Иже кто́ ми́лостивъ, и ми́лостыню твори́тъ отъ своего́ труда́, то́й Го́сподеви прія́тенъ. А и́же кто́ непра́вдою живе́тъ, и съ убо́гихъ и сиро́тъ е́млетъ коры́сти, отъ ни́хже ми́лостыню твори́тъ, и то́ю хо́щетъ Бо́гу угоди́ти, се́й ненави́стенъ е́сть Бо́гу, и подо́бни таковíи ме́ртву псу́ смердя́щу, его́же смра́да человѣ́цы не мо́гутъ терпѣ́ти, ни обоня́ти, но и́дутъ ина́мо отврати́въ лице́ свое́, и очи́ма не могу́ще на́нь зрѣ́ти. Та́ко и Бо́гъ гнуша́ется человѣ́ка того́, и́же непра́ведно е́мля, ми́лостыню твори́тъ, и не терпи́тъ сего́, я́ко зла́го смра́да, но отвраща́я отъ него́ лице́ Свое́, не зри́тъ на него́. Но посе́мъ па́че бѣ́съ приступа́етъ къ нему́, внуша́я и дая́ ему́ несы́тство, поуча́я его́ на грабле́ніе чужа́го имѣ́нія и приводя́ его́ ко вся́кому злу́, да тѣ́мъ собере́тъ себѣ́ непра́ведно бога́тство. Но лу́чши е́сть, бра́тіе, отъ пра́веднаго имѣ́нія пода́ти ми́лостыню, хотя́ и ма́ло что́, и сіе́ вели́ко бу́детъ и прія́тно Бо́гу. Еще́ же глаго́лю ва́мъ, бра́тіе: люби́те дру́гъ дру́га, и никого́же осужда́йте, не зави́дите, не хули́те, не укоря́йте, не лжепослу́шествуйте, но въ пра́вдѣ и во смире́ніи всѣ́хъ привѣ́тствуйте, а́ще ли не пода́ніемъ, то́ поне́ словесы́ до́брыми. Не стыди́теся же старѣ́йшему главы́ своя́ поклоня́ти, и не скуча́йте предъ честнѣ́йшими стоя́ти. Все́ бо сіе́ въ че́сть Бо́гу твори́те, я́коже апо́столъ глаго́летъ: а́ще я́сте, а́ще піе́те, а́ще и́но что́ творите́, вся́ въ сла́ву Бо́жію твори́те. Разумѣ́йте же: а́ще человѣ́къ поды́метъ чрезъ си́лу ка́мень или́ и́но что́, то́ поврежда́етъ живо́тъ сво́й. Та́ко и питіе́ и яде́ніе ма́лое, прино́ситъ здра́віе тѣ́лу, а мно́гое питіе́ и яде́ніе, причиня́етъ болѣ́знь, а души́ грѣ́хъ и па́губу твори́тъ. Па́че же всего́ имѣ́йте любо́вь ра́вную ко всѣ́мъ, къ бога́тымъ и убо́гимъ: лицемѣ́рна бо е́сть сія́ любо́вь, е́же бога́таго люби́ти, а убо́гаго озлобля́ти. Не мози́те же, бра́тіе, укори́ти немощна́го, и безро́днаго, и убо́гаго: тѣ́хъ бо избра́ Бо́гъ; а прему́дрыя, и си́льныя, и бога́тыя посрамля́етъ. Внима́йте, бра́тіе, ко́ль ма́лъ пау́къ, но простира́я паучи́ны, уловля́етъ въ ни́хъ му́хи. И мно́гажды вра́бій и и́ны пти́цы прилета́ютъ и взима́ютъ пи́щу отъ ма́лой се́й лови́твы. Та́коже и мы́ отъ тѣ́хъ немощны́хъ и безро́дныхъ, худы́хъ и убо́гихъ лови́твы, бра́шномъ Бо́жіимъ, ду́шу и тѣ́ло пита́я, насыща́емъ. Послу́шайте Па́вла апо́стола къ Тимоѳе́ю, глаго́люща: въ вели́цѣ у́бо дому́ мно́зи су́ть сосу́ди, о́ви зла́ти, и о́ви сре́брени, инíи же древя́ни, а инíи гли́няни. Овіи у́бо въ че́сть, о́віи же не въ че́сть. Та́коже и вси́ человѣ́цы, бога́тіи и убо́зіи, потре́бни су́ть въ мíрѣ. Не уничижи́те у́бо и не укоря́йте созда́нія Бо́жія, но внима́йте кíйждо ва́съ себѣ́. У дру́га бо ка́ко суче́цъ во о́цѣ ви́диши, а у себе́ бервна́ не чу́еши? Изми́ пре́жде бервно́ изъ о́чію твое́ю, и та́ко у́зриши суче́цъ во очеси́ бра́та твоего́. Егда́ же творите́ пи́рове, и воззове́те бра́тію и ро́дъ, или́ кня́зи, или́ вельмо́жи, то́ сла́вы и че́сти свѣ́та сего́ и́щете. Аще же призове́те убо́гую бра́тію, то́ отъ Бо́га мзды́ своея́ не лише́ни бу́дете. Въ ли́хву сребра́ не дава́йте, и́бо святы́й апо́столъ Па́велъ, лихои́мца, и мздои́мца, ра́вно съ блудники́ вмѣня́етъ. И на мно́гихъ мѣста́хъ о то́мъ Свято́е Писа́ніе возбраня́етъ. И а́ще кто́ въ ва́съ умѣ́етъ гра́мотѣ, да исполня́етъ пра́вило предпи́санное. Аще же кто́ не умѣ́етъ, да и́детъ во святу́ю Це́рковь Бо́жію, и слу́шаетъ свята́го пѣ́нія и чте́нія со внима́ніемъ, ни съ кѣ́мже глаго́ля. Аще бо кто́ кни́ги почита́етъ, или́ чту́щаго слу́шаетъ, то́й съ Бо́гомъ бесѣ́дуетъ. Аще ли же кто́ умѣ́я гра́мотѣ, а не пое́тъ себѣ́ зау́трени, ни часо́въ, ни вече́рни, ни неѳимо́на, то́ са́мъ себе́ свѣ́та Бо́жія лиша́етъ. Подоба́етъ же пѣ́ти и неумѣ́ющимъ гра́мотѣ, зау́треню и часы́, и вече́рню, и неѳимо́нъ. Но рече́ши: ка́ко ми́ пѣ́ти не умѣ́ющу гра́мотѣ? Пѣ́ти и́маши псало́мъ 50-й: Поми́луй мя́, Бо́же, по вели́цѣй ми́лости Твое́й... Аще ли того́ не умѣ́еши, то глаго́ли Трисвято́е и Отче на́шъ, Иже еси́ на небесѣ́хъ... Аще ли и того́ не умѣ́еши, то поклони́ся ели́ко мо́жеши, глаго́ля моли́тву: Го́споди, Іису́се Христе́, Сы́не Бо́жій, поми́луй мя́, грѣ́шнаго. Си́це твори́ за зау́треню, и за часы́, и за вече́рню, и за неѳимо́нъ. Та́ко бо ука́зано пѣ́ти неумѣ́ющему гра́мотѣ, и лѣни́вому. И та́ко творя́ по вся́ дни́, прославля́й Творца́ Своего́, и пріи́меши отъ Него́ мзду́ вѣ́чную. Аще ли въ пути́ бу́деши, или́ производя́ ку́ю-лю́бо рабо́ту ну́жную, а посему́ не отпое́ши своего́ пра́вила, то́ не мни́, я́ко у́же нѣ́сть лзѣ́ отпра́вити того́ зау́тра, и не пріи́метъ Бо́гъ моли́твы твоея́. Но а́зъ ти́ проти́ву сего́ реку́: а́ще бу́деши кому́ до́лженъ, и забу́деши е́же бы отда́ти ему́ до́лгъ сво́й, и о́нъ та́коже забу́детъ у тебе́ проси́ти, но ты́ вспо́мни о то́мъ отда́си ему́ въ ру́цѣ, то не пріи́метъ ли отъ тебе́ о́наго съ ра́достію и благодаре́ніемъ? Подо́бнѣ сему́ и Человѣколю́бецъ Бо́гъ, во вся́кое вре́мя пріи́метъ моли́тву твою́, твори́мую съ усе́рдіемъ. Ра́нняго же яде́нія и питія́ блюди́ся: а́ще бо кто́ ра́но упіе́тся, то́ де́нь ему́ въ но́щь премѣни́тся. Нѣ́ціи у́бо содержа́ще вѣ́ру правосла́вну, не творя́ще же за́повѣдей Бо́жіихъ, мня́тся еди́ною вѣ́рою спасе́ни бы́ти. Друзíи же живу́ще благоче́стно, о вѣ́рѣ же небрегу́ще, а́ки мзды́ до́лжны ожида́ютъ: обои́ же Ца́рства Бо́жія не обрѣто́ша. Вопроси́ нѣ́кто ста́рца: ка́ко возмога́ютъ на ны́ бѣ́си? Онъ же рече́: дре́во — душа́ на́ша, а сѣки́ра — бѣ́си, а топо́рище — во́ля на́ша, е́юже посѣка́емся. Аще кто́ въ сре́ду и въ пято́къ пости́тся, еди́ною на́ день пріе́мля пи́щу — хлѣ́бъ и во́ду, или́ ово́щіе земно́е. И егда́ а́нгелъ пріи́детъ по ду́шу ту́, и веде́тъ ю́ на тре́тіе не́бо, и сря́щутъ ю́ а́нгели — среда́ и пято́къ, то реку́тъ: ра́дуйся, о душе́, мно́го бо еси́ труди́лася на́съ ра́ди на земли́! Аще же кíй человѣ́къ не пости́лся е́сть въ сре́ду и въ пято́къ, а́ще и добродѣ́теленъ бу́детъ, и егда́ пріи́детъ а́нгелъ по́ душу ту́, и веде́тъ ю́ на не́бо, и усря́щутъ ю́ а́нгели — среда́ и пято́къ, то реку́тъ е́й: о, убо́гая душе́, почто́ ся еси́ не пости́ла въ сре́ду и въ пято́къ, о хлѣ́бѣ, и о водѣ́, и ово́щіи земно́мъ, еди́ною дне́мъ? Въ сре́ду бо сотвори́ша жи́дове совѣ́тъ на Христа́, а въ пято́къ распя́ша Его́. Того́ ра́ди вся́кому христіа́нину не досто́итъ въ сре́ду и въ пято́къ ма́сла и млека́ я́сти, кромѣ́ разрѣше́нныхъ отъ Це́ркве дне́й. Бо́гу на́шему сла́ва, ны́нѣ и при́сно и во́ вѣки вѣко́мъ. [Ами́нь.]