Пріиди́те ны́нѣ, церко́вная ча́да, да обы́чное ва́мъ сотворю́ поуче́ніе о постѣ́, и о моли́твѣ, и о ми́лостынѣ къ ва́шему собра́нію. Се́ у́бо, люби́міи, бо́льшая ча́сть поста́ премину́ла е́сть. И ко́ждо ва́съ сво́й тру́дъ вѣ́сть, и́мъ же подвиза́лся къ Бо́гу, во́ дни и въ нощи́ свята́го поста́, и ча́етъ воспрія́ти мзду́ о́тъ Бога: безъ по́двига же никто́же вѣнча́ется. Да а́ще, бра́тіе, въ лѣ́ности досе́лѣ пребы́сте, то на про́чія дни́ подви́гнемся, посто́мъ, и моли́твами, и ми́лостынею, да пости́гнемъ испе́рва труди́вшихся посто́мъ. Моли́тва у́бо мно́гое къ Бо́гу присвое́ніе, то́ю бо исправля́ются вся́кія добродѣ́тели. А́ще отъ всего́ се́рдца моли́тву твори́ши, то́ а́ки ѳиміа́мъ къ Бо́гу восхо́дитъ. Рече́ бо Дави́дъ проро́къ: да ся́ испра́витъ моли́тва моя́, я́ко кади́ло предъ Тобо́ю. А́ще не сотвори́ши моли́твѣ крила́, то не возлѣти́тъ къ Бо́гу. Крилѣ́ же су́ть моли́твѣ — по́стъ и ми́лостыня. По́стъ же не то́кмо воздержа́ніе отъ бра́шна, но отста́тіе всѣ́хъ злы́хъ дѣ́лъ и разрѣше́ніе вся́кому соу́зу непра́вды. Оста́ви бли́жнему зло́, не въ судѣ́хъ бо, ни въ сва́рѣхъ пости́теся, глаго́летъ Госпо́дь. Аще не я́си мя́съ, оста́нися и питія́, и отъ сва́ра, и гнѣ́ва. Вече́рю ли оста́вилъ еси́? Но до по́зда сѣди́ши всѣ́хъ осужда́я и неподо́бная глаго́ля. Но не сицева́го поста́ избра́хъ Азъ, глаго́летъ Госпо́дь. Ка́я по́льза алка́ти пло́тію, а душ́ею мно́ги зло́бы твори́ти? О, человѣ́че, бу́ди себѣ́ судія́, и свои́мъ дѣ́ломъ, и грѣхо́мъ обличи́тель. Поищи́ себѣ́ о постѣ́ оте́ческаго уста́ва, и бу́ди ему́ дѣ́ломъ соверши́тель. Добра́ по́мощь человѣ́ку алчба́. Аще бы алка́ла о́тъ древа Евва, не бы́хомъ ны́нѣ тре́бовали сего́ поста́. Но елма́ не пости́хомся, испадо́хомъ изъ рая́; ны́нѣ у́бо пости́мся, да къ Нему́ па́ки возврати́мся. По́стъ бо проро́ки си́льны сотворя́етъ. По́стъ зако́ну соверши́тель и души́ храни́тель. По́стъ удержа́тель тѣ́лу и собра́ніе до́брыхъ дѣ́лъ. По́стъ на враги́ непобѣди́мое ору́жіе, и страстоте́рпцемъ крѣ́пость, и бѣсо́мъ отгони́тель. По́стъ — цѣлому́дрію сосу́дъ, іере́омъ — соверши́тель, мни́хомъ — крѣ́пость, и бѣсо́мъ — прогони́тель, святи́телемъ — украше́ніе: нѣ́сть бо мо́щно безъ того́ святы́я слу́жбы соверши́ти. По́стъ моли́тву на́ небо возво́дитъ, а́ки крилѣ́ быва́я е́й къ го́рнему ше́ствію. По́стъ слу́ги въ са́нъ вво́дитъ. По́стъ — здра́вію ма́ти, ю́ности — во́ждь, ста́рости — красота́ и добро́та, пусты́нникомъ — по́мощь. Му́жъ, ви́дя жену́ постя́щуся, и са́мъ до́брѣ храни́тъ, а жена́, ви́дящи му́жа постя́щася, и та́ ему́ уподо́бится. Никто́ же до́мъ сво́й оскуди́, ча́сто постя́ся: а́лчбою упраздни́шася по́варове и ножи́, а трапе́за домо́вная не оскудѣ́етъ ча́сто постя́щагося, и дѣ́ти его́ не порабо́таютъ тре́бованіемъ бра́шенъ. Ми́лостынями и вѣ́рою очища́ются грѣси́; моли́твами же и посто́мъ отъ зла́ избавля́емся. Ели́ко бо алчбо́ю умерщвля́еши пло́ть, толи́ко ду́шу къ Бо́гу си́льну твори́ши. Тѣ́мъ же потщи́теся, бра́тіе, по́стное тече́ніе соверши́ти добродѣ́тельно. Вѣ́си у́бо, я́ко призыва́ющіи царя́ или́ кня́зя, че́стнѣ до́мъ сво́й украша́ютъ; а ты́, бра́те, Христа́ пріе́мля въ до́мъ душе́вный причаще́ніемъ святы́мъ, очи́сти тѣ́ло посто́мъ, отреби́ жа́ждею, украси́ смире́ніемъ, да ти́ а́лчутъ ру́цѣ отъ грабле́нія, и слу́ха не пріе́млюща зла́ глаго́ланія. Да ти́ а́лчета уста́ и язы́къ отъ слове́съ сра́мныхъ и бесѣ́дъ неподо́бныхъ, о́чи отъ зрѣ́нія на чужу́ю добро́ту. Аще ся пости́ши, дру́га не осужда́й, со враго́мъ смири́ся, и никому́ же зави́ди. Ка́я по́льза алка́ти, пло́тію умира́я, а дѣла́ зла́я твори́ти? Ка́я по́мощь отъ я́ди воздержа́тися, а на блу́дъ совокупля́тися? Ко́е добротворе́ніе, тѣ́ло свое́ томи́ти, а вдови́цъ и сиро́тъ не ми́ловати? Ко́е бла́го, тѣ́ла своего́ не мы́ти, а изли́шними свои́ми на́га не одѣ́яти? Не тако́го поста́ избра́хъ Азъ, глаго́летъ Госпо́дь, но вся́ оста́вите непра́вды, я́рость, гнѣ́въ, за́висть, клевету́, пія́нство съ про́чими зло́бами, да спасе́теся. Аще кто́ отъ хлѣ́ба удержи́тся, а гнѣ́вается, то́ не человѣ́ческо, но звѣ́рско. Аще кто́ на го́лой земли́ лега́ніе твори́тъ, а зла́ не оста́нется, таковы́й скота́ горши́; не спасе́тъ бо на́съ ско́тское воздержа́ніе, аще не оста́немся непра́вды. Бо́гу на́шему сла́ва, ны́нѣ и при́сно, и во́ вѣки вѣко́мъ. [Ами́нь.]