Благи́й Де́латель оляде́вшия преступле́нием земли́ челове́ческих серде́ц, Сын и Сло́во О́тчее, / И́же сшед от недр О́тчих и Сый в безвеще́ственых Того́ не́дрех, / де́лая и обновля́я зе́млю серде́ц и те́рние неве́рия греха́ изсеца́я, / не впряжне́нием живо́тных и ора́лом, но оглаше́нием слове́с и поуче́нием и соверше́нием богозна́мения / се́я боже́ственое се́мя е́же в Него́ ве́ры со Отце́м и со Святы́м Ду́хом. / Се же пе́рвое возде́лание Того́ – боже́ствении ученицы́ Его́, / и́же благо́ю земле́ю серде́ц и теплото́ю ве́ры прии́мше боже́ственое се́мя, / и́же всади́ в них и углуби́ Всеблаги́й Госпо́дь коре́ние того́. / Возрасто́ша же ди́вне зело́, и сте́блие их я́ко ке́дры Бо́жия, испо́лнь богогласова́ния ева́нгельскаго. / Сень же богопропове́дания их покры́ язы́ческия и испо́лни зе́млю плоды́ богоразу́мия. / И сего́ ра́ди рожде́ние испусти́ша благочести́вых от мо́ря и до мо́ря, и о́трасли их от конца́ и до конца́ небе́с. / Ели́цы же помрачи́шася неве́рствием и недосто́йни досто́йни бы́ша се́мени боже́ственаго, поуче́ния Христова / - я́ко Иу́да лука́вый, прии́м бо сие́ преда́тельным и сребролю́бным се́рдцем, / и а́бие неве́рием окамени́шася. / Та́кожде и саддуке́и искуси́тельным смы́слом са́ми расхи́щени бы́ша от возду́шных птиц лука́вых бесо́в, / слы́шаще сия́ кни́жницы и законоучи́тели, глаго́лаху: / «Ка́ко Ты, Челове́к сый, твори́ши Себе́ Бо́га?». / Сего́ ра́ди подави́ша я́ те́рнием неве́рствия и пре́лести жития́. /

Прие́м у́бо сие́ боже́ственое семя́ поуче́ния Христо́ва благи́м се́рдцем и разже́ною ве́рою вели́кий Иа́ков, / и́же по отцу́ и́мени Алфе́ев, по благода́ти же Госпо́день апо́стол,/ и́же возрасте́ зело́ и бысть дре́во ве́лие, я́ко и пти́цам небе́сным вита́ти под се́нию его́, / си́речь язы́чному мно́жеству и́же прия́ша небе́сное богопропове́дание его́. / От него́же пита́еми кра́мы : / плоды́ разума боже́ственых та́инств и за́поведьми зако́на жи́зни нетле́нныя. / За превысо́кое же благода́ти того́, изя́щное доброде́телей ра́зума, / таково́е сосло́вия язы́к се́мя боже́ственое того́ именова́ша. /

Пои́стинне в пра́вду те́ми нарече́н бысть богопропове́дник се́мя боже́ственое, / его́же Единоча́дый Сын Бо́жий насади́, Святы́й и Животворя́щий Дух напои́, и Безнача́льный Бог Оте́ц возрасти́. / Сие́ се́мя боже́ственое и́мать на ве́твех огневеща́ннаго язы́ка своего́ живо́тныя плоды́ богопропове́дания, / е́же о воплоще́нии Единоро́днаго. / Сие́ боже́ственое се́мя нося́ на себе́ та́инство безсме́ртныя пи́щи боже́ственыя, / его́же прие́млюще ве́рнии, гла́дом не умира́ют. / Сие́ боже́ственое се́мя имы́й на себ́е́ живо́тный грозд нетле́ннаго пития́ честны́я кро́ве Христо́вы, / ея́же пию́ще ве́рою язы́цы возвесели́тися и́муть в Ца́рствии Его́. / Сей я́ко се́мя боже́ственое Госпо́день апо́стол вели́кий Иа́ков имы́й в себе́ огнь небе́снаго пропове́дания и ре́вности Госпо́дни, е́же рече́: / «Огня́ приидо́х воврещи́, и что хощу́ а́ще же уже́ возгоре́ся». / Его́же пла́менем пояда́емь рачи́тель Госпо́день, к си́мже и наше́ствием Пресвята́го и Животвори́ваго Ду́ха в день пятидеся́тный, / е́же у́бо зло́бы покрыва́ло отъя́тся тому́ и сугу́бо просвеща́ется вседе́тельною си́лою Ду́ха. / И ре́вностию Госпо́днею распаля́емь, устремля́ется на пропове́дание, / всю идо́льскаго нече́стия пре́лесть попаля́ет огне́м боже́ственым про́поведи и ре́вности Госпо́дни. / Возде́ет же и обновля́ет зе́млю серде́ц Ду́ха благода́тию и всажда́ет се́мя боже́ственыя ве́ры. / Я́ко нищь ду́хом, явля́яся бога́т же сокро́вищем благода́ти боже́ственыя, / е́юже исцеля́ше я́зи челове́ческия и от злых духо́в стра́ждущая, / сам же, терпя́ вся приве́ржение злых, страда́ше. / Изгони́мь из гра́да во град, и от ве́си во весь. / Бие́мь и уничижа́емь, и ка́мением побива́емь. / А́лчен, и жа́ден, и наготу́я. / Я́ко буй и уро́д ми́ру сему́ вменя́емь, да посрами́т прему́дрыя и обрати́т тех к бу́йству боже́ственаго пропове́дания. / И превы́ше всех ви́димых быва́я, не имы́й влага́лища, ни сапо́г, ни жезл, ни при по́ясе ме́ди. / Но сопря́тан от всех по Госпо́дню словеси, вся уме́ты вмени́в Его́ ра́ди, / да Того́ еди́ного приобря́щет, Его́же и стра́сти подо́бник бысть: / я́коже Влады́ка и сей кресто́м совзима́ется от страда́льнаго де́лания е́же в седме́м [дни], и субо́тствует до́брое субо́тство. / Во упокое́нии осма́го, но́щию непресеца́емаго, / зли́и бо де́латели диа́вольскаго се́мене, е́мше того́, ко кресту́ пригвожда́ют. /

Терпя́ше же до́блествене. / Облегча́ет уподобле́нием стра́сти Го́спода своего́ / и ра́довашеся душе́ю зело́, я́ко уже́ хо́щет созерца́ти сокро́вища О́тча мы́слене. / Веселя́шеся све́тло, я́ко прии́де час е́же узре́ти Единоча́даго со Отце́м и Святы́м Ду́хом. / Благодаря́ше, я́ко скончава́ше до́брое тече́ние и приспе́ вре́мя прия́ти вене́ц от руки́ Госпо́дни. / И моли́твою благослови́в, и все ве́рных исполне́ние. / Оставля́ет многострада́льную заве́су пло́ти / и отхо́дит от зде су́щих кре́стною сме́ртию. / Воскреса́ет же у́мне душе́ю в небе́сная селе́ния, / иде́же Предте́ча Христо́с вни́де. / И той всели́ся, я́ко до́бре послужи́ Ему́, / и я́ко се́мя боже́ственое со́бран бысть в живо́тныя жи́тницы. / Во всеми́рное же Воскресе́ние и многострада́льное те́ло свое́ восприи́мет, просла́влено све́том нетле́ния, / да и́мже пострада́, с тем и просла́вится во сла́ве небе́снаго Ца́рствия. /

От земны́х же ко́е похвале́ние слове́с кто по достоя́нию возмо́жет твоему́ вели́честву принести́? / О́ се́мя боже́ственое Госпо́день апо́столе, порожде́ное Ду́хом Святы́м в жизнь нетле́ния! / О́ се́мя свято́е богопропове́дниче, / его́же Бог Оте́ц Сло́вом И́стинным соблюде́ во и́мя Свое́! / О́ се́мя свяще́нное боговеща́телю, его́же Единоча́дый освяще́нствова свяще́нством боже́ственых Его́ страсте́й / и просла́ви сла́вою, ю́же Оте́ц Тому́ дарова́! / «Аз же, - рече́, - сла́ву, ю́же дал еси́ Мне, дах им», / и па́че: «О́тче, и́хже дал еси́ Мне, да бу́дут со Мно́ю и да ви́дят сла́ву Мою́». / Такову́ю боже́ственую сла́ву и еще́ в житии́ чистото́ю ума́ зря. / Ны́не же, преше́д от вре́менных, па́че ясне́йше зри́ши сла́ву Единоча́даго / и я́ко со́лнце луча́ми чуде́с озаря́еши ве́рных исполне́ние /

Ви́диши сла́ву Его́, я́ко до́бре послужи́ Ему́, / и умно́жи да́нный ти благода́ти тала́нт, / и со дерзнове́нием вни́де в ра́дость Бо́га своего́. / Ви́диши ли сла́ву Его́, я́ко сре́бро я́же дасть тебе́, до́бру ку́плю тем сотвори́ / и отъи́де со мно́жайшим приобре́тением, я́ко да́ры принося́ Влады́це спасе́ние вселе́ныя. / Ви́диши сла́ву Его́, я́ко бо́дрено побде́ в пе́рвую стра́жу, / и втору́ю, и в петлоглаше́ние, и до после́дняя стра́жи вре́менныя жи́зни, / я́ко да усря́щеши Того́ с ра́достию. / Ви́диши сла́ву Его́, я́ко до́бре де́ла в виногра́де боже́ственыя про́поведи от пе́рваго часа́ до вече́рняя годи́ны / и сугу́бу мзду восприя́л еси́. / Ви́диши сла́ву Его́, я́ко и́мени Его́ ра́ди неради́в о вре́менней сла́ве и преоби́дев пи́щи наслажде́ние и бога́тство тле́нное. / И вме́сто сих небе́сная блага́я досто́ин бысть прия́ти. / Ви́диши сла́ву Его́, я́ко претерпе́л еси́ Его́ ра́ди вся́ко му́кам преложе́ние и кре́стныя ра́ди стра́сти подо́бник того́ страда́ния бысть. / Сего́ ра́ди и сла́ве приобе́щник. / В не́йже ны́не живы́й при́сно, весе́лия исполня́емь: богови́дче, богоизбра́нне и богонауче́нне. / И всегда́ пита́яся боговиде́нием Влады́ки своего́ и боже́ствеными заря́ми просвеща́емь, неизрече́нным светоли́тием осия́емь. / Я́сно зри́ши сла́ву боже́ственую, я́ко со дерзнове́нием предстоя́ престо́лу всех Царя́ со тма́ми а́нгел и арха́нгел, / бесе́дуя Ему́ нехода́тайствене за все ве́рных исполне́ние. /

И ми́лостива Того́ нам сотвори, вели́кий Госпо́день апо́столе, / и́же ве́рою соверша́ющим и све́тло пра́зднующим день боже́ственаго ти отше́ствия, во́ньже отше́д страда́нием, / пора́довася со Христо́м ра́достию неотъе́млемою во сла́ве Ца́рствия Его́. / И я́ко се́мя боже́ственое, упра́ви на́ша сердца́ ко прия́тию живо́тнаго се́мени за́поведей Христо́вых / и свои́ми моли́твами ороси́ е́же принести́ плод досто́ин жи́тницам небе́сным в три́десять и шестьдеся́ть и во сто. / Сла́ве же и ра́дости е́йже сподо́бися и нам причасти́тися моли́, / и ве́чному наслажде́нию, а́нгельскому торжеству́ и ликова́нию со все́ми и́же от ве́ка угоди́вшими. / Благода́тию и человеколю́бием Го́спода на́шего Иису́с Христа́, / я́ко Тому ́подоба́ет вся́ка сла́ва, со Отце́м и со Святы́м Ду́хом / ны́не и при́сно и во ве́ки веко́в. Ами́нь.