дово́льно вре́мя волхвова́нии удивля́ти их.
Толкова́ние Златоу́стаго: Зри и друго́е искуше́ние Си́моново: глаго́ля бы́ти не́коего себе́. Ка́ко не умори́ша его́ я́коже Ана́нию и Сапфи́ру? Но я́коже дре́вле и́же в суббо́ту дрова́ собира́я , убие́н бысть в целому́дрие про́чиим, и ктому́ други́й то́йжде не пострада́ет - та́ко и ны́не. Вку́пеже исполня́шеся Христо́вым глаго́лемое: Я́ко прии́дут ло́жнии хри́сти и ло́жнии апо́столы о и́мени Мое́м.
Вопро́с: Зна́мениям вели́ким быва́емым, ка́ко Ду́ха не прия́ша?
Отве́т Златоу́ста: Оставле́ния Ду́ха прия́ша, а дар чудесе́м не прия́ша, я́ко не сребро́м, ниже́ лицеме́ром, но святы́м ве́рою прича́стие Свята́го Ду́ха дае́тся.
Су́щее: Егда́ же ве́роваша Фили́ппу благовеству́ющу, я́же о Ца́рствии Бо́жии и о и́мени Иису́с Христо́ве, креща́хуся му́жие же и жены́. Си́мон же и той ве́рова и кре́щься, бе же пребыва́я у Фили́ппа. Ви́дяже си́лы и зна́мения ве́лия быва́ема, ужа́сен дивля́шеся.
Толкова́ние Епифа́ния Ки́прскаго: Си́мон сей покры́вся, и той подо́бно от Фили́ппа крести́ся с про́чими, не ве́ры ра́ди, но я́ко да бу́дет и той тако́в. Вси же кроме́ его́ прия́ша вели́ких апо́стол прише́ствие, и тех рукоположе́нием прия́ша Дух Святы́й, поне́же апо́стол Фили́пп, слуга́ сый, не имя́ше рукоположе́ния власть е́же дая́ти Дух Святы́й. Зна́мением же вели́ким быва́емым, ка́ко Ду́ха Свята́го не прия́ша? Дух у́бо прия́ша, грехо́м оставле́ния, зна́мением же не прия́ша, ка́ко ви́дев Си́мон прии́де прося́. Почто́ не бе́яху прия́ли Дух Святы́й? Или́ я́ко Фили́пп предпочита́ше апо́столы, или́ я́ко не име́яше дарова́ние таково́, поне́же от седми́х бе. Си́лы бо прия́ша си́и е́же зна́мения твори́ти, а не Дух Святы́й подая́ти друзе́м: се же бо бе апо́столом изря́днейше. И не вси верхо́вни бя́ху, но Петр.
Су́щее: Слы́шавше же и́же во Иеросали́мех апо́столи, я́ко прия́т Самари́я сло́во Бо́жие, посла́ша к ним Петра́ и Иоа́нна, и́же ше́дше и помоли́шася о них, я́ко да прии́мут Дух Святы́й. Не у́бо бе ни на еди́ного же их сни́де, то́чию креще́ни бя́ху во и́мя Го́спода Иису́са. Тогда́ возложи́ша ру́це на ня и прия́ша Дух Святы́й.
Толкова́ние Аммо́ниево: Почто́же не прия́ша от Фили́ппа крести́вшиися Дух Святы́й, но пото́м егда́ помоли́стася о них Петр и Иоа́нн да́ста возложе́нием рук свои́х крести́вшимся Дух Святы́й? О́бщим бо и́менем и неразде́льным глаго́лет Писа́ние, я́ко возложе́нием рук святы́х апо́стол на ве́ровавшия восия́ Ду́ха Свята́го благода́ть. Не рече́ я́ко еди́ным то́чию Петро́м и Иоа́нном, но о́бщим именова́нием рек, совокупи́ Фили́ппа. Те́мже у́бо я́ко не худ сый, или́ недосто́ин Фили́пп пода́ти Дух Свят крести́вшимся от него́, -егда́ же и той зна́мение сотвори́ на исцеле́ния неду́г и изгна́ния бесо́в, - но я́ко не помоли́ся е́же бы́ти им сей, си́це мно́гащи помы́слив бы́ти им на по́льзу, я́ко еще́ неприли́чным су́щим к прия́тию Свята́го Ду́ха. Подоба́ет бо рещи́, я́ко множа́йша творя́ше Фили́пп Ду́хом Святы́м подвиза́емь, и ничто́же от себе́ творя́ше, не повеле́вшу ему́ а́нгелу или́ ду́ху. Я́коже и напре́д обря́щеши пи́саное, си́це глаго́ля: «А́нгел Госпо́день глаго́ла к Фили́ппу: воста́ни и иди́», «па́ки рече́ дух Фили́ппови», но подо́бне у́бо я́ко не подви́гся ду́хом, е́же не помоли́тися и возложи́ти им ру́ки, не приложи́ се от себе́ сотвори́ти, но пребы́сть ожида́я го́рний суд. Петр же и Иоа́нн тепле́йши су́ще и множа́йшее дерзнове́ние иму́ще, помоли́шася о них е́же прия́ти Дух Свят: два мно́жае еди́ного де́йствуют в моли́тве. Друзи́и же глаго́лют, я́ко сеѓо ра́ди Фили́пп не сведе́ Дух, я́ко дия́кон бе, то́кмо презви́терства же или́ епи́скопства досто́инства не име́яше, я́коже ученицы́ Госпо́дни.
Вопро́с: И ка́ко рече́ дия́кон сый крести́л есть?
Отве́т: Поне́же во оскуде́нии бе презви́терства в Самари́и, и еди́н Фили́пп то́чию бе гоне́ния ра́ди бы́вшаго, и разсе́яным всем бы́вшим. Подоба́ет же в ну́жди и дия́кону крести́ти, не су́щу презви́теру, я́коже его́ Дух Святы́й научи́, повеле́вшу ему́ е́же прибли́житися евну́ху. И а́ще не бы во́ля Бо́жия е́же сотвори́ти се, не бы по креще́нии Святы́м Ду́хом восхи́щен быв. Подо́бно же я́ко по креще́нии возложе́нием рук схо́дит моли́твою Дух Святы́й во и́мя Го́спода Иису́са Христа́ на креща́ющагося. Те́мже и да́же до ны́не то́йже чин си́це соблюда́ется.
Коне́ц толкова́нию.