Во дни о́ны, разсе́яни бы́ша апо́столи от ско́рби бы́вшия при Стефа́не: преидо́ша до Финики́и, и Ки́пра, и Антиохи́и, ни еди́ному же глаго́люще сло́ва , то́кмо еди́нем иуде́ом. Бя́ху же не́цыи от них му́жие Ки́прстии и Кирине́йстии, и́же вше́дше во Антиохи́ю: глаго́лаху к е́ллином, благовеству́юще Го́спода Иису́са, и бе рука́ Госпо́дня с ни́ми. Мно́го же число́ ве́ровавше, обрати́шася ко Го́споду.

Толкова́ние Златоу́стаго: Нема́ло исправле́ние и разсе́яние ученико́м Христо́вым бысть: лю́бящым у́бо Бо́га, все на бла́го поспешеству́ют. И зри, поку́ду пропове́дание простре́ся: приидо́ша рече́ до Финики́и, и Ки́пра, и Антиохи́и: и никому́же не глаго́лаху сло́ва, то́чию иуде́ом еди́нем. Ви́диши ли, я́ко по смотре́нию такова́я бы́ша о Корни́лии? Се же и во отве́те Христо́ве бысть, и во осужде́ние иуде́ов. Егда́ Стефа́н убие́н бысть, егда́ апо́столы в темни́цы бы́ша, егда́ мно́гащи гони́ми бя́ху - тогда́ язы́цы прия́ти быва́ют, тогда́ и самаря́не е́же и Па́вел глаго́лет: «Вам бе потре́ба глаго́латися пре́жде сло́во Бо́жие, но поне́же отвраща́етеся и недосто́йни себе́ сло́ву Бо́жию твори́те, се отвраща́емся к язы́ком». «И бе рука́ Госпо́дня с ни́ми» рече́, си́речь, зна́мения творя́ху.

Су́щее: Слы́шано же бысть сло́во во у́шию Це́ркве, су́щей же во Иерусали́ме о них. И посла́ша Варна́ву преити́ до Антиохи́и. И́же прише́д и ви́дев благода́ть Бо́жию, возра́довася. И утеша́ше вся приве́том се́рдца терпе́ти о Го́споде, я́ко бе муж благ и испо́лнь Ду́ха Свя́та и ве́ры. И приложи́ся наро́д мног Го́сподеви.

Толкова́ние Златоу́стаго: Почто́ не пи́шут к Па́влу, но Варна́ву посыла́ют? Поне́же еще́ не ве́даша доброде́тель му́жа. По смотре́нию же быва́ет Варна́ве приити́. Поне́же мно́жество бе и никто́же возбраня́я, удо́бне возрасте́ ве́ра. Глаго́летжеся еди́н от седми́десятых Варна́ву бы́ти и Матфи́я, и́же вме́сто Иу́ды преда́теля апо́столом счета́н бысть, и Фадде́й и́же еди́н есть от сих.

Су́щее: Изы́де же Варна́ва в Тарс взыска́ти Са́вла, и обре́т его́, приведе́ и во Антиохи́ю. Бысть же им ле́то це́ло сбира́тися в це́ркви и учи́ти наро́д мног, нарещи́ же пре́жде во Антиохи́и ученики́ христиа́ны.

Толкова́ние Златоу́стаго: Благ у́бо бе муж Варна́ва, и прост, и добронра́вен. И прии́де ко страда́льцу, прии́де к воево́де, прии́де к подо́бному льву еди́ному ра́тующуся, прии́де и к псу ловя́щу и убива́ющу богобо́рныя зве́ри, прии́де ко све́тлей свещи́, ко усто́м вселе́нную исполня́ющым. Вои́стинну сего́ ра́ди во Антиохи́и нареко́шася христиа́не, я́ко Па́вел в них толи́ко сотвори́ вре́мя. Ви́диши ли Па́влово исправле́ние, в коли́ко высоту́ вознесе́ся? Я́коже и зна́мение не́кое бысть христиа́нское и́мя: иде́же толи́кое мно́жество ве́роваша, и́же уши́ма именова́ние слы́шаху, са́ми христиа́не нареко́шася.

Ина́го: Я́ко при Клавди́и ке́сари Ри́мстем, Петру́ апо́столу поста́вшу епи́скопа Евво́дия во Антиохи́и, преименова́шася христиа́не, и́же пре́жде нарица́хуся назаре́и и галиле́и.

Су́щее: В ты́я же дни снидо́шася от Иерусали́ма проро́цы во Антиохи́ю. Воста́в же еди́н от них и́менем Ага́в, назна́менаше Ду́хом глад вели́к хотя́щь бы́ти по всей вселе́нней: и́же и бысть при Кла́вдии ке́сари. Ученики́ же а́ще име́яше кто, повелева́ше ко́ждо их на слу́жбу посла́ти живу́щым во иуде́и бра́тиям. Е́же и сотвори́ша, посла́вше к ста́рцем, руко́ю Варна́влею и Са́влею.

Толкова́ние Златоу́стаго: А́ще Христо́с глаго́лет, я́ко «Зако́н и проро́цы до Иоа́нна», о о́нех проро́цех глаго́лет, и́же прише́ствие Его́ провозгласи́ша.

[Назри́ же: ни еди́н же и зде от изве́стнейших бя́ше учи́тель:] ки́пряне бо имя́ху учи́тели, и кирине́яне , и Па́вла , - [а́ще] Па́вел и превосходя́ше их, - [я́коже] и Па́вел, Ана́нию и Варна́ву име́яше учи́теля, [оба́че ника́коже ме́ньше бысть ею́, наипа́че же Учи́теля имя́ше, Сама́го Христа́].

Да не у́бо мнят я́ко сего́ ра́ди глад бысть, зане́ христиа́нство вни́де, зане́ бес́ове отгна́шася - прорица́ет Дух Святы́й. Но се ничто́же есть чудне́е, и́бо Христо́с прорече́: «И бу́дет глад, и трус, и про́чая». Не сего́ ра́ди, - поне́же изнача́ла бы́ти хотя́ше, - но за сла́ву, я́же в апо́столех быва́ема, долготерпя́ше Бог. Я́коже зло́бе не престаю́ще прилежа́ху, тогда́ про́чее глад вели́кий быва́ет, возвеща́я иуде́ом хотя́щая бы́ти зла́я. И зри когда́ быва́ет глад: егда́ язы́цы приложи́шася к ве́ре. И быва́ет им глад, вина́ спасе́нию: ми́лостыня бо веще́м мно́зем хода́тай. Ви́диши ли, вку́пе ве́рующе и вку́пе плод приноша́юще? Не су́щым в них то́чию, но и да́льним дая́ху.

Коне́ц толкова́нию.