Добро́ е́сть почита́ніе кни́жное, па́че же вся́кому христіа́нину. Блаже́ни бо, рече́, испыта́ющіи свидѣ́нія Его́, всѣ́мъ се́рдцемъ взы́щутъ Его́. Что́ бо, рече́, «испыта́ющіи свидѣ́нія»? — За́повѣди Его́, я́вѣ рече́. Егда́ глаго́леши и чте́ши кни́ги, не тщи́ся борзѣ́е исчести́ до другíя глави́зны, но разумѣ́й, что́ глаго́лютъ словеса́ та́, и трикра́ты обраща́йся на еди́ны глави́зны. Рече́ бо: съ се́рдцы мое́мъ скры́хъ словеса́ Твоя́, да не согрѣшу́ Тебѣ́. Не рече́: «усты́ то́кмо изглаго́лахъ»; но: «въ се́рдцы скры́хъ, да не согрѣшу́ Тебѣ́». И поразумѣва́ющимъ у́бо и́стинно, Писа́ніе пра́вило и́мъ е́сть. Реку́ же: узда́ коне́ви е́сть прави́тель и воздержа́ніе; та́коже на́мъ воздержа́ніе — почита́ніе кни́жное. Не соста́витъ бо ся кора́бль безъ гво́здія, ни пра́ведникъ безъ почита́нія кни́жнаго. Яко же ю́нъ стои́тъ плѣ́нникомъ у роди́телей свои́хъ, та́ко же и пра́ведникъ о почита́ніи кни́жномъ. Въ за́повѣдехъ Твои́хъ поглумлю́ся и разумѣ́ю пути́ Твоя́. Да не бу́детъ у́бо на́мъ ины́я ра́дости и весе́лія, я́ко же о почита́ніи кни́жномъ. Красота́ кораблю́ — вѣ́трило, та́ко же пра́веднику — почита́ніе кни́жное. Откры́й о́чи мои́, и разумѣ́ю чудеса́ отъ зако́на Твоего́. Очи бо, глаго́летъ, ра́зумъ и смы́слъ се́рдечный. Про́чее: не скры́й отъ мене́ за́повѣдей Твои́хъ, разумѣ́й, не я́ко отъ о́чію не скры́й, но отъ се́рдца, и ра́зума. Тѣ́мже похуля́яй, не поучи́тся въ ни́хъ. Ты́ же си́хъ причасти́ся и возжелѣ́й. Рече́ блаже́нный Григо́рій: я́ко тре́хъ си́хъ и́щетъ Бо́гъ отъ вся́каго человѣ́ка иму́щаго креще́ніе: вѣ́ры пра́вы отъ души́, и́стины отъ язы́ка и цѣлому́дрія отъ ра́зума. О, человѣ́че! Вся́ воспрія́лъ еси́ о́тъ Бо́га: ра́зумъ и смы́слъ, хи́трость и у́мъ, и вся́ ти́ покоре́на су́ть, я́же на земли́ и я́же по во́здуху, и въ вода́хъ и въ гора́хъ, тебѣ́ на пи́щу вдана́ бы́ша. Да а́ще вда́си Бо́гови проти́ву сему́: пра́вду, любо́вь, кро́тость, смире́ніе, ми́лостыню, то да́стъ ти́ Госпо́дь па́ки да́ры, и́хже о́ко не ви́дѣ, и у́хо не слы́ша, ни на се́рдце человѣ́ку взыдо́ша. Человѣ́че, на торгу́ жите́йстѣмъ еще́ еси́, да́же то́ргъ не разы́деся, купи́ си́ ми́лостынею поми́лованіе о́тъ Бо́га, смире́ніемъ — вѣ́чную сла́ву, пра́вдою — житіе́ несконча́емое, чистото́ю — вѣне́цъ нетлѣ́нія, кро́тостію — въ ра́й вхожде́ніе, моли́твою — со а́нгелы пѣ́ніе, трудо́мъ — поко́й, бдѣ́ніемъ — Лице́ неви́димаго Бо́га, посто́мъ и жа́ждею — вѣ́чныхъ бла́гъ наслажде́ніе. Человѣ́че, а́ще бу́детъ ти́ во главѣ́ ра́зумъ и смы́слъ, бли́зъ е́сть Ца́рство небе́сное; во о́чію же — зрѣ́ніе, е́же горѣ́, то къ Бо́гу, а е́же до́лу — то въ зе́млю, въ ню́же пома́лѣ по́йдеши; во ушеси́ десно́мъ — слы́шаніе добро́ кни́жныхъ слове́съ; въ шу́емъ же ушеси́ — слы́шаніе во́пля ни́щихъ; въ но́здрію же — воздыха́ніе о грѣсѣ́хъ; во язы́цѣ — и́стина; во устну́ же — моли́тва, а въ десни́цѣ — пода́ніе убо́гимъ; въ шу́ицѣ же — зла́ огреба́ніе; въ се́рдцѣ же — не имѣ́ти гнѣ́ва, въ тѣлеси́ — чистоту́, во утро́бѣ — алка́ніе; въ колѣ́ну — поклоне́ніе къ Бо́гу; въ ногу́ — ше́ствіе въ моли́твенный хра́мъ, я́ко да и тѣле́сніи у́дове Тебе́ не отлуча́тся. Глаго́летъ бо, про́кляти су́ть уклоня́ющіися от за́повѣдей Твои́хъ. Тѣ́мже и са́мъ ся́ хва́литъ, глаго́ля: ко́ль сладка́ горта́ни моему́ словеса́ Твоя́, па́че ме́да усто́мъ мои́мъ, и: зако́нъ Тво́й па́че ты́сящъ зла́та и сребра́. И, возопи́, глаго́ля: возра́дуюся а́зъ о словесѣ́хъ Твои́хъ, я́ко обрѣта́яй коры́сть мно́гу. Коры́сть бо нарече́ словеса́ Бо́жія, я́ко недосто́инъ сы́й толи́къ да́ръ обрѣто́хъ, е́же ми́ поуча́тися словесе́мъ Твои́мъ де́нь и но́щь. То мы́, бра́тіе, да разумѣ́емъ си́лу поуче́нія святы́хъ Боже́ственныхъ кни́гъ. Послу́шайте житія́ свята́го Васи́лія Вели́каго, и свята́го Кири́лла Филосо́фа, и инѣ́хъ мно́гихъ святы́хъ, ка́ко тíи испе́рва повѣ́даютъ о ни́хъ реку́ще, я́ко измла́да прилѣжа́ху святы́мъ кни́гамъ, та́же и на и́на до́брая дѣ́ла подви́гнушася. Ви́ждьте, ка́ко нача́токъ до́брымъ дѣ́ломъ, поуче́ніе святы́хъ кни́гъ. Тѣ́мже, бра́тіе, съ ни́ми подви́гнемся на пу́ть житія́ и́хъ и на до́брая дѣ́ла и́хъ, и поуча́емся вы́ну словесе́мъ кни́жнымъ, творя́ще во́лю Бо́жію, я́коже ны́ уча́тъ, да вѣ́чныя жи́зни досто́йни бу́демъ. Научи́ся, вѣ́рный человѣ́че, бы́ти дѣ́латель благоче́стію и научи́ся житію́ по Ева́нгельскому словеси́: очи́ма управле́ніе, тѣ́лу порабоще́ніе, уму́ смире́ніе, по́мыслъ чи́стъ имѣ́я, гнѣ́ву потребле́ніе. Понужа́йся на до́брая дѣ́ла Го́спода ра́ди: лиша́емь, не мсти́; ненави́димь — люби́; гони́мь — терпи́; ху́лимь — моли́. Умертви́ грѣхи́, распни́ся со Христо́мъ и всю́ любо́вь возложи́ на Го́спода, да обря́щеши а́нгелъ тмы́ [т. е. деся́тки ты́сящъ], пе́рвенецъ собо́ры, апо́стольскія престо́лы, жезлы́ патріа́ршескія, вѣнцы́ му́ченическія, похвалы́ пра́ведныхъ. Убо́гъ мни́ся бы́ти, и у́трѣ умира́я и пра́хъ быва́я. Глаго́ли: «нѣ́смь досто́инъ, грѣ́шный, ни на лица́ человѣ́комъ взира́ти». Тѣ́мъ такова́я всегда́ помышля́я, мо́жеши спасти́ся о Христѣ́ Іису́сѣ, Го́сподѣ на́шемъ, Ему́же сла́ва. [Ами́нь.]