Явле́нию бы́вшу с небесе́ на зе́млю Спа́са на́шего Иису́с Христа́, проро́ческим словесе́м бы́вшим вся поднебе́сная просвеще́на бысть, словесе́м ве́рующим во еди́наго Бо́га Отца́ Вседержи́теля и в Го́спода на́шего Иису́с Христа́, креща́ющеся о Святе́м Ду́се». Бе же е́тера де́ва и́менем Иусти́на, Еде́сия отца́, ма́тери же Клидо́нии, во гра́де Антиохи́йстем, су́щем близ Дафа́на. Та в хра́ме свое́м при око́нцы се́дши, послу́шаше е́тера диа́кона и́менем Пра́влия глаго́люща вели́чия Бо́жия, вочелове́чение Го́спода на́шего Иису́с Христа́ пропове́дающе, проро́чество и рождество́ е́же от Де́вы Мари́и. И поклоне́ние волхво́в, и явле́ние звезды́, и славосло́вие а́нгельско. Си́лу же Креста́ и зна́мением и чудесе́м быва́ющим, и воскресе́ние е́же из ме́ртвых, и явле́ние е́же ко ученико́м и заве́т е́же к ним. И вознесе́ние е́же на небеса́ и седе́ние е́же одесну́ю Отца́. И неразруши́мое Ца́рство Его́.
Си словеса́ слы́шавши, па́че зре́вши око́нцем свята́я де́ва глаго́лемых диа́коном, не мо́жет терпе́ти ражже́нием Свята́го Ду́ха, но хотя́ше сви́дети лице́ диа́коне, и не могу́щи ви́дети, рече́ ма́тери свое́й: «Ма́ти, послу́шай дще́ри своея́. Ничто́же суть и́мже по вся дни покланя́емся, и́доли бо суть, дре́вяни бо суть, и сре́брени и зла́ти, и костьми́ живо́тных рука́ми челове́ческими сотворе́ни, на ня́же а́ще еди́н прии́дет от Галиле́и без руки́ челове́чески, сло́вом и моли́твою вся побе́дит». Она́ же горды́нею прему́дрости покрове́на су́щи, рече́: «Ча́до, да не очути́т оте́ц твой сове́та твоего́». Рече́ же блаже́нная к ней: «Ве́сто да бу́дет тебе́ ма́ти и моему́ отцу́, я́ко аз Христа́ ищу́, пропове́даемаго сусе́дом мои́м Пра́влом, уви́дех бо о Нем послу́шающи на мно́ги дни, я́ко несть ино́го Бо́га, о Не́мже ны ся есть спасти́».
Си ре́кши, отъи́де, осо́бь творя́щи моли́твы к Бо́гу. Ма́ти же ея́ в нощи́ на ло́жи все пове́да му́жу своему́. Бде́вша же о себе́ мно́го и посе́м усну́вша в сласть, ви́деста во сне, я́ко а́нгельско во́инство прии́де над ня в хра́мину бо́ле ста со свеща́ми горя́щими глаго́люще: «И аз дам ва́ма Ца́рство Бо́жие». Ви́дев же Еде́сий, ужа́сен быв. У́тро воста́в ра́но, пои́м жену́ свою́ и дщерь, и́де в це́рковь с Пра́влом. И моля́ху и́, да доведе́т я́ ко епи́скопу Епта́ту. Сотвори́ же диа́кон та́ко, послу́шав его́. И припа́дше к нога́ма епи́скопу, моли́ша его́, да даст им Христо́во зна́мение. Епи́скоп же не хотя́ше, до́ндеже пове́да ему́ явле́ние Христо́во и жела́ние деви́цы, е́же имя́ше Христа́ ра́ди. Еде́сий же постриже́ власы́ главы́ своея́ и браду́, бе бо иере́й и́дольский, припа́дше ко епи́скопу, прия́ша зна́мение Христо́во. Еде́сий же сподо́блен бысть чи́ну презви́терскому; пребы́сть же в нем еди́но ле́то и шесть ме́сяц, почи́ с ми́ром. Свята́я же де́ва хожда́ше ча́сто в це́рковь.
Аглаи́да сей же е́тер и́менем, схола́стик, до́бра ро́да и бога́т зело́, губи́тель о́бразом, устраше́н же о и́дольстей льсти; зря святы́я де́выя ходя́ща ча́сто в це́рковь, восхоте́ ей и сла́ша к ней му́жа мно́ги, о во́ле жены́ вопраша́ о посажде́нии. Свята́я же всем досажда́ющи, отсыла́ше я́, глаго́лющи: «Уже́ аз обручена́ есмь Христу́». Он же собра́в наро́д и восхоте́ ей сотвори́ти ну́жду. Су́щеи же с не́ю сотвори́ша кличь вели́к, зва́ху су́щая в дому́ еи. Они́ же услы́шавше, притеко́ша со ору́жием, отгна́ша я́. Сам же, одержи́мь сый по́хотию, объя́т деви́цу и удержа́ ю́. Свята́я же де́ва, сотво́рши зна́мение Христо́во, поверже́ и́ взна́ка (на́взничь) на зе́млю и пха́юще ре́бра и лице́ ему́ окровави́, ри́зы ему́ растерза́вши, поста́ви и́ сра́мна, подо́бно сотвори́вши учи́тельницы своея́ Фе́клы. И та́ко и́де в це́рковь.
Аглаи́да же, разгне́вався присту́пль ко еди́ному волхву́ и́менем Киприа́ну. И обеща́ ему́ вда́ти зла́то и сребро́ два тала́нта да улови́т святу́ю де́ву, а́ще мо́жет волшве́нием свои́м. А не ве́дый окая́нный, я́ко непобеди́ма есть си́ла Христо́ва. Киприа́н же сжа́ли си о ю́ноши, призва́в волшве́нием свои́м бе́са. И шед де́мон, и рече́: «Чесо́ ра́ди призва́ мя?» Он же рече́ к нему́: «Ю́ноша возлюби́л есть деви́цу от Галиле́и, мо́жеши ли ми ю́ преда́ти?». Окая́нный же бес, е́гоже не имы́й, я́ко имы́й обеща́ся. Киприа́н же рече́ к нему́: «Пове́ждь ми дела́ твоя́, да ти ве́ру иму́». Де́мон же рече́ к нему́: «Престу́пник бых Бо́жий, послу́шав отца́ моего́, небеса́ смято́х, а́нгелы с высоты́ сведо́х, Е́ву прельсти́х, Ада́ма рая́ лиши́х и Ка́ина уби́йству научих́, и зе́млю кровьми́ оскверни́х, те́рние и волче́ц прозябе́ мене́ ра́ди, позо́рище собра́х, преблудоде́яние пригото́вах, руга́ние сотвори́х, лю́ди Изра́илеви научи́х и́долом служи́ти, и научи́х же я́ поклони́тися тельцу́, и нава́дих я́ пропя́ти Христа́, гра́ды потрясо́х, сте́ны разверго́х, до́мы раздели́х ‐ си вся сотво́рь, ка́ко могу́ яви́тися зол ея́ ра́ди. Но приими́ ча́ры сия́ и просы́пли о́крест хра́ма ея́, да аз прише́д, наведу́ ум отца́ моего́ на ню, и а́бие послу́шает тебе́».
Свята́я же де́ва, воста́вши в тре́тий час но́щи, возда́ше моли́твы Бо́гу. Очути́вши же стремле́ние де́моново и ражже́ние се́рдца, возре́к Влады́це своему́ и зна́мением и си́лою кре́стною зна́менавше все те́ло, гла́сом ве́лиим рече́: «Бо́же Вседержи́телю, О́тче земна́го О́трока Твоего́ Иису́с Христа́, Погруже́й человекоуби́йца зми́я в бе́здне о́гненей, и Спас уловле́ныя им, Простры́й не́бо и Утвержде́й зе́млю, Просвеще́й со́лнце и луну́ Сотво́рь све́тлу, Созда́вый челове́ка по о́бразу Своему́, Введы́й в рай пи́щи, да наслажда́ется тва́ри бы́вшей с Тобо́ю. Прельще́нием змии́ным озе́мствована, не́ си его́ оста́вил, Человеколю́бче, но си́лою Креста́ Твоего́ возврати́л еси́ Иису́с Христо́м, И́мже весь мир просвеще́н бысть, вся зна́ют Тя Бога, Су́щаго на́до все́ми. Ты Го́споди, и ны́не спаси́ рабу́ Свою́ глаго́лом Твои́м, и да не прико́снется мне напа́сть. Тебе́ бо обеща́хся де́вством сохрани́ти, Единоча́дому Иису́с Христу́. Тя бо возлюби́х всем се́рдцем мои́м и все́ю кре́постию мое́ю, Иису́с Христе́. Ты бо вожже́ свети́льник души́ моея́ любо́вию Свята́го Твоего́ Ду́ха. Те́мже молю́ся Тебе́, не даждь мене́ в ру́це губи́телю и не осла́би мене́, да не преступлю́ обетова́ния е́же к Тебе́, но отжени́ от мене́ сове́тника злу бе́са». И си ре́кши, все те́ло свое́ зна́мением Христо́вым зна́менавши. И ду́ну на де́мона, и посра́мльши отгна́ и́. Бес же посра́млен прише́д, ста пред Киприа́ном. И рече́ к нему́ Киприа́н: «Где есть по ню́же тя посла́х? Что аз бдех, а ты не улучи́?». Де́мон рече́: «Не вопраша́й мене́, я́ко не могу́ ти глаго́лати. Ви́дех бо е́теро зна́мение и убоя́вся отбежа́х».
Киприа́н же призва́, поруга́вся ему́, кре́пльшаго бе́са свои́м волшве́нием. Прише́д же и той, рече́: «Киприа́не, чух повеле́ние твое́ и о́ного зло́бу. Те́мже посла́ мя отец́ мой диа́вол испра́вити печа́ли твоя́. Но приими́ ча́ры сия́ и посы́пай о́крест хра́ма ея́, да аз прише́д, вдам ти ю́». Сотвори́ же Киприа́н та́ко, и и́де де́мон к де́ве. Свята́я же де́ва воста́в в шесты́й час но́щи, моли́тву свою́ возда́ше Богу, глаго́лющи си́це: «Полу́нощи воста́х испове́датися Тебе́ о су́дьбах пра́вды Твоея́. Бо́же, всех Ми́лости, небе́сным Зако́не, и превы́шним Храни́телю, и подземлены́м Стра́шне, Посра́мль диа́вола и Возвели́чий же́ртву Авраа́млю, Све́ргий Ви́ла и уби́в зми́я, и отроко́м Свои́м зна́ны сотвори́ ра́зуму Божества́ Твоего́ вавило́няном, Смотря́й вся́ких, возлю́бленым о́троком Свои́м Иису́с Христо́м просвеще́й и омраче́ная дре́вле и умерщве́ны у́ды жи́вы сотвори́. Не пре́зри мене́, Человеколю́бче Царю́, но соблюди́ мою́ чистоту́, и свети́льник де́вства моего́ неугаса́емь сохрани́, да вни́ду с Женихо́м мои́м Иису́с Христо́м и возда́м преда́ние о Христе́ чи́сто, е́же ми преда́сть, я́ко Тебе́ есть сла́ва во ве́ки веко́в. Ами́нь.» Си́це помо́льшися, запрети́ бе́су Христо́м, и посра́мльши отгна́. О́нже посра́млен прише́д, ста пред Киприа́ном, и рече́ Киприа́н: «Где есть по ню́же тя посла́х?» Бес же рече́, «Побежде́н есмь. и не могу́ ти рещи́. Ви́дех бо е́теро зна́мение, и убоя́вся отбежа́х».
Киприа́н же рече́, призва́в мни́маго всех кре́пльша, самого́ рече́ отца́ бесо́м, и рече́: «Что есть зло́ба сие́? Побежде́на бы́ста и вся твоя́ сила́». Де́мон же рече́: «Аз ти пригото́ваю, то́кмо гото́в бу́ди». Киприа́н же рече́ к нему́: «То ко́е есть зна́мение побе́ды твоея́?». Бес же рече́: «Разжгу́ огньми́ разли́чными». Шед же де́мон по шести́ дний, в полу́нощи прело́жься во о́браз деви́ческ, вни́де в храм иде́же свята́я де́ва живя́ше и, сед на одре́, рече́ ко святе́й деви́це: «Хощу́ аз с тобо́ю бы́ти день сей, по́слан есмь Христо́м де́вство твое́ сохрани́ти. Но что у́бо есть страсть де́вства твоего́, рцы ми? Ли ка́я мзда его́? Зело́ бо тя ви́жу удруче́ну посто́м». Свята́я де́ва рече́: «Мзда у́бо мно́га есть, а страсть мала́». Бес же рече́: «Е́ва де́вою сущи́ в раи́ пищи́ послу́шавши ино́го и роди́ сы́ны, и ра́зум добру́ и злу прия́. И от тоя́ весь мир рожде́н бысть. И ты же послу́шавши мене́, иди́ со мно́ю, а́може тя веду́». Свята́я же де́ва воста́, ходя́щи изы́ти из две́рий, прельще́на де́моном. Бес же вскочи́, изы́де пе́рвее. Она́ же раждали́[ше] си и смя́тшися зело́. И разуме́вши, кто есть прельща́я ю́, обрати́ся на моли́тву. Зна́менавшися зна́мением Христо́вым, ду́ну на бе́са и, посра́мльши и́, отгна́ и́. Она́ же ма́ло безмо́лствовавши от смуще́ния, похвали́ Бо́га, и а́бие отступи́ огнь от нея́. Наче́нши же си́це, рече́: «Сла́ва Ти, Христе́ Бо́же мой, спаса́я наси́лованыя неприя́знию и просвеща́я рабы́ Своя́, творя́щая во́лю Твою́. Не преда́ждь мене́ Влады́ко, да не побеждена́ бу́ду неприя́знию, но пригвозди́ [в] стра́се Твое́м плоть мою́ и зако́ном Твои́м поми́луй мя, и даждь сла́ву и́мени Твоему́. Ами́нь». Бес же с вели́ким студо́м яви́ся Киприа́ну. Рече́ же Киприа́н к нему́: «Или́ ты побежде́н еси́ еди́ною де́вою? Что есть си́ла побе́ды ея́?» Де́мон же рече́: «Не могу́ ти рещи́, ви́дех бо е́теро зна́мение, и убоя́вся отбежа́х. А́ще ли хо́щеши уве́дети, клени́ ми ся, и реку́ ти».
Киприа́н же рече́: «Ка́ко же ти ся клену́?» «Си́лами мои́ми вели́кими су́щими во мне». Киприа́н рече́: «Та́ко ми си́лы твоея́ вели́кия, не отве́ргуся тебе́». Де́мон же ве́ру имь, рече́: «Ви́дех е́теро зна́мение Пропне́наго, и убоя́вся отбежа́х». Киприа́н рече́: «То бо́ле ли тебе́ есть Пропя́тый?» Бес рече́: «Послу́шай, реку́ ти всю и́стину. Ели́ко у́бо их а́ще прельсти́м, ли сотвори́м что, отпу́щено нам быва́ет зде. Но та́мо ме́дяны ви́лы суть, и разже́гшия возложа́т на вы́ю ли а́нгела, ли челове́ка согре́шьша. И та́ко стремле́нием о́гненым веду́т а́нгелы пред суди́ще Пропне́наго». Киприа́н рече́: «Те́мже у́бо и аз потща́тися хощу́ прия́тель бы́ти Пропя́тому, да не в ту же му́ку причте́н бу́ду». Де́мон рече: «Клял ми ся еси́, да престу́пиши ли кля́тву?». Киприа́н рече́: «Ка́ко ти ся клях?» Бес рече́: «Си́лами мои́ми вели́кими». Киприа́н рече́: «И тебе́ небрегу́, и сил твои́х не бою́ся, в сию́ бо нощь ве́ру ях моли́твами святы́я деви́цы и зна́мением Пропя́таго, я́ко не́мощен еси́ и бежди́в. Те́мже и аз, зна́мением зна́менався, отрица́юся тебе́». И си рек, зна́менася, глаго́ля: «Сла́ва Тебе́ Бо́же, отъиди́ от мене́ де́моне, ищу́ бо Христа́ моего́».
Бес отъи́де посра́млен, Киприа́н же кни́ги своя́ волше́бныя заде́в отроко́м и прии́де с ни́ми в це́рковь Бо́жию, и припаде́ к нога́м блаже́ннаго Анфи́ма епи́скопа, глаго́ля: «Ра́бе Блаже́ннаго Христа́, хощу́ во́ин бы́ти Христо́в, вчести́ся во ста́до Его́». Блаже́нный Анфи́м, мнев я́ко прельсти́ти его́ хо́щет и ве́рныя, рече́ к нему́: «Киприа́не, не мози́ искуси́ти Це́ркви Бо́жия, непобеди́ма бо есть си́ла Его́». Киприа́н рече́: «Аз ве́рую Ему́, я́ко непобеди́ма есть. В сию́ бо нощь посла́х де́моны на святу́ю де́ву Иусти́ну, хотя́ прельсти́ти ю́. И уви́дех, я́ко моли́твами свои́ми победи́ я́, зна́мением Христо́вым отгна́ я́. Те́мже приими́ кни́ги моя́ и сожзи́ огне́м, а мя поми́луй». Святы́й же Анфи́м, ве́ру имь, кни́ги его́ сожже́, а самого́, благослови́в, отпусти́, реки́й: «Потщи́ся в це́рковь Бо́жию». Киприа́н же шед в дом свой, сокруши́ же и́долы, всю же нощь рыда́ше и пла́кашеся, глаго́ля: «Увы́ мне! Ка́ко могу́ яви́тися пред суди́щем Христо́вым, толи́ко зол сотво́рь? Ка́ко благословлю́ усты́ мои́ми, и́миже кля́хся, призыва́я нечи́стыя де́моны». Посы́пав же главу́ свою́ по́пелом, лежа́ше молча́, ми́лости Бо́жия прося́.
У́тру же бы́вшу, в день субо́тный вели́кия Па́схи, и́де в це́рковь Бо́жию. Гряды́й же по пути́, нача́ глаго́лати: «Го́споди, а́ще есмь досто́ин раб Твой соверше́н нарещи́ся, даждь да вни́дущу ми в це́рковь Твою́, да услы́шу словеса́ святы́х книг подо́бна моему́ спасе́нию. И вла́зящу ему́ в це́рковь, Дави́д глаго́лаше: «Ви́дел еси́, не премолчи́, Го́споди, не отступи́ от мене́». Иса́ия же па́ки: «Се разуме́ется о́трок мой». Дави́д же па́ки: «Вари́ста о́чи мои ́ко у́тру поучи́ти ми ся словесе́м Твои́м». И па́ки Иса́ия: «Не бо́йся, отроча́ мой Иа́кове и возлю́бленный Изра́илю, и́же Аз избра́х». Та́коже и Па́вел апо́стол: «Христо́с ны искупи́ от кля́твы зако́нныя». Дави́д же па́ки, «Кто возглаго́лет си́лы Госпо́дни и слы́шаны сотвори́т вся хвалы́ Его́?» Пото́м просвеще́ние Ева́нгельское, пото́м уче́ние от епи́скопа, па́ки сло́во катехуме́нское (огласи́тельное), и диа́кон глаго́ля: «Катехуме́ни (оглаше́ннии), вон иди́те». Киприа́н же седя́ше, и рече́ ему́ диа́кон Асте́рий: «Иди́ вон». И рече́ Киприа́н: «Раб сотворе́н есмь Распя́тому, да изго́ниши мя вон?». Диа́кон рече́: «Не уже́ соверше́н еси́». Киприа́н рече́: «Жив ми есть Христо́с, Посрамле́й де́моны и святу́ю деву Спас. И мя поми́луй, не изы́ду си́це, а́ще не бу́ду соверше́н».
Диа́кон же Асте́рий возвести́ епи́скопу. Призва́в же и́ епи́скоп и стяза́ и́ по зако́ну, и моли́тву сотвори́ над ним, я́ко всем пла́катися, и та́ко крести́ и́. Во осмы́й же день подо́бник бысть Та́йнам Христо́вым, в двадеся́тый же день иподиа́кон же и две́рник святы́м Тайнам свята́го двора́, в четыредеся́тый же день диа́кон Христо́в бысть. Благода́ть же дана́ ему́ бысть на бе́сы, и всяк неду́г исцеля́ше. Мно́ги же от е́ллинския ве́ры уча́ше бы́ти христиа́ны. Сконча́вшу же ле́ту, сосе́дник бысть епи́скопу, пожи́т же в чи́ну презви́терства шестьна́десять лет. Блаже́ный же Анфи́м созва́ епи́скопы от окре́стных град, пове́да им о церко́вном устрое́нии, еще́ жив сый. И, вдасть стол епи́скопства Киприа́ну, не по мно́зих днех почи́ о Христе́ с ми́ром. Мног же устро́й сотвори́ Киприа́н в це́ркви. Святу́ю же де́ву диакони́су сотвори́ и нарече́ и́мя ей Иусти́на и сотвори́ ю́ ма́терь монастыре́м. И мно́ги же просвети́ словесе́м Киприа́н и, отторга́я от е́реси, прилага́ше к ста́ду Христо́ву, Ему́же сла́ва во ве́ки веко́в, ами́нь.