Во дни о́ны, ви́дев Си́мон я́ко возложе́нием рук апо́стол дае́тся Дух Святы́й, принесе́ им сребро́ глаго́ля: Дади́те и мне власть сию́, да на него́же а́ще положу́ ру́це, прии́мет Дух Свят.

Толкова́ние Златоу́стаго: Зри Си́монову нечистоту́. Что же сребро́ прино́сит, и́бо не ви́де их име́ния ра́ди се творя́ще? И не бе неве́дения вещь, но искуша́ющу во осужде́ние вложи́ти их. Сего́ ра́ди отвеща́но бысть ему́: несть ча́сти, ни жре́бия в словеси́ сем и про́чая.

Су́щее: Петр же рече́ к нему́: «Сребро́ твое́ с тобо́ю да бу́дет в поги́бель, я́ко дар Бо́жий непщева́л еси́ сребро́м стяжа́ти. Несть ти ча́сти, ни жре́бия во словеси́ сем, и́бо се́рдце твое́ несть пра́во пред Бо́гом. Пока́йся у́бо о зло́бе свое́й и помоли́ся Бо́гу, а́ще у́бо отпу́стит ти ся помышле́ние се́рдца твоего́: в же́лчи бо го́рести и сою́зе непра́вды зрю тя су́ща». Отвеща́в же Си́мон рече́: «Помоли́теся вы о мне ко Го́споду, я́ко да ничто́же на́йдет на мя и́хже реко́сте».

Толкова́ние Афана́сия Александри́йскаго: «Сребро́ твое́ с тобо́ю в поги́бель» рече́. А́ще и не подоба́ет, но смея́ния ра́ди твоего́, «я́ко дар Бо́жий непщева́л еси́ сребро́м приобрести́, несть ти ча́сти, ни жре́бия в словеси́ сем: се́рдце бо твое́ несть пра́во пред Бо́гом». И толи́ка нань рек по пра́вде, ничто́же сих неисце́льно непщева́ к покая́нию. Цели́тельна же сия́ разсуди́в бы́ти, приве́д: «Пока́йся у́бо от зло́бы твоея́ и помоли́ся Го́сподеви, не́гли оста́вит ти ся помышле́ние се́рдца твоего́». В гне́ве бо го́рести и соу́зе непра́ведне ви́жду тя су́ща. И толи́ко возмо́же е́же на покая́ние веле́ние вели́каго апо́стола, на такова́го волхва́, же́лчи и го́рести и толи́ких зол испо́лнена, я́ко усе́рдием и прилежа́нием пода́вшему ему́, и сия́ ему́ ре́кшу Писа́ние свиде́тельствует: «Помоли́теся вы о мне ко Го́споду, да ничто́же прии́дет на мя и́хже глаго́ласте, мне у́бо дерзнове́ния несть». Толи́ко же по́льзовася сей таковы́й волхв наде́ждою покая́ния, я́коже от лука́вства и го́рести преложе́ну бы́вшу си́це рещи́: «Аз у́бо несмь дово́лен о себе́ помоли́тися. И помоли́теся вы о мне ко Го́споду, да ничто́же прии́дет на мя и́хже реко́сте».

Су́щее: О́на же у́бо засвидете́льствовавша и глаго́лавша сло́во Госпо́дне, возврати́стася во Иеросали́м: мно́гим же ве́сем самари́йским благовести́ста.

Толкова́ние Златоу́стаго: Почто́же па́ки та́мо отхо́дят , иде́же мучи́тельство бе злых, иде́же па́че уби́йцы суть? Но я́коже во бране́х во́ины творя́т, и боля́щую страну́ бра́нем достиза́ют, си́це и си́и.

Коне́ц толкова́нию.