Уны́ніе отве́ржемъ, бра́тіе, преполови́вше святы́я дни́ честна́го поста́, и на про́чія ра́достно спѣ́емъ. Того́ бо ра́ди усмотри́вше святíи отцы́, въ преполове́ніе свята́го честна́го и Вели́каго поста́, Кре́стъ Госпо́день предложи́ша на поклоне́ніе. Ему́же припаде́мъ и поклони́мся вси́, гнѣ́ва, и за́висти, и клеветы́, и осужде́нія, и вся́кія зло́бы удали́вшеся и, очи́стивше душа́ и тѣлеса́ покая́німъ и ми́лостынею, и та́ко да поклони́мся и цѣлу́емъ, вѣ́рніи, ра́достно Честны́й Кре́стъ, сла́вяще на не́мъ пригвожде́ннаго пло́тію Христа́ Бо́га, и ча́юще не по мно́зѣ вхо́да во Іеросали́мъ во́лею на стра́сть Го́спода на́шего Іису́са Христа́, погребе́нія и Воскресе́нія. И не стужа́емъ си́ о по́стномъ по́двизѣ, подо́бящеся свято́му Госпо́дню смире́нію и любви́. Са́мъ бо Христо́съ смири́ся на́съ ра́ди и бы́сть человѣ́къ, и вся́ добродѣ́тели на́мъ Собо́ю прообразова́. Четы́редесять днíй пости́ся, на́мъ по́стъ прообразова́: поно́съ же, и уко́ръ, и распя́тіе, и сме́рть воспрія́тъ, и вся́ Творе́цъ претерпѣ́ на́шего ра́ди спасе́нія. Тѣ́мъ же и мы́, возлю́бленніи, потщи́мся подо́бни Ему́ обрѣсти́ся, посто́мъ, и моли́твами, и ми́лостынею, и смире́ніемъ, и любо́вію. А не рцы́ никто́ же: «ка́ко пости́тися начну́, погу́бль недѣ́лю или́ двѣ́ въ лѣ́ности?» О, бра́тіе, не вѣща́йте та́ко, мно́ги бо су́ть оби́тели на́ небеси, кому́ждо проти́ву дѣ́ломъ угото́ваны, то́чію нелѣ́ностно потщи́мся пости́гнути первонача́льнѣйшихъ, сугу́бо дѣ́ло пріе́млюще, а́лчбою и жа́ждею, и поклоне́ніемъ. Бо́гъ бо послѣ́дняго пріе́млетъ досто́йнѣ ка́ющася, я́коже и пе́рваго. Аще бо ны́нѣ въ сія́ дни́ по́стныя не покае́мся, и а́ще кого́ на́съ сме́рть пости́гнетъ, то лу́чше бы тому́ не роди́тися, не́жели въ зло́бѣ бы́ти. Потщи́мся, бра́тіе, и́стинно пока́ятися, се́ бо Са́мъ Госпо́дь Бо́гъ на́шъ зове́тъ на́съ на пресвѣ́тлую ра́дость, по́стникомъ же подае́тъ нетлѣ́нныя вѣнцы́. Да не мо́жемъ, бра́тіе, са́ми себе́ лиши́ти небе́сныя ра́дости, ея́же наслѣ́дятъ до́брая дѣ́ла творя́щіи. За зла́я же дѣ́ла на́ша, я́же въ ма́лѣ на́съ наслажда́ютъ, а во́ вѣки му́чити ны́ и́мутъ. Рече́ бо Госпо́дь Бо́гъ на́шъ: блюди́теся, да не отягча́ютъ сердца́ ва́ша объяде́ніемъ, и пія́нствомъ, и печа́льми жите́йскими. Святíи отцы́ то́же вопію́тъ. Аще ли еси́ сва́дникъ бы́лъ, то дне́сь миротво́рецъ бу́ди. Аще ли еси́ пія́ница бы́лъ, то дне́сь яви́ся по́стникъ крѣ́покъ. Аще ли еси́ тѣ́лу уго́дникъ бы́лъ, то дне́сь яви́ся просвѣти́тель души́; а не сло́вомъ то́кмо христіа́не бу́демъ, да не на на́съ бу́детъ рече́нное: лю́діе сíи устна́ми Мя́ чту́тъ, се́рдце же и́хъ дале́че отстои́тъ отъ Мене́. Аще у́бо отъ земны́хъ вла́стелей каково́ сло́во, или́ гра́мота пріи́детъ, то вси́ слу́шаютъ и сотворя́тъ ско́ро повелѣ́ніе и́хъ, а Бо́гу по вся́ дни́ и по вся́ часы́ зову́щу ны́, проро́ки же и апо́столы, и святи́тели, и му́ченики, и святы́ми отцы́, но никто́ же творя́й во́лю Его́. Поспѣва́емъ, вѣ́рніи, на про́чія дни́ ра́достно; а́ще ли и досе́лѣ проидо́хомъ въ небреже́ніи, поне́ отсе́лѣ до́брѣ сконча́емъ, и что́ бу́демъ во все́ лѣ́то согрѣши́ли, а́ще и́стинно пріи́мемъ покая́ніе, вся́ отпу́ститъ на́мъ Госпо́дь. Что́ бо тя́гости мольбы́ твори́ти къ Бо́гу? Творя́ще же не имѣ́йте зло́бы и гнѣ́ва, да не вотще́ бу́детъ тру́дъ ва́шъ. А егда́ въ це́ркви пою́тъ, не бесѣ́дуйте пусто́шныхъ слове́съ, да не погуби́те мзды́ своея́, и не суди́те чужи́хъ грѣхо́въ, то́ бо непрія́зни весе́ліе е́сть, но вся́къ пеки́ся о свои́хъ согрѣше́ніихъ, ко́ждо бо са́мъ о себѣ́ отвѣща́етъ и пріи́метъ по дѣ́ломъ свои́мъ. Аще бо предъ земны́ми вла́стели стоя́, никто́ же смѣ́етъ бесѣ́довати, но съ боя́знію стои́мъ, таковы́мъ же человѣ́комъ че́сть воздаю́ще, бои́мся и́хъ, то не па́че ли подоба́етъ че́сть возда́ти Бо́гови, и боя́тися Его́, и дѣ́яти пра́вду, То́й бо владѣ́етъ душа́ми и тѣлесы́ на́шими: мертви́тъ и живи́тъ, убо́житъ и богати́тъ, смиря́етъ и вы́ситъ. Мно́ю бо, рече́, ца́ріе ца́рствуютъ и си́льніи держа́тъ вла́сти. Мно́ю бога́тство и сла́ва. Азъ, рече́, чту́щія Мя́ почту́. Того́ убои́мся, бра́тіе, и съ чи́стою со́вѣстію пріи́мемъ Тѣ́ло и Кро́вь Христо́ву, вражду́ и гнѣ́въ попра́вше, за́висть и осужде́ніе отве́ргше, и вся́ зла́я дѣя́нія. Яко же бо тѣ́ло не пріе́мля хлѣ́ба, не мо́жетъ жи́во бы́ти, та́ко и душа́, а́ще не причаща́ется, мертва́ е́сть. О се́мъ и Христо́съ глаго́летъ: не о хлѣ́бѣ еди́номъ жи́въ бу́детъ человѣ́къ. Люби́міи, дади́те душе́вная бра́шна души́, а тѣле́сная тѣлеси́. Сія́ бо трапе́за душе́вная, жи́лы су́ть и соу́зы со́вѣсти на́шея. Того́ бо ра́ди діа́волъ прети́тъ вѣ́рнымъ, да бы́ неча́сто причаща́лися, да бы́ вла́сть свою́ имѣ́лъ на ни́хъ. Люби́міи, ра́дуетъ ми ся се́рдце, ви́дя вѣ́рныхъ, съ жена́ми и съ дѣтьми́, пріе́млющихъ Тѣ́ло и Кро́вь Госпо́дню. Слы́шасте бо Го́спода глаго́люща: яды́й Мою́ Пло́ть, и пія́й Мою́ Кро́вь и́мать живо́тъ вѣ́чный и на су́дъ не пріи́детъ, но пре́йдетъ отъ сме́рти въ живо́тъ. Аще же кто́ прича́стія лише́нъ, то́й и въ це́ркви недосто́инъ стоя́ти. Бо́гу на́шему сла́ва.