Вопро́с: Что ра́ди ини́и евангели́сти от смотре́ния нача́ша и се сей вма́ле, посе́м начат рек: «И Сло́во плоть бысть», а друго́е все мимотече: зача́тие, рождество́, воспита́ние, возрасте́ние, - а́бие о присносу́щнем рожестве́ нам бесе́дует?
Отве́т: Поне́же друзи́и евангели́сти о пло́тных словеса́х бесе́доваша, страх бо бе мног ни́зу лежа́щим ничто́же вы́ше челове́к помышля́ти о Единоро́днем Сы́не Бо́жии, сего́ ра́ди о́на мимоте́к и от естествова́ния Присносу́щнаго твори́т по́весть.
Подоба́ет же и се смотри́ти: я́ко ни сей, на высо́кое сло́во ся верг, о смотре́нии неради́, ни они́, о сем потща́шася, преве́чнаго умолча́ша. И зело́ подо́бно: Еди́н бе Дух, дви́жай ду́шы всех. Почто́ рече́ «искони́»? Понеже весть, я́ко челове́цы старе́йшинство, нача́ток чтут, си́речь Бо́га, Отца́ же оста́вль, и о Сы́не бесе́дует, зане́же бе Он всем я́ве, а́ще не я́ко Оте́ц, но я́ко Бог, а Единоро́дный не бе явле́н. А е́же «бе», ничто́же и́но есть, но е́же бысть при́сно я́ве и без сведе́ния бы́ти. «Сло́ва» же И́ нарече́, да не стра́нно рождество́ Его́ мним. Еще́ же и зане́же возвести́л нам Отца́: мно́га же суть словеса́ Бо́жия, но ни еди́но от сих слове́с Бог, но та вся словеса́ проро́чества, повеле́ния, Се же Сло́во Существо́ е́теро, из Самого́ изше́дшее, из Отца́ безстра́стно. Что сей Бо́га и Бо́га рек? И́бо Бог бе рече́ Сло́во. Не явля́ет нам посреди́ Божества́ Его́, зане́же не ме́ньши Бог Сын, рече́ же зна́емое и свята́го Его́ Божества́ и присносу́щие сим сло́вом - «искони́ бе». Соприсносу́щие же показа́ нам сим - «се искони́ бе у Бо́га», си́речь, не мний рече́ естества́, но О́тчее старе́е су́ще: не бе бо николи́же Оте́ц без Сы́на. А́ще ли кто глаго́лет, то ка́ко есть Сын не у́нее Сый Отца́? Его́же бо от кого́ есть ну́жда есть по́слежде бы́ти, от него́ же бу́дет. Се рече́м у́бо сия́ние со́лнечно, от самого́ естества́ со́лнечнаго исхо́дят. Егда́ по́слежде бу́дуще рече́м со́лнечнаго естества́, ника́коже испове́сть бо и се ослепле́ный очи́ма, не я́ви бо ся коли́ без сия́ния со́лнце се. И от него́ и не по́слежде его́. Та́коже и о Отце́ и о Сы́не, да не мним па́че же бо́льшими, и боголе́пно. Сего́ ра́ди бо и Па́вел си́це И́ нарече́. И поне́же Моисе́й ме́ньшу часть от тва́ри прие́м, ничто́же изрече́ нам о неви́димых си́лах, вои́стинну евангели́ст еди́нем кра́тким словом, все се прии́м рече́: «Вся Тем бы́ша, и без Него́ не бысть ничто́же, е́же бысть», си́речь, бы́вших Тем или́ ви́димо есть или́ разу́мно. Ничто́же без си́лы Христо́вы бысть. Не подоба́ет бо коне́чнаго срече́ния, поста́вити в ничто́же, я́коже еретицы́. Они́ бо си́це реко́ша: «Е́же бысть в Нем», живо́т бе хотя́ща глаго́лати Ду́ха Свята́го тварь. Рек о сотворе́нии, приложи́ о промышле́нии Слов́а: да никто́же не неверует, ка́ко толи́ка и такова́я Тем бы́ша, прирече́: «Я́ко в Нем живо́т бе», ре́кше я́ко о Нем живу́т вся, и о Нем промышля́емь есть, и о Нем вои́стинну речеся, я́ко о Нем живе́м, и дви́жимся, и есмы́.
«И Живо́т бе Свет челове́ком». Не си́це бе Свет чу́вствен, но разу́мен, ду́шы просвеща́я. И не рече́ же «Свет иуде́ом», но всем челове́ком: не иуде́и бо то́кмо, но и е́ллини, и вси в ра́зум приидо́ша. «Сия́ет» же Свет сей разу́мен «во тме»: тму же глаго́лет, или́ смерть, или́ лесть: [в] пропове́дании бо посреде́ льсти всея́: и в сме́рти же быв, Сам та́ко ей удоле́, я́ко и держи́мыя испе́рва возведе́. «И тма же Его́ не пости́же»: я́ко ни смерть ему́ удоле́, ни лесть - есть бо неудоле́емь и не вмеща́етжеся в не хотя́щих душа́х просвети́тися: не бедо́ю бо, ни ну́ждею приво́дит Бог к себе́, но во́лею и хоте́нием.
Бесе́довав же с на́ми уго́дно о Бо́жии словеси́, по чи́ну и по пути́ преходя́, ко Иоа́нну пропо́веднику Словеси́ гряде́т. Слы́шаще же я́ко от Бо́га по́слан есть, не мним ничто́же челове́чее су́ще рече́нных: не своя́ бо, но посла́вшаго и́ вся глаго́лет, тем а́нгел рече́тся: а́нгелово бо изволе́ние, е́же ничто́же свое́ рещи́. А е́же бысть, не прише́ствия бы́ти иска́я явля́ет, но и́стиннаго посо́льства. Е́же бо «бысть по́слан» - по́слан есть, да послу́шествует о Све́те, не да извести́т естество́ Сы́на Бо́жия или́ да приложи́т Сло́во к че́сти, но за гряду́щее, да вси ве́руют им сопричтоплеме́нницы: Сам бо Бог Сый и Сын, при́сно Сын Бо́жий, и естества́ блаже́ннаго и нетле́юща, не тре́бует по́слуха, поне́же хо́щет спасе́нию мно́гих. Сего́ ра́ди в толи́ко смире́ние сни́де, я́ко и челове́ку послу́шствовати о нем.
Почто́ рече́: «Не бе той Свет, но да свиде́тельствует о Све́те»? Зане́же мно́гажды у нас вя́щший бу́дет по́слух от послу́шствуемаго. Да никто́же се о Иоа́нне мнит, лука́вно се непщева́ние восторга́я, си́це рече́. Возводя́ наш ум на безнача́льное естество́, рече́: «Бе Свет и́стинный, И́же просве́щает вся́кого челове́ка в мир гряду́щаго».
И а́ще вся́кого челове́ка просвеща́ет, ка́ко непросвеще́ни оста́ша, толи́ко бо Ему́ у́бо прише́дшу вся просвети́ти? А́ще ли е́тери очи́ма со́вести си во́лею сомжа́ша, и не хоте́ша прия́ти луча́ све́та - не естества́ све́том омраче́ние тем, но зло́бою во́ля, лиша́ющихся спасе́ния.
В ми́ре бе, не я́ко ми́ру соле́тен. Сего́ ра́ди прирече́: «И мир Тем бысть». Вся́ко бо, и во́лею, и нево́лею, пону́жден бу́дет всяк челове́к, а́ще и проти́вен бу́дет сла́ве Бо́жии. Пре́жде дел испове́сть Творца́, и мир Его́ не позна́. «Мир» глаго́лет су́щая лю́ди, и пригвожде́нныя сему́ житию́, и земна́я му́дрствующая. А «дру́зи Бо́жии» - вси позна́вше И́. Не по пло́тнем прише́ствии то́кмо, но пре́жде, я́коже Авраа́м, и Моисе́й, и Дави́д, и пре́жде бы́вшии Самуи́ла проро́цы. Я́коже рече́ Петр: «В Cвоя́ Cи прии́де, и свои́ Его́ не прия́ша» - или́ о иуде́ох глаго́лет, или́ о всех челове́цех сотворе́нных им: Человеколю́бец бо Сый Бог, ну́ждею бо ни еди́ного же, но самово́льно всех влече́т к Себе́. Те́мже и прише́дша Его́, о́ви прия́ша, о́ви же ни. В Cвоя́ Cи прии́де, не Cвоея́ ра́ди потре́бы: Бог бо есть, не тре́буя и́но благоде́тий ра́ди Свои́х.
Отку́ду же прии́де, Cый везде́ и вся исполня́яй? И ко́е истощева́ ме́сто, содержа́яяй вся ме́ста? У́бо ни еди́но не оста́вль. Сходя́ же к нам, се сотвори́ и яви́ся нам, в на́шу плоть обо́лкся. Явле́ние же се и схожде́ние, «прише́ствие» нари́чет, и в не́же жи́дове вси Его́ не рачи́ша прия́ти.
Что же есть? Ели́коже их прия́т И́, си́речь, или́ раби, или́ свобо́дни, или́ е́ллини, или́ ва́рвари, или́ му́дри, или́ нему́дри, или жены́, или́ му́жи, или́ де́ти, или́ ста́рцы, или́ бога́тии, или́ убо́зи, или́ кня́зи, или́ гру́бии - вси тойжде ча́сти сподо́бишася. Ве́ра бо, и благода́ть духо́вная, ми́рное ослабле́ние прии́мши, во еди́н о́браз вся сотвори́ Це́ркви. Не рече́, я́ко сотвори́ я́ ча́да Бо́гу, но дасть им о́бласть, явля́я я́ко до́лжни есмы́ мно́го тща́ние показа́ти, да усыне́ние креще́нное це́ло и невре́дно сохраним. Помяну́ же пло́тныя боле́зни рек: «И́же не от кро́ви» и про́чая, да соприме́рше ма́лое и смире́ное пе́рваго, си́речь, пло́тнаго родства́, на высо́кое и благоро́дное, втора́го благода́тнаго, е́же есть от Бо́га роди́тися, вели́к ра́зум о Нем прии́мем и досто́йне дар Рожде́ннаго. Те́мже и вину́ неизре́чнне сей че́сти подоба́ет глаго́ля: «И Сло́во плоть бысть, и зрак ра́бий прии́м Влады́ка». Чада Бо́гу бы́хом, бысть же Сло́во плоть. Не естеству́ Его́ припа́дшу в плоть, [сие́ бо помышля́ти после́дняго есть безче́стия,] но пребыва́я е́же есть, и та́ко зрак раба́ прия́т бысть. Рече́, ерети́ческая затыка́я уста́, глаго́лющая, я́ко привиде́ние е́теро бе, смотрения бе, а не пло́ти и́стинныя восприя́тие.
Что есть е́же «всели́ся в ны»? Все́льшееся не то́жде есть всели́вшеся, но и́но во ино́м всели́тся, си́речь, Бог Сло́во воплоти́ся и совокупи́ся пло́ти. И́ноже по естеству́ глаго́лем, совокупле́нием и сни́тием . Еди́н бо есть Бог Сло́во, и плоть не сли́тию бы́вшу, но потребле́нию существо́м и совокупле́нию е́теру неизрече́нну, я́коже Сам испове́сть: «И ви́дехом сла́ву Его́», с воспите́ным те́лом нам явля́ет. А́ще бо лица́ Моисе́ова не стерпе́ша ви́дети, ка́ко боже́ственаго, и свет непристу́пный саме́м вы́шним си́лам, мы же пе́рстьнии и земни́и, ка́ко возмогли́ бы́хом стерпе́ти? И поне́же мно́зи от проро́к просла́влени бы́ша, и́хже еди́н есть Моисе́й, удиви́шажеся а́нгели, челове́ки я́вльшеся, и херуви́м, и серафи́м многою сла́вою яви́ся проро́ку. От всех сих отводя́ ны и евангели́ст, на том бла́зем поставля́ет ны, глаго́ля: «Сла́ву Единоча́даго от Отца́, испо́лнь благода́ти и и́стинны», И́стинну Царю́ Единоро́днаго О́трока О́тча, са́ми Го́спода всех ви́дехом сла́ву. А е́же яко не подо́бию есть, ни при́тчи, но извествова́нию: и глаго́лаше: «Ви́дехом сла́ву, я́коже подоба́ше и леть бе име́ти Единоро́дному и Присносу́щному Сы́ну всех Царю́ Бо́гу». Что же бе сла́ва Си? Я́ко со о́бластию подобною Царю́ и Влады́це вся творя́ще, а не я́ко а́нгели и проро́цы повелева́еми: Сам благода́ти и и́стинны испо́лнь Сый, и ине́м подава́я ю́.
Что ра́ди мно́гажды евангели́ст Иоа́нново прино́сит послу́шство, я́коже и зде рече́? Иоа́нн послу́шствует не про́сто о Нем, но и зело́ мы́слено, поне́же мно́го имя́ху чу́до Му́жа Сего́ вси иуде́и, и́мже Ио́сиф, за умре́тие Его́, град иуде́йск бра́нию поги́бнути помышля́ше, и до́лга словеса́ похвалы́ о Нем творя́ше. Сего́ ра́ди тем хотя́ иуде́я посрами́ти, ча́сто воспомина́ет им послу́шство Предте́ча, не тща́ся рабо́м Влады́ку досто́йна сотвори́ти, но младе́нцем иуде́ом не́мощи смотря́. А е́же возопи́ глаго́ля, дерзнове́ние его явля́я, я́ко без вся́кого сомне́ния прише́ствие Сы́на Бо́жия пропове́даше. А е́же рече́: «Сей есть, Его́же рех», показает, я́ко и пре́жде явле́ния Христо́ва пропове́да, и се же творя́ше, да благоприя́тно бу́дет послу́шство его́. А е́же «Гряды́й во след мене́, се есть пропове́дяй по мне, и И́же пре́до мно́ю бысть», си́речь, светле́е и честне́е, И́же старе́е мене́ бе. Я́ко не от кото́раго спе́яния старе́йша мене́ су́ща, последи́ сотвори́ мя бы́ти, но при́сно старе́й бе, а́ще и последи́ прии́де. И от исполне́ния же Его́ мы вси восприя́хом, я́ко не прия́тен и́мать дар, но Сам Исто́чник и Ко́рень есть всем благи́м, Сам Живо́т, Сам Свет, Сам И́стинна. Не в Себе́ содержа́ бога́тство, но и всем преисточа́я, и по источа́нии пребыва́ет полн. За ко́ю благода́ть толи́ку благода́ть восприя́хом? За ве́тху но́ву: и́бо благода́тию иуде́и прия́ти бы́ша. Тогда́ я́коже пи́сано есть: «Я́коже бо не умножи́тися вам, но Отце́м избра́х вас». И мы па́ки благода́тию спасе́ни бы́хом, но не та́кожде, но бо́лшими - за дар духо́вный и за дерзнове́ние бы́вшее смире́нием. А е́же «прия́ти зако́н благода́ти бе», я́коже пририца́ет, я́ко зако́н Моисе́ом дан бысть. А́ще бо о́браз бе Зако́н той, но «ми́лостыню Бо́жию явля́ет и щедро́ты, я́ко зна́ны сотвори́ пути́ Своя́ Моисе́ю» , я́коже рече́ Дави́д:
«Я́ко благода́ть и и́стинна Иису́с Христо́м бысть». Я́ко бо́льша бла́га нам внесе́, я́ве есть: он бо служи́тель сый, ме́ньших ве́щий слуга́, Сей же Влады́ка и Царь, и Ца́рев Сын, лу́чша мно́гих принесе́ нам, Сей при́сно со Отцем, Ему́же сла́ва, честь и поклоне́ние досто́ит Сы́ну, и Пресвято́му, Животворя́щему Ду́ху, от всего́ дыха́ния, ны́не и при́сно, и во ве́ки веко́в. Ами́нь.