Послу́шайте, бра́тіе, и се́стры, и ча́да, ста́ріи, и младíи, и вси́ вѣ́рніи, Боже́ственнаго Писа́нія, е́же о постѣ́хъ. Са́мъ Госпо́дь Бо́гъ на́шъ прообразова́ на́мъ Собо́ю честны́й по́стъ, 40 дне́й пости́вся, я́коже Матѳе́й апо́столъ во Ева́нгеліи написа́: тогда́ Іису́съ возведе́нъ бы́сть Ду́хомъ въ пусты́ню, искуси́тися отъ діа́вола, и пости́вся дне́й четы́редесяте и но́щей четы́редесяте, послѣди́ взалка́. И отто́лѣ повелѣ́ та́ко твори́ти ученико́мъ Свои́мъ и апо́столомъ. Апо́столи же, крестя́ще вѣ́рныя, заповѣ́даху Госпо́дне преда́ніе держа́ти: рече́ бо и́мъ Госпо́дь, ше́дше въ мíръ ве́сь проповѣ́дите Ева́нгеліе все́й тва́ри. Иже вѣ́ру име́тъ и крести́тся, спасе́нъ бу́детъ, и и́же не име́тъ вѣ́ры, осужде́нъ бу́детъ. По сему́ же глаго́лу и уче́нію Спа́сову, апо́столи научи́ша вся́ язы́ки вѣ́ровати во Отца́ и Сы́на и Свята́го Ду́ха, и креще́нію, и покая́нію, посту́, и покло́номъ, и моли́твѣ, ми́лостыни, и смире́нію, и братолю́бію, и про́чимъ добродѣ́телемъ, и посты́ узако́ниша два́: пе́рвый се́й святы́я 40-цы, другíй по 50-цѣ, апо́стольскій. Послѣди́ же святíи отцы́ уста́виша и и́на два́ поста́: и́же предъ Рождество́мъ Христо́вымъ и по́стъ Успе́нія Пресвяты́я Богоро́дицы. И повелѣ́ша че́стно держа́ти и́хъ, постя́щися отъ всѣ́хъ зо́лъ удаля́тися, и отъ грѣхо́въ очища́тися, смире́ніемъ и ми́лостынею наслѣ́дити Ца́рство небе́сное. Глаго́летъ бо Писа́ніе, по́стъ, и моли́тва, и ми́лостыня избавля́ютъ человѣ́ка отъ сме́рти. По́стъ у́бо и ми́лостыня — двѣ́ вели́цѣ крилѣ́, и́миже не то́кмо до небесе́ вознести́ся человѣ́къ мо́жетъ, но и до престо́ла Бо́жія. Дави́дъ у́бо ца́рь дво́е зло́ сотвори́: убíйство и прелюбодѣ́йство; егда́ же обличе́нъ бы́сть о грѣсѣ́ то́мъ, покая́ніе и по́стъ воспрія́тъ, сле́зы мно́ги излива́ше и ми́лостыню безчи́сленну дая́ше, и тогда́ ви́дѣвъ Бо́гъ чи́стое покая́ніе его́, и сокруше́ніе се́рдца, и моли́твы, и ми́лостыню, и ина́я до́брая его́ дѣ́ла, и отпусти́ ему́ грѣхи́ тѣ́, и во проро́цѣхъ причте́нъ бы́сть. Та́ко же и Даніи́лъ проро́къ, егда́ повелѣ́ніемъ царе́вымъ вве́рженъ бы́сть въ ро́въ ко звѣре́мъ, да снѣдя́тъ и́, о́нъ же посто́мъ и моли́твою звѣ́ри укроти́, и самаго́ царя́ посту́, и моли́твѣ, и смире́нію, и вся́кія добродѣ́тели научи́. И тріе́ о́троцы въ Вавило́нѣ отъ Навуходоносо́ра царя́ вве́ржени бы́ша въ пе́щь, огне́мъ горя́щу, посто́мъ и моли́твою о́гнь угаси́ша. Пости́вся Моисе́й, и моли́твѣ прилѣжа́въ, съ Бо́гомъ бесѣ́дова. Пости́ся Іису́съ На́ввинъ, моли́твою и моле́ніемъ иноплеме́нники побѣди́, и со́лнце уста́ви отъ тече́нія своего́. Пости́вся Илія́, моли́твою о́гнь съ небесе́ сведе́ и сы́на вдови́ча воскреси́, и па́ки моли́твою до́ждь съ небесе́ сведе́, и на колесни́цѣ о́гненнѣй взя́тъ бы́сть на́ небо, и ми́лоть свою́ Елисе́ови све́рже. Пости́вся Елисе́й, моли́твою Іорда́нъ по́ суху пре́йде, и го́рькія во́ды въ сла́дость преложи́, и сы́на госпожи́ до́му воскреси́. Поще́ніемъ ниневи́тяне Бо́жій гнѣ́въ на ми́лость преложи́ша. Пости́вся Иса́ія, сподо́бися Бо́га ви́дѣти, херуви́мы обстои́ма. Анна постя́щися и моля́щися Бо́гу, и дарова́ е́й Госпо́дь пло́дъ, роди́ Саму́ила проро́ка. Пости́вся Сампсо́нъ, иноплеме́нники побѣжда́ше мно́ги, моли́твою же отъ о́слія че́люсти сухíя водѣ́ истещи́ сотвори́. Іоаки́мъ и Анна постя́щеся и моля́щеся Бо́гу де́нь и но́щь, прія́ста благовѣ́стіе отъ а́нгела о зача́тіи Святы́я Дѣ́вы Марíи. Та́кожде и въ но́вѣй благода́ти, мно́зи преподо́бніи и пра́ведніи поще́ніемъ, и моли́твами, и ми́лостынею бы́ша свя́ти, и мно́га чудеса́ сотвори́ша, и́хъ же невозмо́жно исписа́ти всѣ́хъ. Посто́мъ вся́ до́брая соверша́ются. Посто́мъ у́бо тѣ́ло очища́ется, моли́твою же и ми́лостынею грѣси́ очища́ются, смире́ніемъ душа́ украша́ется. Наипа́че же всего́ лю́битъ Бо́гъ покая́ніе отъ человѣ́къ, и а́нгели на́ небесѣхъ ра́дуются о еди́нѣмъ грѣ́шницѣ, ка́ющемся на земли́. Мы́ же, бра́тіе, сестры́ и ча́да, послу́шавше си́хъ слове́съ, потщи́мся чи́сто честны́й по́стъ проводи́ти, со вся́цѣмъ воздержа́ніемъ, съ покло́ны, и съ моли́твами, и съ до́брыми дѣ́лы. Честны́й бо по́стъ святíи отцы́ уста́виша на́мъ отъ апо́столъ, научи́вшеся о не́мъ сло́вомъ, вѣ́рнымъ всѣ́мъ на подвиза́ніе, а неслы́шавшимъ на послуша́ніе и на воздержа́ніе, да не вни́дутъ въ невѣ́жьство, не слы́шавше писа́нія о постѣ́, а услы́шавше словеса́ сія́, да подви́гнутся на воздержа́ніе, и на труды́, и на покая́ніе, и на моли́твы, и на покло́ны, на ми́лостыню, и на кро́тость, и на смире́ніе, и на вся́кая до́брая дѣ́ла. Нѣ́сть бо забы́ти добро́ты дне́й тѣ́хъ: егда́ бо пріи́дутъ днíе торже́ственніи, и прохла́дніи, тогда́ вси́ чревоуго́дницы и пія́ницы возра́дуются, а егда́ пріи́детъ по́стъ, тогда́ оскорбѣ́ютъ, дря́хли и уны́ли бу́дутъ. Благоразу́мніи же лю́діе, по́стницы и возде́ржницы возра́дуются тогда́ и возвеселя́тся духо́вно. Егда́ же пости́шися, то нелицемѣ́рно пости́ся, не бу́ди явля́яся предъ человѣ́ки, но предъ Бо́гомъ, я́ко же Госпо́дь рече́: егда́ мо́лишися, то затвори́ две́рь свою́, и помоли́ся Бо́гу въ та́йнѣ, Госпо́дь же возда́стъ тебѣ́ я́вѣ, и отжене́тъ отъ тебе́ вся́ ско́рби и печа́ли твоя́, и злíи супоста́ти не мо́гутъ прибли́житися къ тебѣ́. Егда́ же хо́щеши ми́лостыню твори́ти, да́ждь ю́ неви́димо, да не бу́деши возненави́дѣнъ отъ Бо́га, я́коже фарисе́й. Аще пости́шися, то не отъ еди́наго хлѣ́ба пости́ся, но и отъ пія́нства, и о́тъ гнѣва, и я́рости, и велича́нія, и осужде́нія, и за́висти, и отъ вся́кія непра́вды, и отъ вся́кія вражды́, и отъ всѣ́хъ плотьски́хъ похоте́й, да и́стинный по́стникъ яви́шися. Мно́зи бо человѣ́цы въ постѣ́ то́кмо пе́рвую недѣ́лю почита́ютъ, а про́чія за сла́бость и лѣ́ность небрегу́тъ. О, бра́тіе, вси́ су́ть дни́ че́стны, и до Воскресе́нія Христо́ва. Аще бо кто́ дѣ́лаетъ хра́мину или́ и́но что́, то не до́брѣ ли украша́етъ ю́ лѣ́потою? Аще ли нае́мникъ не до́брѣ сотвори́тъ, то не то́кмо мзды́ лише́нъ бу́детъ, но и хулу́ пріи́метъ. Аще ли же наче́нъ и до́брѣ устро́итъ ю́ лѣ́потою до конца́, то не то́кмо мзду́ воспріи́метъ, но и похвалу́ ве́лію. Та́ко же и о постѣ́, а́ще постя́ся и до конца́ соверши́ши и́, то ду́шу свою́ очи́стиши отъ грѣ́хъ и съ пра́ведными на Воскресе́ніе Госпо́дне возра́дуешися. Аще ли же не соверши́ши поста́ до конца́, лѣ́ности ра́ди своея́, то не то́кмо погуби́ши тру́дъ сво́й, и ничто́же успѣ́еши на отпуще́ніе грѣхо́мъ, но и бѣ́си пора́дуются о тебѣ́, глаго́люще: «на́шъ еси́, а не Бо́жій»; а храни́тель тво́й а́нгелъ скорби́тъ о нерадѣ́ніи твое́мъ. Того́ ра́ди, а́ще хо́щеши бы́ти Бо́жій человѣ́къ, то сотвори́ по́стъ и соверши́ его́ ве́сь до конца́, до Воскресе́нія Христо́ва: мно́зи бо лѣ́ностію погубля́ютъ мзду́ свою́, послѣ́дующе бѣсо́мъ, а не богоно́снымъ отце́мъ, и́же повелѣ́ша на́мъ пости́тися отъ пи́щи, и отъ питія́, и отъ злы́хъ дѣ́лъ. И Вели́кую суббо́ту приложи́ша къ по́стнымъ дне́мъ того́ ра́ди, я́ко Госпо́дь на́шъ Іису́съ Христо́съ въ то́й де́нь во́ гробѣ бы́сть; Богоро́дица же со апо́столы и со всѣ́ми вѣ́рными въ вели́цѣй ско́рби и печа́ли въ де́нь то́й бы́ша; жи́дове же ра́довахуся, глаго́люще: «се́ Наслѣ́дника на́шего уби́хомъ, глаго́лемаго Іису́са, да бу́детъ на́ше наслѣ́дствіе», и того́ ра́ди идя́ху я́сти и пи́ти веселя́щеся. Зау́тра же воскре́се Госпо́дь на́шъ Іису́съ Христо́съ. Слы́шавше же жи́дове Христа́ воскре́сша, оскорбѣ́ша вельми́, и обрати́ся худа́я и́хъ и ма́лая ра́дость на вели́кую и́мъ ско́рбь, и печа́ль, и на муче́ніе въ безконе́чныя вѣ́ки; Богоро́дицѣ же со апо́столы и со всѣ́ми вѣ́рными, ма́лая та́ ско́рбь премѣни́ся въ вели́кую ра́дость, е́й же нѣ́сть конца́. Слы́шавше же, бра́тіе, о постѣ́, потщи́мся че́стно проводи́ти по́стъ вся́ недѣ́ли ра́вно, я́ко пе́рвую недѣ́лю, та́ко же и послѣ́днюю, и до Свѣ́тлаго Воскресе́нія Христо́ва, со вся́цѣмъ воздержа́ніемъ отъ вся́каго зла́, съ чистото́ю душе́вною, и тѣле́сною, и со смире́ніемъ, причасти́вшеся Тѣ́лу и Кро́ви Христо́вѣ, а не объяде́ніемъ, ни пія́нствомъ, да бу́дете и́стинніи по́стницы и правовѣ́рніи христіа́не нарече́теся. Воскресе́ніе же Христо́во и всю́ Святу́ю недѣ́лю пра́зднуйте че́стно, дру́гъ дру́га цѣлу́юще, и веселя́щеся, и свѣ́тло торжеству́юще духо́вно, а не объяде́ніемъ, ни пія́нствомъ, ни пляса́ніемъ, ни игра́ми бѣсо́вскими, ни плотьски́ми похотьми́, но пѣ́ніи и пѣ́сньми духо́вными. Вѣ́рныхъ бо це́рковь пріе́млетъ чи́сто входя́щихъ; не пріе́млетъ же скверня́щихъ тѣлеса́ своя́ блудо́мъ, и объяде́ніемъ, и пія́нствомъ. Егда́ у́бо воскре́се Христо́съ отъ ме́ртвыхъ, тогда́ возра́довася вся́ тва́рь, ликовству́ющи Воскресе́нія ра́ди Христо́ва. Того́ ра́ди, бра́тіе, до́лжни есмы́ всю́ Святу́ю недѣ́лю почита́ти, я́ко еди́нъ де́нь, и прославля́ти Го́спода, воста́вшаго отъ ме́ртвыхъ, и торжествова́ти духо́вно о Воскресе́ніи Его́. То́й бо, бра́тіе, не́бо и зе́млю сотвори́, и человѣ́ка отъ земли́ созда́, и ду́шу отъ Своего́ животворя́щаго дохнове́нія въ о́нь вдохну́, и всю́ тва́рь ви́димую и неви́димую сло́вомъ сотвори́. И зе́млю на вода́хъ основа́ и утверди́, и небеса́ та́кожде сло́вомъ сотвори́. Тому́ арха́нгели, а́нгели, херуви́ми и серафи́ми, престо́ли и госпо́дьствія, со́лнце и луна́, и звѣ́зды небе́сныя, мо́ре и рѣ́ки, и исто́чницы, го́ры и хо́лми, и древа́ плодоно́сная, вѣ́три и о́блацы, до́ждь и гра́дъ, снѣ́зи и сла́ны, пти́цы и звѣ́ріе, ско́ти и га́ди, и вся́ тва́рь повину́ется, и я́ко Бо́га и Творца́ своего́ боя́тся и трепе́щутъ, и слу́жатъ безпреста́ни человѣ́чу естеству́, не преступа́юще повелѣ́нія Бо́жія. Земля́ даю́щи плоды́ своя́ на пи́щу человѣ́комъ, звѣре́мъ же и пти́цамъ, ското́мъ и вся́кому дыха́нію земно́му. Со́лнце, просвѣща́я всю́ вселе́нную и огрѣва́я, восходя́ и заходя́, не преступа́етъ повелѣ́нія Бо́жія, рабо́тая человѣ́комъ. То́кмо мы́, человѣ́цы, не бои́мся Творца́ своего́ и за́повѣди Его́ не соблюда́емъ, но всегда́ согрѣша́емъ и съ пути́ и́стиннаго совраща́емся, веду́щаго ны́ въ Ца́рство небе́сное, и въ пи́щу ра́йскую, и въ жи́знь вѣ́чную. Пути́ же поги́бельнаго держи́мся, веду́щаго на́съ въ му́ку вѣ́чную, и во тму́ кромѣ́шнюю, и во о́гнь неугаси́мый, и въ че́рвь неусыпа́емый. Никто́ же бо на́съ та́мо влече́тъ, но са́ми по своему́ произволе́нію и́демъ, Бо́га не боя́щеся, а діа́волю во́лю творя́ще. Са́мъ бо рече́ Госпо́дь: «О, несмы́сленніи человѣ́цы, слы́шите и разумѣ́йте, Азъ ва́съ ра́ди свѣ́тъ сотвори́хъ, небеса́ простро́хъ, мо́ре песко́мъ огради́хъ. Ва́съ ра́ди зе́млю, езе́ра, и рѣ́ки, и исто́чники сотвори́хъ. Со́лнце на просвѣще́ніе дне́ви, луну́ же на просвѣще́ніе но́щи устро́ихъ и не́бо звѣзда́ми украси́хъ. Ва́съ ра́ди вся́ко дре́во на земли́ насади́хъ и траву́ прорасти́хъ». О, бра́тіе, зри́те, ка́ко милосе́рдуя Госпо́дь о на́съ и не хотя́ ви́дѣти созда́нія Своего́ порабоще́на дія́воломъ, уста́ви на́мъ святы́я посты́ на очище́ніе душа́мъ и тѣлесе́мъ на́шимъ, и на прогна́ніе зло́бамъ. Мы́ же, бра́тіе, лѣни́ви, и сла́би, и не́мощни, и тя́жцы, и не благоуго́дни на по́стъ, и на моли́твы, и на вся́кая до́брая дѣ́ла, и́миже душа́ спаса́ется; на зла́я же дѣ́ла крѣ́пцы и мо́щни, си́льни и бо́дри, и легча́е пера́ себе́ творя́ще. А Бо́жія, и святы́хъ апо́столъ, и святы́хъ оте́цъ за́повѣди тя́жки твори́мъ па́че всѣ́хъ дѣ́лъ. Но нѣ́сть ничто́же тя́жко въ за́повѣдехъ Бо́жіихъ, но то́кмо учи́тельно и души́ спаси́тельно. Са́мъ бо Госпо́дь глаго́летъ: и́го бо Мое́ бла́го и бре́мя Мое́ легко́ е́сть. То тя́жко ли сохрани́ти за́повѣди Бо́жія, я́же су́ть сія́: покая́ніе, по́стъ, чистота́, покло́ны, алка́ніе, воздержа́ніе отъ всего́ зла́, ми́лость, покоре́ніе, любы́, смире́ніе, кро́тость, тре́звость, братолю́біе, больны́хъ посѣще́ніе, къ темни́цамъ хожде́ніе, всегда́ Боже́ственныхъ слове́съ слу́шаніе; е́же не оклевета́ти никого́же, не оболга́ти, не враждова́ти, не рѣзои́мствовати, блуда́ не твори́ти, не горди́тися, къ це́ркви Бо́жіи приходи́ти, и моли́тися Бо́гу со слеза́ми, и и́на мно́га до́брая дѣла́. Си́ми бо дѣ́лы Бо́га умо́лимъ, и діа́вола дале́че отъ себе́ прожене́мъ, и Ца́рствіе небе́сное наслѣ́димъ. Па́губная же, и Бо́гомъ ненави́дима, и святы́ми кни́гами прокля́тая дѣла́ су́ть сія́: лжа́, клевета́, сва́ръ, бо́й, велича́ніе, го́рдость, немилосе́рдіе, за́висть, братоненавидѣ́ніе, зло́ба, оби́да, гнѣ́въ, возноше́ніе, лицемѣ́ріе, непокоре́ніе, преслуша́ніе, мздои́мство, хула́, осужде́ніе, пія́нство, объяде́ніе, прелюбодѣ́йство, грабле́ніе, татьба́, непослуша́ніе за́повѣдей Бо́жіихъ, разбо́й, чародѣ́йство, нау́зы ноше́ніе, кощу́ны, пѣ́сни бѣсо́вскія, бу́бны, сопѣ́ли, гу́сли, пляса́ніе, и игра́ніе неподо́бное, и руса́ліи, — сія́ вся́ уго́дія діа́волу. Да се́ слы́шавше, бра́тіе, сы́нове и дще́ри, подви́гнемся на до́брая дѣ́ла, а зла́я вся́ оста́вимъ и бѣ́гаемъ и́хъ. По́стныя же дни́ ра́достію духо́вною прово́димъ съ чистото́ю, стра́хъ Бо́жій иму́ще въ сердца́хъ свои́хъ, и за́повѣди Бо́жія соблюда́юще, со вся́кимъ смире́ніемъ и добродѣ́телію, съ моли́твами и покая́ніемъ, да чи́сти и непоро́чни Тѣ́ло и Кро́вь Христо́ву отъ іере́овъ воспріи́мемъ, на освяще́ніе душа́мъ и тѣлесе́мъ на́шимъ, и на оставле́ніе грѣхо́въ, и бу́демъ це́рковь Бо́га Жива́го. Бо́гу на́шему сла́ва, ны́нѣ и при́сно, и во́ вѣки вѣко́мъ, ами́нь.