Благослове́нъ Госпо́дь Бо́гъ Изра́илевъ, я́ко посѣти́ и сотвори́ избавле́ніе лю́демъ Свои́мъ. Не стерпѣ́ бо зрѣ́ти человѣ́ка порабоще́на грѣхо́мъ, но милосе́рдіемъ Свои́мъ посла́ Сы́на Своего́ на зе́млю, Иже вочеловѣ́чися Бо́гъ Сы́й неопи́санъ, пло́ть прія́тъ отъ Святы́я Богоро́дицы, и распя́тіе претерпѣ́, и сме́рть вкуси́ за на́ша согрѣше́нія. Поне́же пра́отецъ на́шъ Ада́мъ, престу́пль за́повѣдь Бо́жію, испаде́ изъ поро́ды. Сего́ ра́ди Влады́ка Госпо́дь на́шъ Іису́съ Христо́съ, въ пло́ть на́шу облече́ся, и преложи́ ю́ въ хлѣ́бъ, егда́ на ве́чери пріе́мъ хлѣ́бъ, благослови́въ, преломи́ и даде́ ученико́мъ Свои́мъ и апо́столомъ, глаго́ля: пріими́те, яди́те, се́ е́сть тѣ́ло Мое́ за вы́ ломи́мое. И па́ки по ве́чери, пріе́мъ ча́шу отъ плода́ ло́знаго, и хвалу́ возда́въ Бо́гу Отцу́, даде́ и́мъ, глаго́ля: се́ е́сть кро́вь Моя́ Но́ваго Завѣ́та. Егда́ бо Са́мъ Госпо́дь рече́, се́ е́сть Кро́вь и Пло́ть Моя́, ю́же преда́хъ ученико́мъ Мои́мъ, ре́къ и́мъ, сіе́ твори́те въ Мое́ воспомина́ніе. Ели́ко бо а́ще я́сте Хлѣ́бъ се́й, и Ча́шу сію́ піе́те, сме́рть Мою́ возвѣща́ете. Тѣ́мже, бра́тіе, и мы́ собра́вшеся отъ ма́ла и до вели́ка, чи́стыми сердцы́ и несра́мнымъ лице́мъ, вси́ да присту́пимъ къ чу́дному и стра́шному Бо́гу, Его́же трепе́щутъ а́нгели несогрѣ́шше. А мы́, по вся́ дни́ согрѣша́юще, ка́ко безъ стра́ха приступа́емъ, и пріе́млемъ Пречи́стое Тѣ́ло Госпо́дне, и Пречи́стую Его́ Кро́вь? Ка́ко въ се́мъ часѣ́ обѣща́емся, егда́ рече́тъ свяще́нникъ: горѣ́ имѣ́емъ сердца́. И мы́ глаго́лемъ: и́мамы ко́ Господу; но лже́мъ Тому́, Иже свѣ́сть вся́ серде́чная. Мы́ бо усты́ то́кмо Его́ чте́мъ. Прихо́димъ въ Це́рковь не Бо́га ра́ди, но да дру́гъ дру́га зри́мъ. Тѣлесы́ въ Це́ркви стои́мъ, а се́рдце и у́мъ на́шъ въ до́мѣхъ на́шихъ, или́ и́ндѣ гдѣ́ хо́дятъ. Инъ бо здѣ́ ны́нѣ стоя́, а мы́слію все́ о бога́тствѣ пече́тся, ка́ко бы устро́ити е́. А и́нъ размышля́етъ и пече́тся, ка́ко бы нищеты́ избы́ти. А друзíи отъ на́съ о питіи́ и о яде́ніи пеку́тся, ка́ко бы къ тому́ позва́ли и́хъ. А о се́мъ ника́коже пеце́мся, ка́ко у́мрети, и пре́дъ Богомъ ста́ти, Ему́же ны́нѣ лжу́ще обѣщава́емся, я́ко сердца́ и́мамы ко́ Господу, а са́ми о други́хъ глаго́лемъ въ Це́ркви и осужда́емъ, или́ разглаго́льствуемъ о су́етномъ житіи́ сего́ свѣ́та. Но послу́шайте Дави́да проро́ка, глаго́люща: кто́ е́сть человѣ́къ хотя́й живо́тъ, любя́й дни́ ви́дѣти бла́ги? Удержи́ язы́къ сво́й отъ зла́, и устнѣ́ свои́ е́же не глаго́лати льсти́; уклони́ся отъ зла́, и сотвори́ бла́го. Что́ бо е́сть того́ злѣ́е, е́же о́ друзѣ глаго́лати въ Це́ркви, или́ о житіи́ сего́ свѣ́та, отъ него́же на́мъ е́сть у́мрети. Аще же кто́ хо́щетъ до́мъ стро́ити, или́ о имѣ́ніи бесѣ́довати, то́ въ до́мѣхъ свои́хъ о то́мъ бесѣ́дуйте. Но въ Це́ркви лѣ́по е́сть пла́катися то́кмо грѣхо́въ свои́хъ и моли́тися Бо́гу, не я́вѣ, но та́йно въ души́ свое́й, и омы́ти тѣ́ло свое́ слеза́ми, да очи́стиши ду́шу твою́. А не печа́льми свѣ́та сего́, ни словесы́ сту́дными и пусто́шными занима́тися, окаля́я грѣхо́мъ ду́шу, я́ко свинія́ ка́ломъ смердя́щимъ. Аще кто́ имѣ́я въ себѣ́ таковы́ зло́бы, присту́питъ къ Причаще́нію безъ стра́ха Бо́жія, со́ гнѣвомъ на кого́, или́ враждо́ю, или́ за́вистію, таковы́й вѣ́чнѣй му́цѣ досто́инъ бу́детъ. Но молю́ вы, бра́тіе, а́ще кто́ хо́щетъ причасти́тися Пречи́стому Тѣ́лу и Кро́ви Христо́вѣ, ели́ко гнѣ́въ и́маши на кого́ въ се́рдцы свое́мъ, ше́дъ, пре́жде смири́ся съ ни́мъ, и пріиди́ съ ра́достію и любо́вію, е́же о́ Бозѣ прія́ти Свято́е Прича́стіе. Аще ли блу́дъ сотвори́лъ еси́, или́ и́но ко́е зло́, или́ свари́лся еси́ съ кѣ́мъ, и не смири́лся; или́ бесѣ́довалъ еси́ съ кѣ́мъ въ Це́ркви о жите́йскихъ въ ча́съ Литургíи, то не приступа́й ко Свято́му Тѣ́лу и Кро́ви Христо́вѣ. Аще ли присту́пиши, и причаща́ешися не удержа́въ язы́ка своего́ отъ зла́, и отъ пра́здныхъ слове́съ, и не очи́стився отъ скве́рнъ грѣхо́вныхъ, пови́ненъ еси́ огню́ негаси́мому. Двана́десять часо́въ и́мать де́нь, отъ ни́хже еди́нъ ча́съ избра́ Себѣ́ Бо́гъ на святу́ю сію́ Литургíю. Да сего́ ли еди́наго часа́, бра́тіе моя́, и ча́да возлю́бленная Бо́гомъ, не мо́жете престоя́ти со́ страхомъ и тре́петомъ, до оконча́нія моли́твы къ получе́нію своего́ спасе́нія, да Влады́ка на́шъ Іису́съ Христо́съ съ че́стію почíетъ на свято́мъ олтарѣ́, я́ко на престо́лѣ сѣдя́ херуви́мстѣмъ. Егда́ бо человѣ́къ чи́стымъ се́рдцемъ присту́питъ ко Свято́му Причаще́нію, тогда́, ели́ки и́мать грѣхи́, очи́стятся ему́. Идѣ́же бо чи́стая и пресвята́я внидо́ша, су́ть свяще́нна. Тѣ́мже пра́ведніи насы́тятся нетлѣ́нныя пи́щи Свята́го Прича́стія. Слы́шите, ка́ко Дави́дъ проро́къ возбужда́етъ къ тому́ вѣ́рныя, глаго́ля: вкуси́те и ви́дите, я́ко бла́гъ Госпо́дь. Да и мы́, бра́тіе и ча́да вѣ́рніи, поревну́емъ о́ной женѣ́, я́же вѣ́рою прикосну́ся вскра́й ри́зъ Госпо́днихъ, и а́біе въ то́мъ часѣ́ уста́вися тече́ніе кро́ве ея́. И о таково́мъ чудеси́ просла́ви Бо́га, и спасе́на бы́сть вѣ́рою. Та́ко и мы́, бра́тіе, вѣ́рою причасти́мся Свято́му Тѣ́лу и Кро́ви Христо́вѣ, да и на́ша исцѣли́тъ грѣхо́вныя я́звы. Аще ли кто́ отъ ва́съ гнѣ́въ и́мать на кого́, и не смири́ся, то́ да не вхо́дитъ въ Це́рковь, и да не приступа́етъ ко пречи́стому комка́нію [прича́стію], да не осу́дится въ вѣ́чную му́ку; та́ко же и оскверня́ющій свою́ ду́шу ше́пты мірски́ми, да не дерза́етъ приступа́ти, недосто́инъ бо е́сть таковы́й. Но, хотя́й прія́ти Тѣ́ло и Кро́вь Христо́ву, да отве́ржетъ вся́ зла́я дѣла́. Да зри́мъ у́бо очи́ма до́лу, а у́мъ возво́димъ горѣ́ на́ небо, да не посра́млени ста́немъ на стра́шнѣмъ суди́щи Христо́вѣ, егда́ пріи́детъ въ сла́вѣ Свое́й: и́же бо, рече́, постыди́тся Мене́, и Мои́хъ слове́съ, въ ро́дѣ се́мъ прелюбодѣ́йнѣмъ и грѣ́шнѣмъ, постыжу́ся и Азъ его́ предъ а́нгелы Мои́ми. Сія́ же словеса́ слы́шаще, бра́тіе, Самого́ Го́спода глаго́люща, постыди́мся Его́ су́ща на святѣ́мъ олтари́ въ ча́съ се́й стра́шный предстоя́ще Ему́, и потщи́мся сохрани́ти за́повѣди Его́, да Ца́рство небе́сное получи́мъ, о Христѣ́ Іису́сѣ Го́сподѣ на́шемъ. [Ами́нь.]