Услы́шите сия́ вси́ правове́рнии лю́дие, внуши́те вси́ живу́щии по вселе́нней, / бли́жнии же и да́льнии сы́нове челове́честии, вку́пе бога́т и убо́г, / му́жеск пол и женск, ста́рцы с ю́нотами! / Преди́вная бо хощу́ рещи́ ва́м, / небе́снаго Царя́ и Бо́га, небе́сныя Цари́цы и Богоро́дицы, / о Ея́ к ро́ду христиа́нскому неизрече́нном милосе́рдии: / я́ко несть ни еди́на страна́ христоимени́тых люде́й, ниже́ гра́д или́ ве́сь, / ниже́ хра́м или́ до́м в подсо́лнечней, в не́мже бы с ве́рою на́ по́мощь при́звана бы́вши, посо́бствовати не изво́лила. / Скоре́е Она́ тщи́тся гре́шным и бе́дствующым помоществова́ти, не́же ма́ти чадолюби́вая, пла́чущее ча́до свое́ от гла́да, млеко́м сосцу́ свои́ма напита́ти, / те́мже от всея́ Це́ркве, ско́рая Помо́щница нарече́ся. / Не́сть бо ско́рбь и ну́жда во́ вселе́нней не ско́ро посо́бствуемая Е́ю. / Она́ по мо́рю пла́вающым жела́емую тишину́ посыла́ет. / Она́, путьше́ствующым посо́бием свои́м спутеше́ствует. / Она́ в темни́цах седя́щыя свобожда́ет, плене́нныя изво́дит, печа́льныя утеша́ет, больны́я исцеля́ет, ни́щыя бога́тит. / Она́ царе́м ски́петры утвержа́ет, во́ем побе́ды на враги́ да́рует. / Гра́ды - обстоя́ний лю́тых пресла́вно свобожда́ет. / Она́ - слепы́м Све́т, хромы́м Нога́, ста́рым Же́зл, си́рым Ма́ти, и вдови́цам Засту́пница. / Она - отча́янным Исправле́ние, гре́шным Спасе́ние и ненаде́ждым Наде́жда. / Она́ есть едино гото́вое Заступле́ние к Не́й прибега́ющым. / Она́ все́м во́ вся́цей потре́бе есть ско́рая и изве́стная Помо́щница. / Она́ бо, предстоя́щи Престо́лу Сы́на Свое́й и Бо́га, непреста́нно мо́лит Его́ благоутро́бие о на́с гре́шных, / гне́в Его́ пра́ведный утоля́ет и десни́цу на́ ка́знь на́шу с мече́м протягне́нную уде́рживает. / Она́ вся́кое благопребыва́ние на́ше у Него́ упра́шивает и на́м посыла́ет. / Полна́ убо су́щи сама́ Бо́жия благода́ти, вся́ ве́рныя жела́ет то́ю напо́лнити. / Те́мже я́ко со́лнце са́мо вселе́нную непреста́нно обти́чет, да́ благо все́й тва́ри све́том и теплото́ю луче́с свои́х содева́ет, / та́ко и Она́, в со́лнце жена́ облече́нная, / а́ще сама́ лице́м Свои́м святы́м на́ высоте́ небе́сной вы́ну с Сы́ном свои́м Царе́м и Бо́гом я́ко Цари́ца небе́сная ца́рствует, / оба́че све́том и теплото́ю милосе́рдия Своего ве́сь ми́р обтека́ет да́ все́м соде́ловает благо́е. /

А́ще у́бо и везде́ ми́лостивною благода́тию свое́ю присеща́ет, / но на́шу православноросси́йскую страну́ изря́днейшим обы́чаем возвесели́ти благоволи́ла есть, / егда́ пречестны́м и пречу́дным Свои́м о́бразом чуде́сно приити́ в ню́ по возду́ху, / и ту́ во́ оби́тели Ти́хфинстей пресла́вно изво́ли водвори́тися, все́м правове́рным во́ исполне́ние вся́каго потре́бства духо́внаго и теле́снаго. / О ея́же вели́ком к Росси́йскому ро́ду милосе́рдии, и чуде́сном по возду́ху ше́ствии, и мно́гом чудотворе́нии, в кра́тце, си́це по́весть предлага́ю: / В ле́то от созда́ния ми́ра ше́сть ты́сящь о́смь со́т де́вятьдесят и пе́рвое, / во́ дни́ благочести́выя держа́вы вели́каго кня́зя Дими́трия Иоа́нновича Моско́вскаго и всея́ Росси́и, / при́ преосвяще́нном Пи́мине митрополи́те Моско́вском и вся́ Росси́и, и при боголюби́вом Алекси́и архиепи́скопе вели́каго Нова́ Гра́да и Пско́ва, / в Росси́йстей стране́, в преде́лех вели́каго Нова́ Гра́да, на Ла́дожском е́зере, е́же нарица́ется Не́во, / лови́тву ры́б де́ющым челове́ком, пресла́вно яви́ся над о́ным е́зером на́ возду́се, иду́ща по́ о́ному, ико́на Пресвяты́я Влыды́чицы, / иму́щая на́ руце́ о́браз преве́чнаго Младе́нца Христа́ Бо́га на́шего. / Сему́же пресла́вному чудеси́ вельми́ уди́вльшеся, / и оста́вльше де́ло свое́, приле́жно тща́хуся ви́дети, на́ ко́ем ме́сте ста́нет то́й пречу́дный Бо́жия Ма́тере о́браз, / но́ Бо́гу жела́нию и́х не соизво́лившу, отъи́де зре́ния и́х пречестна́я ико́на, и прии́де на́ реку́ Оя́ть, / отстоя́щу от езера Не́ва три́десять по́прищь, / и яви́ся та́мо на́ возду́се на́ ме́сте глаго́лемем Смолко́ве. / Ему́же пресла́вному чудеси́ наро́ду уди́вльшуся, и мно́гую Ея́ ми́лость и благода́ть чудотворе́ния обре́тшу, / от вели́кия ве́ры и любве́, тому́ чудотво́рному Бо́жия Ма́тере о́бразу на́ ме́сте о́ном поста́виша часо́вню во́ и́мя честна́го Ея́ Успе́ния, / я́же и до́ ны́не та́мо пребыва́ет. /

В не́йже та́ чу́дная ико́на не́колико вре́мя пребы́вши, Бо́жиим вседе́тельным про́мыслом, неви́димо отъи́де. / И прии́де в не́кую ве́сь зово́мую Имоче́ницы, я́же от Смолко́ва отстои́т два́ по́прища, / и яви́ся та́мо та́кожде чуде́сно на́ возду́се, / сте́кшему же ся наро́ду и приле́жное моле́ние к Бо́жией Ма́тери принося́щему, / мно́гая пресла́вная дарова́ния пода́шася: больны́м здра́вие, неду́гующым исцеление. / И́хже ра́ди пресла́вных чуде́с на́ вселе́ние многочуде́сныя ико́ны Богома́тере, / поста́виша та́мо це́рковь во́ и́мя честна́го Ея́ Рождества́, я́же та́мо стои́т и доны́не. / Чудесото́чный же о́браз Влады́чицы не́ по мно́зе вре́мени и отто́ле неви́димо оты́де: / да́ везде́ обита́ющыя рабы́ Своя́, ми́лостивным Свои́м обра́дует присеще́нием, и небе́сными уще́дрит благода́тьми. / И яви́ся па́ки та́кожде пресла́вно на́ не́коей горе́ нарица́емей Ку́кове, бли́з Па́ши реки́ су́щей, / я́же гора́ от ве́си Имоче́ницы отстои́т се́дмьдесят и де́вять по́прищь. / Ю́же сте́кшийся наро́д на́ возду́се зря́, а́бие нача́ ста́вити часо́вню во́ и́мя Тоя́, / Ю́же то́щно прося́ да́ благоволи́т свы́ше к нему́ сни́ти честны́м Свои́м о́бразом и со о́ным неотсту́пно бы́ти. / Цари́ца же небе́сная благоволи́вши ико́не Свое́й, та́мо на́ возду́се еди́н ча́с то́чию пребы́вши, и́намо пресели́тися. /

Христолюби́вии же лю́дие, по́ Тоя́ отше́ствии / в па́мять Ея́ пресла́внаго явле́ния часо́вню соверши́ша, / я́же и до ны́не хране́нием Тоя́ пребыва́ет. /

От о́ного же ме́ста, ико́на Богома́тере по́ возду́ху отше́дши, / яви́ся на́ возду́се над Па́шею же реко́ю, на ме́сте глаголемом Коже́ле, / е́же отстои́т от горы́ Ку́ковы еди́но по́прище. / Наро́ду же сте́кшемуся, и приле́жно у Пресвяты́я Богоро́дицы ми́лости прося́щему, / неоску́дну тогда́ ве́рным ми́лость дарова́ла е́сть и разли́чными неду́ги боля́щым цельбы́ сотвори́. / Те́мже христоимени́тии лю́дие, на́ водворе́ние Тоя́ поста́виша та́мо це́рковь во́ и́мя честна́го Ея́ Покро́ва, я́же и доны́не цела́ сохраня́ется. /

Чу́дная же ико́на Богома́тере, по́ не́колицем вре́мени и отту́ду неви́димо отъи́де. / И прии́де на́ реку́ Ти́хфину [я́же от ме́ста Коже́лы отстои́т два́десять по́прищь], и яви́ся наро́ду на́ возду́се в све́те вели́це. / Мно́жеству же наро́да сте́кшуся и уми́льно о сни́тии того́ пречестна́го о́браза небе́сную Цари́цу прося́щу, / всеми́лостивая же Влады́чица сни́де к ни́м с высоты́ ае́ра всечестны́м Свои́м о́бразом, / и дарова́ им, с ве́рою прося́щым: слепы́м прозре́ние, боля́щым исцеле́ние, и и́ная разли́чная чудеса́ сотвори́. / Правосла́внии же наро́ди зря́ще, / я́ко от свети́ла ве́лия, та́ко от о́браза Богома́тере и́м пребога́тых благодея́ний лучи́ неоску́дно на их душе́вная и теле́сная просвеще́ния изсыпа́ются и сия́ют, / на пребыва́ние той чудесото́чней ико́не сове́т сотвори́ша созда́ти це́рковь, во́ и́мя Пресвяты́я Богоро́дицы, честна́го Ея́ Успе́ния. / И а́бие от вели́каго жела́ния хра́м нача́ша зда́ти, / и три́ венцы́ основа́ния в то́й де́нь поло́жше, / и у ико́ны Богома́тере, и у основа́ния стра́жи оста́вльше, / вси ра́достными сердцы́ в до́мы свои́ разыдо́шася. / Прише́дши же но́щи, и уже́ ко́ у́тру приближа́ющейся, / страже́м же усну́вшым, / Бо́жиим манове́нием честна́я та́ ико́на, и о́ное основа́ние хра́ма, и со угото́ванными древесы́ / на́ другу́ю страну́ реки́ Ти́хфины чуде́сно пренесе́ся, и от того́ ме́ста положи́ся на ино́м, / е́же от о́наго отстои́т я́ко две ста́дии, иде́же ны́не хра́ма благоле́пием украше́нно, я́ко не́бо. / Всечестна́я же в не́м ико́на я́ко со́лнце, луча́ми чудотворе́нии мно́гих озаря́ющи ве́рныя, сия́ет. / Во́ у́трий же де́нь сте́кшеся лю́дие, уди́вльшеся о чуде́сном пренесе́нии, / приле́жно всю́ду со слеза́ми о́наго многоце́ннаго да́ра Бо́жия Ма́тере о́браза поиска́вше, / и обре́тше, ви́деша той, и церко́вное основа́ние стоя́ще, и вся древеса́ на то строе́ние угото́ванная, / и са́мыя ма́лыя щепы́ лежа́щия, це́ло, я́коже и на о́ной стране́ реки́ бя́ше та́ко чи́нно расположе́нно, я́кобы с ме́стом о́нем все́м ту пренесе́ным бы́ти. / Уди́вльшежеся сему́ вели́кому чудеси́, нача́ху та́мо на́ о́ном основа́нии приле́жно це́рковь стро́ити. /

Ра́ди же на тоя́ це́рковь благослове́ния, и о чуде́сном Бо́жия Ма́тере о́браза явле́нии, и о чудесе́х того́, / посла́ша ве́сть в Вели́кий Нов град к архиепи́скопу Алекси́ю и к нача́льником гра́да. / Святи́тель же и с про́чими, неме́дленно взе́м повеле́ние от самоде́ржца и от преосвяще́ннаго первопресто́льника благослове́ние, / повеле́ хра́м соверши́ти, и приче́тники ему́ дово́льны устро́ити. /

[…]

Те́мже Тя ми́лостивую всесмире́нно мо́лим, / сие́ поси́льное на́ше, я́ко усе́рдное, приими́ ми́лостивно хвале́ние, / подо́бящися ма́тери чадолюби́вой и немотствова́ние чад свои́х лю́бящей. / То же прие́мши любе́зно, бу́ди о нас милосе́рдая к Милосе́рдому Сы́ну Своему́ и Бо́гу те́плая Хода́таица, / да ра́ди Твоего́ о нас ма́терняго кра́йняго хода́тайства / мно́жеством щедро́т Свои́х прости́т нам мно́жество беззако́ний на́ших, / […] да та́ко под Сы́на Твоего́ и Бо́га, и Твои́м милосе́рдия небе́сныя Цари́цы покро́вом / вре́мя жи́зни на́шея безбе́дно и спасе́нно проводя́ще / и неусы́пное ма́тернее Твое́ хране́ние, заступле́ние и хода́тайство прославля́юще, / хва́лим и сла́вим всех благ Вино́вника, Единоро́днаго Сы́на Твоего́ и Бо́га, со безнача́льным Его́ Отце́м, и со Пресвяты́м и Благи́м и Животворя́щим Его́ Ду́хом, ны́не и при́сно и в безконе́чныя ве́ки веко́в. Ами́нь.