Креста́ пра́зднество твори́м, и все церко́вное исполне́ние озаря́ется. Креста́ пра́зднество твори́м, и луча́ми ра́достными лице́ всея́ вселе́нныя просвеща́ется. Креста́ пра́зднество твори́м, и́мже тма прогна́на бысть, а свет приведе́н бысть. Креста́ пра́зднество твори́м, и с Пропя́тым восхо́дим, зе́млю оста́вльши до́ле со грехо́м.

Крест воздвиза́емь быва́ет, и с собо́ю воздвиза́ет род челове́ческий. Крест воздвиза́емь быва́ет, и неприя́зненыя супроти́вныя си́лы па́дающеся отбега́ют и сокрыва́ются. Крест воздвиза́емь быва́ет, и вси гра́ди ликоству́ют и лю́дие веселя́тся: е́же бо помяну́ти есть Креста́ ра́дости о́браз есть, а е́же и о́браз кре́стен сотворе́на зре́ти ‐ есть му́жества вина́, и се́тования потребле́ние, и ле́ности прогна́ние зря́щему быва́ет.

Та́ко бо стяжа́ние вели́ко есть Крест: и́же бо и приобре́те и́, стяжа́ сокро́вище вели́ко, зла́та и сребра́ и би́сера и ка́мения безце́ннаго честне́е. Аз же всех до́брых добре́е и всех честны́х честне́е сокро́вище же нарица́ю, е́же есть и ве́щию и́менем, на не́мже спасе́нию на́шему нача́ток возложе́н быв испра́вися.

А́ще бо не бы Креста́ бы́ло, не бы Христо́с пропя́т. А́ще бы Креста́ не бы́ло, не бы́ Жизнь пропя́та на дре́ве. А́ще не бы Креста́ было, не бысть истекли́ из ребр исто́чницы неистле́нныя кровь и вода́ на очище́ние всего́ ми́ра, не бы́ рукописа́ние раздра́но бы́ло, не бы́хом свобо́ды улучи́ли, не бы́хом дре́ва живо́тнаго наслади́лися, не бы рай отве́рст был, не бы́ обраща́юще[еся] [пла́менное] ору́жие пути́ сотвори́ло, не бы́ разбо́йник в раи́ был.

Что же се си́це мно́го глаго́лю? А́ще бы Креста́ не бы́ло, не бы Христо́с на зе́млю прише́л. А́ще бы Христо́с на зе́млю не прише́л, не бы́ Де́вая была́. А́ще не бы́ Де́вы бы́ло, не бы́ Христо́ва Рождества́ втора́го бы́ло, не бы́ Христо́с вочелове́чился, не бы́ Рождества́ бы́ло, не бы́ я́сли, не бы́ пеле́н, не бы́ обре́зания осмодне́внаго бы́ло, не бы́ покоре́ния к роди́телема бы́ло, не бы́ расте́ния те́лу и явле́ния, не бы́ показа́ния чуде́с, не бы́ креще́ния прича́стие, не бы́ Иу́да пре́дал, не бы́ Пила́т суди́й, не бы́ша иуде́и сме́ли пропя́ти непови́ннаго. А́ще не бы́ Креста́ бы́ло, не бы́ смерть попра́на была́, не бы ад испрове́ржен был, не бы го́рький змий умерщве́н был.

Сего́ ра́ди вели́ка и честна́ есть вещь Крест! Вели́ка у́бо, я́ко мно́га бла́га исправле́ния бы́ша им и си́ла мно́га, вели́ко и во Христо́вы му́ки и чудеса́ честна́я, я́ко Христо́ва му́ка и побе́да есть Христо́с. Му́ка у́бо за во́льную страсть Му́ченому на нем. Побе́да же и зане́ уя́звен бысть диа́вол, побеждена́ же бы́вше с ним и смерть, и затво́ри а́дстии сокруши́шася.

Коне́чное же, Крест всему́ ми́ру бысть о́бщее спасе́ние. Крест - упова́ние христиа́ном, наде́ющимся спаси́тель, вдаю́щимся приста́нище, боля́щим врачь, неду́жным исцели́тель, здра́вию пода́тель, умерщве́ным живо́т, благоче́стия пронаписа́ние, хуле́нию запреще́ние. Крест ‐ ору́жие на враги́, ски́петр ца́рствия, вене́ц красоты́, о́браз ненаписа́н, жезл си́лы, утвержде́ние ве́ры, подпо́р ста́рости, води́тель слепы́м, свет су́щим во тме, наказа́тель безу́мным, учи́тель младе́нцем, греху́ взя́тель, покая́нию показа́ние, пра́вде написа́тель. Крест ‐ ле́ствица на небеса́ возводя́щая, путь на добродея́ние наставля́яй, животу́ испроси́тель, сме́рти разруше́ние, истле́ния утужде́ние (избежа́ние), огню́ угаше́ние, к Бо́гу дерзнове́ние, ключь Ца́рствия небе́снаго. Крест - в нощи́ храни́тель, живу́щим бразда́, лени́вых содержи́тель, моли́тель отпуще́нию грехо́в, прия́тель споспе́шником, засту́пник добр, в напа́стех помо́щник, в беда́х спаси́тель, в мо́ри ко́рмчий, в тузе́ отради́тель. Крест храни́т спя́щая в нощи́, с набдя́щими бдит. Крест ‐ тружда́ющимся поко́й, а́лчущим пи́ща, постя́щимся кре́пость, подвиза́ющимся пома́занник, наги́м одея́ние, пу́тник стра́нным, бога́тым целому́дреник, вдови́цам помо́щник, си́ротам засту́пник. Крест ‐ князе́м честь, царе́м держа́ва, во́ином побе́да, иере́ом сла́ва, де́вам служи́тель, чистоте́ печа́ть, све́рсти (супру́жества) соу́з, гра́дом храни́тель, о́браз (жития́) утвержде́ние, прия́зни обруче́ние, на враги́ преще́ние, на супроти́вныя боре́ц, пога́ным прогони́тель, ва́рваром пострека́тель, ми́ру хода́тай, любви́ творе́ц, всему́ ми́ру смири́тель, всем конце́м земли́ написа́ние, небеси́ высота́, земли́ глубина́, всей тва́ри соде́тель.

И все ре́кши, Кре́ст ‐ му́кам Христо́вым глава́, верх чудесе́м бы́вшим в нас. Сий сла́ва Христо́ва нарица́ется, сий ча́ша вожделе́нная слове́т и сконча́ние бы́вшим нас ра́ди му́кам Христо́вым.

Ему́же сла́ва и честь и держа́ва и поклоне́ние, Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.