Се́ же, бра́тіе моя́, слы́шасте отъ проро́къ, и апо́столъ, и Ева́нгелія, о суетѣ́ и печа́ли бога́тства. И еще́ хощу́ вы́ поучи́ти ра́зуму и стра́ху Бо́жію, отъ при́тчей му́драго, въ ни́хже о́нъ глаго́летъ: сы́не, а́ще му́дръ бу́деши, себѣ́ и бли́жнимъ свои́мъ му́дръ бу́деши; а́ще ли зо́лъ бу́деши, то́ еди́нъ почерпе́ши себѣ́ зло́. И па́ки: сы́не, а́ще моея́ за́повѣди глаго́ланія пріи́мъ скры́еши я́ въ себѣ́, то́ послу́шаетъ у́хо твое́ прему́дрости, ре́кше Христа́, Иже е́сть Прему́дрость, и приложи́ши се́рдце твое́ въ ра́зумъ, ре́кше въ вѣ́ру. И аще взы́щеши прему́дрости па́че зла́та и сребра́, тогда́ уразумѣ́еши стра́хъ Бо́жій, и ра́зумъ обря́щеши: я́ко Госпо́дь дае́тъ ра́зумъ, и прему́дрость, и спасе́ніе. И па́ки: нача́ло прему́дрости — стра́хъ Госпо́день, и ра́зумъ бла́гъ, все́ благо́е твори́тъ: неразу́мный же во все́ зло́ впа́даетъ. Кро́тціи же въ ра́зумѣ, наслѣ́дятъ зе́млю. Гордели́віи же, и проти́вницы, зе́млю пу́сту сотворя́тъ. Госпо́дь го́рдымъ проти́вится, а смире́ннымъ дае́тъ благода́ть. И па́ки: бу́ди упова́я во все́мъ на́ Бога, а о свое́й му́дрости не возноси́ся, да пра́во хо́дитъ нога́ твоя́, и не и́мать претыка́тися. Блаже́нъ, и́же обрѣ́те прему́дрость, и ра́зумъ: лу́чше бо е́сть иска́ти му́дрости, не́жели зла́та и сребра́. И па́ки: му́дрый не куе́тъ на́ друга зла́, го́рдый же, и несмы́сленый сва́ръ воздвиза́етъ. На го́рдыхъ кля́тва Госпо́дня, а на смире́нныхъ Госпо́дня ми́лость, отъ ны́нѣ и до́ вѣка. И па́ки: прему́дріи сла́ву и че́сть наслѣ́дятъ, а безу́мніи — безче́стіе и па́губу души́. Сы́нъ послушли́въ и разу́менъ, люби́мъ отцу́ своему́, и чти́мъ ма́терію свое́ю: отъ Бо́га же возлю́бленъ е́сть. И па́ки: му́дрый и́щетъ прему́дрости и пути́ пра́ваго, по нему́же пости́гъ блага́я, не труди́тся, а безу́мный впаде́тъ въ ро́въ глубо́кій и поги́бнетъ, и бу́дутъ ему́ послѣ́дняя го́рша пе́рвыхъ. И па́ки: внима́й наказа́нію му́дрыхъ, и уче́нія разу́мныхъ не отри́ни, ни поху́ли, но пріими́ въ се́рдцы свое́мъ съ похвало́ю: тѣ́хъ бо уче́нія — живо́тъ души́, а тѣ́лу — исцѣле́ніе, грѣхо́мъ — разрѣше́ніе, и сокро́вищемъ живо́тнымъ исполне́ніе. И па́ки: не внима́й злѣ́ женѣ́, ме́дъ бо ка́плетъ отъ усте́нъ жены́ любодѣ́йцы, я́же во́ время наслади́тъ тво́й горта́нь, послѣди́ же бу́детъ горча́е же́лчи; прилѣпля́яйся е́й, сме́рть обря́щетъ, тѣ́лу — истлѣ́ніе, а души́ — во а́дъ сведе́ніе. И тогда́ рече́ши: о, лю́тѣ мнѣ́, почто́ возненави́дѣхъ наказа́нія му́дрыхъ, и отъ уче́нія разу́мныхъ уклони́ся се́рдце мое́, и не послу́шахъ наказу́ющихъ мя́, и возненави́дѣхъ и́хъ, и въ свое́мъ безу́міи погибо́хъ? И па́ки: сы́не мо́й, пíй во́ду отъ свои́хъ сосу́дъ, и отъ свои́хъ студене́цъ и исто́чникъ, а отъ чужи́хъ блюди́ся. И тогда́ обря́щешися посредѣ́ поро́ды угото́ванныя благоразу́мнымъ. И па́ки: прелюбодѣ́й и пія́ница, за ску́дость ума́ поги́бнета. Пріими́те наказа́нія му́дрыхъ, па́че зла́та, и уче́нія разу́мныхъ, па́че сребра́. И па́ки: зако́нъ Госпо́день ненави́дитъ досажде́нія го́рдыхъ, и сокруши́тъ Госпо́дь ко́сти го́рдыхъ внеза́пу: кро́тціи же и лю́бящіи Го́спода, обря́щутъ бога́тство и сла́ву. И па́ки: блаже́нъ му́жъ, и́же послу́шаетъ наказа́нія му́дрыхъ, таковы́й бо бу́детъ мудрѣ́е му́драго. И па́ки: разу́мный наказу́яй безу́мнаго, зла́я пріи́метъ, а облича́яй нечести́ваго, гнѣ́въ на ся́ воздви́жетъ, и отмще́ніе зло́. А наказу́яй му́драго, пріи́метъ че́сть и сла́ву отъ Бо́га. Сего́ ра́ди глаго́летъ Госпо́дь: не помета́йте би́серъ ва́шихъ предъ свинія́ми, да не по́прутъ его́ нога́ми. Свиніи́ бо нарече́ безу́мныя лю́ди, а би́серъ драгíй — Госпо́дне уче́ніе. И па́ки: сы́нъ прему́дръ весели́тъ отца́, сы́нъ же безу́менъ — печа́ль ма́тери. Сребро́ ражже́нно, и зла́то искуше́нно — язы́къ му́драго, се́рдце же безу́мнаго испо́лнь зла́. И па́ки: уста́ разу́мнаго умѣ́ютъ глаго́лати высо́кая, а безу́мнаго — хулу́ и ле́сть. И па́ки: благослове́ніе Госпо́дне на главѣ́ пра́веднаго, и вѣне́цъ сла́вы на главѣ́ разу́мнаго: таковíи не имѣ́ютъ печа́ли въ сердца́хъ свои́хъ, и сокро́вища и́хъ имѣ́ніемъ исполня́ются. Уста́ нечести́выхъ глаго́лютъ беззако́ніе, уста́ же смире́нныхъ уча́тся прему́дрости, а велича́выхъ — ерети́честву. И па́ки пи́сано е́сть: малоу́мный зави́дя у́мному впа́даетъ въ е́реси; и ненави́дящій уче́нія у́мнаго, въ жидо́вство впа́даетъ: таковы́й съ жиды́ и еретики́ вку́пѣ осу́дится. И па́ки прито́чникъ глаго́летъ: уме́ршу пра́веднику, не поги́бнетъ наде́жда его́ во́ вѣки: похвала́ же нечести́выхъ поги́бель, и безъ конца́ и́мъ муче́ніе. И па́ки: му́дрый терпи́тъ досажде́ніе, и таи́тъ прекосло́віе; безу́мный же въ пе́рвый де́нь исповѣ́сть гнѣ́въ дру́га своего́. Не уго́дно бу́детъ пра́ведному все́ непра́ведное, непра́ведный же вся́кія зло́бы исполня́ется. Смире́нный всегда́ во мно́зѣ бога́тствѣ, безу́мный же въ хулѣ́ и кля́твѣ всегда́. И па́ки: и́же храни́тъ своя́ уста́, соблюда́етъ свою́ ду́шу; сварли́вый же, и прекосло́вный, и непокорли́вый губи́тъ свою́ ду́шу. И па́ки: му́дрыхъ сердца́ жела́ютъ уче́нія спасе́нію, а безу́мныхъ сердца́ дале́че хо́дятъ отъ уче́нія спасе́ннаго. И па́ки: держа́й дру́жбу съ му́жемъ му́дрымъ, му́дръ бу́детъ, а съ безу́мнымъ дружа́яйся, зло́ обря́щетъ. Пра́ведніи обря́щутся во мно́зѣ бога́тствѣ, а грѣ́шніи во мно́зѣ ско́рби и печа́ли. И па́ки рече́: наказу́яй сы́на своего́, лю́битъ его́, а не наказу́яй ненави́дитъ его́. И па́ки: му́дрый созда́ хра́мину, а безу́мный раскопа́ ю́. И па́ки: въ му́дрѣ му́жѣ сла́ва кня́зю, а въ безу́мнѣ му́жѣ сокруше́ніе и паде́ніе. Съ му́дрымъ му́жемъ совѣ́туя кня́зь, не погуби́тъ княже́нія своего́, а съ безу́мнымъ совѣ́туя, лиши́тся княже́нія своего́. Аще кня́зю се́рдце бла́го, почíетъ въ не́мъ му́дрость; въ се́рдцы же гордели́ваго почíетъ безу́міе. Слу́шаяй клеветника́, гнѣви́тъ да́вшаго ему́ княже́ніе; оправда́яй же вино́внаго мзды́ ра́ди, неизмоли́мъ су́дъ пріи́метъ въ де́нь су́дный. И Дави́дъ проро́къ глаго́летъ: о́чи Госпо́дни на пра́ведныя и у́ши Его́ въ моли́тву и́хъ. Воззову́тъ пра́ведніи, и Госпо́дь услы́шитъ и́хъ. Воззову́тъ грѣ́шницы, ре́кше судіи́ непра́ведніи и неми́лостивіи, и воспла́чутся, отсыла́еми въ му́ку вѣ́чную. Госпо́дь же отврати́тъ лице́ Свое́ отъ ни́хъ, си́це глаго́ля и́мъ: нѣ́сть ми́лости, несотво́ршимъ ми́лости. О, го́ре непра́во судя́щему, по дѣло́мъ бо его́ су́дится ему́! Пи́сано бо е́сть: не спасе́тъ кня́зя княже́ніе, ни епи́скопа епи́скопство, и ни кíй же са́нъ сано́вникъ, но кíйждо въ свое́мъ чину́ просія́етъ, за́повѣди Госпо́дни сохра́ньши. Иса́ія же глаго́летъ: измы́йтеся, и чи́сти бу́дите. Отыми́те лука́вство отъ ду́шъ ва́шихъ и научи́теся добро́ твори́ти. Взыщи́те суда́ пра́ва и изба́вите оби́дима, суди́те сиротѣ́ и оправда́йте вдови́цу. Се́ же глаго́летъ князе́мъ, и вла́стелемъ, а не просты́мъ лю́демъ. И при́точникъ глаго́летъ: прія́тенъ быва́етъ князе́мъ и вла́стелемъ слуга́ разу́мный. Лу́чше ча́сть ма́ла съ боя́знію Госпо́днею, не́жели бога́тство непра́ведное. И па́ки: до́мы гра́бящихъ разоря́етъ Госпо́дь, а кро́ткихъ тве́рды твори́тъ и долгоживо́тны. И па́ки глаго́летъ: ми́лостынею очища́ются грѣси́, а пра́вдою — беззако́нія. Са́мъ бо Госпо́дь рече́: ми́лости хощу́, а не же́ртвы. То́й же при́точникъ глаго́летъ: со́тове ме́двени словеса́ до́брая, сла́дость же и́хъ исцѣле́ніе души́, и тѣ́лу прилѣжа́ніе. И па́ки: грѣхолю́бецъ ра́дуется сва́ромъ, а добро́ творя́щіи наслѣ́дятъ блага́я. Му́жъ велича́въ впаде́тъ во зло́, а молчали́вый и смире́нный вни́детъ въ до́брую степе́нь. И па́ки: ми́луяй ни́ща и убо́га, въ де́нь лю́тъ изба́витъ и́ Госпо́дь, а велича́въ му́жъ досажда́етъ святы́мъ. И па́ки: лу́чши е́сть жи́ти въ ху́дѣ хра́минѣ съ пра́вдою, не́жели въ пова́пленыхъ съ непра́вдою. И па́ки: и́же не послу́шаетъ моля́щагося, и то́й на́чнетъ моли́тися Бо́гу, и Бо́гъ его́ не послу́шаетъ. А и́же помина́етъ вражду́, законопресту́пникъ е́сть, и моли́тва его́ непрія́тна бу́детъ Бо́гови. Же́ртвы нечести́выхъ — ме́рзость Го́сподеви, та́коже и приноше́ніе законопресту́пника, и рѣзои́мца, и мздои́мца, и корче́мника. И па́ки: бога́тъ и ни́щъ срѣто́стася, обою́ же Бо́гъ сотвори́. Анна, ма́ти Саму́илова, глаго́лаше: Госпо́дь убо́житъ и богати́тъ, смиря́етъ и вы́ситъ, воздвиза́етъ отъ земли́ убо́га, и отъ гно́ища возно́ситъ ни́ща. И па́ки: да не хва́лится прему́дрый прему́дростію свое́ю, и си́льный си́лою свое́ю, и бога́тый бога́тствомъ свои́мъ. Но о се́мъ да хва́лится хваля́йся: е́же разумѣ́ти и зна́ти Го́спода, и твори́ти су́дъ и пра́вду посредѣ́ земли́. Проро́къ Заха́рія глаго́лаше: напра́ви но́ги на́ша на пу́ть ми́ренъ. Дави́дъ же глаго́летъ: блаже́нъ му́жъ, и́же не́йде на совѣ́тъ нечести́выхъ. И па́ки при́точникъ: сы́не, а́ще му́дръ бу́деши, то возвесели́ши ду́шу свою́. Не бу́ди винопíйца, ни простира́йся предложе́ніемъ мя́со купова́ти: пія́ница бо всегда́ въ скве́рнахъ пребыва́етъ, и на коне́цъ житія́ обнища́етъ. И па́ки: а́ще кто́ жену́ добру́ и́мать, то́ дража́йши е́сть ка́менія многоцѣ́ннаго, о таково́й бо ра́дуется се́рдце му́жа ея́. И па́ки: свято́му му́жу да́стся жена́ зла́, таковы́й же пріи́метъ бо́лій вѣне́цъ о́тъ Бога; а грѣ́шну му́жу добра́ жена́. Се́ же мно́гими недовѣ́домо е́сть. И па́ки: Го́споди Бо́же мо́й, да́ждь ми́ ра́зумъ наказа́нія, внегда́ подоба́етъ ми́ рещи́ сло́во. И се́ предложи́хъ предъ ва́ми я́ко по́ле, и я́ко ко́рень въ земли́ жа́ждущей, о Христѣ́ Іису́сѣ Го́сподѣ на́шемъ, Ему́же сла́ва, ны́нѣ и при́сно и во́ вѣки вѣко́мъ, ами́нь.