Отвѣ́тъ. Рече́ Госпо́дь къ Моисе́ю: «а́ще въ повелѣ́ніихъ Мои́хъ хо́дите, и за́повѣди Моя́ снабди́те, и сотворите́ я́. Да́мъ до́ждь ва́мъ во́ время свое́, и земля́ да́стъ жи́та своя́, и древа́ польска́я дадя́тъ пло́дъ сво́й, и возрасту́тъ. И пости́гнетъ млаче́ніе жи́тъ въ има́ніе ви́нное, и има́ніе вина́ пости́гнетъ въ сѣ́ятву, и я́сте хлѣ́бъ ва́шъ въ сы́тость, и всели́теся тве́рдо на земли́ ва́шей. И да́мъ ми́ръ въ земли́ ва́шей, и у́снете, и не бу́детъ устраша́яй ва́съ, и погублю́ звѣ́ри лю́тыя отъ земли́ ва́шея, и ра́ть не про́йдетъ сквозѣ́ зе́млю ва́шу, и пожене́те враги́ ва́ша, и паду́тъ подъ нога́ма ва́шима, и сме́ртію у́мрутъ. И пожене́те пя́ть ва́съ сто́, а сто́ ва́съ пожене́те тму́, и паду́тъ врази́ ва́ши предъ ва́ми мече́мъ. И призрю́ на вы́, и благословлю́ ва́съ, и возращу́ вы́, и умно́жу ва́съ. И поста́влю завѣ́тъ Мо́й съ ва́ми, и снѣ́сте ве́тхая, и ве́тхая ве́тхихъ, и ве́тхая отъ лица́ но́выхъ испраздните́. И поста́влю завѣ́тъ Мо́й въ ва́съ, и не возгнуша́ется душа́ Моя́ ва́ми. И похожу́ въ ва́съ, и бу́ду ва́мъ Бо́гъ, и вы́ бу́дете Мнѣ́ лю́діе. Аще ли же не послу́шаете Мене́, ни сотворите́ повелѣ́ній Мои́хъ си́хъ, ни покори́теся и́мъ, и суде́бъ Мои́хъ вознегоду́етъ душа́ ва́ша, я́ко же не сотвори́ти ва́мъ всѣ́хъ за́повѣдей Мои́хъ, и я́ко разори́ти завѣ́тъ Мо́й, и Азъ сотворю́ си́це ва́мъ: наведу́ на вы́ ску́дость, и ра́ны, и кра́сты врежда́ющія о́чи ва́ша, и суша́щія ду́ши ва́ша. И сѣ́яти бу́дете вотще́ сѣ́мена ва́ша, изъядя́тъ бо и́хъ супоста́ти ва́ша. И отвращу́ лице́ Мое́ отъ ва́съ, и паде́те предъ враги́ ва́шими, и пожену́тъ вы́ ненави́дящіи ва́съ, и побѣ́гнете ники́мъ же гони́ми. Да а́ще и отъ сего́ не послу́шаете Мене́, то приложу́ на вы́ ка́зни мно́ги за беззако́нія ва́ша, и сокрушу́ досажде́ніе горды́ни ва́шея, и положу́ не́бо ва́мъ, а́ки желѣ́зно, и зе́млю ва́шу, а́ки мѣ́дяну. И бу́дутъ вотще́ труды́ ва́ша, и не да́стъ земля́ ва́ша сѣ́мене сѣ́яннаго ва́ми, и древа́ се́льная не даду́тъ плодо́въ свои́хъ. Аще же и посе́мъ соблудите́ на страны́, и не восхо́щете послу́шати Мене́, приложу́ ва́мъ я́звъ се́дмь по грѣхо́мъ ва́шимъ, и послю́ на ва́съ звѣ́ри лю́тыя земны́я, и изъядя́тъ ва́съ, и потребя́тъ скоты́ ва́ша, и ума́лены сотворю́ ва́съ, и пути́ ва́ша запустѣ́ютъ. Аще же и си́мъ ненака́жетеся, но по́йдете ко Мнѣ́ страно́ю, и Азъ къ ва́мъ пойду́ въ я́рости страно́ю, и поражу́ вы́ и Азъ седми́жды грѣ́хъ ра́ди ва́шихъ. И наведу́ на вы́ ме́чь, отмща́ющь суда́ завѣ́тнаго, и побѣ́гнете въ гра́ды ва́ша, и послю́ на вы́ сме́рть, и впаде́те въ ру́цѣ вра́гъ ва́шихъ. И снѣ́сте пло́ти сыно́въ ва́шихъ и дще́рей, и положу́ пу́сты гра́ды ва́ша, и разсы́плю свята́я ва́ша, и не обоня́ю вони́ тре́бъ ва́шихъ, и сотворю́ пу́сту зе́млю ва́шу, и почудя́тся о ва́съ врази́ ва́ши, и разсѣ́ю вы́ во страны́, и погуби́тъ вы́ находя́й ме́чь». Бо́гу на́шему сла́ва.