Всяк челове́к хотя́й похвали́ти что, ино́му добре́йшему прилага́я хвали́ти: сла́дкое убо сладча́йшим, мя́гкое мягча́йшим, ско́рое же скоре́йшим, кра́сное же красне́йшим, или́ высо́кое - то высоча́йшим, и́[бо] сла́вное - то славне́йшим. Сла́дкое у́бо сла́вящи, то мед или́ са́хару или́ ма́нне прилага́ют, тех бо сладча́йше не зна́ем. Тебе́ же, Госпоже́ моя́ Свята́я Богоро́дице, аз недосто́йный хотя́ похвали́ти, не вем чему́ приложи́ти в тва́ри сей: Твоя́ бо сла́дость ме́ду суть сладча́йши, Твоя́ бо по́мощь вся́кия пти́ща скоре́йши, и кто до́бре Тя помо́лит всем се́рдцем, Ты же бо́льшими помога́еши. Чи́е бо се́рдце в тва́ри сей мягче́е Твоего́ се́рдца обря́щется, на вся́ку моли́тву прекланя́ющися? Ка́я ли красота́ красне́йши Твоея́ красоты́? Дави́д бо святы́й испе́рва зря духо́вныма очи́ма, о Тебе́ возвести́, Пресвята́я Де́во, рече́: вся сла́ва Дще́ри Царе́ве внутрьу́ду, ря́сны златы́ми оде́яна и преукра́шена, не бо́ Ты еси́ извну́ укра́шена ба́гром и зла́том и би́сером, но и́маши боголе́пныя красо́ты в себе́. Да тем Тебе́ рече́ извну́трь всея́ добро́ты в себе́ име́яше, ре́кше чистоты́, пра́вды, угожде́ния вся́кая Бо́гу. Чи́я ли вы́сость Твоея́ вы́сости вы́шьши? Не те́лом мню, а́ще и те́лом вся́кого челове́ческаго о́браза добрей́ши и красне́йши обре́теся; но че́стию реку́ и сла́вою: честне́йши бо еси́ святы́х а́нгел и сла́внейши святы́х арха́нгел. В пяти́ ты́сящи лет и в пяти́ сот от Ада́ма ни еди́нояже возлюби́ толма́ в них, я́коже роди́тися от нея́; но Тебе́ во всем ро́де избра́, я́коже и проро́ки сведе́тельствуют, от лица́ Спа́сова реки́й: зде вселю́ся, Ю́же избра́х; Тебе́ возлюби́: Ты бо еси́ добро́та Иа́ковля, Ю́же возлюби́; Твое́й бо добро́ты вожделе́ Царь и Госпо́дь. Ты добре́йши еси́ всех челове́к. Ты честне́йши еси́ всех святы́х муже́й. Ты вы́шьши, Богоро́дице, и сла́внейши святы́х а́нгел и небе́сных сил. Ты проро́ком а́ки мед на язы́це. Тебе́ бо меня́щим уста́ ся услажда́ху тем сла́достию. Ов бо Тя Кио́т святы́м нари́чет. А други́й ‐ Го́ру несеко́му, от Нея́же усече́ся Христо́с Бог наш, и испо́лни всю зе́млю. Други́й же Дверь све́тлую, и́миже изы́де Со́лнце пра́ведное [всей тва́ри], ибо славное то славнейшим други́й же нарече́. Иса́ия бо вели́кий нарече́ Тя жезл, прозя́бший от ко́рене Иесе́ова.
Си́це бо пи́шет Иа́ков, в по́вести свое́й, реки́й: Бе́яше Иоаки́м бога́т зело́, и укаря́емь ю́жиками, и́мже де́тища не име́яше. И сжа́лив си зело́, пости́ся четы́редесять дний и четы́редесять но́щий. Та́коже и А́нна, жена́ его́, постя́ся. Послу́шав же Бог моли́тв ея́, посла́ к А́нне а́нгела Своего́, во огра́де свое́м седя́щи ей, и под фи́ничною пла́чущися. И рече́ к ней а́нгел: «А́нна! Послу́ша Госпо́дь Бог моли́твы твоя́, прия́ти бо и́маши и роди́ти де́тищь, и просия́ти и́мать плод твой по всей земли́». Рече́ А́нна: «Жив Госпо́дь Бог мой! А́ще рожду́ аз му́жеск пол или́ же́неск, то принесу́ да́ры Го́сподеви Бо́гу моему́, и бу́дет служа́й вся дни живота́ своего́». Прии́де же Иоаки́м от горы́ в дом свой, и тому́ бо та́мо яви́ся а́нгел Госпо́день, рек: «Услы́ша Бог моли́тву твою́, сни́ди отсю́ду: роди́ти бо и́мать А́нна отроча́». Прии́де же Иоаки́м, и Бо́гу дар принесе́, иере́ом и лю́дем. И почи́ в свое́м дому́, и ра́довашеся со А́нною, и пото́м заче́нши и роди́ста отрокови́цу. И рече́ А́нна: «Возвели́чися душа́ моя́ в сий день». В тре́тие же ле́то рече́ Иоаки́м: созове́м открови́цы чи́сты, и свещи́ вже́гше несе́м отрокови́цу в це́рковь Госпо́дню. И сотвори́ста та́ко, и внесо́ста Ю́ в це́рковь Госпо́дню, и благослови́ Ю́ иере́й, и рече: «Возвели́чит Госпо́дь и́мя твое́ во всех ро́дех». И бе ту двана́десять лет, служа́щи Бо́гу в це́ркви, пита́ема а́нгелом.
О́ блаже́нная супру́га, Иоаки́ме и А́нно! Ва́ма бо приведе́ся дар Творцу́ и Бо́гу, дар без прикла́да всех дар изря́дней, Ма́терь Пресвяту́ю, Сию́ еди́ну во всем святу́ю Госпожу́, утро́ба свята́я, простра́ннейши небе́с! Ему́же в руку́ небеса́ и земля́, Той роди́ся от сея́ чи́стыя утро́бы. О́ све́тлый дню сла́вный, во́ньже роди́ся нам ра́дость, печа́ль разганя́ющи! Те́мже ра́дуемся, Бо́га сла́вящи, припа́дающе к Нему́, да́вшаго нам такову́ Засту́пницу. Ра́дуемся, бра́тие: днесь бо вели́ка свобо́да просия́; преслуша́нием бо прама́тери на́шея Е́вы вси бе́хом порабоще́ни проти́вному супоста́ту. Днесь, дру́зи, да возвесели́мся, сла́вяще Ро́ждьшуюся: кто бо ви́дя сицево́ чу́до, испе́рва от нача́ла всея́ тва́ри? Жена́ ся ражда́ет, я́же посе́м ско́ро и Творца́ Бо́га и́мать роди́ти, и бу́дет Ма́ти Своему́ Творцу́ и Бо́гови. Чу́до превели́кое! Ка́ко мо́жет бре́нное те́ло огнь в себе́ носи́ти боже́ственый, Его́же небеса́ вся не мо́гут вмести́ти, то ка́ко и́мать в ма́ле утро́бе неопи́санное и безприкла́дное вели́чеством в себе́ удержа́ти, не домышля́юся. А́ще по челове́ческу чи́ну помышля́ю, ум ми исчеза́я во мне: дивлю́ся бо, ка́ко пла́мень сохрани́т плоть без вре́да, чужду́ся, ка́ко огнь в се́ни девяти́ ме́сяц пребыва́ет не опаля́я. Кольми́ еси́ возлю́блена Бо́гом Си Де́ва Пречи́стая, и чрез естество́ все твори́тся о Ней: о́бразом бо повеле́л есть бы́ти ди́вно, и пре́жде Той твори́ти в после́дняя ле́та; да а́ще кто и в неве́рствие впаде́т, мня немо́щно бы́ти сему́ по чи́ну челове́ческу чрез естество́, то почита́в си писа́ния свята́я, и утверди́ си я́ко на ка́мени ум на ве́ру. Кто бо не укрепи́т си ум на ве́ру тве́рду, слы́шав купину́ горя́щу при Моисе́и на горе́, е́же сотвори́ о́браз Предо́брыя Сея́ Де́вы? И па́ки, мо́ре на́двое раздели́ся па́лицею, и лю́дие преидо́ша по су́ху, и ног не омочи́ша: я́коже и Гаврии́лу благовести́вше, Де́ва Сия́ Сы́на роди́. И па́ки, по преше́ствии морсте́м бысть мо́ре, я́коже и пре́жде, во́дно без прехо́да: си́це и Пречи́стая Дев́а Сы́на роди́ де́вою, и роди́вши па́ки де́вою пребы́сть, я́ко и пре́жде; и руно́ Гедео́ново, на не́же сни́де роса́ и дождь без щу́ка (шу́ма); и жезл Ааро́нов в час прозяба́яй; и Дании́л[ом] ка́мень усече́ся без рук от горы́; И дверь (врата́) Езеки́илеви, и́миже Вели́кий Свят исхожда́ше.
И́ны мно́ги о́бразы изобря́щет кто о Пресла́вней Де́ве? О́ чу́до, всех чуде́с пречу́днейши! Же́нский у́бо пол превы́ше серафи́м бысть; я́ко Бог яви́ся ма́лым чим от а́нгел умале́н. Ничто́же но́во под со́лнцем. О́ Де́во благода́тная, Це́ркви Бо́жия свята́я, я́же духо́вный Соломо́н миронача́льный соде́лав, не зла́том, ниже́ ка́мением безду́шным укра́шена, но в зла́та ме́сто сия́ющи Ду́хом; вме́сто же ка́меней честны́х име́я многоце́ннаго би́сера Христа́, У́гля боже́ственаго, Его́же косну́тися и на́шим устна́м умоли́м, я́ко да освяще́ни того́ со Отце́м и Ду́хом, воспои́м, взыва́юще: свят, свят, свят Госпо́дь Савао́ф, еди́но естество́ Божества́ в трие́х соста́вех!
Свят Бог Оте́ц, Благоволи́вый о(т?) Тебе́, и от Тебе́ соверши́тися е́же пронарече́ преве́чное та́инство.
Святы́й Кре́пкий, Сын Бо́жий, Бог Единоро́дный, и Тебе́ Единоро́дну произведе́ от непло́дныя ма́тере днесь, я́ко да Единоро́ден Сый от Отца́ и Пе́рвенец всей тва́ри, Еди́н роди́ся от Тебе́ Де́вы Ма́тере, Перворо́ден в мно́зе бра́тии, подо́бен нам, от Тебе́ прича́щься пло́ти и кро́ви, но не от еди́ного Отца́ или́ Ма́тере произы́де, да единоро́дно еди́ному сохрани́тся е́же во всем еди́ное: Той бо Еди́н от Еди́ного Отца́ Единоро́ден, и Еди́н от Еди́ныя Ма́тере.
Свят Безсме́ртный, Пресвяты́й Дух, И́же росо́ю Своего́ Божества́ и боже́ственаго огня́ сохрани́в Тебе́ невре́дну, ка́меню че́стный несуме́нный (несомне́нный), случи́выйся необы́чнаго а́нгела просвеща́ем; роди́телем поко́рна и послушли́ва, мудрова́нием смире́на в виде́ниих высо́ких, сло́во кро́тко от несму́тныя души́ произноси́мо.
И что мно́го глаго́лю, ра́зве Бо́жие прия́телище: Тебе́ досто́йно вси ро́ди блажа́т, я́ко избра́нную сла́ву челове́чества; Ты свяще́нником Похвала́, царе́м Утвержде́ние, христиа́ном Наде́жда, де́вства плодоно́сный Сад: Тебе́ бо ра́ди добро́та де́вства простре́тся. Благослове́на Ты в жена́х, и благослове́н Плод чре́ва Твоего́! Испове́дающе Тебе́ Богоро́дицу благослове́ннии, а отмета́ющиися – про́кляти! О́ свяще́нная дво́ице, Иоаки́ме и А́нно! Приими́та от мене́ сло́во се о рождестве́. О́ дщи Иоаки́ма и А́нны, Влады́чице! Приими́ сло́во раба́ гре́шнаго та́жде от ражже́ния жела́ющаго и ве́рующаго, Тебе́ еди́ну стяжа́вшаго ра́дость и наде́жду, житию́ предста́тельницу и к Твоему́ Сы́ну Премени́тельницу, и спасе́ния Обруче́ние кре́пкое, и грехо́вному бре́мени Расточе́ние, и Утеше́ние искуше́нием, и Окормле́ние подоба́юще житию́.
И к го́рнему руково́дствуя Божеству́, ми́рови да́руй умире́ние, соверше́ное весе́лие и спасе́ние ве́чное о Христе́ Иису́се Го́споде на́шем, Ему́же сла́ва со Отце́м и Святы́м Ду́хом, ны́не и при́сно [и во ве́ки веко́в. Ами́нь.]