Послу́шайте, бра́тіе и люби́мицы, вели́каго архіере́я, глаго́люща: «а́ще кто́ отъ вѣ́рныхъ и боголюби́выхъ, отъ діа́вольскаго науче́нія, или́ отъ своего́ велича́ваго и го́рдаго ума́, впаде́тъ въ сѣ́ти непрія́зненны, ре́кше, во гнѣ́въ и сва́ръ, или́ въ ку́ю вражду́, то да пріи́метъ стра́хъ Бо́жій въ се́рдцы свое́мъ, и умиле́нную покори́вую кро́тость, и да пріи́метъ любо́вь свята́го и блаже́ннаго смире́нія, съ вели́кою любо́вію тща́ся ско́ро и нелицемѣ́рно и нельсти́во. Слы́ши проро́ка, глаго́люща: въ че́мъ тя́ заста́ну, въ то́мъ и сужду́. И и́ндѣ глаго́летъ: со́лнце да не за́йдетъ во́ гнѣвѣ ва́шемъ. Дави́дъ глаго́летъ: гнѣ́вайтеся и не согрѣша́йте, и на ло́жахъ ва́шихъ умили́теся. И па́ки рече́: же́ртва Бо́гу ду́хъ сокруше́нъ, се́рдце сокруше́нно и смире́нно Бо́гъ не уничижи́тъ. Бли́зъ Госпо́дь сокруше́нныхъ се́рдцемъ и смире́нныя ду́хомъ спасе́тъ. И па́ки са́мъ Госпо́дь рече́: ми́ръ Мо́й даю́ ва́мъ. И Па́велъ апо́столъ рече́: ми́ръ ва́мъ бу́ди и любо́вь отъ Бо́га и Отца́, и ми́лость Го́спода на́шего Іису́са Христа́, и прича́стіе Свята́го Ду́ха со всѣ́ми ва́ми. И па́ки рече́ Госпо́дь: о се́мъ позна́ютъ вы́, я́ко Мои́ есте́ ученицы́, а́ще лю́бите враги́ ва́ша, и добро́ творите́ ненави́дящимъ ва́съ, и моли́теся за творя́щія ва́мъ па́кости. И па́ки рече́ Госпо́дь: блаже́ни миротво́рцы, я́ко тíи сы́нове Бо́жіи нареку́тся. И па́ки рече́: блаже́ни кро́тціи, я́ко тíи наслѣ́дятъ зе́млю. Послу́шайте, люби́мицы, Самого́ Го́спода, глаго́люща: «не дади́те ни еди́ному же сло́ву па́сти на́ землю, да не обря́щется я́коже о́ны свинія́ зоба́вше зла́то Госпо́дне». Сíи су́ть жи́дове и еретицы́, не иму́ще до́браго ра́зума, то́го ра́ди нареко́шася сви́ніи, а зла́то — Боже́ственное уче́ніе. На́мъ же, бра́тіе, да не бу́детъ нарица́тися и́менемъ тѣ́мъ, не внима́ющимъ Боже́ственнаго и душеспаси́тельнаго уче́нія, но бу́демъ послушли́ви, и покорли́ви, и кро́тцы, я́коже Па́велъ, и Дави́дъ, и Госпо́дь на́шъ Іису́съ Христо́съ. Па́велъ бо мно́ги прія́тъ ра́ны и досажде́нія отъ всѣ́хъ язы́къ, но съ любо́вію вся́ терпя́ше. Та́ко же и Дави́дъ мно́ги бѣды́ прія́тъ отъ иноплеме́нникъ и отъ сосѣ́дъ свои́хъ. И Са́мъ Госпо́дь на́шъ Іису́съ Христо́съ прія́тъ стра́сть и сме́рть отъ Свои́хъ ра́бъ, и не воздаде́ зла́ за зло́, но вся́ терпя́ше спасе́нія на́шего ра́ди. А мы́, грѣ́шніи, не мо́жемъ ни ма́лы вины́ претерпѣ́ти своего́ ра́ди спасе́нія. Того́ ра́ди молю́ вы́, бра́тіе, расто́ргнемъ сѣ́ти непрія́зненныя, я́же су́ть: гнѣ́въ, сва́ръ, бо́й, клевета́, за́висть, вражда́, прекосло́віе, злопомнѣ́ніе, непокоре́ніе, не смире́ніе, и про́чая зло́бы. Тѣ́хъ бо ра́ди зло́бъ моли́твы на́ша непрія́тны су́ть Бо́гу, но па́че Бо́га гнѣви́мъ и му́ки вѣ́чныя гото́вимъ. Но притеце́мъ ско́ро на смире́ніе, смире́нія бо жела́ющіи сы́нове Бо́жіи нареко́шася. Та́ко же и человѣ́цы смире́нія ра́ди мно́гажды и со а́нгелы я́вѣ бесѣ́доваху. Пе́рвіи у́бо человѣ́цы ле́стію діа́волею прельсти́шася, и отступи́ша о́тъ Бога, и нача́ша служи́ти бѣсо́мъ, и бы́ша въ ни́хъ сва́ры, и кото́ры мно́зи. Ангели же Бо́жіи ви́дѣвше сатанину́ пре́лесть и зло́бы человѣ́ческія, держа́ху ра́ть не то́кмо съ бѣ́сы, но и со злы́ми человѣ́ки. Егда́ же ви́дѣ Бо́гъ, я́ко человѣ́цы соврати́шася отъ пути́ и́стиннаго и уклони́шася вси́ на зло́бу, умилосе́рдися Свои́мъ неизрече́ннымъ благоутро́біемъ и ми́лостивымъ се́рдцемъ, обра́щся на смире́ніе къ человѣ́комъ, не то́кмо смы́сломъ, но и дѣ́ломъ: умы́сли посла́ти Всеми́лостивый Единоча́днаго Своего́ Сы́на, Го́спода на́шего Іису́са Христа́, да То́й на́съ ра́ди сни́детъ съ небесе́ и со человѣ́ки поживе́тъ, а діа́вола и слу́гъ его́ побѣди́тъ, и бы́сть та́ко. Того́ ра́ди пе́рвѣе посла́ Бо́гъ проро́ки, проповѣ́дающія сни́тіе Его́ и воплоще́ніе, да́же и до распя́тія и до Воскресе́нія. Ту́ бы́сть попра́ніе бѣсо́мъ, а человѣ́комъ спасе́ніе, и бы́сть ми́ръ на небеси́ и на земли́, а́нгеломъ и человѣ́комъ. Послу́шайте, люби́мицы, каково́ е́сть добро́ ми́ръ межу́ собо́ю имѣ́ти. Аще бо кто́ ми́ръ межу́ собо́ю воздержи́тъ и любо́вь ко вся́кому человѣ́ку, то́й безъ труда́ спасе́тся, и моли́тва его́ прія́тна Бо́гу. Аще же кто́ по́йдетъ къ це́ркви гнѣ́ваяся и не простя́ся, то моли́тва его́ не прія́тна Бо́гу, но то́кмо гнѣви́тъ Бо́га, и на таковы́хъ человѣ́цѣхъ гнѣ́въ Бо́жій и ка́знь за преслуша́ніе Его́ святы́хъ слове́съ быва́етъ. Мы́ же, бра́тіе, возве́рземъ гнѣ́въ сво́й и всю́ вражду́ сатанину́ на сатану́ и на слу́гъ его́, и ми́ръ а́нгельскій воспріи́мемъ, не ме́дляще ни на ма́лъ ча́съ, да бу́детъ на́мъ здѣ́ и въ бу́дущемъ вѣ́цѣ жили́ще со а́нгелы и со всѣ́ми святы́ми веселя́щеся».