О́браз пречестны́й Твой Богоро́дице, Вси почита́ем, а́нгелов Цари́це, Его́же зря́ще, я́ко Тя саму́ю Ви́дим Божию Матерь и́стинную. Пред ним смире́нно покло́н сотворя́ем, Во вся́ких ну́ждах по́мощи жела́ем. Тем бо, я́ко Ты, о́ Богома́ти, Ве́рным обы́че по́мощь подая́ти, И́же с ве́рою к Тебе́ прибега́ют, О́браз Тво́й святы́й че́стно почита́ют.
На Тя саму́ю та честь возво́дится, Я́же Твоему́ о́бразу твори́тся. А́ще вси печа́ть ца́рску почита́ют, Кольми́ Тво́й о́браз в ле́поту лобза́ют! Земны́я да́ры печа́ть укрепля́ет, Тво́й небе́сныя о́браз да́ры дае́т.
Ру́сская страна́ те́ми напо́лнися, Егда́ Тво́й о́браз на Ти́хфине всели́ся. Простра́нный ае́р тогда́ просвяще́нный, Егда́ а́нгелами о́браз сей несе́нный. Во́ды прича́стны бы́ша благода́ти, Егда́ изво́ли мо́ре препла́вати Из гра́да во град. Та́кожде пусты́ня Све́тло почте́ся, егда́ во густы́ня Своя́ прия́ти о́браз сподо́бися, И егда́ Сама́ на кла́де яви́ся. Ей, я́ко со́лнце весь мир просвеща́ет, Тако Твой о́браз всю Русь озаря́ет.
Лучесы́ чуде́с и даро́в премно́гих, Проявля́емых на лю́дех убо́гих. Просвеща́ются зде слепы́м очеса́, Отверза́ются и глухи́м ушеса́. Мно́гажды язы́к немы́й разреши́ся, Ни еди́н хроме́ц в нога́х утверди́ся. Разсла́бленнии зде́ ся укрепля́ют, Изумле́ннии ум восприима́ют. Бесни́и от дух скве́рных свобожде́ни, Разнобо́льнии ско́ро устрабле́ни.
А в наше́ствии проти́вных варяго́в, О́бразу сему́ неи́стовых враго́в, Коль чуде́с мно́го изво́ли яви́ти, Всяк прочита́яй бу́дет ся диви́ти. Не то́кмо се́мо лю́дем приходя́щим, Но и в дале́ких страна́х отстоя́щим.
Ве́лия ми́лость Е́ю дарова́ся, Когда́ кто ити́ сю́ду обеща́ся. На о́стров морски́й заблу́ждьших пита́ше, Егда́ им траву́ до́бру показа́ше. И и́на мно́га чудеса́ творе́нна, Я́ко вскра́й мо́ря песо́к безчисле́нна. И́мже ся то́кмо возмо́жно диви́ти, А не словесы́ лет определи́ти.
Темже ве́рнии о́браз святы́й зря́ще, Покло́н твори́те, усе́рдно моля́ще. Бо́жию Ма́терь да нас сохраня́ти, Вы́ну изво́лит в Своей благода́ти. Да не отсту́пно все́й стране́ пребу́дет, О́бразом Свои́м раб си не забу́дет Да утвержа́ет вся ве́си и гра́ды, Да сподо́бит ны ве́чныя отра́ды. Моля́ще же ся, смире́нно целу́йте, Сла́дкими гла́сы си́це приветству́йте:
«Ра́дуйся Де́во обра́дованная, Во Ма́терь Христу Богу избра́нная. Де́во пло́дная, де́вствующа Ма́ти, Мо́гшая без тли Плод чре́ва изда́ти. Ра́дуйся, Со́лнца мы́сленнаго Све́те, Ра́дуйся, рая́ небе́снаго Цве́те. Ра́дуйся, Луно́ светя́щая в но́щи, В беда́х и ско́рбех ско́рая По́моще. Ра́дуйся, Зве́здо, све́тлая Денни́це, Вве́дшая Со́лнце в мир Христа Деви́це.
Ра́дуйся, Не́бо, Бо́га держа́щее, На рук Престо́ле Его́ нося́щее. Ра́дуйся, во́инств небе́сных Царице, Го́споже всех сил небе́с Влады́чице. О́блаче све́тлый, ве́рныя заря́щий, Дождь, благода́ти Бо́жия нося́щий. Ра́дуйся, Мо́ре вся́кия добро́ты, Ре́ко, Е́юже Бог то́чит щедро́ты. Исто́чниче вод с небесе́ теку́щих, Живо́т нам ве́чный удо́бь де́йствующих.
Ра́дуйся, Зе́мле невозде́ланная, Се́менем тле́нным ненасе́янная. Ра́дуйся, Ни́во неприкосне́нная, Вы́ну от Бога благослове́нная. Ра́дуйся, Го́ро над все́ми гора́ми, Весь под твои́ми лежи́т мир нога́ми. От Тебе́ Ка́мень Христо́с отвали́ся, Лесть и́дольская И́мже истре́бися. Ра́дуйся, Ра́ю живо́тнаго дре́ва, Со вторы́м Ада́мом Ты втора́я Е́ва.
Златы́й небе́снаго Жениха́ Черто́же, И преве́чнаго Соломо́на Ло́же. Ра́дуйся, Це́ркви, в Не́йже водвори́ся, Бог Сын и Сло́во, егда́ воплоти́ся. Ра́дуйся, До́ме, ра́дуйся, Пола́то, Ю́же всех добро́т украша́ет зла́то. Кио́те святый неприкоснове́нный, Внутрь у́ду, и вне Ду́хом позлаще́нный. Ра́дуйся, Сви́тче богонапи́санный, Бо́жию Сло́ву предугото́ванный.
Ты сокро́вище Прему́дрости еси́, Я́же ца́рствуемь со Отцем на небеси. Ра́дуйся, Кни́га одушевле́нная, Бо́жиим сло́вом вся испо́лненая, Е́юже весь мир ума́ испо́лнися, И́стиннаго Бо́га зна́ти научи́ся.
Ра́дуйся, Мо́сте пресве́тлаго не́ба, Ра́дуйся, Пе́щи живо́тнаго хле́ба. Ра́дуйся, всем благове́рным Промы́сленнице, Бо́га к нам гре́шным Примири́тельнице. Все́ми ти́тлами хо́щем Тя хвали́ти, Но ум и язы́к не весть послужи́ти. Виждь хоте́ние, изво́ль е́ прия́ти, За са́мо де́ло, я́ко от чад Ма́ти.
Кто песо́к морски́й возмо́жет счи́слити, То́й есть дово́лен Тебе́ просла́вити. Мы не́мощь на́шу я́ве пове́даем, А пред Тобо́ю ни́зу припа́даем. О том моля́ще, изво́ль пособи́ти, Да Тя возмо́жем вя́щше восхвали́ти.
Проси́ уми́рно изво́ль соблюда́ти Царя́ и Ца́рство в Свое́й благода́ти. Ве́рнии лю́ди Твоея́ по́мощи Да не лиша́тся по вся дни и но́щи, Cоблюда́й дом Сво́й непозы́блем вы́ну, О живу́щих в нем мольбы́ дей ко Сы́ну.
За приходя́щих Ему́ помоли́ся, А на вся враги́ во бро́ня облецы́ся. Да Тебе́ зна́ют на́шу Помо́щницу, Непосты́дную вы́ну Влады́чицу. Твоея́ си́лы всегда́ да страша́тся, Не́мощни рабо́м Твои́м да явя́тся. Та́ко Твоя́ мощь све́тло просла́вит Тя, Егда́ Твои́х раб страна́ утверди́тся».