Бра́тіе, приспѣ́ вре́мя до́браго исповѣ́данія и поспѣ́ха, и́же къ Бо́гу. И ны́нѣ наста́ го́дъ чистоты́, напая́ющъ жа́ждныя по́стники. Се́ прибли́жися цѣли́тель грѣхо́вныхъ вре́дъ: ле́сть отгоня́я и сла́сти плотскíя отсѣка́я. Тѣ́мъ же воспряну́вше, бра́тіе, и мы́сленный слу́хъ разве́рзше, я́сно во́нмемъ глаго́лемая на́мъ апо́столомъ, я́коже учи́тъ на́съ, глаго́ля: но́щь пре́йде, а де́нь прибли́жися. Но́щь бо е́сть житіе́ на́ше, мно́гъ мяте́жь и собла́зны имѣ́я въ себѣ́. Тѣ́мъ же рече́: отве́ржемъ дѣ́ла те́мная, и облеце́мся во ору́жіе свѣ́та, вѣ́чнаго живота́, въ воздержа́ніе, поще́ніе, и чистоту́. Не того́ бо ра́ди сотвори́ на́съ Бо́гъ, да ско́тски пожи́вше, въ вѣ́чную му́ку по́йдемъ, я́же е́сть угото́вана діа́волу и а́нгеломъ его́. Но малого́дно потруди́вшеся въ вѣ́цѣ се́мъ, пре́йдемъ въ вѣ́чную жи́знь, я́же обѣща́ прія́ти на́мъ, соблю́дшимъ за́повѣди Его́. Тѣ́мъ же не льсти́мся, бра́тіе, вдава́ющеся житію́ сему́: житіе́ бо се́ кра́тко е́сть, а му́ка долга́, никогда́ же поко́я, ни конца́ иму́щи. Да на кíй успѣ́хъ хо́щетъ бы́ти сла́дость житія́ сего́? То́кмо печа́ль мно́га и сле́зы. Дне́сь стона́ніе, а у́трѣ напа́сть, или́ болѣ́знь тяжка́. И па́ки въ другíй де́нь сме́рть, или́ себѣ́, или́ женѣ́, или́ дѣ́темъ, или́ у́жикомъ, или́ рабо́мъ, или́ тщета́ до́мови, или́ имѣ́нію, я́же вся́ сія́ су́ть печа́ль, а души́ поги́бель. Тѣ́мъ же рече́ Госпо́дь: не собира́йте себѣ́ сокро́вища на земли́, идѣ́же тля́ тли́тъ, и та́тіе кра́дутъ; но собира́йте себѣ́ сокро́вище на́ небесѣхъ, идѣ́же ни тля́ тли́тъ, ни та́тіе подко́пываютъ, ни кра́дутъ. Собира́емъ, бра́тіе, та́мо имѣ́нія себѣ́, а здѣ́ да раздае́мъ ни́щимъ, да та́мо блага́я обря́щемъ. Подви́гнемся, бра́тіе, и обнови́мъ себе́ посто́мъ и чистото́ю де́нь отъ дне́, па́че же въ сія́ дни́, я́же на́мъ Са́мъ Госпо́дь Бо́гъ предуста́ви на воздержа́ніе и на покая́ніе, сего́ ра́ди да не вдади́мся, бра́тіе, ласкосе́рдіемъ плотски́мъ. Аще бо кто́ въ житіи́ се́мъ что́ изгуби́лъ, зла́то, или́ и́ну ку́ю ве́щь, то́ и́ну въ тоя́ мѣ́сто обря́щетъ; а вре́мя покая́нію изгу́бльши, или́ де́нь, или́ ча́съ, то́ друга́го въ того́ мѣ́сто не обря́щеши. Не тѣле́сна бо ве́щь сія́, но духо́вна, и разу́мна. Аще же и ви́дима е́сть, но не ося́жема. Тѣ́мъ же рече́ Госпо́дь: бди́те прилѣ́жно и моли́теся по вся́ часы́, да не вни́дите въ напа́сть. Аще, бра́тіе, добро́ твори́мъ, то возмо́жемъ убѣжа́ти всѣ́хъ злы́хъ, и ста́ти предъ Сы́номъ Бо́жіимъ непоро́чны, егда́ пріи́детъ Христо́съ, и́стинный Бо́гъ на́шъ, въ сла́вѣ Своего́ Божества́ суди́ти вселе́ннѣй и возда́ти кому́ждо по дѣло́мъ его́. Поне́же у́бо христіа́не нарица́емся Христо́ва ра́ди и́мени, то и до́лжни есмы́ вся́ повелѣ́нная на́мъ сохрани́ти, на́съ бо ра́ди та́ вся́ узако́нена, по апо́стольскому словеси́: отве́ргше вся́ скве́рны и плотскíя по́хоти, цѣлому́дренно и пра́ведно поживе́мъ, не то́кмо въ сія́ дни́ по́стныя, но и до исхо́да души́ отъ тѣлесе́. Аще же кто́ си́хъ дне́й по́стныхъ не возмо́жетъ болѣ́зни ра́ди ра́вно держа́ти, то́ поне́ два́ дни́ отъ ни́хъ да держи́тъ постя́ся, — сре́ду и пято́къ, — я́коже предаде́ на́мъ свята́я собо́рная апо́стольская Це́рковь, и уста́въ апо́стольскаго и оте́ческаго преда́нія. А и́же кто́ того́ не держи́тъ, то́ таковы́й ло́жный нарица́ется христіа́нинъ, зане́же ни те́плъ, ни сту́денъ. Въ та́ бо два́ дни́, кромѣ́ мясопу́ста, пове́лѣно христіа́номъ воздержа́тися не то́кмо отъ мя́съ, но и отъ ры́бъ, и ма́сла. Поне́же въ сре́ду бы́сть совѣ́тъ на убіе́ніе Христо́во, а въ пято́къ ра́спятъ бы́сть Госпо́дь на́шъ Іису́съ Христо́съ, то́ подоба́етъ сѣ́товати ра́ди страсте́й Христо́выхъ. И христіа́не держа́тъ въ сію́ днíю по́стъ, ра́звѣ а́ще прилучи́тся Госпо́дьскій пра́здникъ, или́ Пресвяты́я Богоро́дицы, или́ святы́хъ апо́столъ: пра́здникъ бо е́сть ра́дость, а не сѣ́тованіе. Пости́мся же нелицемѣ́рно, не отъ бра́шенъ то́кмо воздержа́щеся, но и отъ пія́нства, и отъ блуда́, и отъ гнѣ́ва, и отъ клеветы́, и за́висти, и отъ татьбы́, и отъ лихоима́нія, и отъ объяде́нія, да бу́детъ и́стинный по́стъ, не человѣ́къ усрамля́ющеся, но Бо́га боя́щеся. Аще и по́честь воздава́ти до́лжни есмы́ человѣ́комъ, но не чрезъ зако́нъ Христо́въ. Рече́ бо Госпо́дь: не убо́йтеся отъ убива́ющихъ тѣ́ло, души́ же не могу́щихъ косну́тися; но па́че убо́йтеся Иму́щаго вла́сть и по убіе́ніи воврещи́ въ родство́ о́гненное, Того́ убои́мся, бра́тіе. А па́че егда́ Са́мъ Госпо́дь Бо́гъ глаго́летъ се́, того́ досто́итъ боя́тися. Власте́мъ же обро́ки, и да́ни, и че́сти воздади́мъ, я́коже Са́мъ Госпо́дь рече́: воздади́те у́бо Бо́гови — Бо́жія, а ке́сареви — ке́сарева. Се́ слы́шавше, возлю́бленная моя́ ча́да, въ чистотѣ́ препроводи́мъ вре́мя по́стныхъ днíй, да свѣ́тли до́йдемъ Христо́ва Воскресе́нія. Никто́ же рцы́: ка́ко начну́ пости́тися отсе́лѣ, изгуби́въ недѣ́лю, или́ двѣ́, или́ три́ въ нерадѣ́ніи? Но мно́ги оби́тели су́ть на́ небесѣхъ, и кíйждо проти́ву дѣ́лъ свои́хъ пріе́млетъ мзду́. Не облѣни́мся, бра́тіе, но спѣ́шно потщи́мся пости́гнути пра́ведныхъ, сугу́быми по́двиги, алчбо́ю, и жа́ждею, и покая́ніемъ. Пріе́млетъ бо Бо́гъ послѣ́дняго, а́ки пе́рваго, досто́йно ка́ющагося. Аще ли въ сія́ святы́я дни́ по́стныя не пока́емся, и пости́гнетъ на́съ сме́ртный ча́съ, то́ лу́чше бы на́мъ не роди́тися. Аще бо кого́ здѣ́ осу́дятъ огне́мъ сожещи́, или́ усѣ́кнути, или́ повѣ́сити, или́ на и́ну ку́ю сме́рть, то́ не бу́детъ ли въ вели́цѣй ско́рби, ничто́ же не вкуша́я два́ или́ три́ дни́, я́ко въ такову́ му́ку предае́тся? Но мы́ не хо́щемъ и до полу́дни попости́тися, и та́ко твори́ти я́коже слы́шасте. Дѣ́ла бо сія́ досто́итъ христіа́нину блюсти́ кому́ждо на́съ себе́ дѣ́ля, а не дру́га ра́ди. Тѣ́мъ же, бра́тіе, се́ слы́шавше, подви́гнемся непоро́чно преити́ сія́ дни́ по́стныя, сла́вяще Святу́ю Тро́ицу, Отца́ и Сы́на и Свята́го Ду́ха, ны́нѣ и при́сно, и во́ вѣки вѣко́мъ, ами́нь.