Се́ приспѣва́ютъ, возлю́бленніи, дни́ честна́го, свята́го и вели́каго поста́, и того́ ра́ди о покая́ніи ева́нгельское сло́во бесѣ́дуетъ. Слы́шите при́тчу сію́: /л. 3/ Рече́ Госпо́дь: человѣ́къ нѣ́кто имѣ́ два́ сы́на (Лук. зач. 79). Кто́ е́сть человѣ́къ? — Человѣколю́бецъ Бо́гъ. Кто́ ли два́ сы́на? Два́ сы́на су́ть — пра́ведницы, и грѣ́шницы. И рече́ ю́ный сы́нъ ко отцу́: о́тче, да́ждь ми́ досто́йную ча́сть имѣ́нія. Юный сы́нъ е́сть грѣ́шникъ, я́коже послѣди́ грѣ́хъ вни́де въ мíръ. Имѣ́ніе же се́ е́сть — не́бо и зе́млю, мо́ре и рѣ́ки, и всю́ тва́рь поручи́ на́мъ Бо́гъ; зако́нъ и проро́ки на́съ ра́ди посла́. Изво́лиша бо грѣ́шницы самовла́стіемъ поги́бнути, непра́вды и безу́мія ра́ди, самовла́стни бо есмы́ добру́ и злу́, а́ще восхо́щемъ твори́ти благо́е и зло́е. А е́же раздѣли́ и́ма оте́цъ имѣ́ніе, ре́кше, за́повѣди и́ма преда́. И взе́мъ ме́ншій сы́нъ, оты́де на страну́ дале́че. Иностра́ніе, сказу́етъ, о тѣлеси́ попече́ніе и по́хоти грѣхо́вныя. Старѣ́йшій сы́нъ за́повѣди пріи́мъ, оправда́ся, а мнíй сы́нъ грѣхи́ творя́, удали́ся отъ Бо́га и изгуби́ добродѣ́тели, живы́й блу́дно. И бы́сть гла́дъ крѣ́покъ на странѣ́ то́й — не гла́дъ хлѣ́ба, но е́же не слы́шати словесе́ Бо́жія. И нача́ лиша́тися, е́же непрія́ти ча́сти святы́хъ честны́хъ Та́инъ, и́же не боя́шеся Бо́га; а боя́щимся Бо́га, никогда́ же нѣ́сть лише́нія. И ше́дъ, прилѣпи́ся /л. 3 об./ ко еди́ному граждани́ну страны́ тоя́, — се́ же су́ть бѣ́си. И то́й посла́ его́ на село́ свое́ пасти́ сви́ніи, ре́кше ины́хъ поуча́ти на зло́: разбо́ю, блуду́, клеветѣ́, рѣзоима́нію, пія́нству, братоненавидѣ́нію, злосе́рдію, и про́чимъ злы́мъ. Не и́мать же сы́тости грѣхолю́бецъ: въ ма́лѣ наслади́вся, а во́ вѣки му́ченъ бу́детъ. Та́ко бѣ́си чту́тъ чту́щія и́хъ. И въ себѣ́ бы́въ, рече́: коли́ко нае́мникомъ у отца́ моего́ избыва́ютъ хлѣ́бы, а́зъ же гла́домъ ги́бну; но воста́въ, иду́ ко отцу́ моему́ и реку́ ему́: о́тче, согрѣши́хъ на не́бо и предъ тобо́ю, и нѣ́смь уже́ досто́инъ нарещи́ся сы́нъ тво́й, но сотвори́ мя я́ко еди́наго отъ нае́мникъ твои́хъ. И не то́кмо рече́, но и дѣ́ломъ сотвори́. Сло́вомъ исповѣ́данія невозмо́жно спасти́ся, дѣ́лы не возслѣ́дующи. Пои́стиннѣ рече́ евангели́стъ, я́ко въ себе́ прише́дъ. Егда́ у́бо согрѣша́ше, внѣ́ себе́ бя́ше. Аще бо кто́ ожестѣ́етъ грѣхо́вными зло́бами, не бои́тся Бо́жія суда́, ни уче́нія внима́етъ. Нае́мницы же су́ть оглаше́нніи. Егда́ бо въ чи́нъ сыно́вень кто́ пости́гнетъ, пото́мъ же согрѣши́тъ, и ви́дя ху́ждьшія себе́ святы́хъ Та́инъ наслажда́ющася, а себе́ внѣ́ /л. 4/ це́ркве стоя́ща, тогда́ умили́вся, на покая́ніе мы́слитъ. И еще́ ему́ дале́че су́щу, срѣ́те его́ оте́цъ, и облобыза́ его́, и повелѣ́ рабо́мъ облещи́ его́ въ пе́рвую оде́жду, и да́ти пе́рстень на́ руку его́, и сапози́ на́ ногу, и повелѣ́ закла́ти теле́цъ упи́танный. Таково́ е́сть милосе́рдіе Бо́жіе: не судо́мъ бо жде́тъ грѣ́шники, но пріе́млетъ ка́ющихся. А раби́ — іере́и су́ть. Пе́рвая оде́жда — очище́ніе грѣхо́въ. Пе́рстень — благода́ть Свята́го Ду́ха. А сапози́ — за́повѣди ева́нгельскія и уче́нія. Теле́цъ упи́танный — причаще́ніе, его́же вѣ́рніи пріе́мше, со а́нгелы лику́ютъ. Бѣ́ же тогда́ старѣ́й сы́нъ на селѣ́. Толков. Село́ — зако́нъ имену́ется, его́же не отступа́ютъ пра́ведніи, терпя́ще. Оба́че же се́ ди́вно, а́ще и пра́веденъ бѣ́ сы́нъ, но ропта́ше на отца́. Толи́ка е́сть Бо́жія благода́ть, я́ко же и пра́ведницы соблажня́ются о долготерпѣ́ніи Бо́жіи: не зави́дятъ бо грѣ́шныхъ спасе́нію, но дивя́тся человѣколю́бію Бо́жію. Дави́дъ бо глаго́летъ: доко́лѣ грѣ́шницы восхва́лятся? И Іеремíя рече́: почто́ пу́ть грѣ́шныхъ спѣ́ется? Насади́лъ я́ еси́ /л. 4 об./ и укорени́шася. Что́ же рече́? Мнѣ́ же еси́ ни козля́ти да́лъ, да со́ други бы свои́ми возвесели́лся. Толков. То́ глаго́ля пра́ведный сы́нъ, я́ко озлобля́емь е́смь, рече́, и не оста́вилъ еси́ поги́бнути, да бы́хъ прія́лъ осла́бу, но ве́сь живо́тъ озлобля́емь е́смь отъ грѣ́шникъ. Се́ святíи отъ туги́ се́рдца глаго́лаху. И рече́ оте́цъ: ча́до, вся́ моя́, твоя́ су́ть, а твоя́ моя́. Се́й же бра́тъ тво́й ме́ртвъ бѣ́, и оживе́, изги́блъ бѣ́, и обрѣ́теся. Ме́ртва же, рече́, — рабо́тающа діа́волу язы́ки пога́ныя, невѣ́дущія Бо́га. А поги́бшими вѣ́рныя мни́тъ, и́же по креще́ніи грѣхи́ мно́ги и непра́вды творя́тъ. А и́же обрѣ́теся, ре́кше, пока́яся. И мы́ у́бо пока́емся, да спасе́мся, о Христѣ́ Іису́сѣ Го́сподѣ на́шемъ.