Ангелъ Госпо́день сказу́етъ сло́во о́тъ Господа, ко мня́щимся вѣ́рнымъ христіа́номъ, а стра́ха Бо́жія не иму́щимъ, глаго́ля си́це: «го́ре человѣ́ку тому́, и́же гнѣ́въ имѣ́я на кого́-лю́бо, или́ свари́вся, или́ би́вся съ кѣ́мъ, или́ кому́ зло́ сотвори́въ, или́ на кого́ зло́ каково́ въ се́рдцы имѣ́я, а не простя́ся съ ни́мъ, и́детъ въ це́рковь Бо́жію, проти́вяся вѣ́рнымъ и кро́ткимъ человѣ́комъ, и́мъ же наслѣ́довати зе́млю обѣтова́нную обѣща́но и поко́й. Или́ а́ще свѣщу́, или́ просфиру́, или́ и́но ко́е приноше́ніе принесе́тъ, или́ до́ру я́стъ, или́ Ева́нгеліе цѣлу́етъ, сы́й въ зло́бѣ, досто́инъ е́сть таковы́й му́цѣ вѣ́чнѣй, и смолѣ́ при́сно кипя́щей, и огню́ негаси́мому. Го́рше же того́, и вельми́ горѣ́е убíйства, и душегу́бства, и ерети́чества, и вся́каго зла́ злѣ́е, и вся́кія па́губы па́губнѣе, егда́ кто́ приступа́етъ къ Пречи́стому Тѣ́лу и Кро́ви Христо́вѣ, а гнѣ́въ держа́ на кого́, или́ свари́вся, или́ би́вся, или́ кого́ оклевета́лъ, или́ кого́ сва́дилъ съ кѣ́мъ, или́ по́мня зло́ на кого́, то неумоли́мъ су́дъ таковы́й воспріи́метъ и безъ ми́лости му́ку вѣ́чную; лу́чше бы таково́му не роди́тися: го́рши бо жидо́въ и ерети́къ осу́дится, зане́ недосто́йнѣ пріе́млетъ Пречи́стое Тѣ́ло и Кро́вь Госпо́дню. Егда́ бо кто́ приступа́етъ ко Пречи́стому Тѣ́лу и Кро́ви Го́спода на́шего Іису́са Христа́, Сы́на Бо́жія, взе́млющаго грѣхи́ всего́ мíра, и слы́ша глаго́лемая: «Во́нмемъ, Свята́я святы́мъ», — се́ бо рече́но е́сть о причаще́ніи Святы́хъ Та́инъ, ре́кше досто́йнымъ и вѣ́рнымъ человѣ́комъ, — и сы́й недосто́инъ приступа́етъ къ Пречи́стымъ Та́йнамъ Христо́вымъ, тогда́ не́бо, и земля́, и преиспо́дняя вся́ потрясу́тся, и превы́шнія небе́сныя си́лы вся́ вострепе́щутъ, и вся́ мы́сленная во́инства стра́хомъ одержи́ми быва́ютъ, ви́дяще человѣ́ческое естество́, на земли́ вся́ку непра́вду дѣ́ющее». Слы́шасте, люби́міи, а́нгелову по́вѣсть, ска́зану святы́мъ Васи́ліемъ. Слы́шасте ли, ка́ко святíи а́нгели не согрѣ́шше, трепе́щутъ и боя́тся, то ка́ко мы́, грѣ́шніи, убѣжи́мъ вѣ́чныхъ му́къ, толи́ка наказа́нія и уче́нія не слу́шающе, толи́ка стра́ха и боя́зни не ужаса́ющеся? Но се́ ва́мъ бу́ди извѣ́стно сло́во Госпо́дне, е́же рече́: не вся́къ глаго́ляй Ми́: "Го́споди, Го́споди", вни́детъ въ Ца́рство небе́сное, но творя́й во́лю Отца́ Моего́. Се́ же е́сть во́ля Бо́жія, е́же имѣ́ти стра́хъ Его́ въ се́рдцы свое́мъ, и е́же и́мутъ а́нгели Его́, смире́ніе, покоре́ніе, кро́тость, беззло́біе, благоу́міе, трезвѣ́ніе, послуша́ніе, внима́ніе, и про́чая вся́ до́брая дѣ́ла: та́ бо су́ть а́нгельская дѣ́ла. Да а́ще бы́хомъ, бра́тіе, и мы́ такова́я имѣ́ли дѣ́ла, то дале́че бы отбѣ́гли отъ на́съ вѣ́чныя му́ки, и Ца́рство небе́сное не дале́че бы отъ на́съ бы́ло, и со а́нгелы вќпѣ ра́довалися бы́хомъ. А се́ су́ть сатанина́ дѣ́ла и слу́гъ его́: го́рдость, велича́ніе, презо́рство, зло́е непоко́рство и нечи́стое пія́нство, со вся́кою зло́бою, и́хъ же ра́ди сатана́ отпаде́ сла́вы Бо́жія, окая́ннымъ несмы́сльствомъ. Его́же го́рдость и велича́ніе пріи́мше жи́дове, не я́ша вѣ́ры Сы́ну Бо́жію, и му́цѣ вѣ́чнѣй досто́йни бы́ша, со учи́телемъ свои́мъ діа́воломъ, его́же уче́нія на́мъ не бу́ди прія́ти, бра́тіе. Но бу́ди на́мъ прія́ти уче́ніе проро́ческое, и апо́стольское, и оте́ческое, и о то́мъ уче́ніи получи́ти жи́знь вѣ́чную и Ца́рство небе́сное, со всѣ́ми сотво́ршими во́лю Бо́жію и ходи́вшими по за́повѣдемъ Его́, да и мы́, бра́тіе, потщи́мся тому́ уче́нію послѣ́довати.