Христу́, пра́ведному Со́лнцу, днесь от Де́вы Пречи́стыя возсия́вшу, тма нечести́вых отбеже́, и свет доброве́рным пода́сться, и лед неве́рных разы́деся, и плод богоуве́дений процвете́, и звезда́ и́стинная всем взы́де. Днесь же и пло́тному све́ту прии́де ра́дость, и духо́вному просия́ние есть: «Наро́д бо седя́й во тме ви́де свет вели́к» (Ис. 9:2). Днесь без отца́ Сын род́ися, и вся тварь ему́ да́ры прино́сит: земля́ ‐ я́сли, ка́мение ‐ де́лвы ка́меныя, го́ры ‐ пеще́ру, гра́ди ‐ Вифлее́ма, ве́три ‐ послуша́ние, мо́ре ‐ повинове́ние, ви́рове ‐ ры́бы, ре́ки ‐ Иорда́на, пусты́ни ‐ Иоа́нна, пти́цы ‐ го́лубя, волсви́ ‐ да́ры, жены́ ‐ Ма́рфу, вдо́вы ‐ А́нну, непло́дови ‐ Елисаве́ть, де́вы ‐ Богоро́дицу Мари́ю, де́ти ‐ зелени́чие, па́стыри ‐ хвалу́, иере́и ‐ Симеона, гони́телие ‐ Па́вла, гре́шнии ‐ мздои́мца, кровоточи́вая ‐ веру, блу́дная ‐ ми́ро, ду́бие ‐ Закхе́я, дре́во ‐ Креста́, крест ‐ разбо́йника, восто́к ‐ звезду́, небеса́ ‐ а́нгелы, Гаврии́л ‐ целова́ние, реки́й: «Ра́дуйся, Обра́дованная, Госпо́дь с Тобо́ю». И мы же, убо́зии, днесь у́бо ра́дующеся, рцем к Ней: О́ Пресла́вная Богоро́дице, Ты днесь отверза́еши рай Ада́му, пра́деду на́шему, и́же затвори́ Е́ва преслуша́нием! О́ Пресвята́я Де́во, Ты днесь родила́ еси́ Да́теля и Творца́ всего́ того́. Гряди́те и ви́дите, вся страны́, утро́бу, ши́ршую небе́с, И́же бо ся в то не́бо не вмести́, то в сию́ ся вмести́в, рожде́нием вся соу́зы разсы́па и сво́боду челове́ческому естеству́ дал есть, держи́му от пе́рваго челове́ка и доны́не, да ны́не мы славосло́вим Прише́дшаго во Своя́ и обра́дуемся Ему́.

И царь бо Дави́д и проро́к, и́же зако́н Бо́жий име́яше, киво́т от иноплеме́нных прише́дша ви́дев, ликоствова́, ра́дуяся, и тем коли́ку любо́вь име́яше к Бо́гу. Мы же днесь, зако́н поло́жшаго Самого́ ви́дяще, я́коже сквозе́ киво́т сия́юще от Де́вы, наслади́мся и возвесели́мся, и все́ю си́лою Благода́вца похва́лим. Киво́т бо зако́н име́яше, кля́тву приводя́ и му́ку, и́же и ху́де преступа́ше писа́ние. Си же исполни́теля и́мать зако́ну, искупа́юща нас от кля́твы зако́нныя, и пра́вду и жизнь всем даю́ща. Целу́ем у́бо день сей честны́й и сла́вный, я́коже мно́га до́бра приноси́тель. В сей бо день Неви́димый пло́тию яви́ся всему́ ми́ру, в сей бо день тва́ри всей наде́жда прии́де всем, и му́чимым челове́ком бе́сы Царь ся показа́, в сей пле́нником нам прии́де избавле́ние, убо́гим бога́тство, омраче́нным свет, заблу́ждьшим путь. Хва́лим, бра́тие, све́тлый сей пра́здник: прии́де бо вонь рабо́м ‐ свобо́да, гре́шным ‐ просты́ни, скве́рным ‐ очище́ние, боля́щим ‐ целе́ние, прии́де слепы́м очи и глухи́м слу́ха дая, прии́де хромы́м ‐ здра́вие, разсла́бленым ‐ быстрота́, пеготи́вым ‐ очище́ние, прии́де лежа́щим ‐ воста́ние, прии́де тру́дным ‐ поко́й, прии́де а́лчным ‐ насыще́ние, жела́ющим ‐ весе́лие, прии́де гру́бым ‐ прему́дрость, ме́ртвым ‐ ожи́тие. Сла́вим Прише́дшаго нас ра́ди Го́спода: прии́де бо И́же сатану́ умертви́, И́же поплени́, прии́де И́же тле́нию Разо́рник, прии́де И́же ве́чней жи́зни Да́вец и безсме́ртию Да́тель, прии́де И́же в ри́зу нетле́ния облача́я ны и в оде́жду сла́вну одева́я нас, прии́де правди́вым Хвала́, и тва́ри всея́ Ра́дость, прии́де прете́кшихся Мир, прии́де Бо́жий Челове́к и Хода́тай, прии́де жития́ сего́ всего́ Строи́тель, прии́де И́же обетша́ния на́шего Обнови́тель, прии́де И́же неприя́зниныя челове́ки со а́нгелы твори́т ра́вны, прии́де И́же ча́да Бо́жия челове́ки твори́т, прии́де И́же Ца́рство небе́сное всем дае́т.

И сего́ ра́ди днесь на земли́ а́нгельския си́лы ликоствова́ху, «Сла́ва в вы́шних Бо́гу» вопию́ще, «и на земли́ в человецех благоволе́ние». Ви́деша бо чу́до ди́вно и у́жасти по́лно; ви́деша всех Го́спода, ра́бий о́браз иму́ща. Ви́деша измла́да сия́юща, И́же вся младе́нцы во утро́бах образу́ет. Ви́деша Творца́ Ада́мова, прии́мша младе́нство, да Ада́ма свободи́т от зла. Ви́деша вели́ко таи́мое и не ве́руемое, днесь в Вифлее́ме сотво́ршееся: того́же Го́спода и Челове́ка, из жены́ изше́дша, и Де́ву, де́тищь от сосцу́ млеко́м пита́ющу. Ви́деша и Ро́ждьшую Ту, и пребы́вшу Де́вую. Ви́деша Ту, Ма́терь бы́вшу и му́жа не зна́вшу. Ви́деша чу́до но́во и пресла́вно: клас невсе́ян, невсажде́н грозд, без отца́ де́тищь. Что реку́, ка́ко ли возглаго́лю? Ки́им ли о́бразом испове́м, е́же вы́ше испове́дания есть? Давне́йши есть Ма́тери Сын, по и́стине же рещи́, Творе́ц Ма́терень есть, и́бо сугу́бо Бо́жие есть рождество́: о́во вся́чески неизглаго́ланно, а друго́е и глаго́лемо, и глаго́лющим язы́ки огне́м осыпа́я. О́во пре́жде век, а друго́е в после́дняя ле́та. О́во от Бо́га и еди́ного Отца́, а друго́е от Де́вы и еди́ныя Ма́тере. Без ма́тере есть на небеси́, без отца́ есть на земли́: ни та́мо ма́тере, ни зде отца́ на рожде́ние тре́бова. В вы́шних трепе́щут а́нгели, до́ле коря́т челове́цы. Горе́ херувими Ему́ престо́ли, до́ле пеще́ра и я́сли Ему́ ме́сто. В вы́шних во сла́ву неисповеди́мую оде́ян есть, до́ле в пл́атищих пови́т. Горе́ серафи́ми не сме́ют зре́ти Нань, до́ле блу́дная по но́зе ся держи́т Ему́. Горе́ небе́сныя си́лы не сме́ют приступи́ти, до́ле со гре́шники ясть. Горе́ Царь есть над цари́, до́ле Убо́г есть и «не име́я, где главы́ подклони́ти». Горе́ всея́ тва́ри Суди́й есть, до́ле от Пила́та без греха́ суд прие́млет. Сие́ все на́шего делма́ ро́да ми́лостию сотвори́, все нас ра́ди убо́гих челове́к, во тме седя́щих неве́дения, соде́тельствует. Та́ко бо есть Ми́лостив Влады́ка и Госпо́дь, да егда́ мно́жае в нече́стия внидо́хом, и злее всего́ сотвори́хом, и сопоста́ти Ему́ бы́хом, отбе́гше от Него́, и бы́хом досто́йни суд го́рек прия́ти и лют, тогда́ вели́кую ми́лость и человеколю́бство от Него́ прия́хом. Ку́ю бо часть в тва́ри бого́м не почто́хом? Ки́им не моли́хомся и служи́хом бесо́м? Ко́е злоскверне́ние и безче́стие на́ми ся не сотвори́ и по́честь прия́ от нас? Ра́зве Еди́наго и И́стиннаго вся бо́ги прозва́хом: не́бо и зе́млю, со́лнце и луну́ и звезды, го́ры и хо́лми, ду́бие, исто́чницы и ре́ки, ка́мение и скот всяк, к сему́ еще́ и сла́дость, и убие́ние, и жела́ние, и татьбу́, и блуд, не разуме́вше, я́ко и бо́ги то чтя́хом все. Та́ко бо ны пре́лестию угото́ви сатана́, я́ко и скве́рным ся дело́м кла́няти, и без стра́ха нача́хом на зло преходи́ти. Но и таце́м ны су́щим, Благода́тивый Бог не презре́ нас, ни оста́ви нас в той скве́рне потопля́тися, но «иде́же преумно́жися грех, ту изоби́ла бысть благода́ть» (Римл. 5:20), и предоле́ благода́ти Его́ на́шему неприя́знеству, и щедро́тством и ми́лостию вели́кою с небесе́ прии́де к нам гре́шником Сам, на́ша вре́ды исцеля́я, и скрыв Свое́ Божество́ во пло́ти, а́ки и в у́де сме́ртне, и на́ше естество́ прии́м, и та́ко спасе́ние челове́ком сотвори́, угаси́в смерть, разруши́ безче́стие и неве́рство, пре́лесть изгна́в, диа́вола связа́в, бесо́вския полки́ прогна́, нас освети́в, во тме су́ща, и́стине ве́дение всади́, все житие́ престро́ив на у́ньшее, на безсме́ртную и на неистле́нную наде́жду возве́д наш ум, и в земли́ ме́сто на не́бо зре́ти сотвори́в, и снабде́вшим за́поведи Его́, Ца́рство небе́сное дасть нам, и ра́вны со а́нгелы сотвори́ нас.

Сего́ ра́ди ликоству́ем, и сла́вим, и весели́мся, Царю́ и Спа́су на́шему днесь просия́вшу и прише́дшу. О том всем пра́зднующе днесь и ра́дующеся, похва́лим у́бо, бра́тие, все́ю си́лою Благода́теля на́шего, и до́брыми ся де́лы утвори́м, а не ри́зами, упие́мыся хвала́ми Его́, а не вино́м, да́ры принесе́м вси, я́ко и волсви́, Царю́ сла́вному, не бу́дем ху́ждьше тех пе́рсян мы ве́рнии. Принесо́ша они́ зла́то, яко царя́ чту́ще: зла́то бо дань есть ца́рская. Принесе́м и мы в зла́та ме́сто ве́ру нескверне́ну и зако́н и́стинен. Принесо́ша они́ лива́н, доброво́ньством Божества́ естество́ Ему́ явля́юще: фимиа́м бо доброво́нный Бо́гу на честь прино́сится. Принесе́м и мы в лива́на ме́сто житие́ благоуха́юще угожде́нием к Бо́гу. Принесо́ша они́ сми́рну, Госпо́дню смерть назна́менающе: сми́рною бо пома́заху ме́ртваго пе́рвее. Принесе́м и мы умерщвле́ние удо́в на́ших. Они́, слы́шавше от а́нгела, ине́м путе́м отъидо́ша во своя́ лю́ди, И́рода оста́вльше мяту́щася, мы же, Влады́кою а́нгельским води́ми, гре́шнаго приме́са отбе́гше, путе́м гряде́м на не́бо к Бо́гу веду́щим, о Христе́ Иису́се Го́споде на́шем, Ему́же сла́ва и держа́ва, честь и поклоне́ние со Безнача́льным Отце́м и со Святы́м Ду́хом, ны́не и при́сно и во ве́ки веко́в. Ами́нь.