Ве́лия и многоразли́чна безпло́тныя и велеле́потныя арха́нгельския твоея́ добро́ты и стоя́ния, уми́, да́рове же и благода́ти, пресла́вный Михаи́ле архистрати́же, и простра́нное, и высо́кое вои́стину, и многообра́зное вселе́потнаго и безпло́тнаго твоего́ зра́ка и живо́тнаго строе́ния.
Ника́коже челове́ческий язы́к и плотска́я си́ла теле́сно и смире́но, и нехи́тро теле́сными сосу́ды от на́шего се́рдца происходя́щее сло́во. И ка́ко тя у́бо по достоя́нию архистрати́же Вседержи́теля Бо́га, подви́гшеся похва́лим, безпло́тный глас подо́бно, безпло́тнаго твоего́ и мы́сленаго чинонача́лия, ве́щными и плотски́ма устна́ма принесе́м? Ки́ими прии́мем веща́нии и знамени́ты, и совеща́нную и неизрече́нную твою́ сла́ву? Недоуме́ет вои́стину вся́ко земны́х естество́ хвали́ти тя, пренебе́снаго чинонача́льника. Непости́жна и несказа́нна благоле́потныя твоея́ добро́ты, и све́тлости, и доброслу́тия. Я́коже бо удиви́ся ра́зум Бо́жии и от нас утверди́ся, и не возмо́жем челове́цы к нему́ - та́коже у́бо арха́нгельския твоя́ су́щественыя благода́ти, си́лы безчи́сленыя мно́жество, от нея́же неизрече́ннии боже́ствении да́рове истека́ют, непостижи́мо челове́ческим по́мыслом бысть и неизсле́дно.
Но поне́же у́бо не́где рече́ боже́ственое сло́во, е́же научи́хомся пропове́даем. И е́же ви́дехом возвеща́ем, сего́ ра́ди безчи́сленая оста́вльше вели́чествия чуде́с твои́х, ма́ла не́како боже́ственых и духо́вных слове́с собра́ вообрази́ти ва́пы, на́шими словесы́ покуша́емся испове́дати писа́нием велеле́пие сла́вы святы́ня твоея́, и си́лу стра́шных твои́х чуде́с отры́гнути, и зна́мения твоя́ возвести́ти, ве́рою собра́вшеся в боже́ственый твой пра́здник днесь. Я́ко сказа́ние уже́ предлежа́щаго спасе́ния, всем к нему́ те́пле притека́ющим, превели́кий и пречу́дный архистрати́же Бо́жий Михаи́ле. Днесь бо я́ко не́кий многообра́зный пита́тель созва́вся ны духо́вныя сообе́дники на обе́д, па́че со́лнца восия́вшаго светообра́знаго твоего́ пра́здника, положе́наго в нача́ток днесь от коне́ц вселе́нныя, во́ньже чудесы́ духо́вною по́льзою наслажда́ются ве́рных се́рдца. Но я́ко уще́дри ны́не на́ше смире́ние высо́кий предста́телю Ца́рства небе́снаго и возсия́й нам заря́ человеколю́бнаго твоего́ про́мысла, от человеколю́бнаго твоего про́мысла. От человеколюби́ваго Бо́га прие́м человеколю́бие, человеколю́бче Михаи́ле архистрати́же, све́тлая и многоле́потная и знамени́тая и за́рная звезда́ со́лнце сла́вы. Кре́пкий поспе́шник и побо́рник и засту́пник лю́бящим Бо́га. Промы́сленик и помо́щник и засту́пник тве́рдый призыва́ющим тя, и любо́вию притека́ющим в боже́ственый и всечестны́й дом твой. Ты просвети́ на́ши мы́сленеи серде́чне о́чи на сведе́ние и разуме́ние про́поведи. И ели́ко пости́жно твоего́ вели́чества чудеса, я́ко тобо́ю вся до́брых всех оби́льное пода́ние от вседержи́тельнаго Бо́жия промышле́ния, и дае́тся без сумне́ния на тя упова́ющим, и прилага́ющим на вся́ку похвалу́ твою́. [Аминь.]
[Четьи Минеи - есть продолжение...]