Во дни о́ны, а́нгел Госпо́день рече́ к Фили́ппу глаго́ля: «Воста́ни и иди́ на полу́дне на путь сходя́щий, от Иеросали́ма в Га́зу, и той есть пуст». И воста́в по́йде. И се муж му́рин евну́х си́лен Кандаки́и цари́цы му́ринския , и́же бе над все́ю Га́зою то́ю, и́же прии́де поклони́тися во Иеросали́м, бе же возвраща́яся и седя́ на колесни́цы свое́й и чтя́ше проро́ка Иса́ию.

Толкова́ние Златоу́ста: Мне ся мнит от седми́ дия́кон сего́ бы́ти, и́бо от Иеросали́ма к полу́дню не бы шел, но к се́веру, Га́за бо от Иеросали́ма к се́веру лежи́т. «Той есть пуст» рече́, я́ко не убоя́тися иуде́йскаго настоя́ния. И не вопроси́ почто́, но воста́в и́де. Зри а́нгелы заступа́юще пропове́дание. И тех не пропове́дающе, но сия́ призыва́юще. И е́же в дре́вних у́бо ску́дно бе и едва́ быва́ше, се ны́не удо́бна быва́ют. Вку́пе же и утеше́нием бе, да иноплеме́ники удержа́т.

Вопро́с: Почто́ ка́женику не явля́ется а́нгел, и приво́дит его́ к Фили́ппу?

Отве́т: Я́коже не бы у́бо ве́ровал, но устраши́л бы ся па́че. Вели́ка му́жа сего́ похвала́. А́ще и в Ефио́пии пребыва́ше, и толи́кими огражде́н веща́ми, пра́зднику у́бо приспе́вшу, и в нечести́ве гра́де живя́, прии́де поклони́тися в Иеросали́м. И потща́ние его́ мно́го: седя́й на колесни́цы чтя́ше, и зри в каково́ вре́мя - в зной люте́йший. Зде исполня́ется проро́чество глаго́лющее: «Ефио́пия вари́т руко́ю свое́ю Бо́гови».

Су́щее: Рече́ же Дух к Фили́ппу: «Приступи́ и прилепи́ся колесни́це сей». Прите́к же Фили́пп, услы́ша его́ чту́ща проро́ка Иса́ию. И рече́ у́бо: «Разуме́еши ли я́же чте́ши?». Он же рече́: «Ка́ко у́бо могу́ разуме́ти, а́ще не кто наста́вит мя?». Умоли́ же Фили́ппа возше́дша се́сти с ним.

Толкова́ние Севериа́на Антиохи́йскаго: В руку́ бо ноша́ше кни́гу рече́ Иса́ия проро́ка и любоче́стно чте́нию прилежа́ше, мы́слию же не разуме́яше я́же язы́ком глаго́лаше, и та́ко боголюбе́зне прилежа́. Ви́де его́ И́же се́рдца зряй, хотя́й всем челове́ком ве́рою спасти́ся и в ра́зум и́стинный приити́, Фили́ппа ему́ от Свои́х учени́к еди́ного на пути́ ненаде́жно преста́ви. И́же от саме́х и́же чтя́ше та́йны нача́т, и проро́ческих глаго́л сокрове́нный ум откры́в, и ко явле́нию приве́д, показа́ я́ко и от проро́к обетова́нный на спасе́ние ро́ду челове́ческому Иису́с Христо́с есть, воплоще́йся непрело́жно нас ра́ди Бо́жие Сло́во, я́ко Овча́ на заколе́ние веды́йся, и спасе́ное нас ра́ди во́лею претерпе́ распя́тие. И воскресе́нием е́же из ме́ртвых сме́ртную разруши́в держа́ву, и Пе́рвенец нам от ме́ртвых быв, и наде́ющеся нам безсме́ртия Свое́ю пло́тию нача́т, е́же по соста́ву приобщи́ Себе́, ду́шу иму́щу слове́сну и у́мну, да соверше́нное нам спасе́ние да́рует.

Су́щее: Сло́во же Писа́ния, его́же чтя́ше бе се: «Я́ко овча́ на заколе́ние веде́ся, и я́ко а́гнец пря́мо стригу́щему его́ безгла́сен, та́ко не отверза́ет уст Свои́х». Во смире́нии Его́ суд Его́ взя́тся, род же его́ кто испове́сть? Я́ко взе́млется от земли́ живо́т Его́.

Толкова́ние Златоу́ста: Зри у́бо, ка́ко Бо́жиим смотре́нием бысть: пре́жде чтет и не разуме́ет, та́же чтет са́мое свиде́тельство, иде́же бе страсть и Воскресе́ния дар. Ка́женик бо не ви́дит во о́браз. Не рече́т: «Кто еси́?», не уничижи́, не горди́т, не глаго́лет ве́дети, но испове́дает я́ко не весть, те́мже науча́ется и показу́ет струп врачу́. Разуме́, я́ко и весть сия́, и хо́щет научи́ти.

Толкова́ние Кири́лла Александри́йскаго: Я́коже у́бо вре́менми о́вцы, е́же очи́ститися приво́дятся, и стри́жеми на стригу́щая не настаю́т, - си́це и Христо́с оклевета́емь, не оклевета́ше, стражда́, не преща́ше. Поне́же естества́ и́же по нас бы́вшаго плотска́го рожде́ния ве́руется та́инство, сего́ ра́ди глаго́лет «род Его́ кто испове́сть? Я́ко взя́тся от земли́ живо́т Его́», си́речь вы́ше су́щих на земли́ бу́дет живо́т Его́. Егда́ кроме́ пло́ти, и не ктому́ по нас бу́дет. Е́же по воскресе́нии бы́вшую сла́ву, и рождество́ Его́ досто́инство, я́ко по смотре́нию бы́вшем показа́ иску́с, кто дово́лен сло́вом изрещи́? Самому́ у́бо смерть прие́мшу, всем же благода́тию Его́ оживле́ным и ве́рою оставле́ния изба́вленым.

Су́щее: Отвеща́в же ка́женик к Фили́ппу рече́: Молю́ тя, о ком проро́к глаго́лет се? О себе́ ли, или́ о ино́м не́коем? Отве́рз же Фили́пп уста́ своя́ и нача́т от кни́ги сея́ благовести́ти ему́ Иису́са. Я́коже идя́ху путе́м, приидо́ша на не́кую во́ду. И рече́ ка́женик: «Се вода́, что возбраня́ет ми крести́тися?». Рече́ же ему́ Фили́пп: «А́ще ве́руеши от всего́ се́рдца своего́ ,мо́щно ти есть». Отвеща́в же рече́: «Ве́рую Сы́на Бо́жия бы́ти Иису́са Христа́». И повеле́ ста́ти колесни́це, и слезо́ста о́ба на во́ду, Фили́пп же и ка́женик. И крести́ его́. Егда́ же взыдо́ша от воды́, Дух Святы́й нападе́ на ка́женика.

Толкова́ние Златоу́ста: Ви́диши ли усе́рдие? Ви́диши ли опасе́ние и прилежа́ние? «Молю́тися» рече. Ви́диши ли я́ко во всем уче́нии соверше́н бе? И́бо Иса́ия проро́к о всем пи́шет: о воплоще́нии, о стра́сти, о Воскресе́нии, о вознесе́нии, о бу́дущем Суде́. А́ще бо и мно́го жела́ние име́яше е́же крести́тися, не диви́ся: мно́го бо потща́ние бе хотя́щим соверше́но христиа́нство держа́ти, о чу́вственнем креще́нии. Сугу́бу пода́нию су́щу водо́ю и Ду́хом, быва́ет же се на спасе́ние и просвеще́ние души́ и на воскресе́ние теле́сное.

Су́щее: А́нгел же Госпо́день восхити́ Фили́ппа. И не ви́де его́ ктому́ ка́женик, идя́ше бо в путь свой ра́дуяся.

Толкова́ние Диди́мово: Предлежа́щее восхище́ние, единомо́щно есть вознесе́нию Илиину́. Почто́ восхи́щен бысть Фили́пп? Да боже́ственное яви́тся бы́вшее, и да не мни́ши, я́ко челове́к бе прост, поне́же восхи́тився от ме́ста на ме́сто пренесе́н бысть, подо́бно я́ко Илия́ быв от ме́ста на и́но селе́ние преста́вися, а́ще и о́вем назна́менает восхище́ным же и вознесе́ным.

[Су́щее: Фили́пп же обре́теся во Азо́те, и проходя́ благове́ствоваше градо́м всем, до́ндеже приити́ ему́ в Кесари́ю.]

Толкова́ние Диди́мово: Фили́пп по восхище́нии обрете́ся во Азо́те, Па́вел же апо́стол во тре́тие не́бо, и да́же до рая́ преложе́н быв, слы́ша неизрече́нныя глаго́лы. На се у́бо приими́ Авваку́ма: и той бо преста́влен бысть а́нгелом от Иеросали́ма в Вавило́н. Илия́ же вознесе́н бысть, не глаго́лет же в ко́ем ме́сте. Подо́бно и Ено́х преложи́ся от ме́ста на ме́сто. В собо́рных у́бо кни́гах не глаго́лет где есть, в сокрове́нных же глаго́лет я́ко в раи́. А́ще та́ко есть, смотри́ о Илии́: я́коже глаго́лет вознесе́н бысть на не́бо, в рай преста́влен бысть. Госпо́дь же наш Иису́с Христо́с без вся́кого двоу́мия, на небеса́ вознесе́н бысть, мно́га у́бо свиде́тельства суть о сем. Вели́ку у́бо и Фили́пп досто́инству сподо́бися е́же слы́ша о проро́цех, и о Езекии́ли, и о Авваку́му и про́чиих, ви́де на себе́ быва́емо. Отсю́ду показу́ется мно́го ше́ствование отше́д, а́ще во Азо́те обре́теся, та́мо его́ поста́ви, иде́же про́чее благовествова́ти подоба́ше.

Ина́го: В лепоту́ восхи́ти его́ а́нгел Госпо́день: поне́же помоли́л бы его́ ити́ с ним ка́женик, и не послу́шав опеча́лил бы его́. Ка́женик же бе, а не цари́ца ю́жская нарица́шеся Конда́к . И явле́нно е́же Григо́рий Богосло́в глаго́лет во второ́м сло́ве е́же во Просвеще́нии: «Фили́пп есмь тебе́, бу́ди глаго́лемый Конда́к».

Коне́ц толкова́нию.