По преставле́нии же блаже́ннаго Фили́ппа, царю́ Ива́ну ле́та дово́льна препроводи́вшу и преста́вися ко отце́м свои́м. / И бы́сть в его́ ме́сто сын его́ – благочести́вый ца́рь Фео́дор. / В седмо́е же ле́то благочести́выя держа́вы его́, в два́десять пе́рвое ле́то по преставле́нии свята́го / – Солове́цкого монастыря́ и́ноцы благогове́йнии воспомяну́ша по́тове и труды́ и попече́ние ла́врское блаже́ннаго Фили́ппа, / ны́не же лише́ни су́ще его́ сопребыва́ния, и́бо кроме́ свое́го престо́ла во изгна́нии сконча́вшуся. / И возвеща́ют наста́внику своему́ Иа́кову. / Сия́ же слы́шав настоя́тель, ра́дости мно́ги испо́лнися, я́ко от Бо́га извеще́ние прии́мшу к своему́ начина́нию. / Помышля́ющу у́бо ему́, ка́ко бы пренести́ мо́щи блаже́ннаго ко о́тчеству свое́му, / я́ко та́ко свято́му изво́лившу, да иде́же ду́хом набдя́й, неотсту́пно ту́ и те́лом пребу́дет. / Неме́дленно же у́бо па́стырь ше́ствие сотвори́ к ца́рствующему гра́ду Москве́ ко благочести́вому царю́ Фео́дору. / […] Покори́ся у́бо царь моле́нию па́стыря, и повелева́ет да́ти и своя́ ца́рская писа́ния ко епи́скопу гра́да Тве́ри. / Прие́м же Иа́ков посла́ние, ра́достию постиза́ет гра́д, и ту живу́щим та́ко глаго́лаше: / «Где положи́сте миротво́рнаго свети́льника Фили́ппа? / Рцы́те нам, где скры́сте но́ваго Моисе́я / – не законополо́жника, но страда́ти изово́лившаго за лю́ди Бо́жия, па́че ца́рских сокро́вищ вмести́вшаго поноше́ние Христо́во?» / Оскорбе́ша у́бо Тве́рстии лю́дие слы́шавше сия́, та́же епи́скопу Заха́рии показа́ше ца́рское писмо. / Заха́рия же повеле́нию ца́рскому проти́витися не возмо́же, повеле́ настоя́телю места́ того́ показа́ти гро́б, иде́же погребе́н блаже́нный Филипп, / оба́че же и не хотя́ще показа́ша гро́б, са́ми бо свою́ тщету́ вменя́ху. / Нача́ша же раскопова́ти землю, и обрето́ша гро́б, […] / [и а́бие] благоуха́ния некоего́ неизрече́ннаго напо́лнися возду́х, / и гра́д весь ума́стися от вони́ благоуха́ния. / Откры́ша же ковче́г, и обрето́ша те́ло свята́го це́ло и неруши́мо, поне́ ни ри́зам его прикосну́тися тле́нию. / Стеко́ша же ся отвсю́ду вся́каго во́зраста наро́ди, и бе ви́дети удивле́нно све́щный бле́ск, я́коже зве́зды сия́юща. / Ту́ же и престо́льнику прише́дшу, славосло́вия пе́сни согла́сны Го́сподеви возсыла́юще. / И ра́достию благода́рственныя приноша́ху […]. / И со слезами объе́мля целу́ет свята́го: / «Хода́тайствуй, - глаго́ля, - к Царю́ все́х Бо́гу, о граде в не́мже обита́, и нас в моли́твах свои́х помина́й». / И та́ко дарствует Иа́кова, глаго́ля: / «Приими́ гро́зд, и́же от виногра́да ва́шего израсте, я́ко крин во удо́лиих сия́я. / Его́же ра́ди писа́нию ца́рскому проти́витися не мо́жем. / Печа́ль бо па́ки нестерпи́ма отдаю́щих мо́щи, ра́дость же неизглаго́ланная содержа́щи прие́млющих те́ло». / Па́ки же Заха́рий епи́скоп со священным собо́ром и со мно́жеством наро́да / че́стно свята́го проводи́ша на кра́й реки́ / до ме́ста, отню́дуже хотя́ше плы́ти. / Игу́мен же Иа́ков прии́м да́р любо́честный и сокро́вище безце́нное, вско́ре пути́ каса́ется, / Бо́га благодаря́ я́ко получи́ иско́мое, и свята́го похваля́ше я́ко не пре́зре. / Егда́ же прибли́житися им со святы́м ко ото́ку, услы́шавше же в кинови́и живу́щии, / изыдо́ша в срете́ние и́ноческия четы́ со мно́жеством наро́да, со свеща́ми и канди́лы. / И несо́ша того́ во святу́ю и собо́рную це́рковь, ю́же свои́ми труды́ возгради́, / пе́сни согла́сныя Бо́гови возсыла́юще, я́ко сподо́бишася его́же не наде́ющеся обре́тше. / Ра́дуется у́бо и святы́й, я́ко ко оте́честву своему́ дости́же. / Егда́ же вре́мя у́треннему славосло́вию клепа́ти, / пора́ну у́бо настоя́тель приити́ в це́рковь и обоня́ше воня́ благоуха́ния необы́чнаго, / полну́ су́щу я́коже ми́ра многоце́ннаго, / излия́нна от моще́й свята́го, я́коже и пре́жде. / Диви́ти же ся и параеклисиа́рху о сем, / и та́ко благодари́вше Бо́га и свята́го посеще́нию. / По соверше́нию же у́треняго славослови́я, егда́ угото́вльше ме́сто, иде́же хотя́ше почи́ти, / целова́в же те́ло свята́го с подо́бною че́стию. / Ту спогребо́ша, иде́же са́м угото́ва. / И согрея́ся се́рдце его́ в нем, и возра́довася пло́ть его́, / я́ко жива́ и одушевле́нна о Бо́зе Жи́ве, и дарова́нии чуде́с обогати́ся. / [Пяти́десяти четыре́м ле́том мину́вшим, моще́м свята́го почива́ющим на свое́м ме́сте, / бы́ша преложе́ни ти́и в Преображе́нский собо́р Солове́цкой оби́тели, иде́же пребыва́ша в но́вей гробни́це шесть лет. / По проше́ствии же шести́ лет, митрополи́т Новгоро́дский Ни́кон / прося́ше у патриа́рха Ио́сифа пренести́ мо́щи святи́теля из Солове́цкой оби́тели во град Москву́. / И умоли́вше патриа́рха, получи́в его́ благослове́ние, / митропо́лит Ни́кон сотворя́ет ше́ствие во оби́тель Солове́цкую / с покая́нною гра́мотою царя́ Алексе́я Миха́йловича, в не́йже той испраша́ет проще́ние грехо́в де́да своего́ царя́ Ива́на. «Ничто́ толи́ко печа́лит ду́шу мою́, пресвяты́й Влады́ко, / - писа́ше царь в гра́моте, / - е́же не́си в на́шем Богохрани́мем ца́рствующем гра́де Москве́, / во святе́й собо́рней це́ркви Успе́ния Пресвяты́я Богоро́дицы, / вку́пе с бы́вшими до тебе́ и по тебе́ святи́телями, / за е́же ра́ди ва́ших совоку́пных моли́тв всегда́ непосту́пной пребыва́ти Святе́й Собо́рней и Апо́стольстей Це́ркви и ве́ре Христо́вой, чрез ю́же и спаса́емся. / Молю́ у́бо тебе́, прииди́ се́мо / и разреши́ согреше́ние пра́деда на́шего, царя́ и вели́каго кня́зя Иоа́нна, / соверше́нное проти́ву тебе́ неразсу́дно, за́вистию и несдержа́нною я́ростию. / А́ще и непови́нен есмь в досажде́нии тебе́, / но гроб пра́деда приво́дит мя в жа́лость, и́бо по е́же бы́ти изгна́ну тебе́ и досел́е пребыва́еши вдали́ от твоея́ святи́тельския па́ствы. / Преклоня́ю пред тобо́ю сан мой ца́рский за согреши́вшаго проти́ву тебе́, / да отпу́стиши ему́ согреше́ние его́ свои́м к нам прише́ствием и да упраздни́тся поноше́ние, е́же лежи́т на нем за твое́ изгна́ние. / Молю́ тебе о сем, о́ свяще́нная главо́, и преклоня́ю честь ца́рства моего́ пред твои́ми честны́ми моща́ми, / поверга́ю на умоле́ние тебе́ всю мою́ власть...» / Тру́ден бы́ше путь и до́лог, оба́че тре́тияго ию́ния достиза́ет митрополи́т Ни́кон ото́ка Солове́цкаго / и последи́ же трехдне́внаго поста́ сотворя́ет Литурги́ю, на не́йже чтет свято́му покая́нную гра́моту царя́ а́ки живо́му, / бра́тии монасты́рстей послу́шающей чте́ние и пла́чущей го́рько. / На гряду́щий же день начина́ет ше́ствие с моща́ми во град Москву́, часть от моще́й оста́вльше в монастыри́ по сле́зной про́сьбе бра́тней. / Я́коже досто́йно сотвори́ся чи́ну святи́теля сие́ второ́е пренесе́ние! / С моле́бным пе́нием во граде́х иде́же проноша́ху мо́щи, / с посо́льством ца́рским спутьше́ствующим святи́телю, / с церко́вными ли́ки и чи́нми! / Мно́гия чудесы́ та́кожде явле́ни бы́ша чрез мо́щи святи́теля, тому́ благословля́ющу возвраще́ние свое́ в престо́льный град. / Ка́я ра́дость и ко́е торжество́ бы́ше сие́ сре́тение, / е́же наро́д моско́вский и гра́да престо́льного клир и ли́ки обрето́ша девя́таго ию́лия! / На ме́сте сре́тения моще́й святи́теля воздвиго́ша крест, / и отне́леже ме́сто сие́ имену́ется Кресто́вской заста́вой да́же до днесь. / А́бие поста́виша мо́щи свята́го на Ло́бнем ме́сте на Кра́сной сто́гне, иде́же и моле́бен свято́му отслужи́ша. / И по́слежде положи́ша я́ во Успе́нском собо́ре и́же во Кремле́, / в не́мже стоя́ша мо́щи на среди́не це́лу седми́цу, и пото́к люде́й к тем прибега́ющих не оскудева́ше. / Седмьна́десятаго ию́лия мо́щи преложе́ни бы́ша во сре́бряну ра́ку близ ю́го-восто́чной стены́ олтаря́, / иде́же пребыва́ют и до сего́ дне. / Пра́зднование же сего́ честна́го втора́го пренесе́ния моще́й святи́теля Фили́ппа е́же в Москву́ соверша́шеся седмьна́десятаго ию́лия, / оба́че чрез седмьна́десять лет бы́ше пренесе́но на тре́тий день того́же ме́сяца, / в ко́йже и утверди́шеся того́ воспомина́нием.] / О́ боже́ственая и честна́я главо́, святи́телю Фили́ппе, / свы́ше ми́лостивне и на нас призира́й. / И́же со а́нгелы ликовству́я в приснобытии́, и освяще́ние Пресвяты́я Тро́ицы подъе́мля ясне́е, / отту́ду освяща́й хва́льники своя́ и утвержда́й рабы́ своя́. / Моли́ся у́бо за вселе́нную, и за правосла́вныя лю́ди. / Моли́ и за церко́вный мир, призыва́й и за чисти́тельский чин. / Не премо́лчи за и́ноков исполне́ние. / Ве́си я́ко мно́га я́же на ны вра́жия ра́ти, поставля́ющи сеть и всю́ду ловя́щи. / Ста́ни моли́ся, побори́ за свое́ духо́вное ста́до. / Отжени́ во́лки мы́сленыя моли́твеною па́лицею свое́ю. / И́маши бо доброприбы́тна его́же возлюби́, и обре́те благода́ть ю́же изво́ли. / Насыща́ешися неизрече́нных благ, и́хже бу́ди и нам всем получи́ти, / благода́тию и человеколю́бием Го́спода на́шего Иису́са Христа́. / Ему́же ле́по есть вся́ка сла́ва, честь и поклоне́ние, / со Безнача́льным Его́ Отце́м, и со Пресвяты́м и Благи́м и Животворя́щим Ду́хом, ны́не и при́сно и во ве́ки веко́в. Ами́нь.