Пріиди́те, вси́ вѣ́рніи, люби́мое ста́до Христо́во, да обы́чное ва́мъ сотворю́ поуче́ніе. Слы́шите па́ки, что́ испе́рва рече́но бы́сть о святѣ́мъ постѣ́. Се́ бо двѣ́ недѣ́ли поста́ премину́ло е́сть. Всего́ же лѣ́та десяти́на по́стъ сíй, на уврачева́ніе души́ уста́вленый. И до́лжно на́мъ десяти́ну душе́вную чи́сту отда́ти Бо́гови, я́коже пе́рвіи святíи творя́ху, не то́кмо бо отъ имѣ́ній десяти́ну дая́ху, но и душе́вную исполня́юще, посто́мъ и моли́твами, поклоне́ніемъ, и ми́лостынями, просла́вишася отъ Го́спода Бо́га, я́ко сотво́рше во́лю Его́. Пе́рвіе пости́ся Ено́хъ, и взя́тъ бы́сть съ пло́тію на́ небо, и́же и доны́нѣ жи́въ е́сть. Пости́ся Но́й, и отъ пото́па изба́вленъ бы́сть, съ ро́ждьшимися отъ него́ дѣтьми́, отъ его́же пле́мени ны́нѣшній мíръ бы́сть. Пости́ся та́коже Авраа́мъ, и дру́гъ Бо́жій нарече́ся, оте́цъ бы́въ всѣ́мъ проро́комъ и патріа́рхомъ. Моисе́й посто́мъ очи́стився, съ Бо́гомъ бесѣ́дова лице́мъ къ Лицу́, и просія́ лице́ его́ я́ко со́лнце. Илія́ пости́ся, и о́гнь съ небесе́ сведе́ и до́ждь отъ Бога лю́демъ испроси́. Даніи́лъ проро́къ посто́мъ львы́ укроти́, и му́жъ жела́нію нарече́нъ бы́сть. Іису́съ На́ввинъ пости́вся, иноплеме́нники побѣди́ и со́лнце отъ тече́нія уста́ви. Тріе́ же о́троцы въ пе́щь о́гнену вве́ржени, посто́мъ и моли́твами о́гнь угаси́ша. Пости́шася Ниневи́тяне, и гнѣ́въ Бо́жій на кро́тость преложи́ша. Мно́зи же и въ Но́вомъ Зако́нѣ посто́мъ освяти́шася, моли́твами, и смире́ніемъ, и ми́лостынею къ Бо́гу прибли́жишася. По́стъ бо не имы́й смире́нія, я́ко хра́мъ безъ покро́ва е́сть, и я́ко сосу́дъ у́тлъ, си́це и по́стъ безъ смире́нія. Постя́й же ся, а ми́лостыни не творя́й, ма́ло по́льзы е́сть. Уго́дницы же Бо́жіи свя́ти бы́ша посто́мъ, и моли́твами со смире́ніемъ, и ми́лостынею, и́хже имена́ безчи́сленны су́ть. Аще же рече́те: святíи бы́ша крѣ́пцы, а мы́ сла́би есмы́, и не мо́жемъ колѣ́ну прегиба́ти; то́ поне́ десяти́ну чи́сту отдади́мъ, ея́же Са́мъ Госпо́дь Бо́гъ на́шъ тре́буетъ отъ на́съ. Соста́влену бо лѣ́ту де́ньми тре́ми сты́ и шестью́десять и пятію́, и отъ всѣ́хъ дне́й нарече́ Госпо́дь Бо́гъ свою́ десяти́ну, о се́мъ увѣ́сте до́брѣ, а́ще въ ра́зумъ воспріи́мете реко́мая мно́ю. Три́десять ше́сть дне́й и по́лъ, отъ тре́хъ со́тъ и шести́десяти пяти́, е́сть деся́тая ча́сть всего́ лѣ́та. Сего́ же свята́го поста́ се́дмь недѣ́ль и́мутъ въ себѣ́ четы́редесять и де́вять дне́й. Отъ си́хъ у́бо изложи́вше суббо́ты и недѣ́ли, я́же су́ть днíе Госпо́дьстіи и пра́здницы, исчи́слено бу́детъ три́десять пя́ть дне́й. Про́чее прилага́емымъ къ посту́ святѣ́й Вели́кой суббо́тѣ, и по́лъ свѣ́тлѣй и свѣтотвори́мѣй но́щи, испо́лнятся три́десять ше́сть дне́й и по́лъ дне́, е́же е́сть десяти́на тре́мъ ста́мъ и шести́десятимъ и пяти́мъ дне́мъ всего́ лѣ́та. Того́ бо ра́ди и Вели́кая суббо́та къ посту́ причте́ся, да не поги́бнетъ ничто́же о́тъ Божія десяти́ны. Се́ же разсмотрѣ́вше святíи отцы́, повелѣ́ша сію́ суббо́ту пости́тися, зане́же еще́ Христу́ во́ гробѣ лежа́щу. И та́ко вся́ сія́ се́дмь недѣ́ль — десяти́на Бо́жія е́сть. И а́ще не отдади́мъ ея́ чи́сто, то́ что́ отвѣща́емъ Бо́гови? Ка́ко пріи́мемъ проще́ніе грѣхо́мъ, а́ще и въ сíи дни́ отъ пія́нства, и ла́комства, и про́чихъ похоте́й не удержи́мся? Не воздержа́нія бо ра́ди преступле́ніе бы́сть зако́ну, а преступле́ніемъ зако́на чрезъ невоздержа́ніе сме́рть вни́де въ мíръ. Не сохрани́ бо Ада́мъ поста́ чи́ста, его́же заповѣ́да ему́ Бо́гъ, прія́ тѣле́сную сме́рть. Мы́ же, по толи́цѣхъ указа́ніихъ, а́ще не сохрани́мъ всѣ́хъ по́стныхъ дне́й, то́ не у́мремъ ли душе́вно? Сме́рть бо души́ — вѣ́чная му́ка, я́коже рече́ Па́велъ апо́столъ: вдова́, пита́ющаяся простра́нно, жива́ умерла́. Вѣ́сте же са́ми, ко́ль люби́ми бя́ху Бо́гомъ Изра́ильтестіи лю́діе, и́хже сквозѣ́ Чермно́е мо́ре проведе́, я́ко по́ суху, и ма́нну и́мъ съ небесе́ даде́, и тма́ми въ ни́хъ чудеса́ сотвори́, глаго́ля: сы́нъ пе́рвенецъ Мо́й е́сть. Та́же и тѣ́хъ, непости́вшихся, не пощадѣ́. Глаго́ла бо и́мъ Моисе́й о́тъ Бога: пости́теся четы́редесять дне́й. Они́ же то́кмо два́десять дне́й пости́вшеся, сѣдо́ша я́сти и пи́ти: и пріи́де на ня́ гнѣ́въ Бо́жій, и изомро́ша злѣ́ два́десять и двѣ́ ты́сящи; а про́чихъ о́гнь сожже́, невоздержа́нія и́хъ ра́ди. Ка́я же по́льза на́мъ бу́детъ, е́же недѣ́лю то́кмо пости́вшеся, и па́ки тѣ́лу угожда́ти и непра́вды дѣ́яти. Но молю́ вы, не прельща́йтеся, ви́дяще нѣ́кіихъ въ безстра́шіи живу́щихъ и о души́ непеку́щихся: тíи бо не Бо́гу раби́ су́ть, но чре́ву, и́мже коне́цъ — па́губа и сме́рть е́сть, а по сме́рти — му́ка вѣ́чная. О, бра́тіе, молю́ вы́, я́коже отъ пе́рваго дне́ нача́сте пости́тися, та́ко и до Воскресе́нія Христо́ва сотвори́те. Но никого́же ва́съ понужда́ю чрезъ си́лу пости́тися, но ко́ждо по си́лѣ свое́й, а во осла́бу не вдава́йтеся. Гнѣ́въ же, и за́висть, и клевету́ отъ себе́ отве́ржите, я́коже рече́ апо́столъ: ми́ръ и любо́вь имѣ́йте со святы́нею. Идѣ́же бо питіе́ мно́гое и упита́ніе, ту́ сви́нское житіе́. Вся́къ же постя́йся, я́рости и сва́ра, и вся́кія непра́вды оста́нися. Въ терпѣ́ніи си́ мзду́ стяжи́те, да чи́стою со́вѣстію причасти́теся Святы́хъ Та́инъ Христо́выхъ. Иже бо кто́ въ сíи святы́я дни́ по́стныя не причасти́тся — то́ гла́дъ души́ е́сть. Тѣ́мже, дади́те, вѣ́рніи, духо́вное бра́шно души́, а тѣ́лу — тѣле́сное. Не тѣ́ло бо то́чію пита́й, но души́ гла́дны не оста́ви лише́нны да́ра Бо́жія, но насы́ти ю́ причаще́ніемъ святы́мъ. Бо́гу на́шему сла́ва, ны́нѣ и при́сно, и во́ вѣки вѣко́мъ, ами́нь.