Тогда́ возведе́н бы́сть Духом Иису́с в пусты́ни, искуси́тися отдиа́вола:

Тогда́, когда́, по ду́ха с ше́ствии, по гла́се с вы́ше снесе́ном, и глаголющем: Се́й е́сть сы́н мо́й возлю́бленный, оне́мже благоволи́х. И е́же у́бо чю́днейше, я́ко от Духа Свята́го: се́й бо его возвести́ та́мо рече́. Поне́же бо вся́ ко́ уче́нию на́шему де́йствоваше, и претерпева́нми терпи́т, и е́же та́мо отведе́ния, и е́же к диа́волу ра́ти, да́же ко́ждо креща́емых, а́ще по кр҃ще́нии бо́лшая претерпи́т искуше́ния, да́ не смути́тся, я́ко па́че ча́яния ве́щи быва́емыя: но́ пребыва́ет до́блествене вся́ терпя́, я́ко по после́дованию сему́ случа́ющуся. и́бо сего́ ра́ди приял еси́ ору́жия, не да́же пра́зднуеши, но́ да́же ра́туеши. Сего́ ра́ди ниже́ находя́щих возбраня́ет Бо́г искуше́ний. Пе́рвее у́бо, да́ разуме́еши, я́ко мно́го бы́л еси́ крепча́йши. Пото́мже: да́ пребыва́еши смиря́яся, (л. 140 об.) и ниже́ вели́чеством дарова́ний взима́ешися, искуше́ниям спря́тати тя́ могу́щым. К си́мже, да́же лука́вый де́мон о́н, и́же еще́ сомня́ся о твое́м отступле́нии, от муче́ния искуше́ний извести́тся, я́ко коне́чнее его оста́вив отспупи́л еси́. Четве́ртоє: да́же крепча́йш, и желе́за вся́кого си́лнейш си́це устро́ишися. Пя́тоє: да́же указа́ние прии́меши я́вствено, в ве́реных тебе́ сокро́вищ: ниже́ бы у́бо наше́л диа́вол, а́ще не бы́ тебе́ ви́дел в бо́лшей быва́ема че́сти; Отсю́ду у́бо изнача́ла воста́ на́ а̓да́ма, поне́же у́бо мно́гаго его́ ви́де насла́ждшася досто́инства. Сего́ ра́ди ополчи́ся на́ ӏ̓́ова, поне́же у́бо венча́ема его́, и пропове́дуема узре́ от всех Бо́га. И ка́ко у́бо рече́, моли́теся не вни́ти во́ искуше́ние; Сего́ ра́ди не восходя́ща его́ про́сте показует тебе́ Иису́са, но́ и возводи́ма, по́ смотре́ния сло́ву гада́телствуя си́ми, я́ко не саме́м наскака́ти подоба́ет, но́ привлача́емым стоя́ти до́блествене. И зри́ где́ прие́м его́ Дух возведе́, не во гра́д (л. 141) и то́ржище, но́ в пусты́ню; поне́же бо диа́вола привлача́ти хотя́ше, не́ а́лчвою то́кмо, но́ и ме́стом дае́т ему́ вину́. Тогда́ бо найпа́че напа́дает диа́вол, егда́ уви́дит у едине́ных и по себе́ су́щих. Си́це и жене́ в нача́ле наложи́ся, еди́ну прие́м, и му́жа кроме́ су́щю обри́т. егда́ бо со ине́ми су́щих уви́дит и вооруже́нных, не та́ко дерза́ет, ниже́ нахо́дит. Те́м же подоба́ет найпа́че, и сего́ ра́ти между́ собо́ю сходи́тися ча́сте, я́ко не удо́бь е́млемых бы́ти диа́волом. Обре́т у́бо его́ в пусты́ни, и в пусты́ни не прохо́дней. я́кобо такова́ пусты́ня бе́, ма́рко изяви́л е́сть, ре́к: я́ко со зверми́ бе́. Зри́ с коли́ким прихо́дит злоде́йством и лука́вством; И ко́е наблюда́ет вре́мя, ниже́бо постя́щемуся, ко́ а́лчющу прихо́дит; Да́ ты́ навы́кнеши коли́ко поще́ние добро́ е́сть. И ка́ко ору́жие е́сть надиа́вола вели́ко. и я́ко по креще́нии, не пи́щи и пия́нству, и трапе́зе оби́лней, но́ поще́нию внима́ти подоба́ет. Сего́бо ра́ди и са́м взалка́, не са́м (л. 141 об.) сего́ тре́буя, но́ на́с наказу́я: поне́же у́бо согреше́ния я́же пре́жде креще́ния, е́же чре́ву рабо́тати введо́ша. я́коже у́бо а́ще кто́ неду́гующа здра́ва сотвори́л бы, повелева́ет не твори́ти о́на, отни́хже неду́г бы́сть: си̑це у́бо изде́, и са́м по кр҃ще́нии поще́ние введе́. и́бо и ада́ма, не удержа́ние чре́ва изри́ну от рая́. и пото́п и́же при но́и, сие́ сотвори́, и содо́мския убива́телныя мо́лнии, сие́ низведе́. А́ще бо и блуда́ согреше́ние бе́, но́ оба́че обоя́ му́ки ко́рень от сю́ду прозяба́ше. е́же иєзекӏ́иль гада́телствуя гл҃аше: оба́че сие́ беззако́ние содо́млян, я́ко в го́рдости и в преумноже́нии хле́бов и во изоби́лиих пита́хуся. Си̑це и иуде́и велича́йшая соде́лаша зла́я, отпия́нства и наслажде́ния, на беззако́ние и наслажде́ния, на беззако́ние уклони́вшеся. Сего́ у́бо ра́ди и са́м пости́тся четы́редесять днє́й, на́м целе́ние спасе́ния показу́я: и не происхо́дит дале́йше, я́ко да́ не па́ки вели́чеством чюдесе́, обезве́рится смотре́нию и́стинны. Ны́не у́бо не бы́ сие́ бы́ло, а́ще вы не моисе́й и илиа́ предвари́вше в толи́ку (л. 142) возмого́ша изы́ти долготу́, Бо́жиею держи́ми си́лою. а́щеже да́ле произше́л бы́, мно́гим у́бо и отсю́ду неве́рно бы́ мне́лося пло́ти прия́тие. Пости́вся у́бо четы́редесять днє́й, и нощє́й толи́ких, последи́же взалка́, вину́ ему́ подая́, во́ е́же приступи́ти, да спле́тся, пока́жет ка́ко подоба́ет преодолева́ти и побежда́ти. Си̑це у́бо и подви́жницы творя́т, свои́х у́бо ученико́в наказу́юще одолева́ти, и побежда́ти хотя́ще, на позо́рищих сплета́ются ины́м, в сопротивора́тных телесе́х подаю́ще и̓̀м зре́ти, и нака́зоватися побе́ды о́бразу, е́же у́бо и тогда́ бы́сть. Поне́же у́бо хотя́ше его́ привлещи́ на сие́, и а́лчбу ему́ я́вствену показа́, и прише́дша прия́т: и приє́м еди́ною, и два́жды и три́жды его́ пове́рже, соудо́бством ему́ пристоя́щым. Но́ да́же не претека́юще побе́ды сея́ повреди́м ва́шю по́льзу, от пе́рваго наче́нше приложе́ния ку́юждо со́ опасе́нием истя зу́ем. Поне́же бо взалка́ рече́, приступи́в, искуша́я рече́ ему́: а́ще сы́н еси́ Бо́жий, (л. 142 об.) рцы́, да́же ка́мениє сиє̀ хле́би бу́дут. Поне́же у́бо услы́ша гла́с свы́ше носи́мый гл҃ющий: се́й е́сть сы́н мо́й возлю́бленный, слы́ша же и иоа́нна толи́ка оне́м свиде́телствующа, та́же ви́де а́лчюща в недоуме́нии про́чеє бе́: и ниже́ я́ко человек бе́ про́ст, ве́ровати можа́ше, за ꙗ́же оне́м рече́нная, ниже́ па́ки прия́ти я́ко сы́н бе́ Бо́жий, за е́же зре́ти его́ а́лчюща: отню́дуже в недоуме́нии бы́в, сомни́телны испуща́ет гла́сы. И я́коже а̓да́му приступи́в внача́ле, образу́ет не су́щая, да́ навы́кнет су́щая: си̑це у́бо и зде́, не ви́дев я́вствене неизрече́нное смотре́ния та́инство, и кто́єсть предстоя́й, ины́я начина́ет плести́ мре́жи, и́ми же мня́ше уве́дети сокрове́нное и не явле́нное. И что́ рече́; А́ще сы́н еси́ Бо́жий, рцы да́же ка́мениє сиє̀ хле́би бу́дут. Не рече́ поне́же у́бо а́лчеши, но́ а́ще сы́н еси́ Бо́жий, непщу́я под̾кра́с<т>и его́ похвала́ми: те́м же и а́лчбу умолчя́, да́же не возмни́тся произноси́ти ему́ сиє̀ и поноша́ти: не уве́девбо устроя́емых вели́чество, (л. 143) сра́мно ему́ сие́ непщева́ бы́ти, те́мже ласка́я его́ проны́рлеве, досто́инства помина́ет еди́наго. Что́ у́бо Христо́с; киче́ние его́ низлага́я, и показа́в ниже́ не досто́йно его́ прему́дрости, е́же ласка́я его́ о́н у́молча́, сие́ на среду́ са́м произно́сит и полага́ет глаго́ля: не́ о хле́бе еди́ном жи́в бу́дет челове́к. отку́ду начина́ет; отну́жди чревны́я. Ты́же ми смотри́ лука́ваго о́ного бе́са злоде́йств, [и] отку́ду начина́ет ра́тєй; и ка́ко своея́ не забыва́ет хи́трости; отни́х же бо и пе́рваго изри́ну челове́ка, и ины́х без<ч>и́слеными обложи́ злы́ми, отси́х и зде́ плете́т ле́сть. е́же на́ утро́бу, невоздержа́ние глаго́лю. Мно́гих у́бо и ны́не е́сть слы́шати безу́мных глаго́лющих, безчи́сленая чре́ва ра́ди зла́я. Христо́с же показа́в, я́ко доброде́телнаго ниже́ сие́ мучи́телство понужда́ет <не>что́ отнеподоба́ющих твори́ти: и а́лчет, и не повину́ется повеле́нию, наказу́я (л. 143 об.) на́с, нивче́мже покаря́тися диа́волу. Поне́же у́бо пе́рвый челове́к отсю́ду и Бо́гови прирази́ся, и зако́н преступи́, от преизли́шества тебе́ науча́ет, а́ще и не преступле́ние бу́дет отнего́ повеле́нное, ниже́ сице покаря́тися. И что́ глаго́лю преступле́ние; а́ще бо и что́ потре́бно глаголют бе́сове рече́, ниже́ си̑це внима́й им: та́ко у́бо и бесо́в заусти́ о́нех, пропове́дающих его́ сы́на Бо́жия. И па́вел же па́ки са́моє сие́ вопию́щым воспрети́, а́ще и глаго́лемое потре́бно бе́: но́ от преизли́шества обезчеща́я и́х, и отгражда́я е́же на на́с наве́тования, и сп҃си́телныя догма́ты пропове́дающих изгна́, загражда́я и́х уста́, и молчя́ти повелева́я: и сего́ ра́ди ниже́ зде́ гл҃емым попусти́. Но́ что́ рече́; Не охле́бе еди́ном жи́в бу́дет человек. а е́же гл҃ет таково́ е́сть: я́ко мо́жет Бо́г, и гл҃ом препита́ти а́лчющаго: отдре́вняго ему́ принося́ сведе́телство писа́ния, и наказу́я, а́ще и гла́дни бу́дем, а́ще и е́же у́бо что́ стра́ждем, никогда́же отступа́ти от влады́ки. А́ще же гл҃ет кто́, (л. 144) я́ко и́бо показа́ти подоба́ше. вопроси́л бы у́бо его́, и чесо́ ра́ди, и за что́; ниже́ бо да́ ве́рует сия́ гл҃аше о́н, но́ да́же я́ко непщева́ше в неве́рии обличи́т. Поне́же и пе́рвых си̑це прелсти́, и обличи́, не зело́ ве́рующих Бо́гови. сопроти́вное бо и́хже рече́ Бо́г, о́н овещава́я, и тщи́ми и́х возкичи́в наде́ждами, и в неве́рие вложи́в: си̑це и и́хже имя́ху бл҃ги́х изри́ну. Но́ Христо́с показу́ет себе́, ниже́ тому́ тогда́, ниже́ по́сле та́же ему́ му́дрствующым иуде́ом̾, зна́мение прося́щым попусти́в: везде́ наказу́я на́с а́ще и мо́жем что́ твори́ти, ничто́же де́йствовати ту́не и всу́є, ниже́ ну́жди належа́щи покаря́тися диа́волу. Что́ у́бо скве́рный се́й; побежде́н бы́в и увеща́ти не возмо́г е́же повеле́нное сотвори́ти; и найпа́че а́лчбе належа́щи толи́цей, на и́ное происхо́дит гл҃я: А́ще сы́н еси́ Бо́жий ве́рзи себе́ ни́зу, пи́сано бо е́сть: я́ко а́нгелом свои́м запове́сть о тебе́, и на рука́х во́змут тя́. Что́ у́бо на́ вся́ко искуше́ние сие́ предлага́ет, а́ще сы́н еси́ Бо́жий; (л. 144 об.) е́же припе́рвых сотвори́, сие́ и ныне твори́т. я́коже бо тогда́ оболга́ Бо́га гл҃я: я́ко во́ньже у́бо де́нь сне́сте, отве́рзутся ва́шя очеса́. се́ми показа́ти хотя́, я́ко си́ми прелстишася и ничто́же су́ть благоде́телствовани. Си́це у́бо и зде́, са́мое сие́ гада́телствуя глаго́ля: я́ко ту́не тебе́ нарече́ сы́на, и прелсти́ дарова́нием. поне́же а́ще не сие́ е́сть, пода́й на́м указа́ние е́же си́лы бы́ти о́нея. Та́же, поне́же у́бо отписа́ний ему́ бесе́дова, и са́м проро́ческое приво́дит свиде́тельство. Ка́ко у́бо Христо́с не негодова́, ни раздражи́ся, но со мно́гою кро́тостию па́ки отписа́ний ему́ бесе́дует глаго́ля: не иску́сиши Го́спода Бо́га твоего́; Наказу́я на́с, я́ко диа́волу не зна́мении, но не зло́бием, и долготерпением преодолева́ти подоба́ет, и ничто́же к показа́нию твори́ти, и любоче́стию про́сте. Смотри́ же его́ неразу́мное, и от свиде́телства самого́ его́же приведе́. я́же у́бо от Го́спода приведе́на бы́вшая свиде́тельства, зело прили́чне реко́шася: а я́же от о́ного про́сте я́ко прилучи́ся, (л. 145) и ниже́ пред¬лежа́щым прили́чное вожда́шеся. ниже́ бо зане́ пи́сано е́сть: я́ко а́гнгелом свои́м запове́сть о тебе́, совещава́ет помета́ти себе́ и в стремни́ну низверза́ти. и́накоже, ниже́ о Го́споде сие́ рече́но е́сть: но́ сие́ у́бо оба́че не обличи́, а́ще и досади́телне ему́ глаго́лавшу сло́во, и зело́ сопроти́вне: никто́же бо от Сы́на Бо́жия сия́ про́сит, но́ от диа́вола и бесо́в, е́же верза́ти саме́м себе́ до́лу: Бо́жие же дѣ̑ло е́сть, и лежа́щих возставля́ти. а́ще бо си́лу показа́ти подоба́ше, не самому́ себе поверза́ти ту́не, и во стремни́ну помета́ти, но́ ины́х спаса́ти. А е́же себе́ поверза́ти в де́бри и стремни́ны, о́ного полка́ е́сть. Си̑це у́бо и́же уни́х льсте́ц везде́ твори́т. Но́ Христо́с, и си́м рече́нным, не у себе́ открыва́ет, но я́ко челове́к еще́ ему́ бесе́дует. е́же бо рещи́: не о хле́бе еди́ном жи́в бу́дет человек: и е́же не иску́сиши Го́спода Бо́га Твоего́, не зело́ себе́ открыва́ющаго бе́, но́ еди́наго от мно́гих показу́ющаго. Да́ не почюди́шисяже, а́ще и Христу́ бесе́дуя одолева́ется, (л. 145 об.) мно́жицею. я́коже бо борю́щии егда́ ну́ждныя прии́мут я́звы, кро́вию облива́еми мно́гою, и помрача́еми обно́сятся: Си̑це у́бо и о́н от пе́рвыя и вторы́я я́звы омрачи́вся, про́сте находя́щая веша́ет. и происхо́дит на тре́тие приложе́ние. и возведе́ его́ на гору́ высоку́, показу́ет ему́ вся́ ца́рствия, и рече́: вся́ тебе́ сия́ да́м, а́ще па́д подклони́шися ми́. Тогда́ глаго́лет ему́ Иису́с: иди́ за мно́ю сатано́. пи́сано бо е́сть: Го́споду Бо́гу твоему́ поклони́шися, и тому́ еди́ному послу́жиши. поне́ же у́бо про́чее во́ отца согреши́л е́сть, я́же о́ного вся́ своя́ глаго́ля бы́ти, и Бо́га потща́ся себе́ из¬яви́ти, я́ко соде́теля вся́ческому, тогда́ запрети́, и ниже́ тогда́ с зе́лностию, Но́ про́сте, иди́ от мене́ сатано́, е́же у́бо и повеле́ние найпа́че бе́, не́жели запреще́ние. вку́пе бо рече́ ему́ иди́, и отбежа́ти его́ сотвори́, ниже́ бо ины́х искуше́ний привожда́ше. И лука́ рече́: я́ко вся́ соверши́ искуше́ния. Мне́ ви́дится, главна́я искуше́ний ре́к, вся́ рещи, я́коже (л. 146) и ины́м вте́х обя́тым: безчи́сленая бо содержа́ще зла́я сия́ е́сть: е́же чре́ву рабо́тати: е́же к тщесла́вию что́ твори́ти: е́же неи́стовству име́ний пови́нну бы́ти: е́же у́бо и скве́рный се́й све́дев, е́же все́х кре́пча́йше, после́жде положи́л е́сть, вя́щшаго вожделе́ние. Испе́рва у́бо и от нача́ла, боле́знуя приити́ на сие́, я́ко и́ных си́лнейше су́ще: и́бо се́й его́ ра́ти зако́н, мня́щееся найпа́че запя́ти сия́ после́дняя приводи́ти, е́же у́бо и о Е́ве сотвори́л е́сть. Те́мже у́бо и зде́ от мня́щихся бы́ти худе́йших, и немощне́йших наче́н, на крепча́йшее происзо́дит. Ка́ко ли у́бо его́ преодоле́ти подоба́ет; Си́це, я́коже Христо́с наказа́л е́сть, к Бо́гу прибега́ющым, и ниже́ бо гла́де смиря́тися, ве́рующым могу́щему и сво́вом препита́ти. Ниже́ вни́хже а́ще прии́мем благи́х, искуша́ти да́вшаго: но́ довле́тися свы́ше сла́вою, челове́ческия сла́вы ни еди́но же творя́ще сло́во, и везде́ потре́бы преизли́шнее обезчеща́ти. Ничто́же бо (л. 146 об.) си́це подпа́дати диа́волу твори́т, я́ко е́же мно́жайшаго жела́ти, и лихоима́ние люби́ти. И сие́ и от ны́не быва́емых е́сть уве́дети. и́бо и ны́не су́ть глаго́лющии: сия́ тебе́ вся́ да́мы, а́ще па́д поклони́шися. Челове́цы у́бо су́ще естество́м, сосу́дыже о́ного бы́вше: поне́же и тогда́, не собо́ю то́кмо, но и ины́ми ему́ приступа́ше. Е́же у́бо и лука́ изявля́я глаго́лаше: я́ко поси́х свои́ми сосу́ды ему́ приступа́ше. И се́ а́нгели приидо́ша и служа́ху ему́. Внегда́ бо я́же приложе́ния бы́ша, не оста́ви и́х яви́тися, я́коже не си́це отгна́не бы́ти лови́тве. Егда́же у́бо его́ во все́х обличи́, и отбежа́ти устро́ив, тогда́ явля́ются они́. Да́же и ты́ разуме́еши, я́ко и тебе́ я́же по побе́дах о́нех, а́нгели прие́млют, пле́щуще и провожда́юще во все́х. Си́це у́бо и Ла́заря, по пе́щи нищеты́, и гла́да, и стесне́ния вся́кого, а́нгели прие́мше отнесо́ша. Е́же у́бо предвари́х ре́к, мно́го Христо́с показу́ет ны́не, и́хже и мы́ наслади́тися хо́щем.