О́ блаже́ная страстоте́рпца и благове́рная кня́зя Бори́се и Гле́бе! Несть мо́щно вся испове́дати или́ сказа́ти твори́мая ва́ма чудесы́. По и́стине, ни весь мир мо́жет понести́, я́же де́ются преди́вная чудеса́, и па́че песка́ морска́го. И не ту еди́но где, но и по всем страна́м, и по всем зе́млям преходя́ща, боле́зни вся и неду́ги отго́нита, су́щих в темни́цах и в у́зах посеща́юща. И на ме́сте, иде́же му́ченическим венце́м увязо́стася, со́здане бы́ста це́ркви во и́мя ею́, да и ту та́ко же мно́га чудеса́, посеща́юща содева́ета.
Тем же ва́ю ка́ко похвали́ти – не свем, или́ что рещи́ – недоуме́ю и не возмогу́. А́нгела ли ва́ю нареку́, и́мже вско́ре обрета́етася близ скорбя́щих. Но пло́тски на земли́ пожи́ла еста́ в челове́цех. Челове́ка ли ва́ю имену́ю? Но па́че всего́ челове́ческа ума́ прехо́дита мно́жеством чуде́с и посеще́нием немощны́х. Ц́е́саря ли, кня́зя ли ва́ю проглаго́лю? Но па́че челове́ка у́бо про́ста и смире́на смире́ние бо стяжа́ла еста́, и́мже и высо́кая ме́ста и жили́ща всели́стася. По и́стине вы це́саря еста́ цесаре́м и кня́зя князе́м, и́бо ва́ю посо́бием и защище́нием кня́зи на́ши проти́ву востаю́щая держа́вно побежда́ют и ва́ю по́мощию хва́лятся.
Вы бо тем и нам ору́жие, земли́ Ру́сския забра́ла и утвержде́ние и меча́ обою́ду остра́, и́ма же де́рзость пога́нскую низлага́ем и диа́воля шата́ния в зе́млю попира́ем. По и́стине несумне́нне рещи́ возмогу́: вы у́бо небе́сная челове́ка еста́, земна́я а́нгела, столпа́ и утвержде́ние земли́ на́шея! Те́мже и бо́рета по свое́м оте́честве и посо́бита, я́коже и вели́кий Дими́трий по свое́м оте́честве, рек: «А́ще у́бо и веселя́щемся им, с ни́ми бех, та́коже и погиба́ющим им, с ним умру́». Но оба́че сий вели́кий милосе́рдый Дими́трий о еди́ном гра́де си́це извеща́, а вы ни о еди́ном бо гра́де, ни о дву, ни о ве́си попече́ние и моли́тву воздае́та, но о всей земли́ Ру́сстей.
О́, блаже́ная у́бо гро́ба, прии́мши телеси́ ва́ю честне́и, а́ки сокро́вище многоце́нно! Блаже́ная церквы́, в не́йже положе́не бы́ста ра́це ва́ю святе́и, иму́щи блаже́неи телеси́ ва́ю! О́ Христо́ва уго́дника! Блаже́н по и́стине и высо́к па́че всех град Ру́сских и Вышегра́д, имы́й в себе́ таково́е сокро́вище, ему́же не то́чен ни весь мир! По и́стине Вышего́род нарече́ся: вы́шший и превы́шший го́род всех, вторы́й Селу́нь яви́ся в Ру́сске земли́, имы́й в себе́ врачество́ безме́здное.
Не на́шему еди́ному язы́ку то́кмо по́дано бысть Бо́гом, но и всей земли́ спасе́ние, от всех бо стран ту приходя́ще ту́не поче́рплют исцеле́ние, я́коже и во святы́х Ева́нгелиях Госпо́дь рече́ святы́м апо́столом, я́ко «Ту́не прия́сте, ту́не и дади́те». О сих бо и Сам Госпо́дь рече: «Ве́руяй в Мя дела́, я́же Аз творю́, и той сотвори́т, и бо́льша тех». Но, о́ блаже́ная страстоте́рпца Христо́ва, не забыва́йта оте́чества, иде́же пожи́ла еста́ в те́ле, его́же всегда́ посе́том не оставля́ета!
Та́ко же и в моли́твах всегда́ моли́тася о нас, да не прии́дет на ны зло и ра́на да не приступ́ит к телеси́ на́ю. Ва́ма бо дана́ бысть благода́ть, да мо́лита за ны, ва́ма бо дал есть Бог о нас моля́щася и хода́тая к Бо́гу аз ны: Те́мже прибега́ем к ва́ма и со слеза́ми припа́дающе, моли́мся, да не прии́дет на ны нога́ горды́ни и рука́ гре́шнича не погуби́т нас, и вся́ка па́губа да не на́йдет на ны. Глад и озлобле́ние от нас дале́че отжене́та, и всего́ меча́ бра́нна изба́вита нас, и усо́бныя бра́ни чу́жда сотвори́та, и всего́ греха́ и нападе́ния заступи́та нас, упова́ющих к ва́ма.
И ко Го́споду Бо́гу моли́тву на́шу усе́рдно принесе́та, я́ко согреши́хом зело́ и безако́нновахом премно́го, и безчи́нствовахом па́че ме́ры, преи́злиха, но ва́ю моли́твы наде́ющеся, ко Спа́су возопие́м, глаго́люще: Влады́ко, еди́ный без греха́! При́зри с небесе́ свята́го Твоего́ на нас убо́гих: елма́ же согреши́хом, но Ты очи́сти, и безако́нновахом – осла́би, преткну́хомся по премене́нии – я́ко блудни́цу очи́сти ны и я́ко мытои́мца опра́ви. Да прии́дет на ны ми́лость Твоя́, да воста́нет на ны человеколю́бие Твое́, и не оста́ви ны преда́ным бы́ти грехи́ на́шими, ни усну́ти, ни умре́ти го́рькою сме́ртию, но искупи́ ны от настоя́щаго зла и даждь ны вре́мя покая́нию, я́ко мно́га безако́ния на́ша пред Тобо́ю, Го́споди!
Сотвори́ с на́ми по ми́лости Твое́й, Го́споди, я́ко и́мя Твое́ нарица́ется в нас, и поми́луй ны и уще́дри, и заступи́ моли́твами пречестно́ю страстоте́рпцу Твоею́, и не сотвори́ нас в поно́с, но ми́лость Твою́ изле́й на овца́ па́жити Твоея́, я́ко Ты еси́ Бог наш, и Тебе́ сла́ву возсыла́ем Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.