Святы́й апо́столъ Пе́тръ глаго́летъ, я́ко вся́ко проро́чество кни́жное по своему́ сказа́нію не быва́етъ. Ни бо́ во́лею человѣ́ческою бы́сть о́ное, но отъ Свята́го Ду́ха. Ло́жніи же проро́цы и лжеучи́тели прельща́ютъ несмы́сленныхъ. Поне́же мно́зи прилѣпя́тся се́рдцемъ къ лихоима́нію и нечи́стому собра́нію бога́тства, рабо́тая ему́, я́ко Бо́гу. О се́мъ Госпо́дь глаго́летъ: идѣ́же е́сть сокро́вище ва́ше, ту́ и се́рдце ва́ше бу́детъ. И па́ки: неудо́бь вни́ти вельбу́ду во иглинѣ́ у́ши, ниже́ бога́ту въ Ца́рствіе Бо́жіе вни́ти. И къ бога́тому рече́ся: ты́ прія́лъ еси́ блага́я въ животѣ́ свое́мъ, а здѣ́ пла́чи. О убо́гомъ же: се́й воспрія́ та́мо зла́я, а здѣ́ да почíетъ. И па́ки: кому́, несмы́сленне, имѣ́ніе собира́еши, и жи́то въ жи́тницу? Въ сію́ бо но́щь а́нгели ду́шу твою́ истя́жутъ, а е́же собра́, кому́ сія́ бу́дутъ? О прельща́ющихся же, и лихоимѣ́ніемъ неду́гующихъ, и мы́сли серде́чныя обраща́ющихъ на исчеза́ющее бога́тство, глаго́летъ: сíи су́ть исто́чницы безво́дніи, и про́чее. И Па́велъ апо́столъ къ Тимоѳе́ю вѣща́етъ: ничто́же внесо́хомъ въ мíръ се́й, я́вѣ, я́ко ниже́ изнести́ что́ мо́жемъ. Иму́ще же пи́щу и одѣ́яніе, си́ми дово́льни бу́демъ. А хотя́щіи богати́тися, впа́даютъ въ напа́сти, и въ сѣ́ти, и въ по́хоти мно́ги. Мно́зи бо тѣ́мъ умышле́ніемъ побѣжде́ни, погибо́ша. Ко́рень бо всѣ́мъ злы́мъ сребролю́біе е́сть, его́же нѣ́ціи жела́юще, заблуди́ша отъ вѣ́ры и себе́ пригвозди́ша болѣ́знемъ мно́гимъ. Тѣ́мъ же, бра́тіе моя́, бѣ́гайте неду́га того́ лука́ваго. Глаго́летъ бо Па́велъ къ Тимоѳе́ю: бога́тымъ запреща́й не высокому́дрствовати, ниже́ упова́ти на бога́тство погиба́ющее, но на Бо́га жи́ва, даю́щаго на́мъ вся́ оби́льно въ наслажде́ніе. Уклоня́йжеся, рече́, скве́рныхъ суесло́вій и прекосло́вій лжеиме́ннаго ра́зума. Сего́ ра́ди, бра́тіе моя́, не мози́те о и́стинѣ прѣ́тися, ни рцы́те, мене́ вопроша́й, да не обря́щетеся подо́бни тому́, и́же нося́ше ма́ло морскíя воды́ въ мѣшцѣ́ подъ па́зухою, и пріи́де до нѣ́коего иму́щаго по́лнъ кора́бль воды́ морскíя. Ни ли́ есте́ слы́шали Ездры проро́ка, глаго́люща: Госпо́дь созда́ му́дрость, и пода́стъ ю́ лю́бящимъ Его́. И Соломо́нъ глаго́летъ: вся́къ умудря́яся въ Боже́ственныхъ словесѣ́хъ, ненави́димъ е́сть отъ безу́мныхъ; отъ разу́мныхъ же возлю́бленъ, по да́ннѣй ему́ о́тъ Бога благода́ти. Іоа́ннъ Златоу́стъ рече́: наставля́йте дру́гъ дру́га; ра́зумъ же Бо́гъ дае́тъ, ему́же хо́щетъ. И па́ки глаго́летъ: кто́ на суди́щи судіи́ не бои́тся? или́ кто́ хотя́й уче́нія, учи́теля оскорбля́етъ? И апо́столъ Па́велъ къ Тимоѳе́ю глаго́летъ, я́ко пра́ведникомъ творя́щимъ, зако́нъ не лежи́тъ, но беззако́ннымъ и не покори́вымъ. И повелѣва́етъ таковы́я преда́ти сатанѣ́, да нака́жутся не ху́лити. Но на́мъ бу́ди спасе́ніе прія́ти послу́шающимъ, а не вопреки́ глаго́лющимъ: непокоря́ющіи бо ся Святѣ́й Це́ркви, я́коже еретицы́ мно́зи, прочита́юще кни́ги, но ра́зума добра́ не иму́ще, погибо́ша. И па́ки Па́велъ къ кори́нѳомъ глаго́летъ: бра́тіе, сказу́ю ва́мъ Ева́нгеліе, благовѣ́щенное мно́ю, я́ко нѣ́сть по человѣ́ку, ни бо́ а́зъ прія́лъ е́смь то́ отъ человѣ́къ, но науче́ніемъ Іису́съ Христо́вымъ. И та́ко Бо́гъ подае́тъ благода́ть Свою́ не лихои́мцемъ, но и́щущимъ Его́. Са́мъ бо рече́: не ли́шше проси́те въ моли́твахъ ва́шихъ, ре́кше, не имѣ́нія проси́те. Аще ли злѣ́ про́сите, не да́стся ва́мъ. Оба́че мно́зи раздража́ютъ Бо́га прося́ще бога́тства и тому́ подо́бнаго, и не имѣ́я о то́мъ попече́нія, е́же рече́ Госпо́дь: ищи́те пре́жде Ца́рствія Бо́жія и пра́вды Его́, и сія́ вся́ приложа́тся ва́мъ. Яко же и Са́мъ одѣ́яся въ нищету́, и ученики́ избра́ Себѣ́ отъ ни́щихъ, а не отъ бога́тыхъ, ре́къ и́мъ: не носи́те ни зла́та, ни сребра́, ни двою́ ри́зу, и не собира́йте здѣ́ сокро́вищъ; но собира́йте сокро́вища на небеси́, идѣ́же ни тля́ тли́тъ, ни та́тіе кра́дутъ. И посыла́я ученики́ Своя́ на про́повѣдь, рече́ и́мъ: не вни́дите въ до́мы бога́тыхъ, но къ ни́щу, и кро́тку, и слу́шающу слове́съ Мои́хъ. Тѣ́мъ, ублажа́я таковы́хъ, вѣща́етъ: блаже́ни ни́щіи ду́хомъ; а не рече́: блаже́ни бога́тіи. Слы́шите, ка́ко Госпо́дь блажи́тъ убо́гія, бра́тію Себѣ́ нарица́я, я́коже Матѳе́й евангели́стъ пи́шетъ. Бога́тыхъ же не нарица́етъ бра́тіею, и не блажи́тъ и́хъ я́коже ни́щихъ. Оба́че тѣ́хъ хва́литъ, и́же въ Бо́га богатѣ́ютъ, я́коже Іовъ и про́чіи. А и́же собира́ютъ бога́тство отъ ли́хвы, и отъ непра́вды, отъ мзды́, и отъ грабле́нія, и отъ наси́лія властели́нска, и отъ корче́мнаго прибы́тка, и отъ вся́кія зло́бы, тѣ́хъ укоря́етъ. По псалмопѣ́вцу: лу́чше ма́ло пра́веднику, па́че бога́тства грѣ́шныхъ мно́га. Поне́же то́ бога́тство, и́же скрыва́ютъ въ земли́, зла́то и сребро́ — на изъяде́ніе ржѣ́, ку́ны и по́рты — на изъяде́ніе мо́ли, а бра́шно — плѣ́сни, жи́то же — согни́тію, а питіе́ — прокисле́нію, и гно́ю и смра́ду, ни́щимъ же и прося́щимъ не раздаю́тъ, досто́йно осужде́нія и му́къ. Тѣ́мъ же во Ева́нгеліи въ наставле́ніе на́ше предпи́сано: не пецы́теся о у́треннемъ, что́ я́сти, или́ во что́ облещи́ся. Но воззри́те на пти́цы небе́сныя, ка́ко тíи не сѣ́ютъ, ни пряду́тъ, ни тружа́ются, и Оте́цъ Небе́сный пита́етъ и́хъ. Ко убо́гимъ же, не хотя́щимъ пребыва́ти въ трудѣ́, рече́но бы́сть: а́ще не хо́щете труди́тися, то роди́тъ ли ва́мъ хвра́стіе — вино́, кропи́ва — пшени́цу, а пауки́ истку́тъ ли ва́мъ поло́тна, и ре́мези содѣ́лаютъ ли ва́мъ хра́мы? И па́ки Па́велъ глаго́летъ: се́ сы́ти есте́, се́ обогати́стеся безъ на́съ, воцари́стеся, но не вѣ́чно, и отъ сего́ бога́тства по́йдете къ вѣ́чнѣй нищетѣ́, въ му́ки вѣ́чныя. А ни́щіи воспріи́мутъ вѣ́чное бога́тство, идѣ́же е́сть ра́дость и весе́ліе, я́коже пи́сано: и́хже о́ко не ви́дѣ, и у́хо не слы́ша, и на се́рдце человѣ́ку не взы́де, я́же Бо́гъ угото́ва лю́бящимъ Его́. Тѣ́мже, бра́тіе, молю́ вы, не скорби́те въ нищетѣ́ и тѣснота́хъ живу́ще. Сего́ ра́ди а́зъ прекланя́ю колѣ́на ко Отцу́ Го́спода на́шего Іису́са Христа́, да пода́стъ на́мъ бога́тство нетлѣ́нныя сла́вы Своея́, и низпо́слетъ Ду́хъ прему́дрости и ра́зума, и просвѣти́тъ о́чи серде́чніи къ позна́нію и разумѣ́нію, что́ е́сть упова́ніе спасе́нія на́шего, и что́ е́сть бога́тство сла́вы Его́, Ца́рства небе́снаго. Аще же что́ не мо́жемъ въ Писа́ніи разумѣ́ти, да вопроша́емъ духо́вныхъ и вѣ́дущихъ. Добро́ у́бо е́сть проси́ти у Бо́га свѣ́дѣнія и ра́зума, а па́че проще́нія грѣхо́мъ, но не бога́тства, е́же я́ко цвѣ́тъ травны́й увяда́етъ, и сла́ва его́ исчеза́етъ. Да про́симъ же прему́дрости, по апо́столу Іа́кову, вѣ́рою, ничто́же сумня́ся: и е́же у́мъ человѣ́чь не мо́жетъ пости́гнути, тогда́ неви́димо Бо́гъ отверза́етъ, а́ще то́кмо бу́демъ во́лю Его́ святу́ю исполня́ти, я́коже глаго́летъ: не вся́къ глаго́ляй Ми: Го́споди, Го́споди, вни́детъ въ Ца́рствіе Мое́, но творя́й во́лю Отца́ Моего́, Иже е́сть на небесѣ́хъ. Во́ля же Бо́жія сія́ е́сть: да произрасти́мъ въ на́съ пло́дъ духо́вный, и́же е́сть любы́, ра́дость, ми́ръ, долготерпѣ́ніе, бла́гость, милосе́рдіе, вѣ́ра, кро́тость, воздержа́ніе. И Дави́дъ глаго́летъ: блаже́ни взыска́ющіи свидѣ́нія Его́, а не бога́тства. Приклони́, рече́, се́рдце мое́ во свидѣ́нія Твоя́, а не въ лихои́мство. Сего́ ра́ди возлюби́хъ свидѣ́нія Твоя́ па́че зла́та, и сребра́, и многоцѣ́ннаго ка́менія. Бо́гу на́шему сла́ва. [Ами́нь.]